Inaldaw Kadi nga Iyim-imtuodmo, “Sadino ti Ayan ni Jehova?”

1, 2. (a) Ania ti naespirituan a kasasaad dagiti Judio idi kaaldawan ni Jeremias? (b) Ania koma ti rumbeng nga inaramid dagiti taga-Juda mainaig iti kasasaadda?

AGLULUA ni Jeremias. Mariribukan iti agdama a kasasaad dagiti kailianna ken iti impaipadto ti Dios kenkuana maipapan iti masakbayanda. No la koma kasla burayok ti ulona ket dagiti matana ubbog ti lua a di maatianan. Adda panggapuan ni Jeremias nga agleddaang gapu iti kasasaad ti Juda. (Jer. 9:1-3; basaen ti Jeremias 8:20, 21.) Gapu ta agtultuloy a linaksid dagiti Judio ti linteg ni Jehova ken saanda nga impangag ti timekna, aglak-amda iti didigra.—Jer. 6:19; 9:13.

² Nupay kasta, magusgustuan dagiti taga-Juda ti ibagbaga dagiti narelihiosuan a panguluenda nga awan ti rumbeng a pagdanaganda, isu nga inyaleng-alengda dagiti imbaga ni Jehova maipapan kadagiti aramidda. (Jer. 5:31; 6:14) Kasda la pasiente nga agbirbirok iti doktor a mangibaga kadakuada nga awan ti rumbeng a pagdanaganda idinto ta ammona a nakaro ti sakitda. No adda nakaro a rikriknaem, saan kadi a kayatmo a maammuan no ania a talaga ti saksakitem tapno maagasanka iti kabiitan a panawen? Iti naespirituan nga anag, rumbeng koma nga inammo dagiti Judio idi kaaldawan ni Jeremias ti agpayso a kasasaadda iti naespirituan. Inyimtuodda koma: “Sadino ti ayan ni Jehova?”—Jer. 2:6, 8.

 3. (a) Ania ti kaipapananna kadagiti Judio ti saludsod a “Sadino ti ayan ni Jehova?” (b) Kasano ti panangbirok dagiti Judio ken ni Jehova?

³ Para kadagiti Judio, ti panangyimtuod iti “Sadino ti ayan ni Jehova?” kaipapananna ti panagpaiwanwan iti Dios iti amin a pangngeddeng nga aramidenda, babassit man wenno dadakkel. Saan a kasta ti inaramid dagidi a Judio. Ngem kalpasan ti pannakadadael ti Jerusalem ken ti panagsublida manipud iti Babilonia, masapul a ‘sapulen’ ken ‘birokenda ni Jehova.’ No aramidenda dayta, masarakanda ni Jehova ken maammuanda ti daldalanna. (Basaen ti Jeremias 29:13, 14.) Kasanoda a maaramidan dayta? Ti maysa a pamay-an ket ti sipapasnek a panagkararagda iti Dios, a dawatenda ti panangiwanwanna. Kasta ti inaramid ni Ari David. Impakaasina iti Dios: “Ipakaammom kaniak dagiti bukodmo a dalan, O Jehova; isurom kaniak dagiti bukodmo a dana.” (Sal. 25:4) Imutektekam ti inyawis ti Managdengngeg iti kararag babaen ken Jeremias idi maika-10 a tawen ti panagturay ni Ari Zedekias. “Umawagka kaniak, ket sungbatankanto ken sisasaganaak a mangibaga kenka iti naindaklan ken di maawatan a bambanag a saanmo a naammuan.” (Jer. 33:3) No ti ari ken ti nasukir a nasion ket umawag iti Dios, ipalgakna dagiti banag a ‘dida maawatan,’ ti pannakalangalang ti Jerusalem ken ti pannakaipasdekna manen kalpasan ti 70 a tawen.

4, 5. Kadagiti ania pay a pamay-an a dagiti Judio mabirokanda ni Jehova?

