Natalged ti Rikna Dagidiay Naan-anay nga Agtalek ken Jehova

“Ni met laeng Jehova dumngegto inton umawagak kenkuana.”​—SAL. 4:3.

1, 2. (a) Ania a napeggad a kasasaad ti nakaipasanguan ni David? (b) Ania dagiti salmo nga usigentayo?

NABAYAGEN nga agturturay ni Ari David iti nasion ti Israel idi maipasango iti napeggad a kasasaad. Ti nasikap nga anakna a ni Absalom indeklarana ti bagina kas ari isu a napilitan ni David a mangtalaw iti Jerusalem. Liniputan pay ti pagtaltalkanna a gayyem, isu nga itan, kaduana dagiti sumagmamano laeng a nasungdo kenkuana, sakasaka a magmagna nga agsangsangit iti Bantay dagiti Olibo. Kanayonanna, ni Simei, a kameng ti pamilia nga agserserbi iti balay ni Ari Saul, barbarsakenna ni David iti bato ken tapok sana ilunlunod daytoy.​—2 Sam. 15:30, 31; 16:5-14.

² Agresulta kadi dayta iti nakababain ken naladingit nga ipapatay ni David? Saan, gapu ta agtalek ken Jehova. Nabatad dayta iti maikatlo a Salmo a pinutar ni David bayat ti panagtalawna gapu ken Absalom. Insuratna met ti maikapat a Salmo. Agpada nga iyanninaw dagita a pinutarna ti panagtalekna nga imdengan ken sungbatan ti Dios dagiti kararag. (Sal. 3:4; 4:3) Ipasigurado dagita a salmo nga adda ni Jehova kadagiti matalek nga adipenna, iti aldaw ken rabii, nga ipaayanna ida iti tulong, kasta met iti talna ken kinatalged. (Sal. 3:5; 4:8) Usigentayo ngarud dagitoy a salmo ket kitaentayo no kasano a matulongandatayo a maaddaan iti natalged a rikna ken panagtalek iti Dios.

No ‘Adu ti Bumusor Kadatayo’

 3. Kas ipakita ti Salmo 3:1, 2, ania ti kasasaad a nakaipasanguan ni David?

³ “Ti puso dagiti tattao ti Israel simmurot ken Absalom,” kuna ti maysa a mensahero. (2 Sam. 15:13) Masdaaw ni David no apay nga adu ti nakombinsir ni Absalom a sumuporta kenkuana isu nga insaludsodna: “O Jehova, apay nga immadu dagiti kabusorko? Apay nga adu ti tumaktakder a bumusor kaniak? Adu ti agkunkuna maipapan iti kararuak: ‘Awan ti panangisalakan kenkuana ti Dios.’” (Sal. 3:1, 2) Ipagarup ti adu nga Israelita a ni Jehova dina isalakan ni David manipud ken Absalom ken dagiti buyotna.

4, 5. (a) Ania ti masigurado ni David? (b) Ania ti kaipapanan dagiti sasao a “Daydiay mangipangato iti ulok”?

⁴ Ngem natalged ti rikna ni David gapu ta naan-anay ti panagtalekna iti Dios. Inkantana: “Kaskasdi a sika, O Jehova, maysaka a kalasag iti aglikmutko, ti dayagko ken Daydiay mangipangato iti ulok.” (Sal. 3:3) Sigurado ni David nga isu ket salakniban ni Jehova no kasano a ti kalasag salaknibanna ti maysa a soldado. Wen, ti lakayen nga ari ket agtaltalaw a nakaabungot ken nakadumog gapu iti bain. Ngem ti Kangatuan ipadayagnanto ni David. Kabaelan ni Jehova a patakderen ni David ken ipangato manen ti ulona. Nagkararag ni David iti Dios gapu ta ammona a masungbatan dayta. Kasta met kadi ti panagtalekmo ken Jehova?

⁵ Babaen kadagiti sasao a “Daydiay mangipangato iti ulok,” binigbig ni David nga isu ket tulongan ni Jehova. Kastoy ti panangipatarus iti dayta ti Today’s English Version: “Ngem sika, O Apo, ti kanayon a kalasagko manipud iti peggad; pagballigiennak ken pasubliem ti kinaturedko.” Sigun iti maysa a reperensia, no ‘ipangato ti Dios ti ulo’ ti maysa, ikkanna iti namnama ken kompiansa. Gagangay laeng a maladingitan ni David gapu ta napadisi kas ari ti Israel. Ngem ti ‘pannakaipangato iti ulona’ ket agresulta iti napabaro a tured, kompiansa, ken naan-anay a panagtalek iti Dios.

