Papanglakayen, Mangukomkayo Buyogen Kinalinteg

“No adda panangusig iti nagbabaetan dagiti kakabsatyo, masapul a mangukomkayo buyogen kinalinteg.”​—DEUTERONOMIO 1:16.

 1. No maipapan iti panangukom, ania a pannakaipabaklay ti autoridad ti naaramid, ket aniat’ ipalnaad daytoy para kadagiti natauan nga ukom?

KAS KATAN-OKAN nga Ukom, impakumit ni Jehova ti hudisial nga autoridad iti Anakna. (Juan 5:27) Kas Ulo ti Kristiano a kongregasion, usaren met ni Kristo ti klase matalek ken naannad nga adipen ken ti Bagi a Manarawidwidna tapno mangdutok kadagiti panglakayen, a no dadduma agserbida kas uk-ukom. (Mateo 24:45-47; 1 Corinto 5:12, 13; Tito 1:5, 9) Kas nababbaba nga uk-ukom, dagitoy ket obligadoda a mangsurot a siinget iti ulidan dagiti nailangitan nga Ukom, ni Jehova ken ni Kristo Jesus.

Ni Kristo​—Ti Mapagulidanan nga Ukom

 2, 3. (a) Ania a Mesianiko a padto ti mangipanayag kadagiti galad ni Kristo kas Ukom? (b) Aniada a punto ti kangrunaanna a maikari a paliiwen?

² Maipapan ken Kristo kas Ukom, naimpadtuan unay a naisurat: “Ti espiritu ni Jehova agtaengto kenkuana, ti espiritu ti kinasirib ken pannakaawat, ti espiritu ti pammatigmaan ken kinamaingel, ti espiritu ti pannakaammo ken ti panagbuteng ken ni Jehova; ket addanto rag-o kenkuana iti panagbuteng ken Jehova. Ket saanto a mangukom a kas iti makita dagiti matana, ken saan met a mangbabalaw gapu laeng iti banag a mangngeg dagiti lapayagna. Ket buyogen kinalinteg ukomennanto dagiti napanglaw, ket buyogen kinalinteg mangbabalawto maipaay kadagiti naemma ditoy daga.”​—Isaias 11:2-4.

³ Paliiwenyo iti dayta a padto dagiti galad a mamagbalin ken Kristo a “mangukom iti kinalinteg iti mapagnaedan a daga.” (Aramid 17:31) Isut’ mangukom maitunos iti espiritu ni Jehova, nadiosan a kinasirib, pannakaawat, pammagbaga, ken pannakaammo. Paliiwenyo, met, nga isut’ mangukom iti panagbuteng ken Jehova. Ngarud, “ti tugaw a pangukoman ni Kristo” ket, mangiladawan unay, isu “ti tugaw a pangukoman ti Dios.” (2 Corinto 5:10; Roma 14:10) Isut’ naannad a mangukom kadagiti bambanag iti wagas a panangukom kadakuada ti Dios. (Juan 8:16) Isut’ saan a mangukom babaen laeng kadagiti langa wenno gapu laeng iti sao-sao. Isut’ mangukom buyogen kinalinteg agpaay kadagiti naemma ken dagiti napakumbaba. Anian a nakaskasdaaw nga Ukom! Ken anian a nakaskasdaaw nga ulidan para kadagiti imperpekto a tattao a naawagan tapno agserbi iti hudisial a saad ita!

Dagiti Naindagaan nga Ukom

 4. (a) Aniantot’ maysa kadagiti annongen dagiti 144,000 kabayatan ti Milenio a Panagturay ni Kristo? (b) Ania a padto ti mangipakpakita a dadduma kadagiti napulotan a Kristiano ket madutokanto kas uk-ukom bayat nga addada pay ditoy daga?

