Maysa a Baro a Lubong nga Awan Panagsagaba

“Dagiti immuna a bambanag didanto malagipen, didanto mapanunoten. Ngem agragsakkayo, ken agrag-okayo iti agnanayon iti daydiay parsuaek.”—Isaias 65:17, 18.

DAGIDIAY a naimpadtuan a sasao impaltiing ti Dios nasurok a 2,700 a tawtawenen ti napalabas. Deskribirenda, iti pasetna, no anianto ti kasasaad ti daga iti masanguanan. Kaano? Kalpasan ti panangipatingga ti Dios iti agdama a sistema dagiti bambanag. Adu a padpadto ti Biblia ti mangilawlawag a panggep ti Dios nga ikkaten daytoy agdama a sistema dagiti bambanag iti mabiiten ket sukatanna dayta iti maysa a baro a lubong nga awan ti aniaman a panagsagaba.

Anian a naidumanto ti biag iti dayta a baro a lubong no idilig iti biag iti intero a napalabas a natauan a historia! Ibaga ti naimpadtuan a Sao ti Dios kadatayo a dayta naan-anayto nga awanan iti gubat, krimen, kinapanglaw, ken kinaawan kinahustisia. Awanton nga agnanayon ti sakit ken ipapatay. Awanton dagiti nasinasina a gobgobierno, relihion, wenno sistema ti ekonomia a napaneknekan a di maitutop. Dagiti lulua iti rag-o sukatandanton dagiti lulua iti panagladingit agsipud ta awanton iti agnanayon ti kinadakes ken panagsagaba.

Nailadawan kadagiti Padpadto ti Biblia

Paliiwenyo no kasano a dagita a kasasaad nailadawanda itoy a pangarigan dagiti padpadto ti Biblia:

Awanen ti Gubat: “Pasardengenna dagiti gubgubat inggana iti ungto ti daga.” (Salmo 46:9) “Ti maysa a nasion saannanto nga itag-ay ti kampilan a maibusor iti nasion, ket didanto adalenen iti pannakigubat uray kaano.”—Isaias 2:4.

Kinahustisia para iti Isuamin: “Ket aramidekto ti kinahustisia iti uged, ken ti kinalinteg iti tinnag.”—Isaias 28:17.

Wayawaya Manipud Buteng: “Ngem agtugawdanto tunggal maysa a tao iti sirok ti kayona nga ubas ken iti sirok ti kayona nga higos, ket awanto ti mangpabuteng kadakuada.” (Mikias 4:4) “Ket sitatalgeddanto iti dagada.”—Ezequiel 34:27.

Mapukawton ti Bisin: “Addanto kinaruay ti bukel iti daga iti tapaw dagiti bambantay.” (Salmo 72:16) “Ket ti kayo iti away mangtedto iti bungana, ket ti daga mangtedto ti rang-ayna.”—Ezequiel 34:27.

Awanen ti Lumakay wenno Agsakit: “Ti lasagna nasalsalibukagto ngem ti lasag ti maysa nga ubing; isu agsubli kadagiti al-aldaw ti kinaubingna.” (Job 33:25) “Ket ti agtaeng dinanto kunaen: ‘Masakitak.’”—Isaias 33:24.

Ti Ipapatay, Ladingit, ken Rigat Awanton: “[Ti Dios] punasennanto ti amin a lulua kadagiti matada, ket awanton ni patay, awanto metten ti sasaibbek, wenno sangsangit, wenno rigrigat. Dagiti immuna a bambanag napalabasdan.”—Apocalipsis 21:4.

Saan nga Inapektaran ti Napalabas

Ti umay a baro a lubong nga aramiden ti Dios makapnekto unay ta ti panangtagiragsak dagiti agnaed iti daga iti biag saanto a malapdan, uray dagiti di nasayaat a pakalaglagipan iti napalabas a panagsagaba. Dagiti nagadu a makapabileg a pampanunot ken ar-aramid iti inaldaw a panagbiagto dagiti tattao iti dayta a baro a panawen in-inotennanto a punasen ti napalabas a dakes a pakalaglagipan. Ti kari ti Dios ket: “Dagiti immuna a bambanag didanto malagipen, didanto mapanunoten.” “Agnanayonton a naragsak” dagiti tattao iti ipaay ti Dios iti isuamin a daga. “Ti isuamin a daga aginana, ket natalna. Dagiti tattao tumpuarda nga agkankanta.”—Isaias 65:17, 18; 14:7.

