“Itultuloymo ti Sumurot Kaniak”

1-3. (a) Kasano a pinanawan ni Jesus dagiti apostolna, ken apay a saan a makapaladingit a panagpakada dayta? (b) Apay a nasken nga ammuentayo no ania ti kasasaaden ni Jesus manipud idi nagsubli sadi langit?

NAKATAKDER iti bantay ti 11 a lallaki. Adda tao ti langana a tangtangadenda buyogen ti ayat ken panagraem. Ngem iti kinapudnona, isu dayta ni napagungar a Jesus, a nagsublin iti kasasaadna kas kabibilgan kadagiti espiritu nga annak ni Jehova. Inummong ni Jesus dagiti apostolna iti Bantay Dagiti Olibo tapno agparang kadakuada iti maudi a gundaway.

² Awan duadua nga adu ti naipalagip ken ni Jesus iti daytoy a bantay, a paset ti apugbato (limestone) a katurturodan iti ballasiw ti Ginget ti Kidron manipud Jerusalem. Adda iti maysa kadagitoy a turod ti ili ti Betania, a nangpagungaran ni Jesus ken ni Lazaro. Sumagmamano laeng a lawas sakbayna, idiay Betfage a kabangibang ti Betania ti nagrubbuatan ni Jesus iti naballigi nga iseserrekna iti Jerusalem. Nalabit idiay Bantay Dagiti Olibo ti ayan met idi ti minuyongan ti Getsemani, a nagtutuokan ni Jesus sakbay ti pannakatiliwna. Ita iti daytoy met laeng a turod, panawanen ni Jesus dagiti kasingedan a gagayyem ken pasurotna. Makaliwliwa dagiti pammakada a sasaona. Kalpasanna, in-inut a nagpangato! Kasla nailansa dagiti apostol iti nagtakderanda a kumitkita iti ipatpategda nga Apo bayat ti iyuulina sadi langit. Kamaudiananna, adda ulep a nanglinged kenkuana iti imatangda, ket saandan a makita.​—Aramid 1:6-12.

³ Naragsak a makapaladingit kadi dayta a panagpakada? Saan. Kinapudnona, kas impalagip ti dua nga anghel iti daydi a gundaway kadagiti apostol, saan pay a nalpas ti pakasaritaan ni Jesus. (Aramid 1:10, 11) Iti adu a pamay-an, pangrugian laeng ti iyuulina sadi langit. Ibaga ti Biblia kadatayo no ania ti simmaruno a napasamak ken ni Jesus. Napateg a maammuantayo no ania ti kasasaaden ni Jesus manipud idi pimmanaw ditoy daga. Apay? Laglagipem ti kinuna ni Jesus ken ni Pedro: “Itultuloymo ti sumurot kaniak.” (Juan 21:19, 22) Nasken a tungpalentayo dayta a bilin, saan laeng a no kaano a kayattayo a tungpalen no di ket kas wagas ti panagbiag. Tapno maaramidtayo dayta, nasken a maawatantayo no ania ti ar-aramiden itan ti Apotayo ken ti annongen a naited kenkuana idiay langit.

 4. Kasano nga impakpakauna ti Biblia no ania ti mapasamak idiay langit kalpasan ti panagsubli ni Jesus sadiay?

⁴ Awan ti ibagbaga ti Kasuratan maipapan iti isasangpet ni Jesus idiay langit, ti pannakaabrasana, ken ti naragsak a kaaddana manen iti sibay ni Amana. Nupay kasta, impakpakauna ti Biblia no ania ti mapasamak idiay langit apaman a makasubli ni Jesus sadiay. Iti nasurok a 15 a siglo, dagiti Judio kanayon idi a makaimatangda iti nasantuan a seremonia. Iti maysa nga aldaw kada tawen, sumrek ti nangato a padi iti Kasasantuan a siled ti templo tapno iwarsina iti sanguanan ti lakasa ti tulag ti dara dagiti daton iti Aldaw ti Panangabbong. Iti dayta nga aldaw, ti Mesias ti iladladawan ti nangato a padi. Idi nakasublin ni Jesus idiay langit, namimpinsan a tinungpalna ti naimpadtuan a kaipapanan dayta a seremonia. Nagparang iti nadaeg a saklang ni Jehova idiay langit​—ti kasasantuan a disso iti uniberso—​ket indatagna iti Amana ti pateg ti datonna a pangsubbot. (Hebreo 9:11, 12, 24) Inawat kadi dayta ni Jehova?

