BEL

[manipud Akkadiano, kaipapananna ti “Makinkukua; Apo”].

Maysa a didiosen dagiti taga Babilonia a ti nakababain a pannakadadaelna ket naipadto a kagiddan ti pannakarbek ti Babilonia.​—Isa 46:1; Jer 50:2; 51:44.

Ti titulo a Bel ket damo a nayawag iti dios a ni Enlil. Ni Bel ket paset ti orihinal a tinallo a didiosen dagiti Sumeriano, a kaduana da Anu ken Enki (Ea). Idi a ni Marduk (Merodac) nagbalin a kangrunaan a dios ti Babilonia, napanaganan met iti Bel.​—Kitaenyo ti DIDIOS KEN DIDIOSA (Dagiti Didiosen ti Babilonia).

No panunoten ti kasta unay a pannakaitantan-ok idi ken Bel, matarusan no apay a tinukoy dagiti mammadto ni Jehova iti sidong ti pannakapaltiing, a ni Bel ket maysa kadagiti didiosen a maipababa no marban ti Babilonia. Agarup 200 a tawen sakbay a natnag ti Babilonia iti im-ima dagiti Medo ken Persiano, impadto ni Isaias a ni Bel ket mapagruknoy ket ni Nebo mapagrukob gapu iti nakababain a pannakaparmekda. Dagiti idolo a ladawanda ket maipaawit kadagiti atap nga animal; gapu ta awan maaramidanda, maisakayda kas gargaret kadagiti animal a pagtrabaho. Saan a makalisi da Bel ken Nebo. “Ti bukodda a kararua,” kayatna a sawen, isuda a mismo, makautiboda. (Isa 46:1, 2; kitaenyo met ti Jer 50:2.) Ni Jehova pilitenna ni Bel a mangyula iti naalimonna babaen kadagiti managdaydayawna, a nangikuna a nagballigida gapu kenkuana. Nangnangruna nga iyula ni Bel ti naidestiero nga ili ni Jehova ken dagiti sagrado nga aruaten ti templona. Dagiti tattao ti nasnasion a pinarmek ti Babilonia saandanton nga agayus nga agturong iti panagdaydayaw ken Bel wenno sumuko kadagiti managdaydayawna a kasla ket tay sumukoda iti kangrunaan a dios ti lubong.​—Jer 51:44; kitaenyo ti MERODAC.