“Agragsakka iti Napalalo ken Jehova”

“Agragsakka iti napalalo ken Jehova, ket itdennanto kenka dagiti kiddaw ta pusom.”​—SALMO 37:4.

1, 2. Asino ti Gubuayan ti pudno a ragsak, ken kasano nga intampok dayta ni Ari David?

“NARAGSAK dagidiay sipapanunot iti naespirituan a kasapulanda, . . . naragsak dagiti naasi, . . . naragsak dagiti mannakikappia.” Dagitoy a sasao, agraman ti innem pay a deskripsion ti naragsak, buklenda ti naisangsangayan nga introduksion ti nalatak a Sermon ni Jesus iti Bantay, kas inlanad ni Mateo a mannurat iti Ebanghelio. (Mateo 5:3-11) Ipanamnama ti sasao ni Jesus a mabalintay a masagrap ti kinaragsak.

² Ni Ari David iti nagkauna nga Israel ket nangputar iti sagrado a kanta a mangitampok iti Gubuayan ti pudno a ragsak, ni Jehova. “Agragsakka iti napalalo ken Jehova,” kinuna ni David, “ket itdennanto kenka dagiti kiddaw ta pusom.” (Salmo 37:4) Ngem ania ti mamagbalin a gubuayan ti ‘napalalo a kinaragsak’ ti panangammo ken ni Jehova ken kadagiti adu nga aspeto ti personalidadna? Kasano a ti panangusig kadagiti inaramidna ken kadagiti aramidennanto pay a panangibanag iti panggepna ipanamnamana a matagiragsakyo ‘dagiti kiddaw ta pusoyo’? Masungbatan dayta babaen ti panangsukimat a naimbag iti Salmo 37, bersikulo 1 agingga iti 11.

“Dika Umapal”

3, 4. Kas nailanad iti Salmo 37:1, ania ti balakad ni David, ken apay a maiparbeng nga ipangag dayta ita?

³ Agbibiagtayo iti “napeggad a tiempo a narigat a pakilangenan,” ken nasaknap ti kinadakes. Nakitatayo ti kaitungpalan ti sasao ni Pablo: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay, a mangyaw-awan ken mayaw-awanda.” (2 Timoteo 3:1, 13) Naglaka la ketdi ti maapektaran kadagiti agparang a panagballigi ken kinarang-ay dagiti dakes a tattao! Makasinga amin dagita, a mamagkudrep iti naespirituan a panangmatmattayo. Imutektekanyo no kasano a ballaagannatayo dagiti panglukat a sasao ti Salmo 37 maipapan iti dayta a posible a peggad: “Dika agpudpudot gapu kadagiti managaramid iti dakes. Dika umapal kadagidiay agar-aramid iti kinakillo.”

⁴ Binigat a madamagtayo iti media ti nakaad-adu a report maipapan iti kinaawan ti hustisia. Dagiti suitik a negosiante maliklikanda ti pannakadusa. Dagiti kriminal gundawayanda dagiti nakapuy. Saan a matiliw wenno madusa dagiti mammapatay. Mabalin a makaparurod ken makaburibor iti isiptayo dagiti kasta a panangballikug iti hustisia. Nalabit a makapaapal pay ketdi ti agparang a panagballigi dagiti managdakdakes. Ngem makatulong kadi no marurodtayo? No apalan dagiti kasla kinarang-ay dagiti managdakdakes, mabalbaliwanna ngata ti pagbanagandanto? Sigurado a saan! Ken awan a talaga ti rasontayo nga ‘agpudot.’ Apay?

