Kasda La Dudon

NAPADASANYO kadin ti nagpasiar iti bangkag iti kalgaw ken nakakita ti nakaad-adu a dudon nga aglalagto iti dalanyo? Kasla addada iti uray sadinoman, nupay mabalin a manmano a madlawyo ida agsipud ta kasla saanda a mangdangran ken awan pategda.

Nupay kasta, ti kinaawan pateg dagiti dudon pagbalinenna ida a maiyanatup a simbolo ti sangatauan. Nupay ibilang dagiti dadduma a prominente a tattao ti bagbagida a napateg unay, maisupadi ti panangmatmat ti Namarsua kadatayo. Kinuna ni mammadtona nga Isaias: “Adda Maysa nga agtugtugaw iti ngatuen ti nagtimbukel a daga, ket dagiti agtaeng kenkuana kasda la dudon.”​—Isaias 40:22.

Ti dayag, pannakabalin, ken sirib ni Jehova a Dios, ti mangitan-ok kenkuana nga ad-adayo ngem dagiti tao, no kasano a ti tao adayo a natantan-ok ngem ti dudon no iti sirib ken bileg. Nupay kasta, ti katan-okan a galad ti Dios ket ayat. Ket ti awan kaaspingna a panagayat ti mangtignay kenkuana a mangmatmat kadatayo, mangtulong kadatayo, ken mangisalakan kadatayo​—no ayaten ken agtulnogtay kenkuana. Siaayat a makilanglangen ni Jehova kadatayo, nupay mayarigtayo kadagiti awan pategna a dudon. Kinuna ti salmista: “Siasino ti kas ken Jehova a Diostayo, isu nga agnanaed iti ngato? Nga agpakumbaba tapno matmatanna dagiti adda sadi langit ken iti daga, a bangonenna ti napanglaw manipud iti tapuk.”​—Salmo 113:5-7.

Kas ilawlawag daytoy a salmo, siaayat a tulongan ni Jehova dagiti nakurapay. Wen, tulonganna dagidiay sipapakumbaba a ‘mangsapul ti Dios bareng no masarakanda.’ (Aramid 17:27) Dagidiay makabiruk iti Dios​—ken agserbi kenkuana​—ti agbalin a napateg iti imatangna. (Idiligyo ti Isaias 43:4, 10.) Ngarud ti napakumbaba a dudon ipalagipna kadatayo ti kinaawan pategtayo ken ti ayat ti mannakabalin a Namarsua kadatayo, a mangipalubos kadagiti natulnog a tattao a makigayyem kenkuana ken mangiburay kadakuada iti di kaikarian a kinamanangaasina. Ap-apresiarenyo met laeng aya ti ayat ti Dios?