Agserbika ken ni Jehova a Mayannurot Kadagiti Nangato a Pagalagadanna

 1. Idi kaaldawan ni Sofonias, kasano ti panangmatmat dagiti umili ti Jerusalem kadagiti pagalagadan ni Jehova?

“NI Jehova saanto nga agaramid iti naimbag, ket saanto nga agaramid iti dakes.” Kasta ti ibagbaga dagiti umili ti Jerusalem idi kaaldawan ni Sofonias. Impagarupda a saan nga iparebbeng ni Jehova kadakuada ti panagbiag a mayannurot iti aniaman a pagalagadan. Kinuna ni Sofonias a ‘tumangtangkenda kadagiti ared-edda.’ Kasda la arinsaed ti nayadi nga arak. Kayatna a sawen, kapkapnekan dagiti umili ti nanam-ay a panagbiagda. Saanda a maseknan iti aniaman a mensahe maipapan iti pannakibiang ti Dios iti biagda. Ngem kinuna ti Dios kadagidi a Judio a ‘siaannad a sukimatenna ti Jerusalem babaen kadagiti pagsilawan’ ket ‘sanguenna’ dagidiay di mangikankano kadagiti pagalagadanna. Wen, addaan ni Jehova kadagiti pagalagadan, ket napateg kenkuana no kasano ti panangmatmat dagiti adipenna kadagita a pagalagadan.​—Sofonias 1:12.

 2. Iti lugaryo, ania ti panangmatmat ti kaaduan a tattao kadagiti pagalagadan?

² Adu met ita ti agkedked a sumurot kadagiti pagalagadan. Nalabit mangngegmo ida nga agkuna iti, “Aramidem no ania ti pagragsakam!” Kuna dagiti dadduma, ‘No awan ti kuartak wenno no saanko a mapennek ti tarigagayko, awan dakesna no aramidek ti amin a pamuspusan tapno laeng maalak ti kayatko.’ Saanda nga ikabkabilangan ti rikna ti Dios wenno ti iparparebbengna kadakuada. Sika ngay? Yamanem kadi ti kaadda dagiti pagalagadan nga impasdek ti Namarsua?

3, 4. Apay nga apresiarem ti kaadda dagiti pagalagadan?

³ Adu kadagidiay agkedked nga agbiag a mayannurot kadagiti pagalagadan ti Dios ti sidadaan nga umawat kadagiti pagalagadan ti tao iti nadumaduma a benneg ti biag. Alaentayo a pagarigan ti kalidad ti danum. Addaan ti kaaduan a gobierno kadagiti pagalagadan no iti kalidad ti danum nga agpaay kadagiti umili. Ngem kasanon no nababa unay dagiti pagalagadan? Mabalin a dayta ti pakaigapuan ti panagtakki ken dadduma pay a sakit a maala iti danum a makaapektar nangnangruna kadagiti ubbing. Ngem mabalin a mabembenipisiaranka kadagiti naipasdek a nangato a pagalagadan para iti mainum a danum. “No awan dagiti pagalagadan, iti saan a mabayag, mariknatayto dagiti epektona,” kuna ti International Organization for Standardization. “Kaaduanna, ditay madmadlaw ti paset dagiti pagalagadan no iti panangpasayaat iti kalidad, kinatalged, kinamapagtalkan, kinaepektibo ken abilidad a mangsukat iti maysa a banag iti sabali pay ta addaan dagitoy iti isu met laeng a pagalagadan​—agraman ti saan a nangina a gatad iti panangipaayna kadagita a benepisio.”

⁴ No umanamongka a napateg ti kaadda dagiti pagalagadan iti nadumaduma a benneg ti biag, saan kadi a nainkalintegan a namnamaen nga addaan ti Dios kadagiti nangato a pagalagadan nga agpaay kadagiti tattao a naawagan iti naganna?​—Aramid 15:14.