⁴ Ipasimudaag dagiti Kasuratan a ti bassit a bilang dagiti napulotan a Kristiano, mangrugi kadagiti 12 nga apostol, agbalindanto a kakadua nga ukom ni Jesus kabayatan ti Milenio. (Lucas 22:28-30; 1 Corinto 6:2; Apocalipsis 20:4) Dagiti natda kadagiti napulotan a kameng ti naespirituan nga Israel ditoy daga ket naukomdan a mismo ken naisublidan idi 1918-19. (Malakias 3:2-4) Maipanggep iti daytoy a pannakaisubli ti naespirituan nga Israel, naipadto: “Isublikto manen dagiti ukomyo kas idi unana, ken dagiti mammagbaga kadakayo kas idi punganay.” (Isaias 1:26) Ngarud, kas iti inaramidna “idi punganay” ti nainlasagan nga Israel, inikkan ni Jehova dagiti naisubli a natda kadagiti nalinteg nga ukom ken mammagbaga.

 5. (a) Asino dagiti “naikabil kas uk-ukom” kalpasan pannakaisubli ti naespirituan nga Israel, ken kasano a nailadawanda idiay libro ti Apocalipsis? (b) Babaen siasino a matultulongan itan dagiti napulotan a manangaywan iti hudisial a trabaho, ket kasano a masansanay dagitoy nga agbalin a nasaysayaat nga uk-ukom?

⁵ Kas pangrugian, dagiti ‘masirib a lallaki’ a “naikabil kas uk-ukom” ket napulotanda amin a lallakay, wenno panglakayen. (1 Corinto 6:4, 5) Dagiti matalek, mararaem a napulotan a manangaywan ket nailadawanda idiay libro ti Apocalipsis kas matengtengngel iti kannawan nga ima ni Jesus, kayatna asawen, iti sidong ti panangtengngel ken panangiwanwanna. (Apocalipsis 1:16, 20; 2:1) Nanipud 1935 dagiti napulotan immawatdan ti nasungdo a panangsuportar ti umad-adut’ bilangna a “dakkel nga umariwekwek,” a ti namnamada ket makalasat “iti dakkel a rigat” ken agbiag nga agnanayon iti maysa a paraiso a daga. (Apocalipsis 7:9, 10, 14-17) Bayat nga umasideg “ti boda ti Kordero,” umad-adu nga umad-adu kadagitoy ti dutdutokan ti napulotan a Bagi a Manarawidwid tapno agserbi kas papanglakayen ken uk-ukom iti sanguanan dagiti 66,000 a kongregasion dagiti Saksi ni Jehova iti intero a daga.a (Apocalipsis 19:7-9) Babaen kadagiti naisangsangayan a pagadalan, masansanayda a mangtaming iti responsabilidad iti “baro a daga” a kagimongan. (2 Pedro 3:13) Ti Kingdom Ministry School, a naidauluan iti ngudo ti 1991 iti adu a pagilian, ti nangipaganetget iti umiso a panangtaming kadagiti suppiat. Dagiti panglakayen nga agserbi kas uk-ukom ket obligadoda a mangtulad ken Jehova ken ni Kristo Jesus, a dagiti panangukomda ket napudno ken nalinteg.​—Juan 5:30; 8:16; Apocalipsis 19:1, 2.

Uk-ukom nga ‘Agtignay Buyogen Panagbuteng’

 6. Apay a dagiti panglakayen nga agserbi kadagiti mangukom a komite rebbeng nga ‘agtignayda buyogen panagbuteng’?

⁶ No ni Kristo a mismo mangukom iti panagbuteng ken Jehova ken buyogen tulong ti espirituna, anianto ketdin nga ad-adda nga aramiden dayta dagiti imperpekto a panglakayen! No madutokan nga agserbi iti maysa a mangukom a komite, kasapulanda ti ‘agtignay buyogen panagbuteng,’ nga umawagda “iti Ama a mangukom a di mangidumduma” tapno tulonganna ida a mangukom iti kinalinteg. (1 Pedro 1:17) Rebbeng a laglagipenda a tamtamingenda ti biag dagiti tattao, dagiti “kararuada,” kas dagidiay “mangidatagto kadakuada.” (Hebreo 13:17) Gapu itoy, sigurado nga agsungsungbatdanto met iti imatang ni Jehova gapu iti aniaman a naliklikan koma a kamali iti panangukom a mabalin a maaramidda. Iti kumentariona iti Hebreo 13:17, insurat ni J. H. A. Ebrard: “Annongen ti pastor a bantayanna dagiti kararua a naipakumit iti aywanna, ken . . . masapul nga isut’ agsungsungbat kadakuada amin, uray kadagidiay basolna ti pannakapukawda. Daytoy ket napasnek a sao. Tunggal maysa koma a masasao a ministro usigenna, a siboboluntario nga innalana daytoy naisangsangayan unay a saad nga addaan panagsungbat.”​—Idiligyo ti Juan 17:12; Santiago 3:1.