⁴ Ti maysa pay a pamay-an a mabirokan dagiti Judio ni Jehova ket babaen ti panangsukimatda iti pakasaritaan ti ilina ken ti pannakilangenna kadakuada tapno maammuanda no ania ti makaay-ayo iti Dios ken no ania ti di makaay-ayo kenkuana. Adda kadakuada dagiti sinurat ni Moises ken ti adu a naipaltiing a rekord maipapan iti pakasaritaan ti Israel agraman dagiti libro a nakailanadan ti pakasaritaan dagiti ari ti Israel ken Juda. No inutobda laeng koma dagita ken impangagda dagiti pudno a mammadto ti Dios, mabalin a natarusanda ti sungbat ti saludsod a “Sadino ti ayan ni Jehova?”

⁵ Ti maikatlo a pamay-an a mabirokan dagiti Judio ni Jehova ket babaen ti panagsursuroda kadagiti mismo a kapadasanda ken iti kapadasan dagiti dadduma. Dina kayat a sawen a sursuruenda ti amin babaen kadagiti kapadasanda, ngem mabalin a nagunggonaanda no inut-utobda dagiti napalabas nga aramidda ken no ania ti panangmatmat ni Jehova kadagita. No pinampanunotda dagita, naawatanda koma no ania ti panangmatmat ni Jehova kadagiti aramidda.—Prov. 17:10.

 6. Kasano a makaparegta kenka ti kapadasan ni Job?

⁶ Ngem mapantayo iti kaaldawantayo. No agdesdesisionka ken no adda pampanunotem nga aramiden, kanayon kadi nga iyim-imtuodmo, “Sadino ti ayan ni Jehova?” Mabalin nga annugoten dagiti dadduma a saanda a kanayon nga ar-aramiden dayta. No pudno dayta kenka, saanka a maupay. Pudno met dayta uray iti matalek a patriarka a ni Job. Idi agsagsagaba iti kasta unay, ti laeng bagina ti pinanunotna, isu a kasapulan nga ipalagip ni Eliu kenkuana ti gagangay a pagannayasan ti tao: “Awan nagkuna, ‘Sadino ti ayan ti Dios a Naindaklan a Nangaramid kaniak?’” (Job 35:10) Indagadag ni Eliu ken ni Job: “Ipakitam a sipapaliiwka iti nakaskasdaaw nga ar-aramid ti Dios.” (Job 37:14) Nasken nga utoben ni Job dagiti nakaskasdaaw a parsua ni Jehova ken ti pannakilangen ti Dios kadagiti tattao. Babaen ti mismo a kapadasanna, naawatan ni Job ti daldalan ni Jehova. Kalpasan nga inibturan ni Job ti nakaro a rigat ken naimatanganna no kasano a tinaming ni Jehova ti bambanag, kinunana: “Nagsaoak, ngem saanko idi a maaw-awatan [dagiti] bambanag a nakaskasdaaw unay kaniak, isuda a saanko nga ammo. Iti alimadamad nangngegko ti maipapan kenka, ngem ita ti bukodko a mata makitanaka.”—Job 42:3, 5.

 7. Kas nailadawan iti panid 116, ania ti sumaganad nga usigentayo?

⁷ No maipapan ken Jeremias, intultuloyna a binirok ni Jehova ket nasarakanna. Ni Jeremias ket saan a kas kadagiti kailianna, ta iti las-ud ti adu a tawen a simamatalek a panagserbina, agtultuloy nga inyimtuodna: “Sadino ti ayan ni Jehova?” Kadagiti sumarsaruno a parapo, maammuantayo iti ulidan ni Jeremias no kasanotay a biroken ken masarakan ni Jehova babaen ti kararag, panagadal, ken kadagiti personal a kapadasan.—1 Cron. 28:9.

