No Kasano nga Agpatingga Daytoy a Lubong

 1. Ania ti makatulong tapno maitultuloytayo ti agbantay ken madaerantayo dagiti pakasuotan?

ASIDEGEN a dumteng dagiti makapakintayeg a paspasamak kas pasingkedan dagiti matungtungpalen a padto ti Biblia. Kasapulan ngarud nga agtultuloytayo nga agbantay. Ania ti makatulong kadatayo? Indagadag ni apostol Pablo a ‘pagtalinaedentayo ti matmatatayo iti bambanag a di makita.’ Wen, napateg a sipapanunottayo iti gunggonatayo a biag nga agnanayon, idiay man langit wenno ditoy daga. Kas ipakita ti konteksto, insurat ni Pablo dagitoy a sasao tapno paregtaenna dagiti padana a manamati nga ipamaysada a panunoten ti naragsak a resulta ti kinamatalekda. No aramidenda dayta, madaeranda met dagiti pakasuotan ken pannakaidadanes.​—2 Cor. 4:8, 9, 16-18; 5:7.

 2. (a) Ania ti masapul nga aramidentayo tapno agtultuloy a natibker ti namnamatayo? (b) Ania ti usigentayo iti daytoy nga artikulo ken iti sumaruno?

² Naglaon ti balakad ni Pablo iti kastoy a napateg a prinsipio: Nasken a kitaentayo ti bambanag iti masanguanan tapno agtultuloy a natibker ti namnamatayo. Napateg nga ipamaysatayo a panunoten dagiti napapateg a pasamak a di pay dimteng. (Heb. 11:1; 12:1, 2) Usigentayo ngarud ti sangapulo a paspasamak iti masanguanan a nainaig iti namnamatayo a biag nga agnanayon.a

 3. (a) Anianto ti mapasamak kas nailanad iti 1 Tesalonica 5:2, 3? (b) Anianto ti aramiden dagiti agtuturay, ken siasinonto ti nalabit makiraman kadakuada?

³ Ti maysa a pasamak iti masanguanan ket dinakamat ni Pablo iti suratna kadagiti taga-Tesalonica. (Basaen ti 1 Tesalonica 5:2, 3.) Dinakamatna ti “aldaw ni Jehova,” a mangrugi iti pannakadadael ti palso a relihion ken agngudo iti gubat ti Armagedon. Nupay kasta, sakbay a mangrugi dayta nga aldaw ni Jehova, dagiti agtuturay iti lubong sasawendanto ti “Talna ken talged!” Mabalin a tumukoy daytoy iti maysa a pasamak wenno iti agsasaruno a pasamak. Mabalin a panunotento dagiti nasion nga asidegen a marisutda ti sumagmamano a dadakkel a problemada. Anianto met ti aramiden dagiti panguluen ti relihion? Gapu ta paset ida ti lubong, nalabit makiramandanto iti aramiden dagiti agtuturay. (Apoc. 17:1, 2) Tultuladenda ngarud dagiti palso a propeta iti nagkauna a Juda. Kinuna ni Jehova maipapan kadakuada: “Kunkunada, ‘Adda talna! Adda talna!’ idinto ta awan ti talna.”​—Jer. 6:14; 23:16, 17.

 4. Ania ti matarusantayo a di maawatan ti kaaduan?

⁴ Siasinoman dagiti karaman iti pannakaideklara ti “Talna ken talged!,” ipakita dayta a pasamak nga asidegton a mangrugi ti aldaw ni Jehova. Maikuna ngarud ni Pablo: “Kakabsat, awankayo iti sipnget, tapno kellaatennakayo dayta nga aldaw a kas kadagiti mannanakaw, ta dakayo amin ket annak ti lawag.” (1 Tes. 5:4, 5) Matarusantayo ti kaipapanan dagiti agdama a pasamak sigun iti linaon ti Kasuratan, nupay di maawatan dayta ti kaaduan. Kasanonto a matungpal ti padto a pannakaideklara ti “Talna ken talged”? Kitaentayto no kasano. Determinadotayo koma ngarud nga ‘agtalinaed a siririing ken agtalinaed a sipupuot.’​—1 Tes. 5:6; Sof. 3:8.

 5. (a) Kasano a mangrugi ti “dakkel a rigat”? (b) Asino ti “reyna” a di umiso ti impagarupna?

