Ipatpategnaka Unay ni Jehova!

 1. Ania ti kitkitaen ni Jehova kadagiti adipenna?

NI Jehova a Dios ket ‘maragsakan kadagiti tattaona.’ (Sal. 149:4) Anian a nagsayaat dayta a panunoten! Makitkita ni Jehova dagiti nasayaat a kualidadtayo; makitana ti potensialtayo, ken iyas-asidegnatayo kenkuana. No agtalinaedtayo a matalek kenkuana, agtultuloyto a nasinged kadatayo iti agnanayon!​—Juan 6:44.

 2. Apay a marigatan ti dadduma a mamati nga ay-ayaten ida ni Jehova?

² Mabalin nga ibaga ti dadduma, ‘Ammok nga ay-ayaten ni Jehova dagiti adipenna kas grupo, ngem kasano a masiguradok nga ipatpategnak a mismo ni Jehova?’ Apay a mabalin nga isaludsod dayta ti maysa a tao? Kinuna ni Oksana,b nga adda dagiti nasaem a kapadasanna idi ubing pay: “Nakaragragsakak idi nagpabautisarak ken nangrugiak nga agpayunir. Ngem 15 a tawen kalpasanna, nalagipko dagiti nasaem a kapadasak. Impagarupko a napukawkon ti pabor ni Jehova ken saanak a maikari iti ayatna.” Imbaga ti maysa a payunir nga agnagan Yua, a saan a nasayaat ti panagubingna: “Indedikarko ti biagko ken Jehova gapu ta kayatko a paragsaken. Ngem siguradok a dinak pulos maayat.”

 3. Ania ti usigentayo iti daytoy nga artikulo?

³ Kas kadagita a matalek a Kristiano, nauneg ti panagayatmo ken Jehova ngem mabalin a pagduaduaam no ay-ayatennaka. Apay a masapul a kombinsidoka a talaga nga ipatpategnaka? Ken ania ti makatulong kenka no pagduaduaam nga ay-ayatennaka ni Jehova? Usigentayo ti sungbat dagitoy a saludsod.

 4. Apay a delikado nga agduaduatayo iti ayat ni Jehova kadatayo?

⁴ Nabileg ti ayat. No kombinsidotayo nga ay-ayaten ken tultulongannatayo ni Jehova, matignaytayo nga agserbi kenkuana a naimpusuan iti laksid dagiti pakarigatan iti biag. Ngem no agduaduatayo nga ipatpategnatayo ti Dios, ‘agkurangto ti pigsatayo.’ (Prov. 24:10) Ket no maupaytayo ken mapukaw ti pammatitayo iti ayat ti Dios, nalakanatayo a biktimaen ni Satanas.​—Efe. 6:16.

 5. Ania ti napasamak iti dadduma a kakabsat idi pinagduaduaanda ti ayat ti Dios kadakuada?

⁵ Kimmapuy ti espiritualidad ti dadduma a matalek a Kristiano iti tiempotayo gapu iti panagduadua. Kinuna ti panglakayen nga agnagan James: “Uray no agserserbiak iti Bethel ken naragsakak a mangasaba iti ganggannaet ti lengguahena a kongregasion, nagduaduaak no talaga met laeng nga aw-awaten ni Jehova dagiti panagsakripisiok. Naminsan, pinagduaduaak pay ketdi no dengdenggen met laeng ni Jehova dagiti kararagko.” Imbaga ni Eva, nga agserserbi met iti Bethel: “Naduktalak a delikado ti panagduadua iti ayat ni Jehova gapu ta apektaran dayta ti amin nga ar-aramidem iti panagserbim ken Jehova. Maawan ti ganasmo iti naespirituan a bambanag ken ti rag-om nga agserbi ken Jehova.” Imbaga ni Michael, a regular pioneer ken panglakayen: “No saanka a mamati nga ipatpategnaka ti Dios, in-inut nga umadayoka kenkuana.”