5, 6. (a) Ania ti mangpaneknek nga inawat ni Jehova ti daton a pangsubbot ni Kristo? (b) Siasino ti mabenepisiaran iti subbot, ken kasano?

⁵ Maammuantayo ti sungbat no usigentayo ti napasamak sumagmamano nga aldaw kalpasan ti panagpalangit ni Jesus. Naguurnong ti agarup 120 a Kristiano idiay Jerusalem iti makinngato a siled idi kellaat a nakangngegda iti daranudor a kasla ungor ti napigsa nga angin ket pinunnona ti intero a balay nga ayanda. Nagdisso iti uloda dagiti sinan-dila nga apuy, napnoda iti nasantuan nga espiritu, ket nangrugida nga agsao iti nadumaduma a pagsasao. (Aramid 2:1-4) Daytoy a pasamak ti nangtanda iti pannakaipasngay ti baro a nasion, ti naespirituan nga Israel, nga isu ti baro a ‘puli a pinili’ ti Dios ken “maysa a naarian a kinapadi” a mangibanag iti pagayatan ti Dios. (1 Pedro 2:9) Nalawag a ni Jehova a Dios inawat ken inanamonganna ti daton a pangsubbot ni Kristo. Daytoy a pannakaiparukpok ti nasantuan nga espiritu ti maysa kadagiti damo a bendision nga inyeg ti subbot.

⁶ Manipud idin, mabembenepisiaran dagiti pasurot ni Kristo iti intero a lubong gapu iti subbot nga impaayna. Kamengtayo man ti napulotan a “bassit nga ipastoran,” a makipagturay ken Kristo idiay langit, wenno dagiti “sabsabali a karnero,” nga agbiagto iti sidong ti turayna ditoy daga, mabenepisiarantayo iti subbot nga impaayna. (Lucas 12:32; Juan 10:16) Dayta ti pakaibatayan ti namnamatayo ken ti pannakapakawan dagiti basoltayo. No la ket ta itultuloytayo nga ipakita ti ‘pammatitayo’ iti dayta a subbot, nga inaldaw a surotentayo ni Jesus, matagiragsaktayo ti nadalus a konsiensia ken ti naraniag a namnama iti masanguanan.​—Juan 3:16.

 7. Ania nga autoridad ti naited ken ni Jesus kalpasan ti panagsublina idiay langit, ken kasano a maipakitam ti panagpasakupmo kenkuana?

⁷ Ania ti ar-aramiden ni Jesus idiay langit manipud idi nagsubli sadiay? Dakkel nga autoridad ti naited kenkuana. (Mateo 28:18) Kinapudnona, ni Jehova dinutokanna ni Jesus a mangituray iti kongregasion Kristiano. Itungtungpal ni Jesus dayta nga annongen iti naayat ken nalinteg a wagas. (Colosas 1:13) Kas naipadto, nangipaay ni Jesus kadagiti responsable a lallaki a mangasikaso kadagiti kasapulan ti arbanna. (Efeso 4:8) Kas pagarigan, pinilina ni Pablo kas “apostol iti nasnasion,” nga imbaonna a mangisaknap iti naimbag a damag kadagiti adayo a pagilian. (Roma 11:13; 1 Timoteo 2:7) Iti arinunos ti umuna a siglo, adda dagiti mensahe nga inturong ni Jesus iti pito a kongregasion iti Asia a probinsia ti Roma tapno komendaran, balakadan, ken tubngarenna ida. (Apocalipsis, kapitulo 2-3) Bigbigem kadi ni Jesus kas Ulo ti kongregasion Kristiano? (Efeso 5:23) Tapno agtalinaedka a pasurotna, agtulnog ken makikooperarka iti kongregasion a nakaitimpuyogam.