⁵ Anianto pay ti sumaganad a mapasamak? Kinuna ni Pablo: “Inton sasawenda: ‘Talna ken talged!’ iti kasta giddato a dumteng kadakuada ti kellaat a pannakadadael.” Ti umuna a paset daytoy a “kellaat a pannakadadael” ket ti pannakaraut ti “Babilonia a Dakkel,” ti sangalubongan nga imperio ti palso a relihion, a naawagan met iti “balangkantis.” (Apoc. 17:5, 6, 15) Inton maraut ti amin a palso a relihion, pakaibilangan ti Kakristianuan, mangruginton ti “dakkel a rigat.” (Mat. 24:21; 2 Tes. 2:8) Adunto ti maklaat iti daytoy a pasamak. Apay? Ngamin, agingga iti dayta a kanito, ti balangkantis ibilbilangna pay laeng ti bagina kas “maysa a reyna” a ‘saanto a pulos agleddaang.’ Ngem kellaatto a maduktalanna a di umiso ti impagarupna. Apagbiitto a mapukaw, a kasla iti “maysa nga aldaw” laeng.​—Apoc. 18:7, 8.

 6. Siasinonto ti mangdadael iti palso a relihion?

⁶ Sigun iti Sao ti Dios, daytoy a balangkantis rautento ti “atap nga animal” nga addaan “sangapulo a sara.” Ipakita ti panagadal iti libro nga Apocalipsis a ti atap nga animal isu ti United Nations (UN). Ti “sangapulo a sara” irepresentarna ti amin nga agdama a napolitikaan a turay a mangsupsuporta iti daytoy nga “eskarlata ti marisna nga atap nga animal.”b (Apoc. 17:3, 5, 11, 12) Kasanonto kakaro dayta nga iraraut? Dagiti nasion a kameng ti UN samsamendanto ti kinabaknang ti balangkantis, ibutaktakda ti pudpudno a kinasiasinona, lamutenda, ken “puorandanto a naan-anay iti apuy.” Daytanton ti kanibusananna.​—Basaen ti Apocalipsis 17:16.

 7. Anianto ti mangtignay iti iraraut ti “atap nga animal”?

⁷ Ibaga met ti padto ti Biblia no anianto ti mangtignay iti daytoy nga iraraut. Addanto pamay-an ni Jehova a mangikabil iti panggepna iti puso dagiti napolitikaan nga agtuturay tapno ‘itungpalda ti panunotna’​—ti pannakawalangwalang ti balangkantis. (Apoc. 17:17) Yantangay makita dagiti nasion a madaddadael ti talna ti lubong gapu iti panangisungsong ti relihion iti gubat, nalabit mariknadanto a pagsayaatanda no dadaelenda ti balangkantis. Inton rumaut dagiti agtuturay, pampanunotendanto nga itungtungpalda ti “maymaysa a panunotda.” Ngem kinapudnona, agtigtignayda kas instrumento ti Dios a mangtalipupos iti amin a palso a relihion. Biglanto nga agbaliw ti kasasaad. Ti maysa a paset ti sistema ni Satanas rautennanto ti sabali a pasetna, ket saanto a malapdan dayta ni Satanas.​—Mat. 12:25, 26.

 8. Ania ti kaipapanan ti iraraut ni “Gog [manipud] iti daga ti Magog”?

⁸ Inton madadaelen ti palso a relihion, addanto pay laeng dagiti adipen ti Dios nga “agnanaed a sitatalged” ken “awanan iti pader.” (Ezeq. 38:11, 14) Anianto ti mapasamak iti kasla awan gawgawayna a grupo ti tattao nga agtultuloy nga agdaydayaw ken Jehova? Agparang a rautento ida ti “adu nga ili.” Deskribiren ti Sao ti Dios dayta a pasamak kas iraraut ni “Gog [manipud] iti daga ti Magog.” (Basaen ti Ezequiel 38:2, 15, 16.) Ania ti rumbeng a panangmatmattayo iti dayta nga iraraut?

 9. (a) Ania koma ti kangrunaan a pakaseknan ti maysa a Kristiano? (b) Ania koma ti aramidentayo itan tapno bumileg ti pammatitayo?