 6. Ania ti masapul nga aramidentayo no mapampanunottayo a dinatay ay-ayaten ti Dios?

⁶ Ipakita dagitoy a kapadasan nga agpeggad ti espiritualidadtayo no pagduaduaantayo ti ayat ti Dios kadatayo. Ngem ania ti masapul nga aramidentayo no kasta ti mapampanunottayo? Ikkatentayo a dagus dayta iti isiptayo! Kiddawem ken Jehova a tulongannaka a mangikkat kadagita a ‘mangrirriribuk a pampanunot’ sa suktam iti ‘talna ti Dios a mangartap iti amin a pannakaawat a mangsalaknib iti puso ken isipmo.’ (Sal. 139:23; ftn.; Fil. 4:6, 7) Ken laglagipem a dika agmaymaysa. Lablabanan met dayta ti dadduma a matalek a kakabsat. Napasaran dayta uray dagiti nagkauna nga adipen ni Jehova. Kitaentayo dagiti masursurotayo iti ulidan ni apostol Pablo.

 7. Ania dagiti problema a nakaipasanguan ni Pablo?

⁷ No dadduma, madagdagsenanka kadi gapu iti adu a responsabilidadmo, a kasla saanmo a kaya amin dagita? No wen, maawatam ti kasasaad ni Pablo. Madanagan idi, saan laeng a para iti maysa a kongregasion no di ket para iti “amin a kongregasion.” (2 Cor. 11:23-28) Masansan kadi a nalidayka gapu kadagiti nabayagen a problema iti salun-atmo? Nagsagaba ni apostol Pablo iti di agpatpatingga a “siit ti lasag,” a mabalin a maysa a sakit a kayatna unay a maikkat koman. (2 Cor. 12:7-10) Maup-upayka kadi gapu iti kinaimperpektom? Masansan met idi a marikna dayta ni Pablo. Imbagana nga isu ket ‘kakaasi a tao’ gapu ta kanayon a lablabananna ti kinaimperpektona.​—Roma 7:21-24.

 8. Ania ti nakatulong ken Pablo a mangibtur kadagiti problemana?

⁸ Nupay naipasango ni Pablo iti nadumaduma a pannubok ken makapaupay a kasasaad, intultuloyna latta ti agserbi ken Jehova. Kasano a naaramidna dayta? Ammona nga imperpekto ngem natibker latta ti pammatina iti subbot. Pamiliar iti kari ni Jesus a ti “asinoman a mangipakita iti pammati [ken Jesus] . . . ket maaddaan iti biag nga agnanayon.” (Juan 3:16; Roma 6:23) Sigurado a maysa ni Pablo kadagidiay nangipakita iti pammati iti subbot. Kombinsido a nakasagana a mangpakawan ni Jehova uray kadagidiay nadagsen ti basolda no agbabawida.​—Sal. 86:5.

 9. Ania ti masursurotayo iti imbaga ni Pablo iti Galacia 2:20?

⁹ Mamati met ni Pablo iti bileg ti ayat ti Dios a nayebkas babaen ken Kristo. (Basaen ti Galacia 2:20.) Paliiwem ti makaparegta a sasao iti ngudo dayta a bersikulo. Imbaga ni Pablo: “[Ti] Anak ti Dios a nangayat kaniak ken nangisakripisio iti biagna para kaniak.” Saan a narikna ni Pablo a nakadakdakes isuna nga uray la saanen a maikari iti ayat ti Dios. Dina pinanunot, ‘Maawatak no apay nga ay-ayaten ni Jehova dagiti kakabsatko, ngem dinak la ketdi maayat.’ Impalagip ni Pablo kadagiti taga-Roma: “Natay ni Kristo maipaay kadatayo bayat a managbasoltayo pay laeng.” (Roma 5:8) Awan ti makalapped iti ayat ti Dios kadatayo!

10. Ania ti masursurotayo iti Roma 8:38, 39?

¹⁰ Basaen ti Roma 8:38, 39. Talaga a kombinsido ni Pablo iti bileg ti ayat ti Dios. Insuratna nga awan ti ‘makaisina kadatayo iti ayat ti Dios.’ Ammo ni Pablo nga inan-anusan ni Jehova ti nasion ti Israel. Ammona met a kinaasian isuna ni Jehova. Kastoy ngarud ti kayat nga ibaga ni Pablo, ‘No imbaon ni Jehova ti mismo nga Anakna a matay para kaniak, adda kadi rason a pagduaduaak ti ayatna kaniak?’​—Roma 8:32.