 8. Kadagiti ania a kasasaad nga immadani ni Jeremias ken ni Jehova babaen ti kararag?

⁸ Iti las-ud ti adu a tawen a panagserbi ni Jeremias kas pannakangiwat ti Dios iti nasion ti Juda, binirokna ni Jehova babaen ti naimpusuan a panagkarkararagna. Dimmawat iti tulong ti Dios idi nasken nga iwaragawagna dagiti mensahe a di magustuan ti kaaduan, idi mariknana a kayatnan ti agsardeng, ken idi maburiboran kadagiti mapaspasamak. Impangag ti Dios dagiti kararagna ken imbagana no ania dagiti aramidenna. Usigentayo ti sumagmamano a pagarigan.

 9. (a) Iti Jeremias 15:15, 16, kasano nga inyebkas ni Jeremias ti rikriknana, ken kasano a sinungbatan ni Jehova? (b) Iti panagkunam, apay a napateg nga iyebkasmo ti rikriknam iti kararag?

⁹ Naminsan, idi nabilin ni Jeremias a mangipakaammo iti nadagsen a mensahe, iti panagriknana, isu ket ilunlunod ti amin. Gapuna, nagpakaasi iti Dios a lagipenna ti propetana. Usigem ti kararagna a nailanad iti Jeremias 15:15, 16 a nangyebkasanna iti riknana idi impangag ti Dios ti panagpakaasina. (Basaen.) Iti dayta a kararag, inyebkas ni Jeremias ti saem a marikriknana. Ngem idi nasarakanna ti sasao ti Dios ken kinnanna dagita, no ar-arigen, napno ti pusona iti rag-o! Ni Jehova tinulonganna ni Jeremias a mangipateg iti pribilehio a mangawit iti nagan ti Dios ken mangiwaragawag iti mensahena. Naammuan ni Jeremias no sadino ti ayan ni Jehova iti daytoy a banag. Ania ti maadaltayo iti dayta?

10. Kasano a sinungbatan ti Dios ti kararag ni Jeremias idi imbagana a saanen a pulos nga agsao iti nagan ni Jehova?

¹⁰ Iti sabali pay a gundaway, kinuna ni Jeremias a saanen a pulos nga agsao iti nagan ni Jehova kalpasan a kinabil ti padi a ni Pasur nga anak ni Immer. Kasano a sinungbatan ti Dios ti kararag ni Jeremias? (Basaen ti Jeremias 20:8, 9.) Saan a dinakamat ti Biblia a simmungbat ti Dios babaen ti panagsaona manipud langit. Ngem ti sao ti Dios ket nagbalin a kasla gumilgil-ayab nga apuy a napupok kadagiti tulangna a dina magawidan, ket masapul nga ipakaammona. Wen, babaen ti panangyebkasna iti Dios iti pudno a rikriknana ken babaen ti panagtignayna a maitunos iti ammona a pagayatan ti Dios, nagutugot ni Jeremias a mangitungpal iti ipapaaramid ti Dios kenkuana.

11, 12. Kasano a nasungbatan ti saludsod ni Jeremias maipapan iti kasla panagballigi dagiti nadangkes?

¹¹ Insaludsod ni Jeremias no apay a naballigi dagiti nadangkes. (Basaen ti Jeremias 12:1, 3.) Nupay saanna a pinagduaduaan ti kinalinteg ni Jehova, kayat a maammuan ni Jeremias ti sungbat ti ‘reklamona.’ Ipakita ti kinaprangkana nga isu ket nasinged iti Dios, a kas iti kinasinged ti maysa nga ubing iti ipatpategna nga ama. Saanna laeng ngamin a maawatan no apay a rumangrang-ay ti adu kadagiti kailianna iti laksid ti kinadakesda. Nakasarak kadi ni Jeremias iti makapnek a sungbat? Impasigurado kenkuana ni Jehova nga ikkatennanto dagiti nadangkes a kas iti mula a maparut iti nagtubuanna. (Jer. 12:14) Idi makita ni Jeremias no kasano a nasungbatan dagiti banag nga inkararagna, dimmakkel la ketdi ti panagtalekna iti kinahustisia ti Dios. Kas resultana, mabalin nga ad-adda a nagkarkararag ni Jeremias, nga iyebkasna iti Amana ti marikriknana.

