Sigurado nga Agpatingga Dagiti Dakes nga Aramid!

IMPAAY ti Dios ti naipaltiing a Saona, a mangilawlawag kadagiti rason no apay nga agaramid dagiti tattao iti dakes. Impaayannatayo met iti wayawaya nga agdesision ken iti abilidad nga agteppel, isu a mabalintayo nga ikeddeng a liklikan ti agaramid iti dakes. (Deuteronomio 30:15, 16, 19) Gapu kadagita a saguday, mailasintayo la ketdi dagiti dakes a pagannayasantayo ket makaaramidtayo kadagiti addang tapno maparmektayo dagita. No liklikantayo ti agaramid iti dakes, agbalintayto a naragsak ken uray dagiti tattao a makalangentayo.​—Salmo 1:1.

Nupay kasta, kas indibidual, uray kasano ti panangikagumaantayo a mangsaranget iti pagannayasan nga agaramid iti dakes, agtultuloy a madidigra ti lubong gapu kadagiti dakes nga aramid dagiti padatayo a tattao. Mangballaag ti Biblia: “Ngem ammuem daytoy, a kadagiti maudi nga aldaw dumtengto dagiti napeggad a tiempo a narigat a pakilangenan.” Apay a “narigat a pakilangenan” dagita nga aldaw? Intuloy ti teksto: “Dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta; ket umadayoka kadagitoy.”​—2 Timoteo 3:1-5.

Kadagita a naimpadtuan a sasao, nalabit a nadlawmo ti sasao a ‘dagiti maudi nga aldaw.’ Ania ti kayat a sawen dayta kenka? Kas iti gagangay a pannakaawat, no madakamat ‘dagiti maudi nga aldaw,’ iparipirip dayta nga adda banag nga asidegen nga agpatingga wenno maawan. Ania koma dayta? Imutektekam ti ikarkari ti Dios iti Saona.

Naan-anay a mapukaw dagiti nadangkes.

“Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—SALMO 37:10, 11.

“Ni Jehova saluadanna amin dagidiay mangay-ayat kenkuana, ngem amin dagidiay nadangkes talipuposennanto.”​—SALMO 145:20.

Awanton ti panangirurumen.

“Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Iti pannakairurumen ken iti kinaranggas subbotennanto ti kararuada.”​—SALMO 72:12, 14.

“Ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.”​—ROMA 8:21.

Mapennekton dagiti pisikal a kasapulan ti tao.

“Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.”​—MIKIAS 4:4.

“Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. Ta kas iti al-aldaw ti maysa a kayo kastanto ti al-aldaw ti ilik; ket ti aramid dagiti bukodda nga ima usarento a naan-anay dagidiay pinilik.” ​—ISAIAS 65:21, 22.

Agarinton ti kinahustisia.

“Ngarud, saan aya a sigurado a ti Dios ipakatnanto ti hustisia kadagiti pinilina nga umaw-awag kenkuana iti aldaw ken rabii . . . ? Ibagak kadakayo, sipapartak nga ipakatnanto kadakuada ti hustisia.”​—LUCAS 18:7, 8.

“Ni Jehova ket managayat iti kinahustisia, ket saannanto a panawan dagidiay nasungdona. Agingga iti tiempo a di nakedngan sigurado a masaluadandanto.”​—SALMO 37:28.

Agarinton ti kinalinteg.

“Ti kinalinteg isu ti sigurado a masursuronto dagiti agnanaed iti nabunga a daga.”​—ISAIAS 26:9.

“Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.”​—2 PEDRO 3:13.

Agbalbaliw Dagiti Tattao​—Uray Ita

Awan duadua a maragsakantayo amin kadagita a panagbalbaliw. Ngem ania dagiti pammatalged a matungpalto dagita? Kinapudnona, addaantayo ita iti pammaneknek a pumudnonto dagiti kari ti Dios. Ania dayta a pammaneknek? Ti kinapudno a minilmilion a tattao ita iti sangalubongan ti sibaballigi a nakaikkat kadagiti managimbubukodan, imoral, wenno naranggas a personalidad ken nasursuroda ti agbalin a mapagpiaran, mannakikappia, ken naasi. Iti intero a pakasaritaan ti tao, adda nakaro a guranggura, kinaranggas, ken panangpapatay a resulta ti pannakasinasina gapu iti puli, kultura, nasionalismo, politika, ken kadagiti kasasaad iti ekonomia. Ngem saan a kasta iti nagbabaetan dagiti Saksi ni Jehova, nga agdagup itan iti nasurok a pito a milion, ket buklenda ti maysa nga internasional a panagkakabsat.a Yantangay mapaspasamak ita ti kasta a panagbalbaliw, adda ngarud natibker a pamatiantayo a matungpalto dagiti kari ti Dios iti nakaskasdaaw a pamay-an.