 7. (a) Aniat’ rebbeng a laglagipen dagiti moderno-aldaw nga ukom, ken aniat’ rebbeng a panggepda? (b) Aniada a leksion ti rebbeng a maadaw dagiti panglakayen manipud Mateo 18:18-20?

⁷ Dagiti panglakayen nga agserserbi iti saad a panangukom rebbeng a laglagipenda a dagiti pudno nga Ukom iti tunggal kaso isu ni Jehova ken ni Kristo Jesus. Lagipenyo ti naibaga kadagiti ukom idiay Israel: “Ta dikayo mangukom gapu iti tao no di ket gapu ken Jehova; ket isu adda kadakayo iti banag a panangukom. Ita ngarud adda koma kadakayo ti buteng ken Jehova. . . . Kastoyto ti aramidenyo tapno dikay koma agbasol.” (2 Cronicas 19:6-10) Buyogen nadayaw a panagbuteng, dagiti panglakayen a mangukom iti maysa a kaso rebbeng nga aramidenda ti kabaelanda tapno masiguradoda a ni Jehova ket pudno nga ‘adda kadakuada iti banag a panangukom.’ Ti pangngeddengda rebbeng a siuumiso nga isilnagna ti wagas a panangusig da Jehova ken Kristo iti dayta a banag. No ania ti simboliko a ‘galutanda’ (masarakanda a nakabasol) wenno ‘warwaranda’ (masarakanda nga awan basolna) ditoy daga rebbeng a nagalutanen wenno nawarwaranen idiay langit​—kas impalgak ti naisurat idiay naipaltiing a Sao ti Dios. No agkararagda ken Jehova iti nagan ni Jesus, addanto ni Jesus “iti tengngada” tapno tulonganna ida. (Mateo 18:18-20, footnote; Ti Pagwanawanan, Pebrero 15, 1988, panid 9) Ti kasasaad iti hudisial a panangusig rebbeng nga ipakitana a ni Kristo ket pudno nga adda iti tengngada.

Amin-Tiempo a Papastor

 8. Aniat’ kangrunaan a responsabilidad dagiti panglakayen iti arban, kas inyulidan ni Jehova ken ni Jesu-Kristo? (Isaias 40:10, 11; Juan 10:11, 27-29)

⁸ Dagiti panglakayen saanda a mangukom iti amin a tiempo. Isuda ket amin-tiempo a papastor. Mangngagasda, saan a manangdusa. (Santiago 5:13-16) Ti kangrunaan a kapanunotan iti likudan ti Griego a sao para iti manangaywan (epiʹsko·pos) ket isu daydiay maipapan iti mangsalaknib a panangtaripato. Ti Theological Dictionary of the New Testament kunaenna: “Iti panangsuplemento iti pastor [idiay 1 Pedro 2:25], ti termino nga [epiʹsko·pos] isingasingna ti panangipastor a trabaho a panagbantay wenno panagguardia.” Wen, ti kangrunaan a responsabilidadda isut’ panangbantay kadagiti karnero ken panangguardia kadakuada, a salimetmetan ida iti uneg ti arban.

 9, 10. (a) Kasano nga impaganetget ni Pablo ti kangrunaan nga annongen dagiti panglakayen, gapuna nga ania a saludsod ti nasayaat a maipasango? (b) Aniat’ ipalnaad dagiti sasao ni Pablo idiay Aramid 20:29, gapuna a kasano a mabalin a makissayan dagiti panglakayen ti bilang dagiti suppiat?