⁹ Nupay nasaksakbay nga ammotayo daytoy a pannakaraut ti ili ti Dios, saan koma a dayta ti mamagdanag unay kadatayo. Saan koma a ti pannakaisalakantayo ti kangrunaan a pakaseknantayo no di ket ti pannakasantipikar ti nagan ni Jehova ken ti pannakaalangon ti kalinteganna nga agturay. Kinapudnona, nasurok nga 60 a daras a kinuna ni Jehova kadagiti nasion: “Kasapulanto a maammuanyo a siak ni Jehova.” (Ezeq. 6:7) Segseggaantay ngarud ti pannakatungpal dayta a nagsayaat a paset ti padto ni Ezequiel, nga agtalektayo nga “ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.” (2 Ped. 2:9) Kabayatanna, kayattayo nga usaren ti tunggal gundaway a mangpabileg iti pammatitayo tapno agtultuloytayo a matalek ken Jehova aniaman a pakasuotan ti pakaipasanguantayo. Ania ti rumbeng nga aramidentayo? Masapul nga agkararagtayo, adalentayo ti Sao ti Dios ken utobentayo dayta, ken iranudtayo iti sabsabali ti mensahe ti Pagarian. No kasta ti aramidentayo, ti namnamatayo a biag nga agnanayon ket agtalinaed a natibker a kas iti “maysa a sinipete [wenno, angkla].”​—Heb. 6:19; Sal. 25:21.

10, 11. Kasano a mangrugi ti Armagedon, ken anianto ti mapasamak iti dayta a tiempo?

¹⁰ Anianto ti makapakintayeg a mapasamak inton maraut dagiti adipen ni Jehova? Ni Jehova, babaen ken Jesus ken dagiti nailangitan a buyot, bumallaetto maipagapu iti ilina. (Apoc. 19:11-16) Dayta nga ibaballaet isunto ti “gubat ti naindaklan nga aldaw ti Dios a Mannakabalin-amin”​—ti Armagedon.​—Apoc. 16:14, 16.

¹¹ Maipapan iti dayta a gubat, impakaammo ni Jehova babaen ken Ezequiel: “‘Mangayabakto iti kampilan maibusor kenkuana iti intero a nakabambantay a rehionko,’ kuna ti Soberano nga Apo Jehova. ‘Ti kampilan ti tunggal maysa maibusorto iti bukodna a kabsat.’” Gapu iti napalaus a danagda, matikawto dagidiay adda iti dasig ni Satanas ket usarenda dagiti armasda a mangpapatay iti maysa ken maysa. Ngem saanto a makaliklik ni Satanas. Kinuna ni Jehova: “Apuy ken asupre pagtuduekto [ken Gog] ken kadagiti bunggoyna ken iti adu nga ili a maikuyogto kenkuana.” (Ezeq. 38:21, 22) Anianto ti resulta daytoy a tignay ti Dios?

12. Anianto ti inkapilitan nga aramiden dagiti nasion?

¹² Mabigbigto dagiti nasion a ni Jehova ti nangibanag iti pannakaabakda. Kalpasanna, kas iti inaramid dagiti nagkauna nga Egipcio a kimmamat kadagiti Israelita iti Nalabaga a Baybay, iyikkisto dagiti awan gawgawayna a buyot ni Satanas: ‘Ni Jehova ti sigurado a makiruprupak maipaay kadakuada!’ (Ex. 14:25) Wen, mapilitanto dagiti nasion a mangbigbig ken Jehova. (Basaen ti Ezequiel 38:23.) Kasano kaasidegen ti panangrugi dagitoy nga agsasaruno a paspasamak?

13. Ania ti ammotayo maipapan iti maikalima a paset ti ladawan a dineskribir ni Daniel?

¹³ Ti maysa a padto iti libro a Daniel tulongannatayo a mangammo no ayantayon iti agus ti panawen. Deskribiren ni Daniel ti maysa a ladawan ti tao a buklen ti nadumaduma a metal. (Dan. 2:28, 31-33) Irepresentar dayta ti agsasaruno a kabilgan a turay iti lubong a direkta a nangirurumen iti ili ti Dios, iti napalabas ken iti agdama. Dagitoy ti Babilonia, Medo-Persia, Grecia, Roma​—ken ti maudi, iti kaaldawantayo, maysa pay a nabileg a turay. Ti panangusig iti padto ni Daniel ipakitana a daytoy a maudi a turay ti inrepresentar dagiti saka ken ramramay ti saka ti ladawan. Bayat ti Gubat Sangalubongan I, naaddaan ti Britania ken Estados Unidos iti naisangsangayan nga aliansa. Wen, ti maikalima a paset ti ladawan isu ti Anglo-Americano a Turay ti Lubong. Dagiti saka isu ti maudi a paset ti ladawan, a mangipasimudaag nga awanen ti sabali pay nga agparang a turay ti tao. Dagiti saka ken ramramay ti saka a naaramid iti landok ken pila iladawanda ti nakapuy a kasasaad ti Anglo-Americano a Turay ti Lubong.

