Asuten ni Jehova ti Kampilanna!

“Amin a lasag mabigbignanto a siak, ni Jehova, inasutko ti kampilanko iti kalubanna.”​—Ezequiel 21:5.

 1. Maibusor iti siasino ti nangilayatan ni Jehova ti kampilanna idiay Juda ken Israel?

MAIYANATUP laeng a ti kampilan ni Jehova ti mangted panagbuteng kadagiti kabusorna. Ngem idi ilayatnan dayta maibusor kadagiti managdakdakes kadagiti pagarian ti Juda ken Israel, talaga aya nga ammoda no aniat’ mapaspasamak? Wen, naipakaammo kadakuada nga inasuten ni Jehova ti simboliko a kampilanna manipud kalubanna.​—Esdras 9:6-9; Nehemias 1:8; 9:26-30.

 2. Aniat’ kinuna ni Jehova maipapan iti “kampilanna,” a nangpataud ti ania a salsaludsod?

² Babaen ken mammadtona ken managbantayna a ni Ezequiel, kinuna ti Dios: “Ket amin a lasag mabigbignanto a siak, ni Jehova, inasutko ti kampilanko iti kalubanna.” (Ezequiel 21:5) Nagaplikar kadi dagidiay a sasao laeng idi unana? Wenno adda aya kaiyuloganda met kadatayo?

Dagiti Pannakaipadles ti Pannakadusa ti Jerusalem

 3. Aniat’ imbaga ni Ezequiel kadagiti nakayawan idiay Babilonia, ket daytoy ti addaan ania a moderno-aldaw a katupag?

³ Ti sasakayan ni Jehova ti umakar manen, ket ti disso ni Ezequiel ti agbaliw met. Arig dayta a kasla ti sinan-sasakayan a nailangitan nga organisasion ti Dios ti immakar iti pagpaliiwan a puesto iti ngato ti Bantay dagiti Olivo. Manipud sadiay nga impadto ni Jesus ti pannakadadael a dimteng iti Jerusalem idi 70 K.P., maysa a pangrebbek a mangipadpadto met ti panungpalan ti Kakristianuan. (Marcos 13:1-20) Iti sirmata, nakita mismo ni Ezequiel no aniat’ naala manipud karayan Kebar, ngem babaen ti espiritu ti Dios isut’ naisublin iti balay a nakakayawanna idiay Babilonia. Idiay insaona kadagiti dadduma met a nakayawan ‘amin a bambanag nga imparang ni Jehova kenkuana.’ Umasping iti dayta, ti napulotan a “managbantay” ti Dios ken dagiti naitimpuyog a sasaksina itatta iwarwaragawagda amin nga impanayag kadakuada ti Nakasakay iti nailangitan a sasakayan.​—Ezequiel 11:22-25.

 4. Kasanot’ panagtignay dagiti nakayawan a Judio kadagiti simbolo nga akto ni Ezequiel?

⁴ Babaen kadagiti simboliko nga aramid, impakita ni Ezequiel kadagiti nakayawan a Judio nga asidegen ti nasional a pannakadidigrada. (Basaenyo ti Ezequiel 12:1-7.) Ti mammadto ti nagawit “ti gargaret a maipaay iti iyaalis” a mangipakita kadagiti bassit la a bambanag a mabalinan nga awiten dagiti makayawan kadagiti ab-abagada. Di agbayag ti panagbuteng umapayton iti nalakub a Jerusalem. Nupay adu dagiti di nangipasnek kadagita a pammakdaar, ni Ezequiel ti mangibaga kadagiti umili: “Awanton ti pannakaitantan kadagiti sasao.” Kasta met itatta adda pananglais kadagiti nadiosan a pammakdaar ken padpadto, ngem dakkel maaramidantayo a mangtulong kadagiti agsapsapul ti kinapudno a mangisaad ti panagtalekda iti kaitungpalanda.​—Ezequiel 12:8-28.