 5. Kasano nga inladawan ni Jehova babaen ken ni Amos ti kinapateg ti panangsurot kadagiti pagalagadanna?

⁵ No mangbangonka iti balay, napateg dagiti pagalagadan. No nakairig ti maysa a diding, mabalin nga agirig met ti intero a pasdek. Wenno saan, di mabalin a pagnaedan ti maysa a balay no adda dagiti giwang kadagiti didingna. Dayta ti punto ti sirmata ni Amos, a nagipadto idi maikasiam a siglo K.K.P., maipapan iti kasasaad ti nasion ti Israel a buklen ti sangapulo a tribu. Nakitana ni Jehova nga agtaktakder iti rabaw ti maysa a pader ket “adda tinnag iti imana.” Kinuna ti Dios: “Adtoy mangisaadak iti tinnag iti tengnga ti ilik nga Israel. Saankonton a palabsen pay dayta.” (Amos 7:7, 8) Ti tinnag ket buttuon a naibitin iti linas. Mausar daytoy a pangsierto no nalinteg met laeng ti pannakaipatakder ti pader. “Naaramid babaen iti tinnag” ti piguratibo a pader a nakita ni Amos a pagtaktakderan ni Jehova. Nalinteg ti pannakaipatakder dayta a pader. Ngem idi kaaldawan ni Amos, saanen a nalinteg ti naespirituan a takder dagiti Israelita. Kasda la nagirig a pader a nasken a rebbaen sakbay a marsuod.

 6. (a) Ania a napateg a punto ti masarakan kadagiti libro nga insurat dagiti 12 a mammadto? (b) Apay a maikunam a nainkalintegan dagiti pagalagadan ti Dios?

⁶ Iti panangadalmo kadagiti libro nga insurat dagiti 12 a mammadto, maulit-ulit a masarakam daytoy a punto: Nasken ti panangsurot kadagiti pagalagadan ti Dios. Dagiti mensahe kadagita a libro ket saan a bin-ig a panangkondenar iti ili a di sumursurot kadagiti nangato a pagalagadan ti Dios. Iti panangsukimat ni Jehova iti ilina, adda dagiti tiempo a nasarakanna ida a sumursurot kadagiti pagalagadanna. Ti banag a kabaelanda nga aramiden dayta paneknekanna a nainkalintegan dagiti pagalagadan ti Dios; uray no imperpektotayo, kabaelantayo a tungpalen dagita. Usigem ti maysa a pagarigan.

 7. Kasano nga impakita ni Zacarias a kabaelan dagiti imperpekto a tattao a tungpalen dagiti pagalagadan ni Jehova?

⁷ Idi naisaaden dagiti nagsubli a Judio ti pundasion ti templo, naisardeng ti panagbangonda. Dayta ti gapuna nga imbaon ti Dios da propeta Haggeo ken Zacarias tapno paregtaenda dagiti umili a mangituloy iti proyekto. Iti maysa a sirmata ni Zacarias, ni Jehova inladawanna ni Zorobabel, a gobernador ti Juda, kas addaan iti ‘tinnag iti imana’ idi insaadna ti pannakaulo a bato a nangkompleto iti templo. Nabangon ti templo sigun kadagiti pagalagadan ti Dios. (Zacarias 4:10) Ngem imutektekam daytoy makapainteres a detalye maipapan iti nairingpas a templo: “Dagitoy a pito isuda ti matmata ni Jehova. Agsursursorda iti intero a daga.” Nakita ti Dios ti panangisaad ni Zorobabel iti pannakaulo a bato, ket yantangay awan ti malabsan dagiti matana, nakitana a nasurot dagiti pagalagadanna iti pannakabangon ti templo. Ti punto ket nupay nangato dagiti pagalagadan ni Jehova, kabaelan dagiti tattao a tungpalen dagita. Nabalinan dayta ni Zorobabel ken dagiti kailianna gapu iti pammaregta da Haggeo ken Zacarias. Kas ken Zorobabel, kabaelam met ti agbiag a mayannurot kadagiti pagalagadan ti Dios. Anian a makaliwliwa a maammuan dayta!

8, 9. (a) Apay nga adda karbengan ni Jehova a mangipasdek kadagiti pagalagadan para kadagiti tattao? (b) Apay a maitutop laeng a namnamaen ti Dios a tungpalen dagiti Israelita dagiti bilinna?