Itatta, “ti inanama a maitantan pagsakitenna ti puso,” kas kunaen ti Biblia. Ngem mabaliktadto ti kasasaad idiay baro a lubong. Iti dayta a tiempo “no umapay ni kalikaguman [isu] ti maysa a kayo ti biag.” (Proverbio 13:12) Saanto nga agsakit ti puso babaen iti panagsagaba wenno babaen kadagiti di natungpal nga inanama. Imbes ketdi, dagitoy mapnekdanto ket agrag-odanto kadagiti adu a nakaskasdaaw a bambanag nga ipaayto ti Dios iti natauan a pamilia.

Naiduma a Panangituray

Imbes a maaddaan iti di naballigi a panangituray ti tao a naisina iti Dios, ti baro a lubong maaddaanto iti naiduma unay a panangituray. Ti mangituray nga autoridad maalanto manipud kadagiti tattao. Pulos a didanto mapalubosan nga agturay a naisina iti Dios.

Kunaen ti Biblia: “Ket kadagiti al-aldaw dagita nga ar-ari [dagiti agtuturay itatta] ti Dios ti langit mamangonto ti maysa a pagarian [idiay langit] a kaanoman dinto madadael ket ti panagturayna dinto met maited iti sabali nga ili [ta awanen ti panangituray ti tao]. Ngem burakennanto ken ibusennanto amin dagitoy a pagpagarian [nga adda itatta], ket isu agtalinaedto iti agnanayon.”—Daniel 2:44.

Insuro ni Jesus dagiti paspasurotna nga agkararag maipaay iti baro a panangituray iti daga idi kinunana: “Umay koma ti pagariam. Maaramid koma ti pagayatam, kas sadi langit, kasta met ditoy daga.”—Mateo 6:10.

Daytanto ti baro a gobierno ti sangatauan—ti nailangitan a turay ti Dios babaen iti Pagarianna nga adda iti im-ima ni Kristo. Ket ditoy daga, dagiti nasungdo a tao nga ad-adipen ti Dios aywanandanto dagiti ar-aramid sigun iti panangiturong ti Dios. (Isaias 32:1) Sinarita ni apostol Pedro daytoy nga urnos kas “baro a langlangit ken maysa a baro a daga nga ur-urayentayo kas mayannurot iti karina, isuda a pagtaengan ti kinalinteg.” (2 Pedro 3:13) Dayta a turay ti Pagarian isu ti kangrunaan a sursuro ti Biblia.

‘Naluk-atan ti Sangaparsuaan’

Daytoy a baro a panangituray naan-anayto met a tenglenna dagiti gagangay a puersa iti daga. Awanton dagiti ‘gagangay a didigra’ kas iti ginggined, bagio, laylayus, wenno tikag a mamataud iti rigat. Impakita a mismo ni Jesus ti pannakabalinna iti panangbilinna kadagitoy a puersa. Iti maysa nga okasion, kas pangarigan, idi dandanin lumned ti barangay a nagluganan ni Jesus ken dagiti adalanna gapu iti bagio, pinagtalnana ti angin ken ti baybay. Kinuna dagiti nasdaaw nga adalanna: “Ania a kababalin ti tao daytoy, ta uray dagiti angin ken ti baybay agtulnogda kenkuana?”—Mateo 8:23-27.

Gapuna ti daga, agraman ti natauan a parparsua, makasarakdanto ti awan kapadana a wayawaya. “Ti met laeng sangaparsuaan maluk-atanto iti pannakaadipen ti panagrupsa a maipaay iti nadayag a wayawaya dagiti annak ti Dios. Ta ammotayo a ti sangaparsuaan agsasaibbekda ken agrigrigatda iti panagpasngay a sangsangkamaysa agingga ita.”—Roma 8:21, 22.

Masiguradotay kadi a mabiiten nga agpatingga ti panangituray ti tao ket ti baro a gobierno ti Dios sublatennanton ti panangiturong kadagiti amin nga ar-aramid ditoy daga? Pudno a kasta, agsipud ta sinao ti Soberano ti Uniberso: “‘Ti patigmaanko mataginayon, ken aramidekto amin a pagayatak’; . . . insaok; aramidekto met ti pannakatungpalna. Pinanggepko, isu met ti aramidekto.”—Isaias 46:10, 11.