8, 9. Ania nga autoridad ti naited ken ni Jesus idi 1914, ket ania ti kaipapanan koma dayta kadatayo no maipanggep kadagiti pangngeddengtayo?

⁸ Nanayonan ti autoridad ni Jesus idi 1914. Iti daydi a tawen, nadutokan kas Ari ti Mesianiko a Pagarian ni Jehova. Idi nangrugi nga agturay ni Jesus, “bimtak ti gubat sadi langit.” Ania ti resultana? Naitappuak ni Satanas ken dagiti demoniona ditoy daga ket nangrugi ti nariribuk a panawen. Ti panagraira dagiti gubat, krimen, sakit, ginggined, ken bisin a mangparparigat ita iti sangatauan ipalagipna kadatayo nga agturturayen ni Jesus idiay langit. Ni Satanas pay laeng “ti agturay iti daytoy a lubong” iti ‘ababa a periodo ti tiempo.’ (Apocalipsis 12:7-12; Juan 12:31; Mateo 24:3-7; Lucas 21:11) Nupay kasta, ipapaayan ni Jesus dagiti tattao iti intero a lubong iti gundaway nga agpaituray Kenkuana.

⁹ Nasken a dumasigtayo iti Mesianiko a Pagarian. Iti amin a pangngeddengtayo iti inaldaw, masapul a gun-odentayo ti anamongna, saan a ti anamong daytoy rinuker a lubong. Bayat a daytoy “Ari ti ar-ari ken Apo ti ap-appo” suksukimatenna ti sangatauan, gumilgil-ayab ti pungtot ken agliplippias ti rag-o iti nalinteg a pusona. (Apocalipsis 19:16) Apay?

10. Ania ti nainkasigudan a kababalin ni Jesus, ngem ania ti rumbeng laeng a mamagpungtot iti Apotayo?

¹⁰ Kas iti Amana, nainkasigudan a naragsak ti Apotayo. (1 Timoteo 1:11) Idi nagbalin a tao, saan a manangbabalaw ken saan a narigat nga ay-ayuen ni Jesus. Ngem adu ti mapaspasamak ita ditoy daga a rumbeng laeng a mamagpungtot kenkuana. Sigurado a makapungtot kadagiti amin a narelihiosuan nga organisasion a di umiso a mangirepresentar kenkuana. Idi pay nga impakaunana: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit. Adunto ti agkuna kaniak iti dayta nga aldaw, ‘Apo, Apo, saankami aya a . . . nagaramid iti adu a mannakabalin nga aramid iti naganmo?’ Ket kaskasdi nga iti dayta ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.”​—Mateo 7:21-23.

11-13. Apay a maklaat dagiti dadduma iti agkakadagsen a sasao nga inturong ni Jesus kadagidiay mangar-aramid iti “adu a mannakabalin nga aramid” iti naganna, ngem apay a makapungtot ni Jesus? Iyilustrarmo.

¹¹ Mabalin a mariro kadagita a sasao ti adu ita a mangibilang iti bagbagida kas Kristiano. Apay a babalawen ni Jesus dagiti tattao a mangar-aramid “iti adu a mannakabalin nga aramid” iti naganna? Dagiti iglesia ti Kakristianuan nangipasdekda kadagiti balay ti kaasi, tultulonganda dagiti napanglaw, nangbangonda kadagiti ospital ken eskuelaan, ken adu dagiti dadduma pay a nagapuananda. Tapno maawatantayo no apay a makapungtot ni Jesus kadakuada, usigem ti maysa nga ilustrasion.

