Ni Jehova ti Pastortayo

“Ni Jehova ti Pastorko. Saanakto nga agkurang iti aniaman.”​—SALMO 23:1.

1-3. Apay a saan a pakasdaawan a ni David indiligna ni Jehova iti maysa a pastor?

NO PAILADAWANDA kenka ti panangaywan ni Jehova iti ilina, ania ti makunam? Ania a panamagdilig ti usarem a mangiladawan iti nadungngo a panangaywan ti Dios kadagiti matalek nga adipenna? Nasurok a 3,000 a tawenen ti napalabas, ni salmista nga Ari David insuratna ti makapikapik a panangiladawan ken ni Jehova, nga indiligna iti trabahona idi isu ket ubing pay.

² Maysa a pastor ni David idi isu ket agtutubo pay isu nga ammona no kasano ti mangaywan kadagiti karnero. Pagaammona unay a no mabaybay-an dagiti karnero, nalakada la a mayaw-awan ken agbalin a biktima kadagiti mannibrong wenno atap nga animal. (1 Samuel 17:34-36) No awananda iti manangaywan a pastor, dida ammo no sadino ti pagarabanda. Idi nataenganen, awan duadua a maragragsakan ni David a manglagip kadagiti adu nga oras a binusbosna a mangiturong, mangsaluad, ken mangpakan kadagiti karnero.

³ Saan a pakasdaawan a nalagip ni David ti trabaho ti maysa a pastor idi isu ket napaltiingan a mangiladawan iti panangaywan ni Jehova iti ilina. Ti maika-23 a Salmo, nga insurat ni David, ket mangrugi kadagitoy a sasao: “Ni Jehova ti Pastorko. Saanakto nga agkurang iti aniaman.” Usigentayo no apay a maitutop dagita a sasao. Kalpasanna, iti tulong ti Salmo 23, kitaentayo dagiti pamay-an ti panangaywan ni Jehova kadagiti agdaydayaw kenkuana, no kasano a ti maysa a pastor aywananna dagiti karnerona.​—1 Pedro 2:25.

Maitutop a Panangidilig

4, 5. Ania dagiti galad ti karnero sigun iti Biblia?

⁴ Dakamaten ti Biblia ti adu a titulo ni Jehova, ngem ti titulo a “Pastor” ti maysa kadagiti kadudunguan. (Salmo 80:1) Tapno matarusantayo a naimbag no apay a maitutop a maawagan ni Jehova kas Pastor, makatulong nga ammuentayo ti dua a banag: umuna, ti kababalin dagiti karnero ken maikadua, dagiti annongen ken galad ti maysa a nasayaat a pastor.

⁵ Ti Biblia masansan nga iparipiripna dagiti galad ti karnero, a deskribirenna a kaay-ayoda ti panangdungngo ti pastor (2 Samuel 12:3), saanda nga agresibo (Isaias 53:7), ken awananda iti gaway. (Mikias 5:8) Kuna ti maysa a mannurat nga adu a tawen a nagtaraken kadagiti karnero: “Dagiti karnero ‘saanda a kabaelan a taraknen ti bagbagida’ kas ipagarup ti dadduma. Kadagiti dinguen, dagiti karnero ti agkalikagum iti awan sardayna nga atension ken naannad a panangaywan.” Tapno agbiag dagitoy awanan iti gaway a parsua, kasapulanda ti manangaywan a pastor.​—Ezequiel 34:5.

 6. Kasano ti panangilawlawag ti maysa a diksionario ti Biblia maipapan iti agmalem ti maysa a pastor idi umuna a panawen?