 5. Apay a dagiti managdakdakes nayarigda iti ruot?

⁵ Sumungbat ti salmista: “Ta kas iti ruot magangodanto a sipapardas, ken kas iti nalangto a baro a ruot aglumendanto.” (Salmo 37:2) Mabalin a makaay-ayo ti buya ti nalangto a ruot, ngem iti di agbayag, magango ken mataydanto. Kasta ti mapasamak kadagiti nadangkes. Saan a permanente ti agparang a kinasaliwanwanda. Inton matayda, saan a makatulong ti tinakaw a kinabaknangda. Mariknanto ti amin ti ngipen ti hustisia. “Dagiti isupapak ti basol isu ti ipapatay,” insurat ni Pablo. (Roma 6:23) Dagiti amin a nadangkes mapasarandanto ti kakaisuna a ‘supapakda.’ Anian nga awan serserbina a panagbiag!​—Salmo 37:35, 36; 49:16, 17.

 6. Ania ti maadaltayo iti Salmo 37:1, 2?

⁶ No kasta, ipalubostay kadi a maupaytayo gapu iti kinabaknang dagiti nadangkes a saan met nga agbayag? Daytoy ti maadaltayo iti dua nga umuna a bersikulo ti Salmo 37: Diyo isardeng ti agserbi ken ni Jehova gapu iti makitkitayo a panagballigida. Imbes ketdi, agtalinaedkayo a sipapanunot kadagiti naespirituan a bendision ken kalat.​—Proverbio 23:17.

“Agtalekka ken Jehova ket Aramidem ti Naimbag”

 7. Apay a nasken nga agtalektayo ken ni Jehova?

⁷ Indagadag ti salmista: “Agtalekka ken Jehova ket aramidem ti naimbag.” (Salmo 37:3a) No umapay kadatayo dagiti pakaringgoran wenno panagduadua pay ketdi, nasken a sititibker nga agtalektayo ken ni Jehova. Isu ti makaipaay iti naan-anay a naespirituan a kinatalged. “Ti asinoman nga agnanaed iti nalimed a lugar ti Kangatuan,” insurat ni Moises, “ikagumaannanto ti mangala iti pagdagusan iti sidong ti mismo a salinong Daydiay Mannakabalin-amin.” (Salmo 91:1) No mariribukantayo gapu iti kumarkaro a kinadakes iti daytoy a sistema ti bambanag, ad-adda a kasapulantayo ti agtalek ken ni Jehova. No maligostayo, makapabang-ar no adda gayyemtayo a mangsaranay kadatayo. Umasping iti dayta, bayat nga ikagumaantayo ti magna a simamatalek, kasapulantayo ti saranay ni Jehova.​—Isaias 50:10.

 8. Kasano a ti pannakiraman iti Nakristianuan a ministerio matulongannatayo a saan a masinga iti kinarang-ay dagiti nadangkes?

⁸ Tapno saan a makasinga kadatayo ti kinarang-ay ti nadangkes, nasken nga okupadotayo iti panangbirok ken panangtulong kadagiti marakarnero a tattao a makagteng iti umiso a pannakaammo iti panggep ni Jehova. Iti sidong ti lumanlanlan a kinadakes, nasken a naan-anay nga okupadotayo iti panangtulong kadagiti sabsabali. “Dikay lipatan ti panagaramid iti naimbag ken ti panangiranud iti bambanag iti sabsabali,” kinuna ni apostol Pablo, “ta babaen iti kakasta a sakripisio maay-ayo a naan-anay ti Dios.” Ti kasayaatan a ‘kinaimbag’ a maaramidtayo isu ti panangiranud iti nadayag a naimbag a damag maipapan iti Pagarian ti Dios. Ti panangasabatayo iti publiko ket pudno a ‘sakripisio ti panagdayaw.’​—Hebreo 13:15, 16; Galacia 6:10.