⁸ Kas Namarsua, adda kalintegan ti Dios a mangipasdek kadagiti pagalagadan ken mangnamnama a tungpalentayo dagita. (Apocalipsis 4:11) Saan a masapul nga ibinsabinsa ni Jehova ti amin, ta inikkanna dagiti tattao iti konsiensia kas napateg a giya. (Roma 2:14, 15) Binilin ti Dios da Adan ken Eva a saanda a mangan iti bunga ti “kayo ti pannakaammo iti naimbag ken dakes,” a mangirepresentar iti kalintegan ti Dios a mangipasdek kadagiti pagalagadan iti naimbag ken dakes. Ammom no ania ti napasamak. (Genesis 2:17; 3:1-19) Mainaig iti di umiso nga inaramid ni Adan, insurat ni Oseas: “[Dagiti Israelita], kas iti naindagaan a tao, sinalungasingda ti tulag.” (Oseas 6:7) No kasta, impakita ni Oseas a sipapakinakem a nagbasol dagiti Israelita.

⁹ Ania aya ti basolda? “Sinalungasingda ti tulag [ti Linteg].” (New International Version) Gapu iti panangaonna iti ilina idiay Egipto, ti Dios ti nagbalin a makinkukua kadakuada ket nalawag nga adda kalinteganna a mangipasdek kadagiti pagalagadan nga agpaay kadakuada. Immannugot dagiti Israelita a makitulag ken ni Jehova. Immanamongda nga agbiag a mayannurot kadagiti pagalagadanna. (Exodo 24:3; Isaias 54:5) Nupay kasta, adu kadakuada ti nangsalungasing iti Linteg. Nagbasolda iti panangibukbok iti dara, pammapatay, ken pannakiabig.​—Oseas 6:8-10.

10. Kasano nga inkagumaan ti Dios a tulongan dagidiay di sumursurot kadagiti pagalagadanna?

¹⁰ Nangibaon ni Jehova kadagiti mammadto a kas ken Oseas a tumulong kadagiti dedikado a tattaona. Iti ngudo ti naimpadtuan a librona, kinuna ni Oseas: “Siasino ti nasaririt, tapno maawatanna dagitoy a banag? Masirib, tapno maammuanna ida? Ta nalinteg ti daldalan ni Jehova, ket dagiti nalinteg isuda dagidiay magnanto kadakuada; ngem dagiti managsalungasing isuda dagidiay maitibkolto kadakuada.” (Oseas 14:9) Sakbayna iti Oseas kapitulo 14, nakitatayo nga impaganetget ti mammadto ti kinapateg ti panagsubli ken ni Jehova. Maawatan dagiti masirib a nangisaad ni Jehova kadagiti nalinteg a dana a rumbeng a pagnaan dagiti tattaona. Kas dedikado nga adipen ti Dios, awan duadua a sipapasnek a tarigagayam ti agtalinaed a kasta, a magmagna kadagiti dana ni Jehova.

11. Apay a kayatmo a tungpalen dagiti bilin ti Dios?

¹¹ Iturong met ti Oseas 14:9 ti imatangtayo kadagiti pagsayaatan ti panangsurot iti nalinteg a dana. Mangyeg kadagiti bendision ken gunggona ti panangtungpal kadagiti bilin ti Dios. Kas Namarsua, ammona ti pakabuklantayo. Agpaay a pagimbagantayo dagiti bilinna. Kas panangiladawan iti relasiontayo iti Dios, alaentay a pagarigan ti lugan ken ti nangaramid iti dayta. Ammo ti nangaramid no kasano a nadisenio ken nasangal ti lugan. Ammona a masapul a masansan a masukatan ti lana ti makina. Ania ti mapasamak no dimo suroten dayta nga instruksion, a nalabit ikalintegam a naannayas met ti panagandar ti lugan? Di agbayag, mabalin a madadael ken agpalia ti makina. Pudno met dayta kadagiti tattao. Adda dagiti bilin kadatayo ti Namarsua. Agpaay a pagimbagantayo no tungpalentayo dagita. (Isaias 48:17, 18) No mabigbigtayo a pagsayaatantayo dagita, dakdakkel ti panggapuantayo nga agbiag a mayannurot kadagiti pagalagadanna, a tungpalentayo dagiti bilinna.​—Salmo 112:1.