⁶ Komusta ti agmalem ti maysa a pastor idi umuna a panawen? Ilawlawag ti maysa a diksionario ti Biblia: “Iti bigat, iwanwanna ti arban manipud iti pagyaponan agturong iti pagaraban. Agmalmalem a bantayanna dita dagiti karnero, a siguraduenna nga awan kadakuada ti maiwawa, ket no adda man ti dina masiputan a mayaw-awan, sipipinget a birokenna ket isublina iti pangen. . . . Inton rumabii, iyawidna ida iti pagyaponan, a bilangenna ida a saggaysa bayat a lumabas dagitoy iti ridaw tapno masiguradona nga awan ti napukaw. . . . Iti rabii, masansan a saluadanna ti pagyaponan manipud kadagiti atap nga animal, wenno kadagiti nasikap a pananggandat dagiti agsisiim a mannanakaw.”a

 7. Apay a no dadduma, kasapulan ti pastor ti mangipakita iti kanayonan nga anus ken dungngo?

⁷ Adda dagiti gundaway a dagiti karnero, nangnangruna dagiti kordero ken dagiti masikog a kabaian, kalikagumanda ti kanayonan nga anus ken dungngo. (Genesis 33:13) Kuna ti maysa a reperensia ti Biblia: “Masansan nga aganak dagiti kabaian iti adayo a lugar, iti sikigan ti bantay. Ti pastor anusanna a bantayan ti nagpasngay a kabaian bayat a nakapsut pay daytoy, alaenna ti kordero, ket ipanna iti pagyaponan. Iti sumagmamano nga aldaw, agingga a di pay makapagna ti kordero, mabalin a bagkatenna wenno sakruyenna iti makinngato a pagan-anayna.” (Isaias 40:10, 11) Nalawag, ti maysa a nasayaat a pastor kasapulanna nga agpadpada dagiti nabileg ken nadungngo a galad.

 8. Ania dagiti dinakamat ni David a panggapuanna nga agtalek ken ni Jehova?

⁸ “Ni Jehova ti Pastorko”​—saan kadi a maitutop dayta a panangiladawan iti nailangitan nga Amatayo? Bayat nga usigentayo ti Salmo 23, makitatayo no kasano nga ay-aywanannatayo ti Dios a kas iti maysa a nabileg ken nadungngo a pastor. Iti bersikulo 1, inyebkas ni David ti panagtalekna nga ipaay ti Dios ti amin nga urnos a kasapulan dagiti karnerona tapno ‘saanda nga agkurang iti aniaman.’ Kadagiti sumaganad a bersikulo, dinakamat ni David ti tallo a pakaigapuan dayta a panagtalek: Iturong, saluadan, ken taraonan ni Jehova dagiti karnerona. Saggaysaentayo nga usigen dagitoy.

“Iturongnak”

 9. Ania nga eksena ti kinatalna ti dineskribir ni David, ken kasano nga adda dagiti karnero iti kasta a kasasaad?

⁹ Umuna, iturong ni Jehova ti ilina. Insurat ni David: “Kadagiti naraber a pagaraban pagiddaennak; iti igid dagiti nasayaat-pannakapadanumna a lugar a paginanaan idalannak. Ti kararuak pabang-aranna. Iturongnak kadagiti desdes ti kinalinteg maipagapu iti naganna.” (Salmo 23:2, 3) Maysa nga arban a sitatalna nga agin-inana iti nawadwad a pagaraban​—iladladawan ditoy ni David ti maysa nga eksena ti pannakapnek, gin-awa, ken kinatalged. Ti Hebreo a sao a naipatarus kas “pagaraban” mabalin a kaipapananna “makaay-ayo a lugar.” Dagiti karnero mabalin a saanda a makasarak a bukbukodda iti makapabang-ar a lugar a paginanaanda a sitatalna. Nasken nga iturong ida ti pastorda iti kasta a “makaay-ayo a lugar.”