¹² Idi dandanin agpatingga ti panagturay ni Zedekias, idi a laklakuben dagiti Babilonio ti Jerusalem, kinuna ni Jeremias a ‘dagiti mata ni Jehova silulukat iti amin a daldalan ti annak ti tattao, tapno itdenna iti tunggal maysa ti maitunos iti daldalanna ken maitunos iti bunga dagiti pannakilangenna.’ (Jer. 32:19) Naawatan ni Jeremias no sadino ti pagtaktakderan ni Jehova no maipapan iti hustisia, a kitkitaen ti Dios ti ar-aramiden ti tunggal maysa ken im-imdenganna dagiti napasnek a kararag dagiti adipenna. Iti met biang dagiti tattao, ad-adda a mapaneknekanda a ti Dios ipaayna iti “tunggal maysa ti maitunos iti daldalanna ken maitunos iti bunga dagiti pannakilangenna.”

13. Apay a masiguradom a matungpal ti pagayatan ti Dios?

¹³ Mabalin a saantay a pagduaduaan ti kinahustisia ti Dios ken ti kinasiribna agpadpada iti ar-aramidenna ken iti aramidennanto pay a mangibanag iti pagayatanna. Nupay kasta, magunggonaantayo no utobentayo dagiti napasaran ni Jeremias ken iyebkastayo kadagiti kararagtayo ti linaon ti pusotayo. Ti panangyebkas iti riknatayo iti kasta a pamay-an pabilgenna ti panagtalektayo a di bumurong a tungpalen ni Jehova ti pagayatanna. Uray no adda dagiti kasasaad a ditay matarusan iti agdama, wenno no apay a kasla nabannayat ti pannakaibanag ti pagayatan ti Dios, mabalintay nga iyebkas iti kararagtayo nga agtalektayo a kontroladona dagiti bambanag. Matungpal ti pagayatan ni Jehova iti wagas ken tiempo nga ammona a kasayaatan. Sigurado daytoy, isu nga awan panggapuantayo nga agduadua. Itultuloytayo nga iyimtuod ti saludsod a “Sadino ti ayan ni Jehova?” iti anag a nainkararagan nga ikagumaantayo a tarusan ti pagayatanna ken imutektekantayo no kasanona nga itungtungpal dayta.—Job 36:5-7, 26.

14. Kasanotay nga ammo nga inadal ni Jeremias ti pakasaritaan ti ili ti Dios?

¹⁴ Mainaig iti saludsod a “Sadino ti ayan ni Jehova?” bigbigen ni Jeremias a kasapulanna ti ‘pannakaammo maipapan ken Jehova.’ (Jer. 9:24) Inadalna la ketdi ti pakasaritaan ti ili ti Dios idi binukelna dagiti libro a pagaammo itan kas 1 ken 2 nga Ar-ari. Espesipiko a dinakamatna ti “libro dagiti pasamak ni Solomon,” ti “libro dagiti pasamak iti al-aldaw ti ar-ari ti Israel,” ken ti “libro dagiti pasamak iti al-aldaw ti ar-ari ti Juda.” (1 Ar. 11:41; 14:19; 15:7) No kasta, natarusanna no kasano a nagtignay ni Jehova iti nadumaduma a kasasaad. Naawatan ni Jeremias no ania ti makaay-ayo ken ni Jehova ken no ania ti panangmatmatna kadagiti pangngeddeng ti tattao. Mabalin a nagkonsulta met kadagiti naipaltiing a sursurat nga adda idi panawenna, kas kadagiti insurat da Moises, Josue, Samuel, David, ken Solomon. Awan duadua nga adu ti ammona maipapan kadagiti immun-una a mammadto kasta met kadagiti kapanawenanna a mammadto. Kasano a nagunggonaan ni Jeremias iti personal a panagadalna?