Ngem ania ti mamagbalin a posible kadagita a panagbalbaliw? Sungbatan dayta ti sabali pay a kari ti Biblia, nga inlanad ni propeta Isaias. Insuratna:

“Ti lobo pudno a makipagtaengto iti apagbiit iti kalakian a kordero, ket iti urbon a kalding makikaiddanto a mismo ti leopardo, ket ti kigaw a baka ken ti burboran a bumaro a leon ken ti napalukmeg nga animal sangsangkamaysada; ket maysa a bassit nga ubing laeng ti mamangulonto kadakuada. . . . Uray ti leon manganto iti garami a kas iti toro. Ket ti agsussuso nga ubing pudno unay nga agay-ayamto iti abut ti kobra; ket iti pagserkan ti lawag maipaay iti nagita nga uleg pudno nga ikabilto ti napusot nga ubing ti bukodna nga ima. Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:6-9.

Ti laeng kadi panagkappianto dagiti animal ken tattao ti ipakpakauna daytoy a padto? Saan, adda pay sabali nga ipaspasimudaagna. Imutektekam no ania ti pakaigapuan ti panagbalbaliw kas iparangarang ti maudi a paset dayta a teksto: “Ti daga sigurado a mapnonto iti pannakaammo ken Jehova.” Ti kadi pannakaammo iti Dios balbaliwanna ti kababalin dagiti animal? Saan. Ngem dayta a pannakaammo kabaelanna a balbaliwan dagiti tattao! Ipakpakauna dayta a padto a dagidiay addaan iti inaanimal a pagannayasan mabaelanda a parmeken dagita ken mapatanorda ti personalidad a kas ken Kristo babaen iti tulong ti panagadal ken panangyaplikarda kadagiti isursuro ti Biblia.

Ti maysa a pagarigan ket ni Pedro.b Patienna a ti panagbalinna a kameng ti organisasion dagiti terorista ket pamay-an a panangilaban iti hustisia. Kalpasan ti pannakasanayna, nabilin a mangbomba iti maysa a kuartel dagiti polis. Naaresto ni Pedro idi agsagsaganan a mangitungpal iti dayta. Naibalud ni Pedro iti 18 a bulan, ket sadiay nga intultuloyna ti iyaalsana. Kabayatanna, ti asawa ni Pedro nangrugi a makipagadal iti Biblia kadagiti Saksi ni Jehova. Idi nawayawayaan ni Pedro, nangrugi met a makipagadal iti Biblia. Gapu iti naadalna maipapan ken Jehova a Dios, natignay a mangbalbaliw iti kababalin ken panangmatmatna iti biag. “Agyamyamanak ken Jehova ta awan ti napatayko bayat dagiti tawen a panagbalinko a terorista,” kuna ni Pedro. “Us-usarek itan ti kampilan ti espiritu ti Dios, ti Biblia, tapno maikasabak kadagiti tattao ti mensahe maipapan iti pudno a talna ken hustisia​—ti naimbag a damag ti Pagarian ti Dios.” Tapno mairanudna ti mensahe maipapan iti talna ken iti lubong nga awan ti kinaranggas, simmarungkar pay ni Pedro iti kuartel nga implanona idi a bombaen.

Ti nabileg nga epekto ti Sao ti Dios iti biag dagiti tattao ket mangipaay iti kanayonan a rason tapno mamatitayo iti kari ti Dios a sigurado nga agpatingganto ti amin a dakes nga aramid. Wen, saan nga agnanayon nga agaramid dagiti tattao iti kinadakes no di ket agbalbaliwdanto. Iti din agbayag, ikkatenton ni Jehova daydiay adda iti likudan dagiti dakes nga aramid, ni Satanas a Diablo, a mangimanmaniobra iti paspasamak ditoy lubong. Kuna ti Biblia: “Ti intero a lubong adda iti pannakabalin daydiay nadangkes.” (1 Juan 5:19) Ngem iti din agbayag, mapaksiatton. Mapukawto met dagidiay sipapakinakem a mangitultuloy iti kinadakesda. Anian a nagsayaatto ti agbiag iti dayta a panawen!

Ania ti masapul nga aramiden ti maysa a tao tapno sigurado a matagiragsakna ti kasta a masanguanan? Laglagipem a ti “pannakaammo ken Jehova” ti mamagbalbaliw kadagiti tattao ita ken mangyeg iti sangalubongan a panagbalbaliw iti asidegen a masanguanan. Babaen ti pananggun-od ken panangyaplikarmo iti umiso a pannakaammo iti Biblia​—a kas iti inaramid ni Pedro​—manamnamam met ti agbiag iti lubong a sadiay nga “agtaeng ti kinalinteg.” (2 Pedro 3:13) Idagadagmi ngarud kenka nga aprobetsarem ti nabatbati a gundaway a manggun-od iti pannakaammo maipapan iti Dios ken ni Jesu-Kristo, gapu ta biag nga agnanayon ti kaipapanan dayta kenka.​—Juan 17:3.

[Footnotes]

[Blurb iti panid 9]

Manamnamam met ti agbiag iti lubong a sadiay nga “agtaeng ti kinalinteg.”​—2 PEDRO 3:13