10. Kasano nga ipakpakita ti Dios nga isu ket agtalek kadatayo?

¹⁰ Kasano ti panangiturong kadatayo ni Jehova ita? Ti maysa a pamay-anna ket babaen ti ulidan. Idagadag ti Saona a ‘tuladentayo ti Dios.’ (Efeso 5:1) Ti konteksto dagita a sasao tukoyenna ti asi, pammakawan, ken ayat. (Efeso 4:32; 5:2) Awan duadua a ni Jehova ti nangipasdek iti kasayaatan nga ulidan no iti panangipakita kadagiti kasta a makaay-ayo a galad. Nalabes kadi ti kidkiddawenna a panangtuladtayo kenkuana? Saan. Dayta a naipaltiing a balakad ket kinapudnona maysa a nagsayaat nga ebkas ti panagtalekna kadatayo. Iti ania a wagas? Naaramidtayo iti ladawan ti Dios, kayatna a sawen, naparaburantayo kadagiti moral a galad ken iti kapasidad a mangpatanor iti espiritualidad. (Genesis 1:26) Gapuna, ammo ni Jehova nga iti laksid ti kinaimperpektotayo, addaantayo iti abilidad a mangpatanor kadagiti galad nga iparparangarangna. Panunotenyo laengen​—agtalek ti naayat a Diostayo a kabaelantayo ti tumulad kenkuana. No tuladentayo ti ulidanna, arigna nga iturturongnatayo iti maysa a makaay-ayo a ‘paginanaan.’ Iti tengnga daytoy naranggas a lubong, ‘agnaedtayo iti kinatalged,’ a tagiragsakentayo ti talna nga iyeg ti pannakaammo nga an-anamongannatayo ti Dios.​—Salmo 4:8; 29:11.

11. Iti panangiturongna kadagiti karnerona, ania dagiti ikabilangan ni Jehova, ken kasano a naiparangarang dayta iti kalikagumna kadatayo?

¹¹ Iturturongnatayo ni Jehova buyogen ti kinadungngo ken kinaanus. Ti maysa a pastor ikabilanganna dagiti limitasion ti karnerona, isu nga iturongna ida “maitunos iti panagaddang dagiti dinguen.” (Genesis 33:14) Umasping iti dayta, iturong ni Jehova dagiti karnerona ‘maitunos iti panagaddangda.’ Ikabilanganna dagiti abilidad ken kasasaadtayo. Arigna nga itunosna ti panagaddangna sigun iti kapartak ti panagaddangtayo, a dina pulos kalikaguman ti nalablabes ngem iti kabaelantayo nga ipaay. Ti laeng kalkalikagumanna ket amin-kararua koma ti panagserbitayo. (Colosas 3:23) Ngem kasano no limmakay wenno bimmaketkayon ket diyo kabaelanen ti sigud a maar-aramidanyo? Wenno kasanon no addaankayo iti nakaro a sakit a manglimitar kadagiti mabalinyo nga aramiden? Dayta ti pagsayaatan ti kalikagum ti Dios nga amin-kararua koma ti panagserbitayo. Awan ngamin ti eksakto nga agpada a kararua. Ti amin-kararua a panagserbi kaipapananna ti panangusaryo iti amin a bileg ken pigsa a kabaelanyo nga ited iti panagserbiyo iti Dios. Iti laksid dagiti pagkapuyan a mabalin a mangapektar iti kapartak ti panagaddangtayo, ipateg ni Jehova ti amin-puso a panagdayawtayo.​—Marcos 12:29, 30.

12. Ania a pagarigan iti Mosaiko a Linteg ti mangyilustrar a ni Jehova iturturongna dagiti karnerona ‘maitunos iti panagaddangda’?