 9. Ilawlawagyo ti indagadag ni David nga “agtaengka iti daga.”

⁹ “Agtaengka iti daga,” intuloy ni David, “ket makilangenka buyogen ti kinamatalek.” (Salmo 37:3b) ‘Ti daga’ idi kaaldawan ni David tuktukoyenna ti teritoria nga inted ni Jehova iti Israel, ti Naikari a Daga. Bayat ti panagturay ni Solomon, saknapanna ti Dan iti amianan agingga iti Beer-seba iti abagatan. Dayta ti pagtaengan ti Israel. (1 Ar-ari 4:25) Sadinoman ti pagnanaedantayo ita, padpadaanantayo ti tiempo inton ti intero a daga ket agbalin a paraiso iti sidong ti baro a lubong ti kinalinteg. Kabayatanna, agnanaedtayo iti naespirituan a kinatalged.​—Isaias 65:13, 14.

10. Ania ti resultana no ‘makilangentayo buyogen ti kinamatalek’?

¹⁰ Ania ti resultana no ‘makilangentayo buyogen ti kinamatalek’? Palagipannatayo ti naipaltiing a proverbio: “Ti tao nga addaan matalek nga ar-aramid makagun-odto iti adu a bendision.” (Proverbio 28:20) Sigurado nga iburay ni Jehova ti bendisionna no simamatalek nga ikagumaantayo nga ikasaba ti naimbag a damag iti siasinoman ken iti sadinoman a pagnaedantayo. Kas pagarigan, 40 a tawenen ti napalabas, nagpayunir ti agassawa a Frank ken Rose iti maysa nga ili iti amianan ti Scotland. Bimmaaw idi ti sumagmamano a naginteres iti kinapudno iti dayta a lugar. Ngem saan a naupay dagitoy nga agassawa. Inyussuatda ti trabaho a panangasaba ken panagaramid kadagiti adalan. Iti agdama, adda narang-ay a kongregasion iti dayta nga ili. Pudno a binendisionan ni Jehova ti kinamatalek dagitoy nga agassawa. Sipapakumbaba a kinuna ni Frank: “Ti kangrunaan a bendision isu ti kaaddami iti kinapudno ken maus-usarnakami ni Jehova.” Wen, no ‘agmatalektayo,’ matagiragsaktayo ti adu a bendision.

“Agragsakka iti Napalalo ken Jehova”

11, 12. (a) Kasano a ‘makapagragsaktayo iti napalalo ken Jehova’? (b) Ania ti mabalinyo nga aramiden a kalatyo mainaig iti personal a panagadal, ken ania ti posible a resultana?

¹¹ Tapno lumagda ti relasiontayo ken ni Jehova ken mataginayon ti panagtalektayo kenkuana, nasken nga ‘agragsaktayo iti napalalo ken Jehova.’ (Salmo 37:4a) Kasanotayo a maaramid dayta? Ni Jehova koma ti ipangpangrunatayo, saan a ti bagitayo, nupay nalabit narigat dayta. Makatulong no iwayaan ti agbasa iti Saona. (Salmo 1:1, 2) Makaparagsak met laeng kadi ti panagbasayo iti Biblia? Makaparagsak dayta no ti panggepyo nga agbasa ket tapno ad-adda a maam-ammoyo ni Jehova. Apay a dikay agpanunot biit kalpasan a nabasayo ti maysa a paset ti Biblia ket iyimtuodyo, ‘Ania ti naadalko iti daytoy a teksto maipapan ken ni Jehova?’ Mabalin a makatulong no adda nakasagana a pagsuratan bayat ti panagbasayo iti Biblia. Kada mennamennaenyo ti kaipapanan ti nabasayo, isuratyo ti sasao a mangipalagip kadakayo iti maysa kadagiti makaay-ayo a galad ti Dios. Iti maysa a salmo, inkanta ni David: “Dagiti sasao ti ngiwatko ken ti panagmennamenna ti pusok agbalinda koma a makaparagsak iti sanguanam, O Jehova a Batok ken Mannubbotko.” (Salmo 19:14) Daytoy a naipamaysa nga atensiontayo iti Sao ti Dios ket “makaparagsak” ken ni Jehova ken makaay-ayo kadatayo.

