PANAGBIAG KAS KRISTIANO

Baro iti Gimong iti Tengnga ti Lawas

Mangrugi inton Enero 2018, mairamanton iti gimong iti tengnga ti lawas dagiti study notes ken media iti online study edition ti New World Translation of the Holy Scriptures (nwtsty), uray awan pay dayta iti lengguahem. Sigurado a makatulong dagitoy a mangpasayaat iti panagsaganam para iti gimong. Ken kangrunaanna, sapay koma ta ad-adda pay a sumingedka ken Jehova—ti naayat nga Amatayo!

STUDY NOTES

Mangted dagiti study notes kadagiti impormasion maipapan iti kultura, lugar, ken sasao a nausar kadagiti bersikulo ti Biblia.

Mateo 12:20

Agkurkuridemdem a pabilo: Bassit a damili a lampara a nakargaan iti lana ti olibo ti gagangay idi a maus-usar kas silaw iti balay. Ti lino a pabilona ti mangipangato iti lana tapno agtultuloy a sumged. Ti Griego a sasao para iti “agkurkuridemdem a pabilo” ket mabalin a tumukoy iti pabilo nga agas-asuk ta maid-iddepen ti apuyna ngem adda pay la bassit seggedna. Iti padto iti Isaias 42:3, naipakpakauna ti kinamanangngaasi ni Jesus; saanna a pulos iddepen ti maudi a rissik ti namnama dagiti napakumbaba ken mairurrurumen.

Mateo 26:13

Pudno: Ti Griego nga a·menʹ a letra-por-letra a patarus ti Hebreo nga ʼa·menʹ, kaipapananna ti “sapay koma,” wenno “sigurado.” Masansan nga usaren ni Jesus daytoy a sao kas panangirugi iti maysa a pakaammo, kari, wenno padto, a mangipasigurado nga agpayso ken mapagtalkan dagita. Kadagiti narelihiosuan a literatura, naidumduma ti panangusar ni Jesus iti sao a “pudno” wenno amen iti kastoy a pamay-an. No maulit (a·menʹ a·menʹ), kas iti pannakausarna iti intero nga Ebanghelio ni Juan, naipatarus ti sasao ni Jesus kas “pudno unay.”—Jn 1:51.

MEDIA

Dagiti ladawan, artwork, ken video nga awan unina ken dagiti animation ipakitada ti nagduduma a detalye a nairekord iti Biblia.

Betfage, Bantay Dagiti Olibo, ken Jerusalem

Ipakita daytoy ababa a video ti dalan nga agturong iti Jerusalem manipud iti daya, iti purok ti agdama nga et-Tur—a mapapati a dayta ti Betfage a nairekord iti Biblia—a mapan iti nangatngato a paset ti Bantay dagiti Olibo. Adda ti Betania iti makindaya a sikigan ti Bantay dagiti Olibo. No adda idi ni Jesus ken dagiti adalanna idiay Jerusalem, ugalida ti umyan idiay Betania, nga isu ti ayan ita ti el-ʽAzariyeh (El ʽEizariya), Arabic a nagan a kayatna a sawen, “Lugar ni Lazaro.” Sigurado a nagdagus ni Jesus iti balay da Marta, Maria, ken Lazaro. (Mt 21:17; Mr 11:11; Lu 21:37; Jn 11:1) No agbibiahe ni Jesus manipud iti lugarda a mapan Jerusalem, mabalin a sinurotna ti ruta a kas iti naipakita iti video. Idi Nisan 9, 33 C.E., idi nagsakay ni Jesus iti bumaro nga asno iti Bantay dagiti Olibo a mapan idiay Jerusalem, mabalin a nangrugi iti Betfage ket sinurotna ti dalan nga agturong iti Jerusalem.

Dalan manipud Betania nga agturong idiay Betfage
Betfage
Bantay dagiti Olibo
Tanap ti Kidron
Bantay a nagsaadan ti templo

Nalansaan a Tulang ti Mukod

Retrato daytoy ti replika ti maysa a tulang ti mukod ti tao a natudok iti landok a lansa a 11.5 a sentimetro (4.5 a pulgada) ti kaatiddogna. Nadiskobre ti orihinal a tulang idi 1968, bayat ti panagkabakab iti makin-amianan a paset ti Jerusalem, ken maipagarup nga idi pay panawen dagiti Romano daytoy. Daytoy a nakali dagiti arkeologo ti mangpaneknek a maus-usar dagiti lansa iti panangpapatay kadagiti tattao a mailansa iti kayo. Mabalin a kapada daytoy dagiti lansa nga inusar dagiti soldado a Romano a nangilansa ken Jesu-Kristo iti kayo. Nakita dagiti arkeologo ti tulang iti maysa a kahon a bato, a maaw-awagan iti ossuary, a pakaikabkabilan dagiti tulang ti natay no dimmagan ti lasagna. Ipakita daytoy a mabalin a maitabon ti maysa a nailansa iti kayo.—Mt 27:35.