¹² Tapno mapaneknekantayo nga iturturong ni Jehova dagiti karnerona ‘maitunos iti panagaddangda,’ usigentayo ti kinunana maipapan iti sumagmamano a daton gapu iti babak, a nadakamat iti Mosaiko a Linteg. Tarigagayan ni Jehova dagiti nasayaat a daton a ginutugot ti puso a manangapresiar. Nupay kasta, ti makalikaguman a daton ket depende iti kabaelan ti agidatdaton. Kinuna ti Linteg: “No saan nga umdas ti kabaelanna maipaay iti maysa a karnero, ngarud . . . masapul a mangyeg iti dua a pagaw wenno dua nga urbon nga atap a kalapati.” Ket no ngay dina kabaelan ti mangidaton uray dua laeng nga atap a kalapati? Mabalin a mangyeg iti sumagmamano a “nasayaat nga arina.” (Levitico 5:7, 11) Daytoy ti mangipakita a di kalikaguman ti Dios ti saan a kabaelan nga ipaay ti agidatdaton. Gapu ta saan a nagbalbaliw ti Dios, makaliwliwa kadatayo a maammuan a dina kalikaguman ti nalablabes ngem iti kabaelantayo nga ipaay; imbes ketdi, maragsakan a mangawat iti aniaman a kabaelantayo nga ipaay. (Malakias 3:6) Anian a pribilehio ti agpaiturong iti kasta a mannakaawat a Pastor!

“Saanak nga Agbuteng iti Dakes, ta Sikukuyogka Kaniak”

13. Iti Salmo 23:4, kasano a nasingsinged itan ti panagsao ni David, ken apay a saan a pakasdaawan dayta?

¹³ Dakamaten ni David ti maikadua a panggapuanna nga agtalek: saluadan ni Jehova dagiti karnerona. Mabasatayo: “Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak; ti baston ken sarukodmo isuda ti bambanag a mangliwliwa kaniak.” (Salmo 23:4) Nasingsinged itan ti panagsao ni David, ta tinukoyna ni Jehova kas ‘sika.’ Saan a pakasdaawan dayta yantangay sarsaritaenna no kasano nga isu ket tinulongan ti Dios tapno maibturanna ti rigat. Naglasat ni David iti adu a ‘nasipnget a ginget’​—dagiti panawen a nagpeggad ti mismo a biagna. Ngem saan a nalapunos iti buteng, ta mariknana nga adda kenkuana ti Dios​—a nakasagana ti “baston” ken ‘sarukodna.’ Daytoy a pannakaammo ti nangsaluad ken ni David ken sigurado nga ad-adda a nangyadani kenkuana ken ni Jehova.b

14. Ania ti ipanamnama kadatayo ti Biblia no mainaig iti panangsaluad ni Jehova, ngem ania ti dina kayat a sawen?

¹⁴ Kasano ti panangsaluad ni Jehova kadagiti karnerona ita? Ipanamnama kadatayo ti Biblia nga awan ti kabusor​—demonio wenno tao​—nga agballigi a mangtalipupos kadagiti karnerona ditoy daga. Di pulos ipalubos dayta ni Jehova. (Isaias 54:17; 2 Pedro 2:9) Nupay kasta, dina kayat a sawen a saluadannatayo ti Pastortayo manipud kadagiti amin a kalamidad. Mapaspasarantayo dagiti pakasuotan a gagangay iti sangatauan, ken maipaspasangotayo iti ibubusor nga umapay kadagiti amin a pudno a Kristiano. (2 Timoteo 3:12; Santiago 1:2) Adda dagiti gundaway a mabalin a kasla ‘magmagnatayo iti ginget ti napuskol a kinasipnget.’ Kas pagarigan, nalabit a gistay nataytayo gapu iti pannakaidadanes wenno sakit. Wenno mabalin a maysa a dungdungnguentayo ti gistay natay wenno pimmusay pay ketdin. Kabayatan dagita a kasla kasisipngetan a paset ti biagtayo, kaduatayo ti Pastortayo, ket saluadannatayo. Kasano?

15, 16. (a) Kadagiti ania a pamay-an a tulongannatayo ni Jehova a mangsango kadagiti pakasuotantayo? (b) Mangisalaysay iti kapadasan a mangipakita no kasano a tulongannatayo ni Jehova kadagiti panawen ti pakasuotan.