15. Ania ti nagimbaganna ken Jeremias ti panangsukimatna iti padto ni Elias?

¹⁵ Insurat ni Jeremias ti maipapan ken Jezebel, ti nadangkes nga asawa ni Acab nga ari ti Samaria. Karaman iti salaysayna ti imbaga ni Elias a ni Jezebel ket rangrangkayen dagiti aso iti sangkadisso a daga ti Jezrael. (1 Ar. 21:23) Ket maitunos iti insurat ni Jeremias, ammom a kalpasan ti agarup 18 a tawen, naitapuak ni Jezebel iti tawa, pinayatpayatan ti kabalio ni Jehu, ken kinnan dagiti aso. (2 Ar. 9:31-37) Napabileg la ketdi ti pammati ni Jeremias iti sao ti Dios idi sinukimatna ti padto ni Elias ken ti kaitungpalan daytoy, uray dagiti detalyena. Wen, nakapagibtur kas propeta gapu iti pammatina a napabileg babaen ti panangadalna kadagiti inaramid ni Jehova.

16, 17. Iti panagkunam, apay a nakapagtultuloy ni Jeremias a nangpakdaar kadagiti nadangkes nga ari idi kaaldawanna?

¹⁶ Mangalatayo iti sabali pay a pagarigan. Ania ti panagkunam a nakatulong ken Jeremias nga agtultuloy a mangpakdaar kadagiti nadangkes nga ari a kas kada Jehoiaquim ken Zedekias iti laksid ti pannakaidadanesna? Ti maysa a kangrunaan a rason ket pinagbalin ni Jehova ti propetana “a maysa a nasarikedkedan a siudad ken maysa nga adigi a landok ken padpader a gambang” maibusor kadagiti ari ti Juda. (Jer. 1:18, 19) Ngem ditay liplipatan a sinukimat a naimbag ni Jeremias ti maipapan iti panagturay dagiti immun-una nga ari ti Juda ken Israel. Insuratna a ni Manases nangbangon “kadagiti altar maipaay iti isuamin a buyot ti langlangit iti dua a paraangan ti balay ni Jehova,” indatagna ti anakna kas daton a mapuoran, ken adu a tattao nga awan basolna ti pinapapatayna. (2 Ar. 21:1-7, 16; basaen ti Jeremias 15:4.) Ngem ammo la ketdi ni Jeremias nga idi nagpakumbaba ni Manases ken nagkarkararag ken ni Jehova, “impalubosna [ni Jehova] nga isu mapagpakaasianna,” ket insubli ni Jehova ti ari iti saadna.—Basaen ti 2 Cronicas 33:12, 13.

¹⁷ Saan a nadakamat ni Jeremias kadagiti suratna a naasian ni Jehova ken ni Manases. Ngem natay ni Manases 15 a tawen laeng wenno nasursurok pay sakbay a nadutokan ni Jeremias kas mammadto. No kasta, naammuan la ketdi ti propeta ti napasamak idi nagbabawyan ti ari dagiti agkakadakes nga inaramidna. Ti panangsukimat ni Jeremias iti maipapan kadagiti dakes nga inaramid ni Manases ken ti nagbanaganna ket nakatulong la ketdi kenkuana a makabigbig iti pateg ti pananggutugot kadagiti ari, a kas ken Zedekias, a manggun-od iti parabur ken naayat a kinamanangngaasi ni Jehova. Uray ti ari a pagaammo nga agdaydayaw iti didiosen ken manangibukbok iti dara ket mabalinna ti agbabawi ken mapakawan. No sika ti adda iti kasasaad ni Jeremias, mapabilegka ngata nga agtultuloy kabayatan ti panagturay dagiti dadduma pay a dakes nga ari no panunotem dagiti napasamak ken Manases?