⁹ Iti panagsaona kadagiti panglakayen ti kongregasion idiay Efeso, inkabil ni apostol Pablo ti panangipaganetget kadagidiay pakaikarianna: “Saluadanyo dagiti bagbagiyo ken ti amin nga arban, a nangdutokan kadakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna iti dara ti bukodna nga Anak.” (Aramid 20:28) Itamtampok ni Pablo ti panangipastor, saan a panangdusa. Dadduma a panglakayen nasayaat no utobenda ti sumaganad a saludsod: ‘Maipaaymi ngata ti kalalainganna a kaadu ti tiempo a kasapulan nga agpalutpot ken mangtaming kadagiti suppiat no ipaaymi met ti ad-adu a tiempo ken pigsa iti panangipastor?’

¹⁰ Pudno, namakdaar ni Pablo maibusor kadagiti “manangparigat a lobo.” Ngem saan aya nga inumsina dagitoy gapu iti ‘dida panangtaming iti arban buyogen kinadungngo?’ (Aramid 20:29) Ken nupay impalnaadna a dagiti matalek a manangaywan rebbeng a paksiatenda dagitoy a “lobo,” saan kadi nga ipakita dagiti saona a dagiti panglakayen rebbeng a tratuenda dagiti sabsabali a kameng ti arban “buyogen kinadungngo”? No ti maysa a karnero agbalin a nakapuy iti naespirituan ken agpaknin, aniat’ kasapulanna​—panangkabil wenno panangagas, panangdusa wenno panangipastor? (Santiago 5:14, 15) Gapuna, regular koma a mangiyiskediol dagiti panglakayen iti tiempo maipaay iti trabaho a panangipastor. Mabalin nga iyeg daytoy ti naragsak a resulta ti basbassit a tiempo a mabusbos iti nagastar-tiempo a suppiat a pakairamanan dagiti Kristiano a pinarukman ti basol. La ketdi, ti kangrunaan a pakaseknan koma dagiti panglakayen isut’ panangipaay iti gubuayan ti inana ken pannakabang-ar, iti kasta itantandudoda ti kappia, talna, ken kinatalged iti ili ni Jehova.​—Isaias 32:1, 2.

Panagserbi kas Naparabur a Papastor ken Uk-ukom

11. Apay a dagiti panglakayen nga agserbi kadagiti mangukom a komite kasapulanda ti di panangidumduma ken “ti sirib nga aggapu sadi ngato”?

¹¹ Ti ad-adda a naipamaysa a panangipastor sakbay a ti maysa a Kristiano ket makaaramid iti maysa a palso nga addang ket mabalin a pabassitenna ti bilang dagiti suppiat iti ili ni Jehova. (Idiligyo ti Galacia 6:1.) Nupay kasta, gapu iti natauan a basol ken kinaimperpekto, mabalin a dagiti Kristiano a manangaywan maulit-ulit a kasapulanda a tamingen dagiti kaso ti panagsalungasing. Aniada a prinsipio ti rebbeng a mangiwanwan kadakuada? Dagitoy saanda a nagbaliw nanipud idi panawen ni Moises wenno iti panawen dagiti immuna a Kristiano. Dagiti sasao ni Moises a naiturong kadagiti ukom idiay Israel ket agkurri pay laeng: “No adda panangusig iti nagbabaetan dagiti kakabsatyo, masapul a mangukomkayo buyogen kinalinteg . . . Masapul a dikay mangidumduma iti panangukom.” (Deuteronomio 1:16, 17) Ti di panangidumduma ket maysa a saguday ti “sirib nga aggapu sadi ngato,” ti sirib a napateg unay para kadagiti panglakayen nga agserserbi kadagiti mangukom a komite. (Santiago 3:17; Proverbio 24:23) Ti kasta a sirib tulonganna ida a makaawat iti nagdumaan ti kinakapuy ken kinadakes.

12. Iti ania a pannakaawat a dagiti ukom saanda laeng a kasapulan ti agbalin a nalinteg a lallaki no di ket nasayaat a lallaki met?