¹² Adda nasken a papanan ti ama ken ina. Saanda a mabalin nga ikuyog dagiti annakda, isu a nangtangdanda iti para aw-awir. Nalawag ti bilinda kenkuana: “Aywanam dagiti annakmi. Pakanem ida, siguraduem a kanayon a nadalusda, ken kitaem a saanda a maan-ano.” Ngem idi nagsubli dagiti nagannak, naklaatda a makakita kadagiti annakda a mabisbisinan. Nakadungdungrit, masaksakit, ken nakakaasi ti langada. Ti para aw-awir saanna nga inkaskaso ti panagsangsangitda. Apay? Adda iti agdan a mangdaldalus kadagiti tawa. Makapungtot dagiti nagannak a nagsaludsod kenkuana no apay a binaybay-anna dagiti annakda. Insungbat ti para aw-awir: “Kitaenyo ti amin a nagapuanak! Saan kadi a nadalus dagiti tawa? Tinarimaanko pay dagiti rumbeng a tarimnen ditoy balayyo, ket agpaay amin daytoy a pagimbagan ti pamiliayo!” Maragsakan ngata dagiti nagannak? Sigurado a saan! Saan a dagita ti impaaramidda kenkuana no di ket kayatda laeng nga aywananna dagiti annakda. Makapungtotda ta saanna nga impangag ti bilinda.

¹³ Mayarig ti Kakristianuan iti dayta a para aw-awir. Binilin ni Jesus dagiti pannakabagina a pakanenda dagiti tattao iti naespirituan a pamay-an babaen ti panangisuroda kadakuada iti kinapudno a linaon ti Sao ti Dios ken panangtulongda kadakuada nga agbalin a nadalus iti naespirituan. (Juan 21:15-17) Ngem nakalkaldaang ta saan a tinungpal ti Kakristianuan ti bilin ni Jesus. Binay-anna nga agbisin dagiti tattao iti naespirituan, a mariroda kadagiti di umiso a sursuro ken saanda nga ammo dagiti pamunganayan a kinapudno a linaon ti Biblia. (Isaias 65:13; Amos 8:11) Uray dagiti panangpadasna a mangpasayaat iti daytoy a lubong dina maikalintegan ti sipapakinakem a panagsukirna. Kinapudnona, mayarig daytoy a sistema ti lubong iti balay a naikeddeng a marakrak. Ibatad ti Sao ti Dios nga asidegen a madadael ti sangalubongan a sistema ni Satanas.​—1 Juan 2:15-17.

14. Ania a trabaho ti mangparparagsak ken ni Jesus ita, ken apay?

¹⁴ Iti sabali a bangir, sigurado a maragsakan unay ni Jesus a tumannawag manipud langit ket makitana a riniwriw dagiti tattao a mangtungtungpal iti annongen nga intedna kadagiti pasurotna sakbay a pimmanaw ditoy daga, ti trabaho a panangaramid kadagiti adalan. (Mateo 28:19, 20) Anian a pribilehio ti makiraman a mangparag-o iti Mesianiko nga Ari! Determinadotayo koma a saan a mauma a makibinnulig iti “matalek ken masirib nga adipen.” (Mateo 24:45) Saan a kas iti klero ti Kakristianuan, daytoy a bassit a grupo dagiti napulotan a kakabsat situtulnog nga iwanwanwanda ti panangasaba ken simamatalek a tartaraonanda dagiti karnero ni Kristo.

15, 16. (a) Ania ti rikna ni Jesus maipapan iti kinaawan ayat a nasaknap ita, ken kasanotay nga ammo a kasta? (b) Apay a makapungtot ni Jesus iti Kakristianuan?

¹⁵ Sigurado a makapungtot ti Ari a makakita iti kinaawan ayat a nasaknap ita ditoy daga. Malagiptayo daydi panangbabalaw dagiti Fariseo ken ni Jesus gapu iti panangpaimbagna kadagiti masakit iti aldaw ti Sabbath. Natangken unay ti panagpuspusoda, napalalo ti kinasubegda ta nagpannurayda laeng iti bukodda a pannakaawat iti Mosaiko a Linteg ken iti oral, wenno saan a naisurat, a linteg. Dagiti milagro nga inaramid ni Jesus ket dakkel ti naitulongna kadagiti tattao! Ngem awan kaes-eskanna kadagidi a lallaki ti rag-o, bang-ar, ken pannakapabileg ti pammati nga inyeg dagiti kasta a milagro. Ania ti narikna ni Jesus? Adda idi gundaway a ni Jesus “kimmita a sirururod iti aglikmut kadakuada, yantangay naan-anay a napaladingit iti kinaawan rikna ti puspusoda.”​—Marcos 3:5.