 5. Yantangay asidegen “ti aldaw ni Jehova,” ania a panangibutaktak ti maiyanatup?

⁵ Dagidiay di agim-imdeng iti managbantay ni Jehova masapul a maammuanda a mariknadanto ti “kampilan” ti Dios. Gapuna, dagidiay responsable iti di umiso a pannakaawat maipapan ti kinatalged ti Jerusalem ken Juda naibutaktakda. Naiyarig dagiti ulbod a mammadto kadagiti manangdadael nga aso ti bakir, ken naipakita a dagiti managulbod pappapudawenda dagiti bakud a matmatuang, wenno dagiti barengbareng a proyekto, dagiti tattao. Uray met dagiti ulbod a babbai nga agipadpadto ti naibutaktakda. “Ti aldaw ni Jehova” ti asidegen, ket naipasango ti rupana a maibusor kadagidiay ‘simmina kenkuana,’ kayatna a sawen, ‘idedikarda ti bagbagida nga umadayo iti isusurotda iti Dios.’ No dedikadotayo ken Jehova, siempre ditay kayat a sumina manipud sagrado a serbisiona.​—Ezequiel 13:1–14:11.

 6. Maispal aya ti asinoman a tao ti nasukir nga ili ti Juda, ket aniat’ isuro daytoy kadatayo?

⁶ Asinot’ mangispal iti nasukir nga ili ti Juda? Uray ni nalinteg a Noe, ni Daniel, ken ni Job saannanto a maispal ida inton iyegen ti Dios ti pannusana iti daga. No kayattayo ti pannakaisalakan, masapul nga ibaklaytayo ti personal a responsabilidadtayo iti imatang ti Dios ken aramidentay ti pagayatanna.​—Ezequiel 14:12-23; Roma 14:12.

 7. Iti aniat’ nakaiyarigan ti Juda, kaskasdi aniat’ ipasdek ti Dios kadagiti matalek?

⁷ Gapu kadagiti di matalek nga umilina, naiyarig ti Juda iti maysa nga atap nga ubas nga awan naimbag a bungana ket maiyanatup laeng iti apuy. (Ezequiel 15:1-8) Isu met ti naiyarig iti maladaga a naibelleng nga inispal ti Dios manipud Egipto ken nataraken agingga iti kinabalasang. Isu ti innala ni Jehova kas asawana, ngem isut’ timmaliaw kadagiti ulbod a didiosen ket agsagabanto ti pannakadadael gaput’ naespirituan a pannakikamalalana. Kaskasdi, kadagiti matalek ti Dios ‘mamangonto ti maysa a tulag nga agnanayon’​—ti baro a tulag iti naespirituan nga Israel.​—Ezequiel 16:1-63; Jeremias 31:31-34; Galacia 6:16.

 8. (a) Iti aniat’ nakaiyarigan ti Babilonia ken Egipto? (b) Kasanot’ rebbeng a panangapektar kadatayo ti panangdadael ni Zedekias iti sapatana?

⁸ Sumaganad, dagiti agtuturay ti Babilonia ken Egipto naiyaspingda kadagiti dadakkel nga agila. Ti maysa binungtolna ti murdong ti kayo a kantingen babaen ti panangikkatna ken Ari Joakin ket sinukatanna ken ni Zedekias. Nupay nagsapata iti kinasungdo ni Zedekias ken ni Nabucodonosor, binungtolna dayta, a sinapulna ti tulong a militar ti agturay ti Egipto, daydiay maysa pay a dakkel nga agila. No inusar ni Zedekias ti nagan ti Dios iti panagsapatana, ti panangdadaelna iti dayta ti nangyeg pakaumsian ni Jehova. Ti mismo kapanunotan a panangyeg pakaumsian iti Dios ti rebbeng a manglapped koma kadatayo nga agbalin nga ulbod iti sasaotayo. Anian a nagdakkelan a pribilehiotayo ti panangibaklay ti nasantuan a nagan kas dagiti Saksi ni Jehova!​—Ezequiel 17:1-21.

 9, 10. (a) Ania a padto ti nailanad idiay Ezequiel 17:22-24, ngem aniat’ masapul a maaramidan no kayattay ti magunggonaan manipud kaitungpalan dayta? (b) Asinot’ responsable iti kababalintayo?