11. Nupay nakaaramid ni Pablo kadagiti basol a kas iti nadakamat iti 1 Timoteo 1:12-15, apay a siguradona nga ay-ayaten isuna ti Dios?

¹¹ Basaen ti 1 Timoteo 1:12-15. Sigurado nga adda dagiti gundaway a nakonsiensia ni Pablo iti napalabasna. Tinukoyna ti bagina kas ti “kangrunaan” a managbasol, ket saan a nakaskasdaaw dayta! Sakbay a naammuanna ti kinapudno, indadanesna dagiti Kristiano iti nadumaduma a siudad, impaibaludna ti dadduma ken pinaboranna ti pannakapapatay ti dadduma. (Ara. 26:10, 11) Ania ngata ti narikna ni Pablo idi maam-ammona ti maysa nga agtutubo a Kristiano nga inaprobaranna ti pannakapapatay dagiti nagannakna? Pinagbabawyan ni Pablo dagiti kamalina, ngem dinan mabaliwan ti napalabas. Inawatna a natay ni Kristo para kenkuana, ket insuratna: “Gapu iti nagpaiduma a kinaimbag ti Dios, maysaak nga apostol.” (1 Cor. 15:3, 10) Ania ti masursurotayo? Akseptarem a natay ni Kristo para kenka tapno maaddaanka iti nasinged a relasion ken Jehova. (Ara. 3:19) Ti napateg iti Dios ket dagiti aramidentayo ita ken iti masanguanan, saan a dagiti kamali a naaramidantayo iti napalabas, maysatayo man a Saksi ni Jehova idin wenno saan pay.​—Isa. 1:18.

12. Kasano a makatulong ti 1 Juan 3:19, 20 no mariknatayo nga awan patpategtayo wenno saantayo a maikari a maayat?

¹² No panunotem a natay ni Jesus tapno maabbongan dagiti basolmo, baka maibagam, ‘Saanak a maikari iti dayta.’ Apay a mabalin a mariknam ti kasta? Mabalin nga allilawennatayo ti imperpekto a pusotayo, ket panunotentayon nga awan ti patpategtayo wenno saantayo a maikari a maayat. (Basaen ti 1 Juan 3:19, 20.) No mapasamak dayta, masapul a laglagipentayo a “dakdakkel ti Dios ngem ti pusotayo.” Ti ayat ken panangpakawan ti nailangitan nga Amatayo ket nabilbileg nga amang ngem iti aniaman a negatibo a rikrikna iti pusotayo. Masapul a kombinsidotayo nga ay-ayatennatayo ni Jehova. Tapno maaramidtayo dayta, masapul nga adalentayo ti Saona iti inaldaw, kanayontayo nga agkararag, ken regular a makilangentayo kadagiti matalek nga adipenna. Apay a napateg ti panangaramid kadagitoy?

13. Kasano a makatulong kadatayo ti panangadal iti Sao ti Dios? (Kitaen met ti kahon a “No Kasano a Nakatulong Kadakuada ti Sao ti Dios.”)

¹³ Adalem ti Sao ti Dios iti inaldaw, ket ad-addanto a maawatam ti adu a nagsasayaat a kualidad ni Jehova. Maawatamto nga ay-ayatennaka unay. Ti panangutobmo iti maysa a paset ti Sao ti Dios iti kada aldaw ket makatulong kenka nga agpanunot a naimbag, tapno ‘mailintegmo ti bambanag’ nga adda iti isip ken pusom. (2 Tim. 3:16) Kinuna ti panglakayen a ni Kevin a nababa ti panagkitana iti bagina: “Nakatulong kaniak ti panangbasa ken panangutobko iti Salmo 103 tapno mailintegko ti pampanunotko ken maawatak ti talaga a pampanunoten ni Jehova maipapan kaniak.” Kinuna ni Eva a nadakamat itay: “Iti ngudo ti aldaw, siuulimek nga utobek ti pampanunot ni Jehova. Dayta ti mangpakalma iti pusok ken mangpabileg iti pammatik.”