12. Kasano a ti pannagna iti nagan ti Dios mapalagdana ti relasiontayo kenkuana?

¹² Ti kangrunaan a pagsayaatan ti panangtungpal kadagiti bilin ti Dios ket isu ti panangtagiragsak iti nalaglagda a relasion iti Dios. No agbiagtayo a mayannurot kadagiti pagalagadanna ket makitatayo a nainkalintegan ken makagunggona dagitoy, umuneg ti panangipategtayo iti Dios a nangipasdek kadagita a pagalagadan. Nagimnas ti panangiladawan ni propeta Mikias iti kasta a nadekket a relasion: “Amin dagiti ili, iti biangda, magnadanto tunggal maysa iti nagan ti diosna; ngem datayo, iti biangtayo, magnatayto iti nagan ni Jehova a Diostayo agingga iti tiempo a di nakedngan, iti mismo nga agnanayon.” (Mikias 4:5) Anian a pribilehio ti pannagnatayo iti nagan ni Jehova, nga itandudo ken bigbigentayo ti kinaturayna iti biagtayo! Natural laeng a kayattayo nga iyanninaw dagiti galadna. Ikagumaan koma ti tunggal maysa kadatayo a palagdaen ti relasiontayo iti Dios.​—Salmo 9:10.

13. Apay a saantayo a pagdaksan ti panagbuteng iti nagan ti Dios?

¹³ Naikuna a dagidiay agbiag a mayannurot kadagiti pagalagadan ti Dios ken magna iti naganna ket adda panagbutengda iti nagan ti Dios. Saantayo a pagdaksan dayta. Ipanamnama ni Jehova kadagiti kasta a tattao: “Kadakayo nga agbuteng iti naganko sigurado nga agsilnagto ti init ti kinalinteg, a kadagiti payakna adda pannakapaimbag; ket pudno a rummuarkayto ket karukayenyo ti daga a kas kadagiti pinalukmeg a kigaw a baka.” (Malakias 4:2) Kas kaitungpalan daytoy a padto, ni Jesu-Kristo “ti init ti kinalinteg.” (Apocalipsis 1:16) Agsilsilnag ita ni Jesu-Kristo tapno mangpaimbag iti naespirituan ket iti masanguanan, agsilnagto tapno paimbagenna ti sangatauan iti pisikal a pamay-an. Ti rag-o dagiti napaimbag ket mayarig iti rag-o dagiti pinalukmeg a baka ‘a karukayenda ti daga,’ ta magagaran ken maayatanda a maibulos. Saan kadi a tagtagiragsakemon ti kasta a wayawaya?​—Juan 8:32.

14, 15. Kasano a magunggonaanka iti panangtungpalmo kadagiti pagalagadan ni Jehova?

¹⁴ Sumayaat met ti relasionmo kadagiti padam a tattao no tungpalem dagiti pagalagadan ti Dios. Adda lima a banag a nangbabalawan ni Habakuk kadagiti naagum, suitik, mangibukbok iti dara, imoral, ken agdaydayaw kadagiti didiosen. (Habakuk 2:6-19) Ti banag nga impakaammo ni Jehova ti dakes a pagbanagan dagiti kasta a tattao nalawag nga ipakitana nga adda dagiti impasdekna a pagalagadan no kasano ti rumbeng a panagbiagtayo. Ngem imutektekam daytoy a punto: Uppat kadagiti nadakamat a dakes nga aramid ti mainaig iti panangtratotayo iti padatayo a tao. No tuladentayo ti panangmatmat ti Dios, ditay ranggasan dagiti sabsabali. Iti kasta, sumayaat ti relasiontayo iti kaaduan kadakuada.