18. Ania ti mabalin a nasursuro ni Jeremias iti kapadasan ni Uria, ken apay a kasta ti sungbatmo?

¹⁸ Iti panagserbina kas propeta, sigurado a nakasursuro ni Jeremias iti nakitana a panagtignay dagiti kapanawenanna iti nadumaduma a kasasaad. Maysa kadakuada ni propeta Uria, a nagipadto maibusor iti Jerusalem ken Juda kabayatan ti panagturay ni Jehoiaquim. Ngem gapu iti butengna ken Ari Jehoiaquim, naglibas ni Uria ket napan idiay Egipto. Gapu iti dayta, nangibaon ti ari kadagiti lallaki idiay Egipto tapno alaenda ni Uria, ket kalpasanna pinapapatayna. (Jer. 26:20-23) Panagkunam, adda ngata nasursuro ni Jeremias iti kapadasan ni Uria? Ti panagtultuloy ni Jeremias a nangpakdaar kadagiti Judio—uray iti templo a mismo—maipapan iti umad-adani a pannakadadael ti Jerusalem paneknekanna nga adda nasursurona. Nagtalinaed a natured ni Jeremias, ket saan a binaybay-an ni Jehova. Tinignay la ketdi ti Dios ni Ahicam, nga anak ni Safan, a mangsalaknib iti biag ni natured a Jeremias.—Jer. 26:24.

19. Ania ti nasursuro ni Jeremias iti agtultuloy a panangibaon ni Jehova kadagiti propeta iti ilina?

¹⁹ Nakasursuro met ni Jeremias iti bukodna a kapadasan idi inusar ni Jehova a mangpakdaar iti ilina. Iti maikapat a tawen ti panagturay ni Ari Jehoiaquim, imbaga ni Jehova ken ni Jeremias nga isuratna ti amin nga imbagana manipud idi kaaldawan ni Josias. Apay nga imbilin ti Dios dayta? Tapno magutugot ti tunggal maysa a mangtallikud iti dakes nga aramid ket iti kasta mapakawan. (Basaen ti Jeremias 36:1-3.) Ni Jeremias, a bimmangon a nasapa a mangipakdaar iti mensahe ti Dios, ket nagpakpakaasi pay ketdi kadagiti tattao nga isardengda dagiti makarimon nga aramidda. (Jer. 44:4) Nasursuro la ketdi ni Jeremias manipud iti mismo a kapadasanna a nangibaon ti Dios kadagiti propeta gapu iti asina iti ilina. Ken sigurado nga impakita met ni Jeremias ti kasta nga asi. (2 Cron. 36:15) Maawatam ngarud no apay nga idi nakalasat ni Jeremias idi nadadael ti Jerusalem, naikunana: “Dayta ket ar-aramid ti naayat a kinamanangngaasi ni Jehova a saantayo a nagpatingga, agsipud ta dagiti asina sigurado a saandanto nga agngudo. Kabbaroda tunggal bigat.”—Un. 3:22, 23.

20. Iti panangbirok ken Jehova, kasanom a matulad ni Jeremias?

²⁰ Kadagiti desision nga aramidem iti inaldaw, ikagkagumaam kadi nga ammuen ti pagayatan ti Dios babaen ti panangyimtuodmo iti “Sadino ti ayan ni Jehova?” (Jer. 2:6-8) Saan a kas kadagiti Judio idi kaaldawanna, kanayon nga agpapaiwanwan ni Jeremias iti Mannakabalin-amin tapno ammona no ania ti rumbeng nga aramidenna. Iti panagdesisiontayo, awan duadua a nainsiriban a tuladentayo ni Jeremias babaen ti inaldaw a panagpaiwanwantayo ken Jehova.