¹² Dagiti panglakayen “masapul a mangukomda buyogen kinalinteg,” maitunos kadagiti pagalagadan ni Jehova no ania ti umiso ken dakes. (Salmo 19:9) Kaskasdi, bayat nga ikagumaanda ti agbalin a nalinteg a lallaki, rebbeng a pagreggetanda met ti agbalin a naimbag a lallaki, iti anag ti panangilasin nga inaramid ni Pablo idiay Roma 5:7, 8. Iti panagkumentona kadagitoy a bersikulo iti artikulona iti “Kinalinteg,” ti pagreperensiaan nga Insight on the Scriptures kunaenna: “Ti pannakausar ti Griego a termino ipakitana a ti tao a nakadidillaw iti, wenno mailasin babaen iti, kinaimbag isu daydiay tao a naparabur (agannayas nga agaramid ti naimbag wenno mangiyeg gunggona kadagiti sabsabali) ken manggunggona (siaaktibo a mangiyeb-ebkas iti kasta a kinaimbag). Isut’ saan laeng a basta maseknan iti panangaramid no ania ti kalikaguman ti kinahustisia no di ket lumabes pay iti daytoy, gapu ta tinignay ti nasayaat a konsiderasion kadagiti sabsabali ken ti tarigagay a manggunggona ken tumulong kadakuada.” (Tomo 2, panid 809) Dagiti panglakayen a saan laeng a nalinteg no di ket naimbag pay ti mangtrato kadagiti nagbasol buyogen naanus a konsiderasion. (Roma 2:4) Tarigagayanda koma nga ipakita ti asi ken pannakipagrikna. Aramidenda koma amin a kabaelanda a tumulong iti nagbasol a makakita iti pannakasapul ti panagbabawi, nupay iti damo kasla saan a mangipangag kadagiti panagreggetda.

Umiso a Kababalin kadagiti Panangusig

13. (a) No ti maysa a panglakayen agserbi kas ukom, isut’ di agsardeng nga ania? (b) Ania a balakad ni Pablo ti agaplikar met kadagiti hudisial a panangusig?

¹³ No ti maysa a kasasaad kalikagumanna ti maysa a hudisial a panangusig, rebbeng a di liplipatan dagiti manangaywan a papastorda latta, a makilanglangen kadagiti karnero ni Jehova, iti sidong “ti naimbag a pastor.” (Juan 10:11) Ti balakad nga inted ni Pablo agpaay iti regular a tulong a maited kadagiti karnero nga adda iti pakarigatan agaplikar iti isu met laeng a dagsen kadagiti hudisial a panangusig. Insuratna: “Kakabsat, no ti maysa a tao masukalan iti uray ania a panagsalungasing sakbay a madlawna dayta, dakayo nga addaan naespirituan a kualipikasion bagbagaanyo dayta babaen ti espiritu ti kinatakneng, a kitaem ti bagim, di la ket ta masulisogka met. Agtitinnulongkayo iti pakadagsenan ti maysa ken maysa, ket iti kasta tungpalenyo ti linteg ni Kristo.”​—Galacia 6:1, 2.b

14. Kasanot’ rebbeng a panangmatmat dagiti manangaywan kadagiti hudisial a panangusig, ken aniat’ rebbeng a kababalinda iti managbasol?

¹⁴ Imbes nga ibilangda dagiti bagbagida a nangangato nga ukom a maikari a mangtarawidwid iti panangdusa, dagiti panglakayen nga agserserbi iti mangukom a komite rebbeng a matmatanda ti panangusig kas sabali pay nga aspeto ti panangipastor a trabahoda. Maysa kadagiti karnero ni Jehova ti agpegpeggad. Aniat’ maaramidanda tapno isut’ maispalda? Naladaw unayen aya a tulongan daytoy a karnero nga immikayen manipud iti arban? Inanamaentayo a saan koma. Taginayonen koma dagiti panglakayen ti positibo a panangmatmat iti panangipakita iti asi no la ketdi mayanatup. Saan a tapno ipababada dagiti pagalagadan ni Jehova no adda naaramid a nadagsen a basol. Ngem ti panagbalinda a sipapanunot kadagiti mangep-ep a kasasaad ti tumulong kadakuada a mangipagteng iti asi no posible. (Salmo 103:8-10; 130:3) Makapaladingit, dadduma a managbasol ket napalwengda unay iti kababalinda a dagiti panglakayen ket obligadoda a mangipakita iti kinatibker, nupay saan a pulos a kinagubsang.​—1 Corinto 5:13.