¹⁵ Agbalin met a naragsak ti pamiliatayo no agbiagtayo a mayannurot kadagiti pagalagadan ti Dios. Masansan nga ipagarup dagiti tattao kadagitoy a tiempo a panagsina ti ultimo a solusion ti di panagkinnaawatan ti agassawa. Ngem babaen ken ni propeta Malakias, kinuna ni Jehova: “Ginurana ti panagdiborsio.” (Malakias 2:16) Detalyado nga usigentayto pay ti Malakias 2:16, ngem iti daytoy a punto imutektekam ta nainsiriban a nangipasdek ti Dios kadagiti pagalagadan a rumbeng a tungpalen dagiti kameng ti pamilia; natalna ti pamilia nga agbiag a mayannurot kadagita a pagalagadan. (Efeso 5:28, 33; 6:1-4) Pudno, imperpektotayo amin, isu a rumsua dagiti parikut. Ngem iti libro nga Oseas, Daydiay “nakautangan ti tunggal pamilia idiay langit ken iti daga ti naganna” ket nangted iti pagtuladan no kasano a risuten uray dagiti narikut a problema ti agassawa. Usigentayto met dayta iti maysa a kapitulo daytoy a libro. (Efeso 3:15) Kitaentayo ita no ania pay ti ramanen ti panangtungpal kadagiti pagalagadan ti Dios.

16. Kasano a nainaig ti Amos 5:15 kadagiti pagalagadan ti Dios?

¹⁶ Ti umuna a tao a ni Adan saan a nainsiriban ti pinilina no makimpagalagadan iti naimbag ken dakes ti kasayaatan. Nasaysayaat kadi ti panagpilitayo? Indagadag ni Amos nga ipasnektayo nga aramiden daytoy. Kinunana: “Guraenyo ti dakes, ket ayatenyo ti naimbag.” (Amos 5:15) Maipapan iti daytoy a bersikulo, kinuna ni William Rainey Harper, daydi propesor iti Semitico a pagsasao ken literatura iti University of Chicago: “Ti adda iti panunot [ni Amos] a pagalagadan iti naimbag ken dakes ket isu ti pannakitunos iti pagayatan ni Yahweh.” Maysa daytoy a kangrunaan a maadaltayo kadagiti 12 a mammadto. Madadaantayo kadi a mangawat kadagiti pagalagadan ni Jehova iti naimbag ken dakes? Dagita a nangato a pagalagadan ket naipalgak kadatayo iti Biblia ken inlawlawag dagiti nataengan ken aduan kapadasan a Kristiano a mangbukel iti “matalek ken masirib nga adipen.”​—Mateo 24:45-47.

17, 18. (a) Apay a nasken a guraentayo ti dakes? (b) Iyilustrarmo no kasano a mapatanortayo ti nakaro a pananggura iti dakes.

¹⁷ No kaguratayo ti dakes, liklikantayo dagiti banag a di makaay-ayo iti Dios. Kas pagarigan, mabalin nga ammo ti maysa a tao ti pagdaksan ti pornograpia iti Internet ket saanna a buyaen dayta. Ngem iti ‘kinataona iti uneg,’ ania ti riknana maipapan iti linaon dagiti pornograpiko a Web site? (Efeso 3:16) No iyaplikarna ti pammagbaga a masarakan iti Amos 5:15, nalaklakana a guraen ti dakes. Iti kasta, mabalin nga agballigi iti naespirituan a pannakidangadangna.

¹⁸ Usigem ti maysa pay a pagarigan. Mairusokmo kadi ti agruknoy kadagiti idolo a mainaig iti panagdayaw iti sekso? Saan kadi a makarimon ti uray panangpanunot laeng iti dayta? Nupay kasta, dinakamat ni Oseas ti maipapan kadagiti amma dagiti Israelita a naigamer iti imoralidad iti sanguanan ni Baal ti Peor. (Numeros 25:1-3; Oseas 9:10) Agparang a dinakamat ni Oseas daytoy a pasamak gapu ta ti panagdayaw ken ni Baal ti kangrunaan a nagbasolan ti pagarian ti Israel a buklen ti sangapulo a tribu. (2 Ar-ari 17:16-18; Oseas 2:8, 13) Panunotem laengen ti makarimon a mapaspasamak: Agrukrukbab dagiti Israelita iti didiosen bayat dagiti aglablabes a seksual a panagraragsak. Ti pannakaammotayo a karimon unay ti Dios ti kasta nga aramid matulonganna ti tunggal maysa kadatayo a mangsaranget kadagiti silo nga ipakpakat ni Satanas babaen ti Internet. Iti kaaldawantayo, adu ti mangid-idolo kadagiti napipintas a babbai ken natataer a lallaki a maiparparang kadagiti popular a paglinglingayan. Ngem naidumatayo unay agsipud ta ammotayo dagiti pakdaar dagiti mammadto maipapan iti panagrukbab iti idolo!