‘Sumungbatto ni Jehova!’

 6. Apay a kinuna ni David a nasungbatan dagiti kararagna manipud iti nasantuan a bantay ni Jehova?

⁶ Gapu ta agtalek ni David ken ni Jehova ken ammona a masungbatan dagiti kararagna, kinunana: “Babaen iti timekko umawagakto ken Jehova a mismo, ket sungbatannakto manipud nasantuan a bantayna.” (Sal. 3:4) Kas imbilin ni David, naipan iti Bantay Sion ti lakasa ti tulag a mangirepresentar iti kaadda ti Dios. (Basaen ti 2 Samuel 15:23-25.) Maitutop ngarud ti kinuna ni David a nasungbatan ti kararagna manipud iti nasantuan a bantay ni Jehova.

 7. Apay a saan a nagbuteng ni David?

⁷ Saan a nagbuteng ni David gapu ta sigurado a masungbatan ti kararagna. Imbes ketdi, inkantana: “No maipapan kaniak, agiddaakto tapno maturogak; sigurado nga agriingakto, ta ni met laeng Jehova agtultuloy a saranayennak.” (Sal. 3:5) Uray iti rabii saan a mabuteng ni David a maturog nupay dakkel ti posibilidadna nga adda dagiti giddato a mangraut kadakuada. Isu ket sigurado a makariing gapu ta naan-anay nga agtalek iti manayon a tulong ti Dios kas iti napadasannan. Addaantayo met iti kasta a kompiansa no salimetmetantayo “ti daldalan ni Jehova” ken ditay umadayo kenkuana.​—Basaen ti 2 Samuel 22:21, 22.

 8. Kasano nga ipakita ti Salmo 27:1-4 ti panagtalek ni David iti Dios?

⁸ Ti natalged a rikna ni David ken naan-anay a panagtalekna iti Dios ket nabatad iti sabali pay a salmona, a naglaon kadagitoy a naipaltiing a sasao: “Ni Jehova ti silawko ken pakaisalakanak. Siasino ti pagbutngakto? Ni Jehova ti salindeg ti biagko. Siasino ti pagalinggagetakto? . . . Uray no maibusor kaniak a ti maysa a pakarso mangibangon iti tolda, ti pusok saanto nga agbuteng. . . . Maysa a banag ti kiniddawko ken Jehova​—isu dayta ti sapulekto, nga agnaedak koma iti balay ni Jehova iti amin nga al-aldaw ti panagbiagko, tapno kitaek ti kinamakaay-ayo ni Jehova ken tapno imatangak ti templona buyogen ti panangtagipateg.” (Sal. 27:1-4) No kasta met ti mariknayo ken ipalubos ti kasasaadyo, regular a makitimpuyogkayo kadagiti pada nga agdaydayaw ken Jehova.​—Heb. 10:23-25.

9, 10. Nupay inkantana ti Salmo 3:6, 7, apay a maibagayo a saan a managibales ni David?

⁹ Nupay ni David ket liniputan ni Absalom ken nagadu ti nangtraidor kenkuana, inkantana: “Saanakto nga agbuteng iti sangapulo a rinibu a tattao a naguurnos a maibusor kaniak iti aglikmut. Tumakderka, O Jehova! Isalakannak, O Diosko! Ta amin dagiti kabusorko kabilemto iti pangalda. Dagiti ngipen dagidiay nadangkes burakemto.”​—Sal. 3:6, 7.

¹⁰ Saan a managibales ni David. No ‘makabil ti pangal’ dagiti kabusorna, ti Dios ti mangaramid iti dayta. Adda insurat ni Ari David a personal a kopia ti Linteg isu nga ammona ti kinuna ni Jehova: “Kukuak ti pammales, ken pannusa.” (Deut. 17:14, 15, 18; 32:35) Ti Dios met ti makaammon a ‘mangburak iti ngipen dagiti nadangkes.’ Kaipapanan dayta nga ikkaten ti Dios ti pannakabalinda a mangdangran. Ammo ni Jehova no asino ti nadangkes gapu ta ‘makitana ti adda iti puso.’ (1 Sam. 16:7) Anian a yamantayo ta ipapaayannatayo ti Dios iti pammati ken bileg a mangsaranget ken Satanas, daydiay kangrunaan a nadangkes, a dandanin maitapuak iti mangliwengliweng nga abut, a kasla bungal a ngumerngernger a leon a maikari a madadael!​—1 Ped. 5:8, 9; Apoc. 20:1, 2, 7-10.