¹² Kasano nga agbalin a makaparagsak kadatayo ti panagadal ken panagmennamenna? Aramidentayo a kalat nga agingga iti kabaelantayo, adu koma ti maadaltayo maipapan ken ni Jehova ken iti daldalanna. Dagiti publikasion a kas iti Ti Katan-okan a Tao a Nagbiag Pay Laeng ken Umadanika ken Jehovaa ipaayandatayo iti adu nga impormasion a mabalintay a mennamennaen buyogen ti apresasion. Ipanamnama ni David kadagiti nalinteg: “[Ni Jehova] itdennanto kenka dagiti kiddaw ta pusom.” (Salmo 37:4b) Ti kastoy a panagtalek ti nangtignay ken ni apostol Juan a mangisurat kadagitoy a sasao: “Daytoy ti adda kadatayo a panagtalek kenkuana, nga, uray ania ti dawatentayo maitunos iti pagayatanna, denggennatayo. Kanayonanna, no ammotayo a denggennatayo maipapan iti aniaman a dawdawatentayo, ammotayo a maaddaantayo iti bambanag a dinawattayo yantangay dinawattayo ida kenkuana.”​—1 Juan 5:14, 15.

13. Kadagiti kallabes a tawen, ania dagiti naimatangan a panagrang-ay iti adu a pagilian mainaig iti trabaho a panangikasaba iti Pagarian?

¹³ Kas natarnaw a tattao, ti kangrunaan a pagragsakantayo isu ti pannakakita iti pannakaalangon ti kinasoberano ni Jehova. (Proverbio 27:11) Saan kadi nga agayus iti rag-o ti pusotayo no maammuantayo ti kadakkel ti panangasaba a magapgapuanan dagiti kakabsattayo kadagiti pagilian a dati nga adda iti sidong ti diktador a rehimen? Sigagagar nga ur-urayentayo ti kanayonan a wayawaya a mabalin a matagiragsak sakbay a manungpal daytoy a sistema. Kadagiti makinlaud a pagilian, adu nga adipen ni Jehova ti sireregta a mangaskasaba kadagiti estudiante, nagbakuit, ken dadduma pay a temporario nga agnanaed kadagita a pagilian ken mangtagtagiragsak iti wayawaya nga agdayaw. Sipapasnek a tarigagayantayo a no agsubli dagitoy nga indibidual kadagiti pagilianda, itultuloyda nga isilnag ti lawag ti kinapudno uray kadagiti lugar a maiparit ti panangasaba.​—Mateo 5:14-16.

“Iyadanim ken Jehova ti Dalanmo”

14. Ania ti pammaneknek a mapagpannurayantayo ni Jehova?

¹⁴ Anian a makabang-ar a maammuantayo a mabalin ti makalung-aw kadagiti pakadanagan ken kadagiti kasla mangpakapuy a dadagsen! Kasano? “Iyadanim ken Jehova ti dalanmo, ket agkammatalekka kenkuana,” kuna ni David, sana innayon, “ket isu agtignayto.” (Salmo 37:5) Iti kongregasiontayo, adu ti pammaneknek a mapagpannurayantayo ni Jehova. (Salmo 55:22) Dagidiay adda iti amin-tiempo a ministerio, a pakairamanan dagiti payunir, agdaldaliasat a manangaywan, misionero, wenno boluntario nga agserserbi iti Bethel, mapatalgedanda amin ti mapagpannurayan a panangaywan ni Jehova. Apay a diyo imtuoden kadagiti am-ammoyo no kasano a tinulongan ida ni Jehova? Awan duadua a mangngegyo ti adu a kapadasan a mangipakita nga uray kadagiti narigat a panawen, kanayon a mangsaranay ni Jehova. Kanayon nga ipaayna dagiti kasapulan iti biag.​—Salmo 37:25; Mateo 6:25-34.