¹⁵ Saan nga ikari ni Jehova ti milagro nga ibaballaetna.c Ngem daytoy ti masiguradotayo: Tulongannatayo ni Jehova a lumasat iti aniaman a bangen a pakaipasanguantayo. Kabaelanna nga ipaay ti sirib tapno madaerantayo ti “nadumaduma a pakasuotan.” (Santiago 1:2-5) Usaren ti pastor ti baston wenno sarukodna saan laeng a tapno mangabug kadagiti rumaut nga animal no di ket tapno mangiturong kadagiti karnerona iti umiso a direksion. ‘Maiturongnatayo’ ni Jehova, nalabit babaen ti maysa a kapammatian, tapno mayaplikartayo ti maysa a naibatay iti Biblia a balakad a mangpasayaat iti kasasaadtayo. Kanayonanna, mapabilegnatayo ni Jehova nga agibtur. (Filipos 4:13) Babaen ti nasantuan nga espirituna, makabalannatayo iti “pannakabalin a nalablabes ngem ti gagangay.” (2 Corinto 4:7) Matulongannatayo ti espiritu ti Dios a mangibtur iti aniaman a pannubok nga iyeg kadatayo ni Satanas. (1 Corinto 10:13) Saan kadi a makaliwliwa a maammuan a kanayon a nakasagana ni Jehova a tumulong kadatayo?

¹⁶ Wen, aniaman a nasipnget a ginget ti mastrektayo, saantay nga agmaymaysa a magna iti dayta. Kaduatayo ti Pastortayo, ket tulongannatayo kadagiti pamay-an a mabalin a ditay naan-anay a madmadlaw no damo. Usigenyo ti kapadasan ti maysa a Kristiano a panglakayen a natakuatan nga addaan iti makapapatay a tumor iti utek. “Aminek nga idi damo, pampanunotek nga amangan no nakaluksaw kaniak ni Jehova wenno dinak pay ketdin ay-ayaten. Ngem determinadoak a saan nga umikay ken ni Jehova. Impeksak kenkuana dagiti pakaringgorak. Ket tinulongannak ni Jehova, a masansan a liwliwaennak babaen kadagiti kakabsat. Adu ti nangiranud kadagiti makatulong a kapanunotan maibatay iti bukodda a kapadasan no kasanoda a nadaeran ti nakaro a sakit. Dagiti balanse a komentoda ti nangipalagip kaniak a mapaspasaran met ti dadduma ti sagsagabaek. Dagiti praktikal a tulong, agraman dagiti makatukay nga ebkas ti kinamanangngaasi, pinatalgedanda kaniak a diak napagura ni Jehova. Siempre, masapul nga itultuloyko a daeran ti sakitko, ket diak ammo no anianto ti pagbanaganna. Ngem kombinsidoak a kaduak ni Jehova ket agtultuloy a tulongannak iti daytoy a pakasuotan.”

“Iti Sanguanak Mangurnoska iti Lamisaan”

17. Kasano ti panangdeskribir ni David ken ni Jehova iti Salmo 23:5, ket apay a saan dayta a maisupadi iti ilustrasion maipapan iti pastor?

¹⁷ Dakamaten itan ni David ti maikatlo a panggapuanna nga agtalek iti Pastorna: sipaparabur a taraonan ni Jehova dagiti karnerona. Insurat ni David: “Iti sanguanak mangurnoska iti lamisaan iti sango dagidiay mangbusbusor kaniak. Iti lana sinapsapuam ti ulok; ti kopak napnapno.” (Salmo 23:5) Iti daytoy a bersikulo, deskribiren ni David ti Pastorna kas maysa a naparabur a manangsangaili a mangidasar iti aglaplapusanan a taraon ken mainum. Saan nga agsupadi ti dua nga ilustrasion​—ti manangaywan a pastor ken ti naparabur a manangsangaili​—yantangay nasken nga ammo ti maysa a nasayaat a pastor no sadino ti ayan ti nawadwad a pagaraban ken paginuman tapno ti arbanna ket saan nga ‘agkurang iti aniaman.’​—Salmo 23:1, 2.