“Ti Panangisalakan Kukua ni Jehova”

11. Apay a rumbeng nga iramantayo iti kararagtayo dagiti kapammatiantayo?

¹¹ Ammo ni David a ni laeng Jehova ti makaipaay iti kasapulanna unay a pannakaisalakan. Ngem saan laeng a ti bagina ti pampanunotenna. Komusta met ti intero a naanamongan nga ili ni Jehova? Maitutop ti panangingudo ni David iti naipaltiing a pinutarna: “Ti panangisalakan kukua ni Jehova. Ti bendisionmo adda iti ilim.” (Sal. 3:8) Nupay adda dagiti dadakkel a problema ni David, silalagip iti intero nga ili ni Jehova ken kombinsido a bendisionan ida ti Dios. Saan kadi a rumbeng laeng a laglagipentayo met dagiti kapammatiantayo? No agkararagtayo, idawattayo koma ken Jehova nga ipaayanna ida iti nasantuan nga espiritu tapno maaddaanda iti tured ken naan-anay a panagtalek a mangikasaba iti naimbag a damag.​—Efe. 6:17-20.

12, 13. Ania ti napasamak ken Absalom, ken ania ti reaksion ni David iti dayta?

¹² Nakababain ti pannakatay ni Absalom​—maysa a pakdaar kadagidiay manggundaway kadagiti sabsabali, kangrunaanna iti daydiay pinulotan ti Dios, kas ken David. (Basaen ti Proverbio 3:31-35.) Adda napasamak a dangadang, ket naabak ti buyot ni Absalom. Idi isu ket naglibas a sisasakay iti mulo, naisalat ti napuskol a buokna iti sinanpakawan a nababa a sanga ti dakkel a kayo. Nakabitin a sibibiag ngem awan gawaynan agingga a pinatay ni Joab babaen ti panangipalokna iti tallo nga urong iti puso ni Absalom.​—2 Sam. 18:6-17.

¹³ Nagrag-o kadi ni David idi naammuanna ti napasamak iti anakna? Saan. Imbes ketdi, nariribukan ken naganug-og sa inyikkisna: “Anakko nga Absalom, anakko, anakko nga Absalom! O siak la koman ti natay, siak, imbes a sika, Absalom nga anakko, anakko!” (2 Sam. 18:24-33) Dagiti laeng sasao ni Joab ti nangpasardeng iti napalalo a ladingit ni David. Anian a nakalkaldaang ti nagbanagan ni Absalom a gapu iti inaagum nga ambisionna, linabananna ti mismo nga amana​—ti pinulotan ni Jehova​—ket dayta ti nakaigapuan ti ipapatayna!​—2 Sam. 19:1-8; Prov. 12:21; 24:21, 22.

Nagtultuloy ti Panagtalek ni David iti Dios

14. Apay a naputar ti Salmo 4?

¹⁴ Kas iti maikatlo a Salmo, ti maikapat a Salmo ket maysa a napasnek a kararag ni David a mangipakita iti naan-anay a panagtalekna ken Jehova. (Sal. 3:4; 4:3) Nalabit pinutar ni David daytoy a kanta tapno iyebkasna ti pannakabang-ar ken panagyamanna iti Dios kalpasan a napaay ti iyaalsa ni Absalom. Wenno mabalin nga insuratna dayta a sipapanunot kadagiti Levita a kumakanta. Aniaman kadagita, ti panangutob iti dayta pabilgenna ti panagtalektayo ken Jehova.