Ti Panggep dagiti Hudisial a Panangusig

15. No tumaud ti maysa a serioso a parikut iti nagbabaetan dagiti indibidual, aniat’ rebbeng nga umuna pay a maikeddeng?

¹⁵ No ti maysa a serioso a parikut ket tumaud iti nagbabaetan dagiti indibidual, dagiti masirib a panglakayen ikeddengda pay nga umuna no dagidiay nairaman ket pinadasdan a risuten a pribado dayta a banag, iti espiritu ti Mateo 5:23, 24 wenno Mateo 18:15. No di nagkurri daytoy, nalabit umdasen ti balakad ti maysa wenno dua a panglakayen. Ti hudisial a tignay ket nasken no adda naaramid a nadagsen a basol a mabalin mangituggod iti panangilaksid. (Mateo 18:17; 1 Corinto 5:11) Masapul nga adda natakneng a Nainkasuratan a pangibatayan iti panangbuangay iti maysa a mangukom a komite. (Kitaenyo Ti Pagwanawanan, Setiembre 15, 1989, panid 18.) No adda mabuangay a komite, dagiti koma kakualipikaduan a panglakayen ti mapili iti partikular a kaso.

16. Aniat’ pagreggetan a ragpaten dagiti panglakayen babaen kadagiti hudisial a panangusig?

¹⁶ Aniat’ pagreggetan a ragpaten dagiti panglakayen babaen kadagiti hudisial a panangusig? Umuna, imposible ti mangukom iti kinalinteg no saan a maammuan ti kinapudno. Kas idiay Israel, dagiti serioso a banag masapul a ‘masukimatda a naimbag.’ (Deuteronomio 13:14; 17:4) Gapuna a maysa a panggep ti panangusig ket tapno takuaten ti kinapudno maipapan iti kaso. Ngem mabalin ken rebbeng a maaramid daytoy buyogen ayat. (1 Corinto 13:4, 6, 7) Iti kanito a naammuanen dagiti kinapudno, aramiden dagiti panglakayen ti maiparbeng tapno masalakniban ti kongregasion ken mataginayon iti uneg dayta dagiti nangato a pagalagadan ni Jehova ken ti nawaya a panagayus ti espirituna. (1 Corinto 5:7, 8) Nupay kasta, ti maysa kadagiti panggep ti maysa a panangusig ket tapno ispalenna, no la ketdi mabalin, ti maysa nga agpegpeggad a managbasol.​—Idiligyo ti Lucas 15:8-10.

17. (a) Kasanot’ rebbeng a pannakatrato ti maysa a napabasol a tao kabayatan ti panangusig, ken buyogen ania a panggep? (b) Aniantot’ kalikaguman daytoy iti biang dagiti kameng ti mangukom a komite?

¹⁷ Ti maysa a napabasol a tao rebbeng a pulos a di matrato a kas tay saan a maysa a karnero ti Dios. Isut’ rebbeng a matrato buyogen kinadungngo. No naaramid ti maysa a basol (wenno basbasol), ti panggep dagiti nalinteg nga ukom isu ti panangtulongda iti managbasol tapno mailinteg, tapno maawatanna ti di-kinaumiso ti dalanna, tapno agbabawi, ket ngarud marabsut manipud “iti silo ti Diablo.” Kalikaguman dayta ti “arte ti panangisuro,” “panangisuro buyogen kinaalumanay.” (2 Timoteo 2:24-26; 4:2) Ania ngay no ti managbasol bigbigenna nga isut’ nakabasol, pudpudno a naduyok ti pusona, ken agkiddaw ti pammakawan ken Jehova? (Idiligyo ti Aramid 2:37.) No kumbinsido ti komite a sipapasnek a kayatna ti tulong, kaaduanna a din kasapulan nga isut’ mailaksid.​—Kitaenyo Ti Pagwanawanan, Hulio 1, 1983, panid 30, parapo 2.