14. Kasano a makatulong kadatayo ti panagkararag?

¹⁴ Kanayonka nga agkararag. (1 Tes. 5:17) Ti natibker a panaggayyem ket naibasar iti kanayon ken naimpusuan a panagsarita. Kasta met laeng no iti pannakigayyemtayo ken Jehova. No ibagatayo kenkuana ti rikrikna, pampanunot, ken problematayo, ipakpakitatayo nga agtaltalektayo kenkuana ken ammotayo nga ay-ayatennatayo. (Sal. 94:17-19; 1 Juan 5:14, 15) Kinuna ni Yua a nadakamat itay: “No agkararagak, saanko la nga ibaga dagiti napasamak kaniak iti agmalem. Ibagbagak met ken Jehova dagiti pampanunotek ken marikriknak. Gapu iti dayta, in-inut nga ibilbilangko ni Jehova kas Ama a talaga a mangdungdungngo kadagiti annakna, saan a kas iti chief executive officer ti maysa a kompania.”​—Kitaen ti kahon a “Nabasam Kadin?”

15. Kasano nga ipakpakita ni Jehova a maseknan kadatayo?

¹⁵ Makilangenka kadagiti matalek a gagayyem; sagut ida ni Jehova. (Sant. 1:17) Ipakpakita ti nailangitan nga Amatayo a maseknan iti tunggal maysa kadatayo ta inikkannatayo iti naespirituan a pamilia nga “agayat iti amin a tiempo.” (Prov. 17:17) Iti surat ni Pablo kadagiti taga-Colosas, dinakamatna dagiti Kristiano a nangsuporta kenkuana ket tinukoyna ida a mangmangted kenkuana iti “kasta unay a liwliwa.” (Col. 4:10, 11) Uray ni Kristo Jesus ket nagkasapulan iti tulong dagiti anghel ken tattao a gagayyemna ken inapresiarna ida.​—Luc. 22:28, 43.

16. Kasano a makatulong dagiti matalek a gagayyem tapno sumingedtayo ken Jehova?

¹⁶ Ap-aprobetsarem kadi ti tulong dagiti matalek a gagayyem a sagut ni Jehova? No ibagam dagiti pakaseknam iti gayyemmo a nataengan iti naespirituan, dina kayat a sawen a nakapuyka; proteksion ketdi dayta. Usigem ti imbaga ni James, a nadakamat itay: “Dakkel a tulong kaniak dagiti nasayaat a gagayyemko a nataengan iti naespirituan. No puro negatibo ti mapampanunotko, an-anusandak a denggen dagitoy a patpatgek a gagayyem ket ibagada nga ipatpategdak. Mariknak kadakuada ti mismo a panagayat ken pannakaseknan kaniak ni Jehova.” Napateg ngarud a makigayyemtayo kadagiti kapammatiantayo ken agtalinaedtayo a nasinged kadakuada!

17-18. Asino ti masapul a denggentayo, ken apay?

¹⁷ Kayat ni Satanas nga isardengtayo ti agaramid iti umiso. Kayatna a patientayo a saannatayo nga ay-ayaten ni Jehova, a saantayo a maikari a maisalakan. Ngem kas nakitatayon, bin-ig a kinaulbod dagita.

¹⁸ Ay-ayatennaka ni Jehova. Ipatpategnaka unay kas iti maysa a gameng. No agtulnogka kenkuana, ‘agtalinaedkanto iti ayatna’ iti agnanayon, a kas ken Jesus. (Juan 15:10) Isu a dimo denggen ni Satanas wenno ti pusom a mangkonkondenar kenka. Imbes ketdi, dumngegka ken Jehova, a mangkitkita iti nasayaat a maar-aramidan ti tunggal maysa kadatayo. Kombinsidoka koma a “maragsakan ni Jehova kadagiti tattaona,” a kas kenka!