21. Ania a kararag ti makatulong kenka mainaig iti ministeriom, kas koma no nasabrak ti makasaritam?

²¹ Kasapulan nga agpaiwanwantayo ken Jehova uray kadagiti babassit a banag. Kas pagarigan, ibagatayon nga adda aldaw nga implanom ti mangasaba. Ngem iti panagriingmo iti kabigatan dayta nga aldaw, nakitam a nakuyem ti tangatang ken kasla saan a nasayaat ti rummuar. Maysa pay, nalabit masansan a mawanwanas ti nakaeskediul a teritoriayo. Mabalin a malagipmo nga iti napalabas a panangasabayo sadiay, adda dagiti nagpambar a saanda a masango ti makisarita wenno nasabrakda pay ketdi. Iti dayta nga agsapa, mabalinmo a nainkararagan nga iyimtuod, “Sadino ti ayan ni Jehova?” No aramidem dayta, mapanunotmo ti kinasayaat ti mensahetayo ken ad-adda a maawatam a pagayatan ti Dios nga iwaragawagmo dayta a mensahe. Iti kasta, ti sao ni Jehova mabalin a punnuenna ti pusom iti rag-o ken ragsak, kas iti narikna ni Jeremias. (Jer. 15:16, 20) Ket no adda makasabaam a nasabrak wenno nakaam-amak pay ketdi, mabalinmo manen nga iyebkas ti rikriknam iti Dios babaen ti kararag. Aramidem kadi dayta? Dimo liplipatan a mabalinnaka nga ipaayan ti Dios iti nasantuan nga espiritu tapno ammom ti maitutop a sawem, ket ti tarigagaymo a mangisarsarita iti mensahe ti Dios parmekenna ti negatibo a rikriknam.—Luc. 12:11, 12.

22. Apay nga adda dagiti kararag a saan nga ipangag ti Dios?

²² Nasayaat a laglagipentayo nga adda dagiti kararag a saan nga ipangag ti Dios. (Basaen ti Un-unnoy 3:44.) Saan nga impangag ni Jehova ti karkararag dagiti nasukir a Judio agsipud ta ‘inyadayoda ti lapayagda kenkuana’ ken saanda nga insardeng dagiti dakes nga aramidda. (Prov. 28:9) Nalawag la ketdi ken ni Jeremias ken uray kadatayo a no saan nga agtignay ti maysa a tao mayannurot iti kararagna, saan a maay-ayo ti Dios kenkuana ket saannanton nga ipangag dagiti kararagna. Ditay koma ngarud agaramid iti aniaman a di makaay-ayo ken Jehova.

23, 24. (a) Ania ti kasapulan tapno maammuantayo ti pagayatan ni Jehova? (b) Kasano nga ad-adda a magunggonaanka iti personal a panagadalmo?

²³ Malaksid pay iti napasnek a panangikararag iti pannarabay ni Jehova, kasapulan nga itultuloytayo ti personal a panagadaltayo ta napateg daytoy a pamay-an tapno maammuantayo ti pagayatan ni Jehova. Iti daytoy a banag, nasaysayaat ti kasasaadtayo no idilig ken Jeremias ta kompleto ti Biblia nga adda kadatayo. Kas ken Jeremias, a nagsukimat a naimbag tapno mabukelna ti naipaltiing a salaysayna, mabalinmo met a sukimaten ti Sao ti Dios ken agpaiwanwan Kenkuana, nga iyimtuodmo, “Sadino ti ayan ni Jehova?” No ikagumaam nga ammuen ti pagayatanna, ipakpakitam ti panagtalekmo kenkuana, ket ‘pudno unay nga agbalinkanto a kas maysa a kayo a naimula iti igid ti dandanum, a mangparuar kadagiti ramutna iti mismo nga igid ti pagay-ayusan ti danum.’—Basaen ti Jeremias 17:5-8.

²⁴ Bayat a basbasaen ken ut-utobem ti Nasantuan a Kasuratan, ikagumaam a tarusan no ania ti kayat ni Jehova nga aramidem iti sidong ti nadumaduma a kasasaad. Sumapulka kadagiti prinsipio a kayatmo a tandaanan ken iyaplikar. Bayat a basbasaem dagiti historikal a salaysay, bilbilin ti Dios, nadiosan a prinsipio, ken nainsiriban a sasao a nailanad iti Sao ti Dios, panunotem no kasanom a mayaplikar dagita iti amin a pangngeddeng nga aramidem iti tunggal aldaw. Kas sungbat iti saludsodmo a “Sadino ti ayan ni Jehova?” mabalin nga ipalgakna kenka babaen ti naisurat a Saona no kasano a sanguen uray dagiti narigat a kasasaad a sumangbay kenka. Mabalin nga ibatad pay ketdi kenka ti Biblia ti “di maawatan a bambanag a saanmo a naammuan” wenno saanmo a matarusan idi.—Jer. 33:3.