⁹ Ti makaparagsak a Mesianiko a padto ti sumaruno. (Basaenyo ti Ezequiel 17:22-24.) Ditoy, “ti saringitna a naganus” isu ti Mesianiko nga Ari, a ni Jesu-Kristo. Immula ni Jehova idiay nailangitan a Bantay Sion, isunto ti agbalin a “naimnas a kantingen,” maysa a gubuayan ti pannalaknib ken bendision inton agturay iti intero a daga. (Apocalipsis 14:1) Iti daytoy pudno a maparegta ken mapaturedtayo.

¹⁰ No kayattayo, nupay kasta, a magunggonaan manipud kaitungpalan ti Mesianiko a padto, masapul a salimetmetantayo ti nasayaat a pannakirelasion ken Jehova. Dagiti pada ni Ezequiel a nakayawan kasla impatoda nga addaanda ti nasayaat a takder iti imatang ti Dios ken pinabasolda dagiti ammada iti panagsagsagabada. Ngem intudo ti mammadto a tunggal tao sungsungbatanna ti bunga ti kabukbukodan a kababalinna. (Ezequiel 18:1-29; idiligyo ti Jeremias 31:28-30.) Sumaruno nga immay ti panagdawat. (Basaenyo ti Ezequiel 18:30-32.) Wen, ni Jehova ti naasi iti agbabbabawi ket awan ragsakna iti ipapatay ti asinoman. Gapuna, kuna ti Dios: ‘Agbalbaliwkayo ngarud ket agbiagkayo.’​—Idiligyo ti 2 Pedro 3:9.

11. Iti aniat’ nakaiyaspingan dagiti agtuturay ti Juda, ket aniat’ napasamak kenkuana idi isut’ kabilen iti “kampilan” ni Jehova?

¹¹ Iti unnoy gaput’ pannakarba ti Juda, naiyarig dagiti agtuturayna kadagiti bumaro a leon. Natay ni Ari Joacaz kas kayaw idiay Egipto, ni Joakim ti natiliw met ni Nabucodonosor, ket ni Joakin ti nakayawan idiay Babilonia. Sumaganad inkabil ni Nabucodonosor ni Zedekias iti trono ti Juda, ngem isut’ immalsa. Kamaudiananna, kas nakatangkal a leon, naipan kas kayaw ni Zedekias idiay Babilonia. Maitunos iti napropetikuan nga unnoy, idi 607 K.K.P., ti Juda nagbalin a kas nadadael nga ubas, ket “awan kenkuana ti nalagda a sarukod, nga agbalin a setro ti panagturay.” Isut’ kinabil ti “kampilan” ni Jehova!​—Ezequiel 19:1-14; Jeremias 39:1-7.

12. (a) Kas kadagiti inapoda, iti ania a kinadakes ti nakiramanan dagiti kapatadan ni Ezequiel? (b) Apay a nagsaludsod dagiti tattao ken Ezequiel no isut’ saan a mannanao kadagiti pangngarig, ket ania a pakdaar ti ipaay daytoy kadatayo?

¹² Inasitgan “dagiti dadduma a lallakay ti Israel,” insao ni Ezequiel ti mensahe ti Dios. Intudona a numan pay inispal ni Jehova dagiti Israelita manipud Egipto ken intedna kadakuada ti lintegna, daytat’ linaksidda ken nagrukbabda iti didiosen. Idinto ta dagiti kapatadan ni Ezequiel nakabasolda iti dayta met laeng a kinadakes, ikabil ti Dios ti bagina a mangukom kadakuada. Nalabit gaput’ panagduadua ken saan a gapu ta saanda a naawatan ti kayat a sawen ni Ezequiel, insaludsod dagiti tattao: “Saan aya nga isu ti mannanao kadagiti pangngarig?” Di agbayag maammuandanto nga awan ti pangngarig iti mensahe ti mammadto. Daytoy ti rebbeng a mangpakdaar kadatayo a ditay mangal-ala ti managduadua a kababalin iti kaitungpalan dagiti Nainkasuratan a pakdaar.​—Ezequiel 20:1-49.