15. Apay a sikokompiansa a makapagkararagtayo ken Jehova baeten iti Anakna?

¹⁵ Impakita manen ni David ti naan-anay a panagtalekna nga imdengan ken sungbatan ti Dios dagiti kararagna. Inkantana: “No umawagak, sungbatannak, O nalinteg a Diosko. Iti rigat iyaramidannakto iti akaba a paglugaran. Ipaayannak iti parabur ket denggem ti kararagko.” (Sal. 4:1) Masiguradotayo met dayta no an-annurotentayo ti kinalinteg. Gapu ta ammotayo a ‘nalinteg a Dios’ ni Jehova, sikokompiansa a makapagkararagtayo kenkuana baeten iti Anakna buyogen ti pammati iti daton a sakripisio ni Jesus. (Juan 3:16, 36) Mangyeg la ketdi dayta iti talna!

16. Apay a mabalin a naupay ni David?

¹⁶ No dadduma, saan a natalged ti riknatayo no maipasangotayo iti makapaupay a kasasaad. Nalabit adda idi tiempo a kasta ti napasamak ken David ta inkantana: “Dakayo nga annak ti tattao, kasano kabayagto ti pannakainsulto ti dayagko, idinto ta itultuloyyo nga ayaten ti ubbaw a bambanag, idinto ta ikagkagumaanyo ti mangsarak iti kinaulbod?” (Sal. 4:2) Agparang a ti sasao nga “annak ti tattao” ket tumukoy iti saan a naanamongan a sangatauan. Dagiti bumusbusor ken David ‘inayatda ti ubbaw a bambanag.’ Kastoy ti panangipatarus ti New International Version iti dayta: “Kasano ti kabayag nga ayatenyo dagiti saan a pudpudno a bambanag ken sapulenyo dagiti ulbod a didios?” Uray no maupaytayo iti inaramid ti sabsabali, itultuloytayo latta ti sipapasnek nga agkararag ken iparangarangtayo ti naan-anay a panagtalek iti maymaysa a pudno a Dios.

17. Ilawlawagyo no kasanotayo nga agtignay maitunos iti Salmo 4:3.

¹⁷ Nabatad ti panagtalek ni David ken ni Jehova kadagitoy a sasao: “Gapuna ammuenyo a ni Jehova sigurado nga ilasinnanto daydiay nasungdona; ni met laeng Jehova dumngegto inton umawagak kenkuana.” (Sal. 4:3) Tapno makapagtalinaedtayo a nasungdo ken Jehova, masapul ti tured ken naan-anay a panagtalek kenkuana. Kas pagarigan, kasapulan ti Kristiano a pamilia dagita a galad no nailaksid ti di agbabbabawi a kabagianda. Bendisionan ti Dios dagidiay matalek kenkuana ken iti daldalanna. Kas resultana, ti kinasungdo ken naan-anay a panagtalek ken Jehova mangyeg iti rag-o kadagiti adipenna.​—Sal. 84:11, 12.

18. Maitunos iti Salmo 4:4, ania ti masapul nga aramidentayo no adda makaparurod a naisawang wenno naaramid kadatayo?

¹⁸ Kasanon no adda nakaisawang wenno nakaaramid iti banag a makaparurod kadatayo? Naragsaktayo latta no aramidentayo ti kinuna ni David: “Aglagawkayo, ngem dikay agbasol. Agsaokayo iti pusoyo, iti rabaw ti pagiddaanyo, ket agulimekkayo.” (Sal. 4:4) Ditay koma agibalbales uray no adda nangsair kadatayo tapno ditay makabasol. (Roma 12:17-19) Iti pagiddaantayo, mabalin nga ikararagtayo dayta a banag. No aramidentayo dayta, mabalin nga agbaliw ti panangmatmattayo ket matignaytayo a mamakawan gapu iti ayat. (1 Ped. 4:8) Makapainteres ta kasta met ti imbalakad ni apostol Pablo, nga agparang a naibatay iti Salmo 4:4: “Agpungtotkayo, nupay kasta dikay agbasol; saannakay koma a malnekan ti init a sipupungtotkayo pay, dikay met ikkan ti lugar ti Diablo.”​—Efe. 4:26, 27.

19. Kasano a matulongannatayo ti Salmo 4:5 mainaig iti naespirituan a sakripisiotayo?

¹⁹ Iti panangipaganetgetna iti kinapateg ti panagtalek iti Dios, inkanta ni David: “Isakripisioyo dagiti sakripisio ti kinalinteg, ket agtalekkayo ken Jehova.” (Sal. 4:5) Sa laeng napateg dagiti sakripisio nga idaton dagiti Israelita no umiso ti motiboda. (Isa. 1:11-17) Tapno anamongan ti Dios ti naespirituan a sakripisiotayo, masapul nga umiso ti motibotayo ken naan-anay nga agtalektayo kenkuana.​—Basaen ti Proverbio 3:5, 6; Hebreo 13:15, 16.