25, 26. Kasanotayo a magunggonaan kadagiti kapadasan?

²⁵ Kanayonanna, mabalinmo nga usigen dagiti bukodmo a kapadasan ken ti kapadasan dagiti dadduma. Kas pagarigan, mabalin a makitam nga adda dagiti simmardeng nga agpannuray ken ni Jehova, a kas ken Uria. (2 Tim. 4:10) Makasursuroka kadagiti kapadasanda ket maliklikam dagiti nakalkaldaang a kasasaad a sinagabada. Kanayon a laglagipem ti panangipakita kenka ni Jehova iti naayat a kinamanangngaasina, kas iti panangapresiar ni Jeremias iti asi ken pannakipagrikna ti Dios. Kasanoman karigat ti kasasaadmo, dimo koma panunoten a saan a maseknan kenka ti Kangatuan. Maseknan kenka a kas iti pannakaseknanna ken Jeremias.

²⁶ No utobem dagiti ar-aramiden ni Jehova maipaay kadagiti adipenna ita, makitam nga iwanwanwannatayo iti inaldaw iti nadumaduma a pamay-an. Alaentay a pagarigan ni Aki, a maysa nga agtutubo a kabsat a babai idiay Japan. Narikna nga isu ket saan a maikari nga agbalin a Kristiano. Naminsan, kinuna ni Aki iti asawa ti manangaywan iti sirkito idi agkaduada iti pangasabaan: “Panagriknak, kas man la kayatnakon nga isarwa ni Jehova, ngem idawdawatko kenkuana nga an-anusannak pay koma.” Miningmingan ti asawa ti manangaywan iti sirkito ket kinunana: “Para kaniak, saanka nga apaganem-em a Kristiano!” Inut-utob ni Aki dagita a makaliwliwa a sasao. Kinapudnona, nupay impagarupna nga isu ket apaganem-em, saan a kasta ti panangmatmat ni Jehova kenkuana. Kalpasan dayta, inkararagna ken Jehova: “Ibaonnak iti sadinoman a kayatmo. Aramidek ti aniaman nga ipaaramidmo.” Agarup iti dayta met la a tiempo, simmarungkar ni Aki iti sabali a pagilian a sadiay ket adda maysa a bassit a grupo nga agus-usar iti pagsasao a Hapones nga agkasapulan iti siasinoman a makapagsao iti dayta a lenguahe ken mabalinna ti makipagnaed ken makipagserbi kadakuada. Naiparna a dayta a lugar ti nakayanakan ni Aki isu a nalaka laeng ti iyaakarna sadiay tapno tumulong. Ngem sadino ti pagyananna? Maysa a kabsat a babai, a kaak-akar laeng ti balasangna, ti nangitukon iti kuarto a pagyananna. “Kas man la inyurnos ni Jehova ti amin para kaniak,” kinuna ni Aki.

27. Apay a rumbeng a tignayennaka ti saludsod a “Sadino ti ayan ni Jehova?”

²⁷ Adu a kakabsat ti makaibaga kadagiti kasasaad a nariknada a mismo ti pannarabay ti Dios, nalabit kabayatan ti panagbasada iti Biblia wenno personal a panagadalda. Mabalin nga adda met kasta a kapadasam. Pabilgenna la ketdi dayta ti relasionmo ken ni Jehova ken tignayennaka nga ad-adda nga agkararag kenkuana a kanayon ken sipapasnek. Agtalektayo a no inaldaw nga iyimtuodtayo, “Sadino ti ayan ni Jehova?” ipakitana kadatayo ti dalanna.—Isa. 30:21.