19. Ania ti maadalmo iti inaramid ni Jonas idi adda iti tian ti dakkel nga ikan?

¹⁹ Bayat nga ikagkagumaam nga itandudo dagiti nangato a pagalagadan ti Dios iti baet dagiti sulisog ken pakarigatan, mabalin a mariknam no dadduma nga awan gawaymo wenno dimo ammo ti aramidem. No kasla napaksuyanen ti panunot ken riknam, kasano a madaeram a sibaballigi ti narikut a kasasaad? (Proverbio 24:10) Bueno, adda maadaltayo ken ni Jonas, nga ammotayo nga addaan met kadagiti pagkapuyan. Lagipem ti inaramidna idi adda iti tian ti dakkel nga ikan. Nagkararag ken ni Jehova. Imutektekam ti linaon ti kararagna.

20. Ania ti makatulong kenka a mangaramid iti kas iti inaramid ni Jonas?

²⁰ Idi nagkararag ni Jonas iti Dios ‘manipud iti tian ti Sheol,’ nagaramat iti adu a sao ken ebkas a kabesadona, dagiti sasao a masarakan kadagiti salmo. (Jonas 2:2) Mariribukan unay ket nagpakpakaasi ken ni Jehova, ngem dagiti sasao ni David ti inyebkas ni Jonas. Kas pagarigan, idiligmo ti sasao ti Jonas 2:3, 5 kadagiti sasao a masarakan iti Salmo 69:1, 2.a Saan kadi a nalawag a kabesado ni Jonas dagiti nabasbasana a salmo ni David? Immapay iti panunotna dagiti sasao ken ebkas a nausar kadagiti naipaltiing a salmo. Adda ti naipaltiing a sao ti Dios ‘kadagiti makin-uneg a paset’ ni Jonas. (Salmo 40:8) No maipasangoka iti narikut unay a kasasaad, adda kadi malagipmo a sasao ti Dios a maitutop iti kasasaadmo? No ad-adda a kabesadom ti Sao ti Dios, makatulongto unay dayta iti panagdesisionmo ken iti panangrisut kadagiti parikut iti wagas a maitunos kadagiti pagalagadan ti Dios.

21. Ania ti nasken a patanorem tapno matungpalmo dagiti pagalagadan ti Dios?

²¹ Siempre, tapno matungpalmo dagiti pagalagadan ti Dios, saan nga umdas ti pannakaammo laeng iti Sao ti Dios. Ilawlawag pay ni propeta Mikias no ania ti kasapulam tapno mayaplikarmo ti Sao ti Dios: “Ti tao nga addaan praktikal a kinasirib agbutengto iti naganmo.” (Mikias 6:9) Tapno maaddaanka iti praktikal a sirib ken mayaplikarmo ti ammom iti mismo a biagmo, masapul nga agbutengka iti nagan ti Dios.

22, 23. (a) Apay a ni Jehova imbaonna ni Haggeo kadagiti nagsubli a Judio? (b) Apay a makapagtalekka a kabaelam a tungpalen dagiti pagalagadan ti Dios?

²² Kasano a masursurom ti agbuteng iti nagan ti Dios? Bueno, agkonsultaka ken ni Haggeo a nagserbi kas mammadto kalpasan ti panagsubli dagiti naidestiero a Judio. Iti nakaab-ababa a libro nga insuratna, a buklen laeng ti 38 a bersikulo, namin-35 nga inusarna ti nagan a Jehova! Idi a ni Jehova binilinna ni Haggeo nga agipadto, idi 520 K.K.P., 16 a tawenen ti napalabas ngem bassit pay ti nagapuanan iti pannakabangon manen ti templo sadi Jerusalem. Naupay ngamin ti ili ti Dios gapu iti panangbutbuteng dagiti kabusorda. (Esdras 4:4, 5) Inkalintegan dagiti umili a saan pay a tiempo tapno bangonen manen ti templo. Binagbagaan ida ni Jehova: “Isaadyo ta pusoyo iti daldalanyo. . . . Bangonenyo ti balay, tapno pagragsakak dayta ket maidaydayawak.”​—Haggeo 1:2-8.