¹⁶ Iti kaaldawantayo, saan la a kasta ti maim-imatangan ni Jesus a ‘naan-anay a mangpaladingit’ kenkuana. Nakullaapan ti panunot dagiti panguluen ti Kakristianuan gapu iti debosionda kadagiti tradision ken doktrina a maikontra iti isursuro ti Biblia. Maysa pay, makaluksawda gapu iti pannakaikaskasaba ti naimbag a damag maipapan iti Pagarian ti Dios. Iti adu a paset ti lubong, dagiti klero ti mangisungsungsong iti nakaro a pannakaidadanes dagiti Kristiano a sipapasnek a mangikagkagumaan a mangikasaba iti mensahe nga inkaskasaba ni Jesus. (Juan 16:2; Apocalipsis 18:4, 24) Malaksid iti dayta, dagita met laeng a klero masansan a sugsoganda dagiti pasurotda a makigubat ken mangpapatay kadagiti sabsabali​—a kas man la makaay-ayo dayta ken ni Jesu-Kristo!

17. Kasano a dagiti pudno a pasurot ni Jesus parparagsakenda ti pusona?

¹⁷ Iti kasumbangirna, ikagkagumaan dagiti pudno a pasurot ni Jesus nga ipakita ti ayat iti padada a tao. Ikaskasabada ti naimbag a damag iti “amin a kita ti tattao,” kas iti inaramid ni Jesus, nupay adda dagiti bumusbusor kadakuada. (1 Timoteo 2:4) Ken naisangsangayan ti ayat nga ipakpakitada iti maysa ken maysa; dayta ti kangrunaan a pakabigbiganda. (Juan 13:34, 35) Babaen ti panangtratoda kadagiti padada a Kristiano buyogen ti ayat, panagraem, ken dignidad, pudno a tultuladenda ni Jesus​—ken parparagsakenda ti puso ti Mesianiko nga Ari!

18. Ania ti mangpaladingit iti Apotayo, ngem kasanotay a maparagsak?

¹⁸ Laglagipentayo met a maladingitan ti Apotayo no saan nga agibtur dagiti pasurotna, no ipalubosda a bumaaw ti ayatda ken ni Jehova ken no isardengda ti agserbi kenkuana. (Apocalipsis 2:4, 5) Nupay kasta, maragsakan ni Jesus kadagidiay agibtur agingga iti panungpalan. (Mateo 24:13) Ngarud, laglagipentayo koma a kanayon ti bilin ni Kristo: “Itultuloymo ti sumurot kaniak.” (Juan 21:19) Usigentayo ti dadduma kadagiti bendision nga iburay ti Mesianiko nga Ari kadagidiay agibtur agingga iti panungpalan.

19, 20. (a) Ania dagiti bendision nga itden ita ti panagbalin a pasurot ni Jesus? (b) Kasano a ti panangsurot ken ni Kristo matulongannatayo a maaddaan iti ama a kasapulantayo?

¹⁹ Pudno a makagunggona a wagas ti panagbiag ita ti panagbalin a pasurot ni Jesus. No awatentayo ni Kristo kas Apotayo, nga agpaidalantayo kenkuana ken tuladentayo ti ulidanna, masarakantayo dagiti gameng a saan a matumpongan dagiti tattao iti intero a lubong. Maparaburantayo iti trabaho a mamagbalin iti biagtayo a makagunggona, agbalintayo a paset ti sangakabbalayan dagiti agkakapammatian a nagkaykaysa iti pudpudno a singgalut ti ayat, maaddaantayo iti nadalus a konsiensia, ken natalna ti panunottayo. Iti ababa a pannao, naragsak ken makapnek ti biagtayo. Ket saan la a dagita ti masagraptayo.