20. Ania ti ipasimudaag ti sasao a ‘ti lawag ti rupa ni Jehova’?

²⁰ Intuloy ni David: “Adu ti agkunkuna: ‘Siasino ti mangipakitanto kadatayo iti naimbag?’ Pagsilnagem kadakami ti lawag ti rupam, O Jehova.” (Sal. 4:6) ‘Ti lawag ti rupa ni Jehova’ ipasimudaagna ti anamong ti Dios. (Sal. 89:15) Gapuna, idi inkararag ni David: “Pagsilnagem kadakami ti lawag ti rupam,” kidkiddawenna ti anamong ti Dios. Gapu ta agtalektayo ken Jehova, magun-odtayo ti anamongna ken addaantayo iti dakkel a rag-o bayat nga ar-aramidentayo ti pagayatanna.

21. Ania ti masiguradotayo no naan-anay a makipaspasettayo iti naespirituan a panagani ita?

²¹ Bayat a segseggaan ni David ti napalaus a rag-o nga ipaay ti Dios, inkantana ken Jehova: “Sigurado a mangipaaykanto iti panagrag-o iti pusok dakdakkel ngem iti daydi tiempo nga immadu ti bukbukelda ken ti baro nga arakda.” (Sal. 4:7) Sigurado a makariknatayo iti napalaus a rag-o no naan-anay a makiramantayo ita iti trabaho a panangasaba. (Luc. 10:2) Iti panangidaulo dagiti napulotan, nga arigna maysa a ‘nasion nga aduan umili,’ maragragsakantayo ita iti iyaadu ti bilang dagiti ‘trabahador iti panagani.’ (Isa. 9:3) Sirarag-o kadi a makipaspasetka iti daytoy naragsak a panagani?

Itultuloytayo ti Naan-anay a Panagtalektayo iti Dios

22. Maitunos iti Salmo 4:8, ania ti nagbanagan dagiti Israelita gapu iti panangannurotda iti Linteg ti Dios?

²² Kastoy ti panangingudo ni David iti Salmo 4: “Agpadpadanto nga agiddaak ken maturogak a sitatalna, ta sika laeng, O Jehova, pagnaedennak iti kinatalged.” (Sal. 4:8) Idi an-annuroten dagiti Israelita ti Linteg ni Jehova, nasinged ti relasionda kenkuana ken natalgedda. Kas pagarigan, ‘ti Juda ken Israel nagnaedda iti kinatalged’ bayat ti panagturay ni Solomon. (1 Ar. 4:25) Dagidiay agtalek ken Jehova natagiragsakda ti talna uray no busbusoren ida dagiti kabangibangda a nasion. Kas ken David, natalged ti riknatayo no maturogtayo gapu iti proteksion ti Dios.

23. Ania ti umapay kadatayo no adda naan-anay a panagtalektayo iti Dios?

²³ Itultuloytayo ngarud ti agserbi ken Jehova. Agkararagtayo koma buyogen ti pammati, iti kasta, umapay kadatayo “ti talna ti Dios a mangringbaw iti isuamin a panunot.” (Fil. 4:6, 7) Anian a rag-o ti itden dayta kadatayo! Ken no taginayonentayo ti naan-anay a panagtalek ken Jehova, ditay maamak aniaman ti dumteng iti masanguanan.

Ania ti Sungbatyo?

• Ania dagiti parikut a nakaipasanguan ni David gapu ken Absalom?

• Kasano a tulongannatayo ti Salmo 3 a maaddaan iti natalged a rikna?

• Kadagiti ania a pamay-an a mabalin a pabilgen ti Salmo 4 ti panagtalektayo ken Jehova?

• Ania ti magunggonatayo no naan-anay ti panagtalektayo iti Dios?

[Ladawan iti panid 29]

Saan a napukaw ti panagtalek ni David ken ni Jehova uray idi naglibas maigapu ken Absalom

[Dagiti Ladawan iti panid 32]

Naan-anay kadi ti panagtalekmo ken Jehova?