“Iti Nakedngan a Tiempo”

Kasano a mapasamak dayta? Kaanonto a mapasamak? Kunaen ti Sao ti Dios: “Maipaay iti tunggal banag adda nakedngan a tiempo.” (Eclesiastes 3:1) Daytoy iramanna ti nakedngan a tiempo ti Dios a mangikuna ‘umdasen!’ ket ipatingganan ti kinadakes ken panagsagaba. Tinukoy ni Daniel “ti nakedngan a panawen ti panungpalan.” (Daniel 8:19) Sinarita met ni Jesus ti “nakedngan a panawen.”—Marcos 13:32, 33.

Wen, nangikeddeng ti Dios iti tiempo ti pannakibiangna kadagiti ar-aramid ti tao ket pukawenna dagiti nakaay-ay-ay nga eksperimento iti panangituray ti tao a naisina kenkuana. “Ukomento ti pudno a Dios ti nalinteg ken ti nadangkok, ta adda panawen a maipaay iti tunggal aramid.” (Eclesiastes 3:17) Ket ti pammaneknek a kaitungpalan iti padto ti Biblia ipamatmatna a ti naituding a tiempo a panangipalubos ti Dios iti panagsagaba mabiiten nga agpatingga. No maturposen dayta a naituding a tiempo, pukawennanton ti di naballigi a sistema ti panangituray ti tao a nangiyeg iti adu a panagsagaba ti natauan a pamilia iti rinibribo a tawen.—Mateo 24:3-14; 2 Timoteo 3:1-5, 13; Apocalipsis 19:11-21.

Inton mangokomen ti Dios, paliiwenyo no anianto ti mapasamak kadagiti agpaituray iti turayna, a maisupadi kadagidiay di agpaituray: “Ta bassit pay a darikmat, ket ti nadangkes maawanton; . . . ngem dagiti naemma tawidendanto ti daga, ket maay-ayatandanto iti kinaruay ti talna.” “Ngem ti putot dagiti nadangkes, magessatdanto. Ti sililinteg tawidennanto ti daga ket agtaengto kenkuana nga agnanayon.” “Paliiwem ti nalinteg, ta natalnanto ti masanguanan dayta a tao. Ngem no maipapan kadagiti managlabsing madadaeldanto a matalipupos.”—Salmo 37:10, 11, 28, 29, 37, 38; kitaenyo met ti Proverbio 2:21, 22; Mateo 5:5.

Ngem dagiti ngay binilion a tattao a natayen? Kasano a magunggonaanda manipud iti baro a lubong? Babaen iti panagungar, ti pannakaisublida iti biag ditoy daga a mismo. Agsublidanto manipud iti tanem ket maikkandanto ti gundaway a mangtagiragsak iti biag nga agnanayon. Ipanamnama ti Sao ti Dios: “Addanto panagungar dagiti nalinteg ken dagiti nakillo.” (Aramid 24:15) Ket indemostra ni Jesus daytoy babaen ti panangpagungarna kadagiti natay, kas ken Lazaro ken ti anak ti balo iti Nain.—Juan 11:38-44; Lucas 7:11-16.

“Gunggona”

Anian a makapabileg-puso ti makaammo a panggep ti Dios nga ipatingga ti panagsagaba ken iyegna ti maysa a nalinteg a baro a lubong! Panunotenyo laengen dagiti minilion a tawen—kinapudnona, agnanayon—a naan-anay a salun-at ken kinaragsak iti sidong ti naparaisuan nga aglawlaw, a sadiay ti kinadakes ken panagsagaba agbalindanton a bambanag a napalabas!

Dikay kadi umanamong a daytoy a “gunggona” nga ipaay ti Dios iti sangatauan—agnanayonto—a ringbawanna ti sumagmamano laeng a ribo a tawen a panangipalubos ti Dios iti panagsagaba? Ket saan kadi a ringbawanna met ti 70 wenno 80 a tawtawen a panagsagaba—wenno basbassit pay—a mabalin nga inibturantayo a sinaggaysa iti isuamin a panagbiagtayo?