²⁰ Ni Jehova intedna ni Jesus kas “Agnanayon nga Ama” kadagidiay mangnamnama nga agbiag nga agnanayon ditoy daga. Ni Jesus ti kasukat ti ama ti sangatauan a ni Adan, a nangpaay iti amin nga annakna. (Isaias 9:6, 7) No awatentayo ni Jesus kas ‘Agnanayon nga Amatayo,’ nga ipakitatayo ti pammatitayo kenkuana, addaantayo iti natalged a namnama nga agbiag nga agnanayon. Maysa pay, ad-adda a sumingedtayo ken ni Jehova a Dios. Kas naadaltayon, ti inaldaw a panangikagumaantayo a mangtulad iti ulidan ni Jesus ti kasayaatan a pamay-an tapno matungpaltayo daytoy a bilin nga impaltiing ti Dios: “Agbalinkayo a tumutulad iti Dios.”​—Efeso 5:1.

21. Kasano a dagiti pasurot ni Kristo mangisilsilnagda iti lawag iti nasipnget a lubong?

²¹ Bayat a tultuladentayo ni Jesus ken ni Jehova nga Amana, addaantayo iti naisangsangayan a pribilehio. Mangisilsilnagtayo iti naraniag a lawag. Iti lubong a naabungotan iti sipnget, a binilion dagiti inyaw-awan ni Satanas ken mangtultulad kadagiti kababalinna, datayo a paspasurot ni Kristo isaksaknaptayo ti karaniagan a lawag​—ti lawag dagiti kinapudno a linaon ti Biblia, ti lawag dagiti nagsayaat a Nakristianuan a galad, ti lawag ti napaypayso a rag-o, pudno a talna, ken pudno nga ayat. Malaksid iti dayta, ad-adda a sumingedtayo ken ni Jehova, ket dayta ti kasayaatan a kalat, ti kangatuan a mabalin a ragpaten, ti asinoman nga intelihente a parsua.

22, 23. (a) Ania dagiti masanguanan a bendision a dumteng kadagidiay sisusungdo nga agtultuloy a sumurot ken ni Jesus? (b) Ania koma ti determinasiontayo?

²² Panunotem met ti kayat ni Jehova nga aramiden maipaay kenka iti masanguanan babaen ti insaadna a Mesianiko nga Ari. Iti saanen a mabayag, iwayatton dayta nga Ari ti nalinteg a gubat maibusor iti dakes a sistema dagiti bambanag ni Satanas. Di bumurong nga agballiginto ni Jesus! (Apocalipsis 19:11-15) Kalpasanna, iruginton ni Kristo ti Sangaribu a Tawen a Panagturayna ditoy daga. Ti nailangitan a gobiernona ipakatnanto dagiti gunggona nga itden ti subbot iti amin a matalek a tattao agingga nga agbalinda a perpekto. Darepdepem ti bagim a mangsagsagrap iti naan-anay a salun-at, a kanayon a napigsa ken saan a lumaklakay, ken siraragsak a makitintinnulong iti nagkaykaysa a sangatauan a mamagbalin a paraiso iti daytoy a daga! Iti ngudo dayta a Milenio, iyawatto ni Jesus ti turay iti Amana. (1 Corinto 15:24) No itultuloymo a suroten a sisusungdo ni Kristo, maparaburankanto iti nagsayaat a gunggona a dimo matukod a panunoten​—ti “nadayag a wayawaya ti annak ti Dios”! (Roma 8:21) Wen, sagrapentayto ti amin a bendision a tinagiragsak ngem napukaw da Adan ken Eva. Kas naindagaan nga annak ni Jehova, agnanayon a maikkatto kadatayo ti mansa ti basol ni Adan. Wen, “awanton ni patay.”​—Apocalipsis 21:4.

²³ Lagipem daydi nabaknang nga agtutubo nga agturay a nasalaysay iti Kapitulo 1. Pinagkedkedanna ti awis ni Jesus nga: “Umayka agbalinka a pasurotko.” (Marcos 10:17-22) Pulos a saanmo koma nga ar-aramiden dayta a biddut! Sapay koma ta sirarag-o ken sipapasnek nga ipangagmo ti awis ni Jesus. Determinadoka koma nga agibtur, nga itultuloymo a suroten ti Nasayaat a Pastor iti inaldaw, tinawen, ket agbiagkanto tapno makitam ti panangibanagna kamaudiananna iti nadayag a kaitungpalan dagiti amin a panggep ni Jehova!