15. Kasano nga agsilnag ti kinalinteg ti ili ti Dios?

¹⁵ No agkompiansatayo ken ni Jehova ken naan-anay nga agtalek kenkuana, matagiragsaktayo ti kanayonan a kinuna ti salmista: “Sigurado nga iruarnanto ti kinalintegmo kas iti mismo a lawag, ken ti kinahustisiam kas iti tengnga ti aldaw.” (Salmo 37:6) Kas Saksi ni Jehova, masansan a padaksendatayo. Ngem ni Jehova luktanna dagiti mata dagiti nasingpet-panagpuspusoda a tattao tapno maawatanda a mangaskasabatayo iti publiko gapu iti panagayat ken ni Jehova ken kadagiti kaarruba. Kabayatanna, uray adu ti mangpadpadakes kadatayo, saan a mailemmeng ti nalinteg a konduktatayo. Saranayennatayo ni Jehova iti sidong ti aniaman nga ibubusor wenno panangidadanes. Kas resultana, ti kinalinteg ti ili ti Dios agsilnag a kas iti init iti agmatuon.​—1 Pedro 2:12.

“Agulimekka . . . Agurayka”

16, 17. Maitunos iti Salmo 37:7, tiempo itan ti ania, ken apay?

¹⁶ Intuloy ti salmista: “Agulimekka iti sanguanan ni Jehova ket agurayka a sigagagar kenkuana. Dika agpudpudot iti asinoman a mamagbalballigi iti dalanna, iti tao a mangitungtungpal kadagiti kapanunotanna.” (Salmo 37:7) Impaganetget ditoy ni David a masapul nga anusantayo nga urayen ti panagtignay ni Jehova. Nupay di pay dimteng ti panungpalan daytoy a sistema, awan ti rasontayo nga agreklamo. Saan aya a napaneknekantayo a dakdakkel nga amang ti asi ken anus ni Jehova no idilig iti pagaammotayo idi damo? Mabalintay met kadi nga ipakita ita a siaanus nga aguraytayo bayat nga okupadotayo a mangikasaba iti naimbag a damag sakbay a dumteng ti panungpalan? (Marcos 13:10) Tiempo itan tapno liklikan dagiti dinadarasudos a tignay a mangikkat iti rag-o ken naespirituan a kinatalgedtayo. Tiempo itan tapno ad-adda a liklikan dagiti makadadael nga impluensia ti lubong ni Satanas. Ken tiempo itan tapno taginayonen ti moral a kinadalustayo ken pulos a di mulitan ti nalinteg a takdertayo ken ni Jehova. Itultuloytayo nga iwaksi dagiti imoral a kapanunotan ken liklikan dagiti di umiso nga aramid kadagiti di kasekso, wenno uray kadagiti kasekso.​—Colosas 3:5.

¹⁷ “Baybay-am ti unget ket panawam ti pungtot,” imbalakad ni David. “Dika agpudpudot ta dakes laeng ti maaramidam. Ta magessatto dagiti mismo a managaramid iti dakes, ngem dagidiay mangin-inanama ken Jehova isuda ti mangtagikuanto iti daga.” (Salmo 37:8, 9) Wen, masiguradotayo a dumteng ti tiempo​—ken nakaas-asidegen​—inton ikkaten ni Jehova ditoy daga ti amin a kinadakes ken dagiti makiramraman iti dayta.

“Apagbiit Laengen a Kanito”

18, 19. Ania a pammaregta ti ipaay ti Salmo 37:10?

¹⁸ “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton.” (Salmo 37:10) Anian a makaparegta dagita a sasao bayat nga umas-asidegtayon iti panungpalan daytoy a sistema ken ti panungpalan ti nakaay-ay-ay nga iyaalsa ken ni Jehova! Namimpinsan a napaay ti amin a kita ti gobierno wenno autoridad a binuangay ti tao. Umad-adanitayon iti tiempo ti pannakaisubli ti turay ti Dios, maysa a pudno a teokrasia, ti Pagarian ni Jehova nga iturayan ni Jesu-Kristo. Daytoy a turay ti naan-anay a mangiturayto iti lubong ken mangtalipupos iti amin a bumusbusor iti Pagarian ti Dios.​—Daniel 2:44.

