ACOR

[Pannakailaksid; Riribuk].

Maysa a ginget wenno nababa a tanap a paset ti makin-amianan a daya a beddeng ti teritoria ti tribu ti Juda. (Jos 15:7) Ti nagan ti ginget, a kaipapananna ti “Pannakailaksid; Riribuk,” ket gapu iti pannakaubor ni Acan ken ti sangakabbalayanna iti dayta a lugar agingga a natayda. Gapu iti panangtakaw ken panangilemmeng ni Acan iti sumagmamano a samsam manipud pannakakautibo ti Jerico, inyegna iti nasion ti Israel ti pannakailaksid wenno pannakailunod, agraman pannakaabak iti damo nga iraraut iti Ai.​—Jos 7:5-26.

Adda dagidiay mangibaga a ti Ginget ti Acor ket isu ti Wadi el Qilt, a kasla baw-ang a naapres a ginget a lumasat iti asideg ti Jerico. Nupay kasta, maibatay iti pannakadeskribir ti ayanna a nailanad iti Josue 15:7, agparang nga adda dayta iti ab-abagatan pay, ket ti sasao iti Isaias 65:10 ipasimudaagna ti ak-akaba, nalawlawa a lugar. Gapu iti daytoy, kunaen ti dadduma nga isu dayta ti el Buqeiʽa (Biqʽat Hureqanya), maysa a natikag ken nababa a lantag ti bantay wenno labneng, a naglayon manipud amianan nga agpaabagatan a bumallasiw iti Wadi Qumran (Nahal Qumeran) iti asideg ti amianan a laud a nagsulian ti Natay a Baybay. Kadagiti panagsukimat sadiay ti arkeolohia, natakuatan dagiti disso ti kadaanan nga il-ili wenno sarikedked kasta met dagiti nagduduma a kita ti puttot.

Iti Oseas 2:15 linagip ni Jehova ti kinaagtutubo ti Israel idi tiempo ti Ipapanaw, ket iti maysa a padto ti pannakaisubli manipud masanguanan a pannakakautibo, inkarina a “ti nababa a tanap ti Acor,” a sigud a disso ti pannakailaksid, agbalinton a “kas pagserkan nga agturong iti namnama.” Ket iti umasping a padto ti pannakaisubli, nupay let-ang dayta a lugar, impadto ti Dios a dayta a nababa a tanap ti Acor agbalinto a “lugar a paginanaan ti bakbaka.”​—Isa 65:10.