Ni Jehova a Mannakigubat

13. Ti “kampilan” ti Dios itaktakderanna ti ania, ket anianto ti maipabigbig kadagiti “amin a lasag” inton mailayaten dayta a kampilan?

¹³ Iti maikapito a tawen ti pannakakayaw (idi Ab 10, 611 K.K.P.), nakurang a dua ket kagudua a tawen ti natda pay sakbay “ti bakal iti aldaw ni Jehova” ti mangrugin a maibusor iti Juda ken Jerusalem. (Ezequiel 13:5; 20:1) Paliiwenyo no aniat’ kinuna ni Jehova a Mannakigubat babaen ken Ezequiel. (Basaenyo ti Ezequiel 21:1-5) Ti “kampilan” ti Dios itakderanna ti naindagaan nga ahensia nga usarennanto, ngem mabalin met a ramanen dayta ti nailangitan, kas sasakayan nga organisasionna. Dagiti “nalinteg” ken “managdakdakes” nga agnaed iti Juda ken Israel, agraman dagiti nasnasion nga addaan gura iti ili ti Dios, mapasagdanto iti “kampilan” ti Dios. Pudno unay, maipabigbigto iti “amin a lasag” a ni Jehova ti makigubgubat a maibusor kadakuada.

14. (a) Kas ken Ezequiel, iti ania ti pangawisan dagiti napulotan a saksi ni Jehova iti atension? (b) Aniat’ mangipamatmat a dagiti agtuturay ti Kakristianuan didanto malisian ti “kampilan” ti Dios?

¹⁴ Kas ken Ezequiel, dagiti napulotan a saksi ni Jehova itatta ipakaammodanto ti “kampilan” nga ilayat ti Dios a maibusor kadagiti paspasurot ti Kakristianuan, a ti sakupna ket isu ti antitipiko a “daga ti Israel.” Saanen nga agbayag dayta a “kampilan” ti mariknanton “amin a lasag manipud abagatan nga agpaamianan,” babaen kadagiti amin a manangalagad ti ulbod a relihion. Dagidiay agintutured idi kaaldawan ni Ezequiel awanto ti rason nga agrag-oda, nga ipakita a ti “kampilan” ni Jehova saanto a ‘mangorganisar ti panangpapatay’ a maibusor kadakuada. Dayta a “kampilan” ni Jehova saanto a ‘mangorganisar ti panangpapatay’ a maibusor kadakuada. Dayta a “kampilan” linaksidna ti naarian a setro ti pagarian ti Juda, kas panangilaksid dayta ti tunggal sabali a “kayo,” wenno setro. Pudno unay, ngarud, a dagiti agtuturay ti Kakristianuan saandanto a maispal babaen iti mammapatay nga ahensia ti Dios.​—Ezequiel 21:6-17.

15. Iti ania a pasamak a nakairamanan ni Nabucodonosor ti mangipakita nga awan ti makaibaw-ing iti “kampilan” ni Jehova?

¹⁵ Ituloy nga ipakita ti padto ni Ezequiel nga awan, agraman dagiti demonio, ti mabalin a mangibaw-ing iti “kampilan” ni Jehova. (Basaenyo ti Ezequiel 21:18-22.) Nupay agaramat ni Ari Nabucodonosor kadagiti dinedemonio a panagbuyon, siguraduen ni Jehova a ti agturay a taga Babilonia agmartsada a maibusor iti Jerusalem, saan a maibusor iti nakapkapuy nga Ammonita a kabisera ti Rabbat. Manipud maysa a pagianan mangpili ni Nabucodonosor ti maysa a pana a namarkaan para iti Jerusalem. Isut’ agusar ti terafin (mabalbalin, babassit a bulto a natauan langana) ket kumitada kadagiti mangipamatmat iti dalem ti napapatay nga animal. Agpapan pay ti panagbuyon, nupay kasta, alaenna ti dalan nga agturong iti kabisera ti Judea ket lakubenna dayta. Pudno, ni Nabucodonosor nangaramid ti maysa a tulag ken Ari Zedekias. Ngem gapu iti panangdadaelda ti sapata, ni Zedekias ken dadduma kadagiti Judio “matiliw[danto] iti ima” ket matengngeldanto a kayaw idiay Babilonia.​—Ezequiel 21:23, 24.