18. (a) Kaano a rebbeng nga ipakita ti maysa a mangukom a komite ti kinatibker iti panangilaksidna iti maysa a managbasol? (b) Gapu iti ania a nasaem a kasasaad a dagiti panglakayen rebbeng nga iyagawada dagiti bagbagida maipaay kadagiti maiyaw-awan a karnero?

¹⁸ Iti sabali a bangir, no dagiti kameng ti mangukom a komite ket maipasangoda iti nabatad a kaso ti awan sardayna a panagapostasia, sipapakinakem nga iyaalsa maibusor kadagiti linteg ni Jehova, wenno nakaro a kinadakes, ti annongenda ket isu ti panangsalaknibda kadagiti sabsabali a kameng ti kongregasion babaen panangilaksidda iti di managbabawi a managbasol. Saan nga obligado ti mangukom a komite a makisarita a maulit-ulit iti managbasol wenno suruanda a mangaramid iti maikaniwas iti riknana, a pilitenda nga agbabawi, no nabatad nga isut’ awanan nadiosan a panagladingit.c Kadagiti kallabes a tawen dagiti panangilaksid iti intero a lubong ket napattapatta a 1 porsiento dagiti agibumbunannag. Kaipapanan dayta nga iti agarup sangagasut a karnero nga agtalinaed iti pagtaraknan, maysa ti mapukpukaw​—nupay temporario. No usigen ti mabusbos a panawen ken bannog tapno maiyeg ti maysa a tao iti uneg ti pagtaraknan, saan kadi a nagsaem a maammuan a pinullo a ribo ti ‘maipulpulang ken Satanas’ iti tunggal tawen?​—1 Corinto 5:5.

19. Aniat’ rebbeng a di pulos liplipatan dagiti panglakayen nga agserserbi iti maysa a mangukom a komite, gapuna nga aniat’ panggepda?

¹⁹ Dagiti panglakayen a mangrugrugi a mangusig iti suppiat rebbeng a laglagipenda a kaaduanna a kaso ti basol idiay kongregasion iramanna ti kinakapuy, saan a kinadakes. Rebbengna a dida pulos liplipatan ti pangngarig ni Jesus maipapan iti napukaw a karnero, a sinerraanna kadagiti sasao a: “Kunak kadakayo a kasta met nga ad-adunto a ragsak sadi langit gapu iti maysa a managbasol nga agbabawi, ngem kadagiti siam a pulo ket siam a nasingpet a dida masapul ti panagbabawi.” (Lucas 15:7) Pudno unay, “ni Jehova . . . dina tarigagayan ti asinoman a madadael no di ket tarigagayanna ti amin nga agturong koma iti panagbabawi.” (2 Pedro 3:9) Buyogen tulong ni Jehova, adu a mangukom a komite iti intero a lubong ti mangaramid iti aginggat’ kabaelanda tapno mamatauddat’ rag-o idiay langit babaen panangtulongda kadagiti managbasol a makakita iti pannakasapul ti panagbabawi ken panangisimpada manen a sititibker kadagiti sakada iti akikid a dalan a mangiturong iti biag nga agnanayon.​—Mateo 7:13, 14.

[Dagiti Footnote]

Pangrepaso a Salsaludsod

◻ Iti panangsurotda ti ulidan ti Naindaklan a Pastor ken ti Naimbag a Pastor, aniat’ rebbeng nga agbalin a kangrunaan a paginteresan dagiti panglakayen?

◻ Iti ania a pamay-a n a dagiti panglakayen maikagumaanda a kissayan ti bilang dagiti suppiat?

◻ Iti ania a pannakaawat a dagiti ukom saanda laeng a kasapulan ti agbalin a nalinteg no di ket agbalin pay met a naimbag?

◻ Kasanot’ rebbeng a pannakatrato ti maysa a managbasol kabayatan ti panangusig, ken buyogen ania a panggep?

◻ Apay a ti panangilaksid ket maysa a kaudian a pamuspusan?

[Ladawan iti panid 16]

No maaramid ti nasaksakbay a panangipastor, adu a suppiat ti mabalin a maliklikan

[Ladawan iti panid 18]

Uray kabayatan ti hudisial a panangusig, dagiti panglakayen rebbeng a padasenda nga ilinteg ti maysa a managbasol iti espiritu ti kinaalumanay