18. Ania ti mangipakita a naparabur ni Jehova?

¹⁸ Naparabur met kadi ti Pastortayo? Awan duadua! Panunotenyo laengen ti kalidad, kaadu, ken panagduduma ti naespirituan a taraon a tagtagiragsakentayo. Babaen ti klase matalek ken masirib nga adipen, ipapaay kadatayo ni Jehova dagiti makatulong a publikasion ken makaisuro a programa kadagiti gimong, asamblea, ken kombension​—agserbi amin dagita a mangpennek kadagiti naespirituan a kasapulantayo. (Mateo 24:45-47) Ditay pulos agkurang iti naespirituan a taraon. “Ti matalek ken masirib nga adipen” ket nangipablaak iti minilion a kopia ti Biblia ken dagiti katulongan iti panagadal iti Biblia, ken magun-odanen dagiti kasta a publikasion iti 413 a lenguahe. Ipapaay ni Jehova dagita a naespirituan a taraon iti nadumaduma a kita​—manipud iti “gatas,” wenno pamunganayan a sursuro ti Biblia, agingga kadagiti “nakired a taraon,” wenno nauuneg a naespirituan a sursuro. (Hebreo 5:11-14) Kas resultana, no maipasangotayo kadagiti parikut wenno mangaramidtayo kadagiti pangngeddeng, kaaduanna a masarakantayo ti kasapulantayo. Aniatayo koma itan no saan a gapu kadagita a naespirituan a taraon? Pudno nga awan kaasping ti kinamanagparabur ti Pastortayo!​—Isaias 25:6; 65:13.

“Agnaedakto iti Balay ni Jehova”

19, 20. (a) Iti Salmo 23:6, ania a panagtalek ti inyebkas ni David, ken kasanotayo a maaddaan iti kasta a panagtalek? (b) Ania ti mausig iti sumaruno nga artikulo?

¹⁹ Kalpasan ti panangutobna kadagiti aramid ti Pastor ken Mangipapaay kadagiti kasapulanna, kinuna ni David: “Sigurado a ti met laeng kinaimbag ken naayat a kinamanangngaasi surotendakto iti amin nga al-aldaw ti panagbiagko; ket agnaedakto iti balay ni Jehova agingga iti kaatiddog ti al-aldaw.” (Salmo 23:6) Naimpusuan a sinao dayta ni David buyogen ti panagyaman ken pammati​—panagyaman maigapu iti napalabas ken pammati maipaay iti masanguanan. Natalged ti rikna daytoy a dati a pastor, ta ammona nga agingga nga isu ket agtalinaed a nasinged iti nailangitan a Pastorna, a kasla agnanaed iti balay ti Dios, agtultuloy ti naayat a panangaywan kenkuana ni Jehova.

²⁰ Anian a yamantayo gapu kadagiti makaay-ayo a sasao a nairekord iti maika-23 a Salmo! Inusar ni David ti kasayaatan a panangiladawan no kasano nga iturong, saluadan, ken taraonan ni Jehova dagiti karnerona. Naitalimeng dagiti nadungngo a sasao ni David tapno mangted iti pammatalged a mapangnamnamaantayo met ni Jehova kas Pastortayo. Wen, agingga a nasingedtayo ken ni Jehova, aywanannatayo kas maysa a naayat a Pastor “agingga iti kaatiddog ti al-aldaw,” uray iti agnanayon. Ngem kas karnerona, responsabilidadtayo ti makipagna iti naindaklan a Pastortayo, ni Jehova. Mausig iti sumaruno nga artikulo no ania ti nairaman iti dayta.

[Footnotes]

Malagipyo Kadi?

• Apay a maitutop ti panangiladawan ni David ken ni Jehova kas maysa a pastor?

• Kasano nga iturturongnatayo ni Jehova buyogen ti pannakaawat?

• Kadagiti ania a pamay-an a tulongannatayo ni Jehova a mangibtur kadagiti pakasuotan?

• Ania ti mangipakita a naparabur a manangsangaili ni Jehova?

[Ladawan iti panid 18]

Kas iti maysa a pastor iti Israel, iturong ni Jehova dagiti karnerona