¹⁹ Iti baro a lubong iti sidong ti Pagarian ti Dios, awanton a pulos ti masarakanyo a “nadangkes.” Kinapudnona, dagus a mapaksiat ti asinoman nga agrebelde ken ni Jehova. Saan nga agbiag sadiay ti asinoman a mangkuestion iti kinasoberanona wenno agkedked nga agpasakup iti autoridad nga insaad ti Dios. Amin a kaarrubayo sadiay tarigagayanda nga ay-aywen ni Jehova. Anian a kinatalged dayta​—awan ti kandado, barandilias, wenno aniaman a mangdadael iti naan-anay a panagtalek ken kinaragsak!​—Isaias 65:20; Mikias 4:4; 2 Pedro 3:13.

20, 21. (a) Siasino “dagidiay naemma” a natukoy iti Salmo 37:11, ken pakasarakanda iti ‘naruay a talna’? (b) Aniada a bendision ti matagiragsaktayo no tuladentayo ti Dakdakkel a David?

²⁰ Kalpasanna, “dagidiay naemma tagikuaendanto ti daga.” (Salmo 37:11a) Ngem siasino dagitoy a “naemma”? Ti sao a naipatarus kas “naemma” naggapu iti termino a ti kayatna a sawen “sapliten, pagpakumbabaen, ibabain.” Wen, “dagidiay naemma” tukoyenna dagiti sipapakumbaba nga aguray iti panangilinteg ni Jehova iti kinaawan hustisia a sinagabada. “Pudno a maragsakandanto iti napalalo iti kinaruay ti talna.” (Salmo 37:11b) Uray ita, tagtagiragsakentayo ti naruay a talna iti naespirituan a paraiso mainaig iti pudno a kongregasion Kristiano.

²¹ Nupay saantay pay a nakalung-aw kadagiti rigat, agtitinnulongtayo ken liwliwaentayo dagiti malmaldaangan. Kas resultana, maitantandudo ti pudno a pannakapnek iti tengnga ti ili ni Jehova. Dagiti kabsat a lallaki a nadutokan kas papastor ti siaayat a mangipaay kadagiti naespirituan​—ken no dadduma iti pisikal​—a kasapulantayo, a tumulong kadatayo a mangandur iti rigat agpaay iti kinalinteg. (1 Tesalonica 2:7, 11; 1 Pedro 5:2, 3) Anian a nagpateg daytoy a talna nga ik-ikutantayo! Adda met namnamatayo nga agbiag nga agnanayon iti umad-adani a natalna a Paraiso. Sapay koma ngarud ta tuladentayo ti Dakdakkel a David, ni Kristo Jesus, a matalek a nagserbi agingga ken patay gapu iti regtana ken Jehova. (1 Pedro 2:21) No aramidentayo dayta, agtultuloy a naragsaktayo, nga idaydayawtayo daydiay napalalo a pagragsakantayo, ni Jehova a Dios.

[Footnote]

Ania ti Sungbatyo?

• Ania dagiti naadalyo iti Salmo 37:1, 2?

• Kasano a ‘makapagragsakkayo iti napalalo ken Jehova’?

• Ania ti pammaneknek a mapagpannurayantayo ni Jehova?

[Ladawan iti panid 9]

Dagiti Kristiano ‘dida apalan dagidiay agar-aramid iti kinakillo’

[Ladawan iti panid 10]

“Agtalekka ken Jehova ket aramidem ti naimbag”

[Ladawan iti panid 11]

Agragsakkayo iti napalalo ken Jehova babaen ti panagadal a naimbag iti maipapan kenkuana

[Ladawan iti panid 12]

“Dagidiay naemma tagikuaendanto ti daga”