14. Anianto ti kabilgan a turay ti lubong inton dumteng ti Armagedon?

¹⁴ Ipasimudaag met laeng dayta a padto a ti Pagarian ti Dios, a nailadawan kas dakkel a bato, ket natikap idi 1914 manipud iti maysa a bantay, a mangirepresentar iti kinasoberano ni Jehova. Dayta a bato ket sipapartak itan nga agturturong iti puntiriana​—dagiti saka ti ladawan. Maburakburakto inton Armagedon dagiti saka ken ti dadduma pay a paset ti ladawan. (Basaen ti Daniel 2:44, 45.) Ti ngarud Anglo-Americano a Turay ti Lubong ti agdama a kabilgan a turay inton dumteng ti Armagedon. Anian a makapagagar a makita ti naan-anay a pannakatungpal daytoy a padto!c Ania met ngata ti aramiden ni Jehova ken Satanas?

15. Kalpasan ti Armagedon, anianto ti mapasamak ken Satanas ken kadagiti demoniona?

¹⁵ Umuna, maimatanganto ni Satanas ti naan-anay a pannakatalipupos ti intero nga organisasionna ditoy daga. Kalpasanna, isunto metten ti maisublat. Impadamag ni apostol Juan ti sumaruno a mapasamak. (Basaen ti Apocalipsis 20:1-3.) Ni Jesu-Kristo​—ti “anghel . . . nga addaan iti tulbek ti mangliwengliweng”​—tiliwennanto ni Satanas ken dagiti demoniona, itapuakna ida iti mangliwengliweng, ken ipupokna ida sadiay iti sangaribu a tawen. (Luc. 8:30, 31; 1 Juan 3:8) Dayta ti umuna a paset ti pannakadunor ti ulo ti serpiente.d​—Gen. 3:15.

16. Ania ti kayat a sawen ti kaadda ni Satanas iti “mangliwengliweng”?

¹⁶ Ania ti “mangliwengliweng” a pakaitapuakanto ni Satanas ken dagiti demoniona? Ti Griego a sao nga aʹbys·sos nga inusar ni Juan kaipapananna ti “di matukod a kinauneg.” Di pulos ngarud madanon dayta ti siasinoman malaksid ken Jehova ken ti dinutokanna nga anghel nga addaan iti “tulbek ti mangliwengliweng.” Sadiayto ti ayan ni Satanas a kasla iti natay nga awan maaramidanna tapno “saannan a mayaw-awan dagiti nasion.” Pudno nga agulimekton dayta a “leon a ngumerngernger.”​—1 Ped. 5:8.

17, 18. (a) Ania a paspasamak iti masanguanan ti inusigtayon? (b) Anianto a panawen ti tagiragsakentayo kalpasan dagitoy a pasamak?

¹⁷ Dandanin dumteng dagiti napapateg ken makapakintayeg a paspasamak. Ur-urayentayo no kasanonto a mapasamak ti pannakaideklara ti “Talna ken talged!” Kalpasanna, maimatangantayto ti pannakadadael ti Babilonia a Dakkel, ti iraraut ni Gog manipud iti Magog, ti gubat ti Armagedon, ken ti pannakaitapuak ni Satanas ken dagiti demoniona iti mangliwengliweng. Kalpasan dagitoy a pasamak, inton mapunasen ti amin a kinadakes, sumrektayton iti baro a panawen​—ti Sangaribu a Tawen a Panagturay ni Kristo, ket matagiragsaktayto ti “kinaruay ti talna.”​—Sal. 37:10, 11.

¹⁸ Malaksid iti lima a pasamak nga inusigtayon, adda pay “bambanag a di makita” a kayattayo a maimatangan. Mausig dagitoy a pasamak iti sumaruno nga artikulo.