16. (a) Aniat’ napasamak kas kaitungpalan ti Ezequiel 21:25-27? (b) Kasanot’ panangrugi ti Panawen Gentil, ket iti ania a pasamak a nagpatinggada?

¹⁶ Babaen ti iyaalsana, nasugat ti makapapatay ni Zedekias. (Basaenyo ti Ezequiel 21:25-27.) Idi naipababa ti ari ti Juda, ti naarian a turbante ken ti korona naikkatda. (2 Ar-ari 25:1-7) Ti “nangato” a pagarian ti Juda ti ‘naipababa’ babaen iti pannakadadaelna idi 607 K.K.P. Gapuna ti “nababa” a pagpagarian a Gentil “naipangatoda,” nga isudan ti mangituray iti daga nga awan panangsingsinga ti manangiladawan a pagarian ti Dios. (Deuteronomio 28:13, 15, 36, 43, 44) Gapuna nangrugin “ti naituding a panawen dagiti nasnasion”​—ti Panawen Gentil​—a nagpatingga idi 1914 idi impaay ti Dios ti kinaari ken Jesu-Kristo, ‘daydiay addaan legal a kalintegan’ iti dayta. (Lucas 21:20-24; Salmo 110:1, 2; Daniel 4:15-28; 7:13, 14) Itan ta addan ni Jesus iti nailangitan a trono, saanen a maibaddebaddek ti nasnasion a Gentil ti insimbolo ti kadaanan a Jerusalem, ti Pagarian ti legal nga agtawid ni David.​—Hebreo 12:22.

17. Ania a “kinaulbod” ti inwaragawag dagiti mammadto nga Ammonita?

¹⁷ Kunkuna dagiti mammadto nga Ammonita a ti kabisera ti Ammon, nga isu ti Rabbat, malisiannanto ti panangdadael ti kampilan ni Nabucodonosor. Ngem daytoy ti maysa a “kinaulbod,” ta ti intero a daga ti Ammon ti marbekto. Iti kaaldawantayo, inkeddeng ti Dios a ti pannakadadael dagiti nasnasion sumarunonto iti pannakadadael ti Kakristianuan, kas ti pannakadadael ti Rabbat simmaruno iti Jerusalem.​—Ezequiel 21:28-32; Apocalipsis 16:14-16.

Maidarum ti Jerusalem

18. Kadagiti ania a basbasol ti nangibutaktakan ni Ezequiel iti Jerusalem, ket kasanot’ panagriknatayo iti daytoy?

¹⁸ Iti panagsaona manen ti sasao ni Jehova, inatakar ni Ezequiel ti Jerusalem kadagiti basbasol kas ti panangibuyat ti dara, panagdayaw ti didiosen, kinaderrep, panagsuitik, ken pananglipat iti Dios. Dagiti sibabasol iti dara a papangulona ti nangabuso iti kinaturay agginggana iti hudisial a panangpapatay, ken inwalin dagiti manangpardaya dagiti kabkabusorda babaen ti siuulbod a panangpabpabasolda kadakuada. Agpaay kadagita a kinadakes, maiwarawaranto dagiti agtaeng iti Jerusalem. Ti pannakaammo iti daytoy ti mangpabileg ti pangngeddengtayo tapno liklikan ti panangabuso ti kinaturya, kinaderrep, panangpardaya, ken dadduma pay a nakaro a basbasol.​—Ezequiel 22:1-16.