Napaut a Panangmatmat

Iti napaut a panangmatmatna kadagiti bambanag, ammo ti Namarsua a nasken a risoten pay nga umuna dagiti napateg a bambanag maipapan iti kalinteganna a mangituray kas Soberano ti Uniberso ken ti kinaumiso ti panangiturayna. Ket nasken a risoten ti banag iti umiso ken di umiso a pannakausar ti wayawaya nga agpili. Nasken met nga ipakita a ti sangaparsuaan naan-anay ket dagiti tattao a sisusungdo nga agpaituray kadagiti nalinteg a linlintegna mabalin a masalimetmetanda ti kinatarnaw kenkuana iti sidong ti pannakaidadanes ken panangsubok dagiti nailubongan nga agtuturay, a ti kangrunaan nga ulidan iti daytoy isut’ Anakna a mismo, ni Jesus, idi adda pay ditoy daga.

Gaput’ narisot aminen dagiti isyu, dinton ipalubos ti Dios ti kinadakes ken panagsagaba nga agsubli a mangmulit iti natalna nga uniberso. “Ti tuok dinto bumangon iti maikadua a daras.”—Nahum 1:9.

Iti kinaagnanayon nga umayto, mabalin nga usaren ti Dios ti napasamak kadagiti napalabas a rinibribo a tawen a kasla maysa a kaso a pangsubokan a naikeddeng iti korte suprema. Dagiti napasamaken mabalin nga iyaplikar iti aniaman a masanguanan a tiempo, iti sadinoman iti uniberso, no rumsuanto dagiti parikut no maipapan iti kinasoberano ti Dios wenno ti umiso a pannakausar ti wayawaya nga agpili.

Anianto ti Pilienyo?

Adda panagpilitayo itatta. Mabalintay nga usaren ti wayawayatayo nga agpili iti maysa kadagiti dua a pamay-an: Mabalin a pilientayo a supringen ti panggep ti Dios, a mapnektayon iti imperpekto a natauan a turay, ket makiramantayo iti pagtungpalanna, wenno mabalin nga usarentayo ti wayawayatayo nga agpili a mangammo kadagiti pangpanggep ti Dios ken no ania ti kasapulan nga aramidentayo a mangay-ayo kenkuana kas dagiti napasnek nga iturayan ti Pagarianna.

Kinuna ni Jesus iti kararagna iti Dios: “Daytoy kaipapananna ti biag nga agnanayon, ti pananggun-odda iti pannakaammo kenka, ti maymaysa a pudno a Dios, ken daydiay imbaonmo, ni Jesu-Kristo.” (Juan 17:3) Gapuna no kayattay ti agbiag idiay baro a lubong, masapul nga ikagumaantayo nga ammuen ti kinapudno maipapan iti Dios, dagiti pangpanggepna, ken dagiti kasapulanna. Paliiwenyo no kasano ti kunaen ti Biblia iti dayta: “Ni Jehova adda kadakayo bayat ti kaaddayo kenkuana; ket no isu sapulenyo masarakanyonto, ngem no isu baybay-anyo baybay-annakayto.”—2 Cronicas 15:2.

Maib-ibusen ti tiempo daytoy daan a lubong; umayen ti baro a lubong: “Ti lubong aglabas ken ti dakes a tarigagayna, ngem ti agaramid iti pagayatan ti Dios mataginayon.” (1 Juan 2:17) Anianto ti pilienyo—ti aglabas a daan a lubong wenno ti umay a baro a lubong?

Kunaen ti Sao ti Dios: “Inkabilko iti sangom ti biag ken ti patay, ti bendision ken ti lunod; isu ti gapuna a piliem ti biag tapno agbiagka, sika ken ti putotmo, babaen ti panagayat ken Jehova a Diosmo, ti panangtungpal iti timekna, ken ti idedekket kenkuana; ta isu ti biagmo ken ti kaatiddog dagiti al-aldawmo.”—Deuteronomio 30:19, 20.

Tarigagayyo kadi a tagiragsaken dagiti bendision nga insagana ti Dios maipaay kadagidiay a mangitunos iti pagayatanda kadagiti pagayatanna? Dagiti manangipablaak itoy a magasin wenno dagiti Saksi ni Jehova iti sadinoman a lugar maragsakandanto a tumulong kadakayo, nga awan bayadna, a makaammo maipapan iti daytoy.

[Blurb iti panid 12]

Dagiti natay maaddaandanto ti gundaway nga agbiag iti baro a lubong ti Dios babaen ti pannakapagungarda manipud kadagiti tanem