²³ Ni Gobernador Zorobabel, ti Nangato a Padi a ni Josue, ken “amin dagidiay nabatbati iti ili nangrugida nga umimdeng iti timek ni Jehova a Diosda, . . . ket nangrugi nga agbuteng dagiti umili gapu ken Jehova.” Gapu iti dayta, kinuna ti Dios: “Addaak kadakayo.” Anian a pammatalged! Iti tulong ti espiritu ti Dios, dagiti umili “nangrugida a sumrek ken mangaramid iti trabaho iti balay ni Jehova.” (Haggeo 1:12-14) Ti umno a panagbuteng a mangpagura iti Dios ti nanggutugot kadagiti naupay nga umili nga agtignay iti laksid ti ibubusor.

24, 25. Babaen ti panangusar kadagiti espesipiko nga ehemplo, iyilustrarmo no kasano a mayaplikarmo dagiti prinsipio a nailawlawag iti daytoy a kapitulo.

²⁴ Sika ngay? No ammom dagiti pagalagadan ti Dios a nainaig iti kasasaad a pakaipaspasanguam, maaddaanka ngata iti tured nga agbuteng ken ni Jehova imbes a kadagiti tattao? Nalabit maysaka a balasang, ket iti pagtartrabahuam adda lalaki a saan a kas kadagiti nadiosan a prinsipiom ti sursurotenna, ngem nakaim-imbag ken agrayo kenka. Ania a teksto ti sumiplot iti panunotmo, a mangipalagip kenka kadagiti pagalagadan ni Jehova ken kadagiti peggad ti di panangikankano kadagita? Ti ngay Oseas 4:11? “Ti pannakiabig ken arak ken nasam-it nga arak isuda ti mangikkat iti nasayaat a motibo.” No sipapanunotka iti dayta a teksto, ti kadi panagbutengmo iti Dios ti mangtignay kenka a mangtungpal iti pagalagadanna ken agkedked no awisennaka dayta a lalaki a dumar-ay iti maysa a sosial nga okasion? No gargariennaka, ti panagamakmo a mangpagura iti naayat a Diosmo matulongannaka nga ‘agtalaw.’​—Genesis 39:12; Jeremias 17:9.

²⁵ Ita subliantayo ti maipapan iti lalaki a mangikagkagumaan a mangsaranget iti awis ti pornograpia iti Internet. Malagipna ngata dagiti sasao ti Salmo 119:37, a nayebkas kas kararag? “Iliklikmo dagiti matak manipud panangkita iti awan pategna.” Ken malagipna ngata ti sasao ni Jesus iti Sermon iti Bantay? “Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:28) Ti panagbuteng ken ni Jehova ken ti tarigagay a mangtungpal kadagiti pagalagadanna ti rumbeng a mangtignay iti maysa a Kristiano a mangliklik iti aniaman a dakes. Kaanoman nga agduyoska nga agpanunot wenno agtignay iti maikaniwas kadagiti pagalagadan ti Dios, ikagumaam a parayrayen ti panagbutengmo iti Dios. Ken laglagipem ti kuna ni Jehova kenka babaen ken ni Haggeo: ‘Addaak kenka.’

26. Ania pay ti usigentayo?

²⁶ Wen, kabaelam ti agserbi ken ni Jehova a mayannurot kadagiti nangato a pagalagadanna ket agpaay a pagimbagam dayta. Bayat nga itultuloymo a sukimaten dagiti 12 a naimpadtuan a libro, ad-adda a maawatam dagiti pagalagadan ti Dios wenno dagiti iparebbengna iti tunggal maysa kadatayo. Ti sumaganad a benneg daytoy a libro salaysayenna dagiti tallo a napateg a banag a pakayaplikaran dagiti nagsayaat a pagalagadan ni Jehova: ti kababalintayo, ti pannakilangentayo kadagiti sabsabali, ken ti biag ti pamiliatayo.