19. Iti ania a pamay-an a ti ili ti Juda matunawto, ket apay a maikari ti pannakaikisapda?

¹⁹ Tunawento met ni Jehova ti ili ti Juda iti maysa nga urno. Daytoy ket saan a tapno dalusanna ida iti pamay-an a pananggugor no di ket tapno tunawenna ida gaput’ nabara a pungtotna. (Ezequiel 22:17-22) Daytoy a dusa ti maikari unay kadagiti agkukumplot a mammadto, managdadakes a papadi, naagum a piprinsipe, ken nakillo a tattao. Amin naibutaktakda. Yantangay awan uray maysa a lalaki iti tengngada nga agtakder a maipaay iti kinalinteg, tunawento ti Dios ida babaen iti apuy ti pungtotna.​—Ezequiel 22:23-31.

Maikari Unay ti Dusa

20. Kadagiti siasino a simboliko a babbai ti pakaibuyatan ti pungtot ti Dios, ket ania dagiti detalye a maipaayyo maipapan ti kinasiasinoda?

²⁰ Ti pannakaibuyat ti pungtot ti Dios ti sumaruno a nailadawan kas dusa a naipataw kadagiti dua a simboliko a babbai a nagbasol iti naespirituan a pannakikamalala. Ti maysa ket isu ni Ahola, ti sangapulo-tribo a pagarian ti Israel a ti Samaria isut’ kabiserana. Isu daydiay “inauna” gapu ta isut’ kabiserana. Isu daydiay “inauna” gapu ta isut’ mangbukel ti kakaaduan kadagiti tribo ti Israel, agraman dagidiay a naggapu kadagiti inaunaan nga annak ni Jacob, a da Ruben ken Simeon. Ti kabsatna a babai a ni Aholiba, ket isu ti dua-tribo a Juda a ti Jerusalem isut’ kabiserana. Ti Ahola kayatna a sawen “Ti Toldana.” Ti Aholiba kayatna a sawen “Ti Toldak Adda Kenkuana,” nga isut’ maiyanatup yantangay ti tolda, wenno templo ti Dios, ket adda idiay Juda.​—Ezequiel 23:1-4.

21. Iti ania ti nagsapulan ni Ahola ti kinatalgedna, a mangted ania a pakdaar kadatayo?

²¹ Nagpukawen ti Ahola (Israel) idi isut’ pinarmek dagiti Asirio idi 740 K.K.P. Aniat’ basolda? (Basaenyo ti Ezequiel 23:5-7.) Iti kinaawan-pammati sinapul ni Ahola ti kinatalged kadagiti napolitikaan nga aliansa, ngem daytoy ti nangiturong kenkuana a nangsurot ti ulbod a panagdayaw dagiti kaaliadona, gapu itoy ‘tinulawanna ti bagina met laeng kadagiti didiosen.’ Babaen iti pannakapakdaar iti naespirituan a pannakikamalala ni Ahola, masapul nga agannadtayo kadagiti nailubongan a singgalut a mabalin a mangdadael iti pammatitayo.​—Santiago 4:4; 1 Juan 2:15-17.

22. Kas ken Ahola ken Aholiba, aniat’ ar-aramiden ti Kakristianuan, ngem aniat’ mapasamakto kenkuana?

²² Gaput’ panangsurot ti dakdakes nga addang ngem ni kabsatna, nagsagaba ni Aholiba (Juda) ti nasional a didigra iti ima dagiti taga Babilonia idi 607 K.K.P. Napasag iti kampilan dagiti annakda wenno naipanda kas kayaw, ket isut’ naibabain kadagiti nasnasion. Kas ken Ahola ken Aholiba, nagaramid ti naespirituan a pannakikamalala ti Kakristianuan, maysa a basol iti imatang ti Dios a kunana a pagdaydayawanna. Ti Protestantismo, agraman kadagiti nakaad-adu a denominasionna, ti nangtulaw met iti bagina kadagiti nakomersialan ken napolitikaan a pannakabalin ti lubong a dakdakes pay ngem ti inauna a kabsatna, ti Romano Katolisismo. Gapuna, siguraduen ni Jehova a ti intero a Kakristianuan ti madadael. Iti kasta mabigbigto amin a tattao nga isu ni Soberano nga Apo Jehova. Papigsaenna ti determinasiontayo a mangliklik kadagiti di umiso a nailubongan a singgalut no malaglagiptayo a dagiti kakadua ti Kakristianuan ti mabiiten a mangbuelta kenkuana ket ibanagdanto ti sentensia ti Dios kenkuana kas ti kangrunaan a paset ti Babilonia a Dakkel, ti sangalubongan nga imperio ti ulbod a relihion.​—Ezequiel 23:8-49; Apocalipsis 17:1-6, 15-18.

Nakellaat dagiti Managinsisingpet

23. Kasano a nairepresentar ti Jerusalem iti mensahe ti Dios ken Ezequiel iti agtapos ti Disiembre idi 609 K.K.P., ket aniat’ mapasamak kenkuana?

²³ Iti mismo nga aldaw idi panagtapus ti Disiembre a rinugian ni Nabucodonosor ti 18-bulan a pananglakubna iti Jerusalem (Tebeth 10, 609 K.K.P.), ti Dios nangted manen ken Ezequiel ti nalawag a mensahe. Iti dayta, ti nalakub a Jerusalem ti naiyarig kas dakkel a kaldero a ‘pakaipaburekan’ dagiti agnanaed iti siudad. Ti moral a kinarugit ti nangpataud ti “lati” iti dayta simboliko a kaldero. “Tunggal reddek,” dagiti managdakdakes mairuardanto iti Jerusalem, ket ti ay-ayna dinto agpatingga agingga nga agsagaba ti pannakadadael. Inukom ni Jehova ti Jerusalem sigun kadagiti kinadakesna, ket isut’ masapul a madadael, kas ti pannakadadael met ti Kakristianuan.​—Ezequiel 24:1-14.

24. (a) Apay a di impakita ni Ezequiel ti ladingitna iti ipapatay ti asawana? (b) Inton agdisso ti “kampilan” ni Jehova kenkuana, kasanonto ti panagrikna ti Kakristianuan, ket anianto ti mabigbigna?

²⁴ Sumaganad, agtignay ni Ezequiel iti karkarna a pamay-an. (Basaenyo ti Ezequiel 24:15-18.) Apay a ti mammadto dinanto ipakita ti panagladingitna iti ipapatay ti asawana? Tapno ipakita no kasanot’ pannakakellaat dagiti Judio iti pannakadadael ti Jerusalem, dagiti umilina, ken ti templona. Nawadwaden ti nasao ni Ezequiel maipapan kadagita a bambanag ket saanton nga agsao manen ti mensahe ti Dios agingga a ti pannakarba ti Jerusalem maipakaammo kenkuana. Kasta met, ti Kakristianuan ken dagiti managinsisingpet a relihionistana makellaatdanto inton panawen ti pannakadadaelda. Ket kalpasan a mangrugin ti “dakkel a rigat,” ti naikunan ti napulotan a klase managbantay maipapan iti panungpalanna ti umdaston. (Mateo 24:21) Ngem inton agdisson ti “kampilan” ti Dios iti Kakristianuan, dagita a nakellaat a relihionista ken dagiti dadduma ‘mabigbigdanto nga isu ni Jehova.’​—Ezequiel 24:19-27.

[Kasanot’ Panangsungbatyo?]

▫ Aniat’ napasamak idi inlayat ni Jehova ti “kampilanna” a maibusor iti Juda ken Israel?

▫ Kasanot’ rebbeng a pannakaapektartayo iti panangdadael ni Zedekias ti sapatana ken ni Nabucodonosor?

▫ Aniat’ itaktakderan ti “kampilan” ti Dios?

▫ Ania a pasamak a nakairamanan ni Nabucodonosor ti mangipakita nga awan ti mabalin a mangibaw-ing ti “kampilan” ni Jehova?

▫ Aniat’ napasamak a kaitungpalan ti Ezequiel 21:25-27?

▫ Aniat’ iladladawan ti saan a panangipakita ni Ezequiel ti ladingitna iti ipapatay ti asawana?

[Ladawan iti panid 18]

Idi dinadael ni Ari Zedekias ti sapatana ken Nabucodonosor ken isut’ nakayawan, ania a padto ti nangrugi a matungpal?