“Agtultuloykayo a Mangpataud iti Adu a Bunga”

“Agtultuloykayo a mangpataud iti adu a bunga ken paneknekanyo ti bagbagiyo nga ad-adalak.”​—JUAN 15:8.

 1. (a) Ania a kalikagum iti panagbalin nga adalan ti dinakamat ni Jesus kadagiti apostolna? (b) Ania ti nasken nga iyimtuodtay iti bagitayo?

ITI rabii sakbay ti ipapatayna, napaut ken napasnek a nakisarita ni Jesus kadagiti apostolna tapno paregtaenna ida. Nalabit pasado alas dose ti rabiin, ngem nagtultuloy a nakisarita ni Jesus gapu iti ayatna kadagiti nasinged a gagayyemna. Iti pannakisaritana, impalagipna kadakuada ti maysa pay a kalikagum a masapul a maitungpalda tapno makapagtalinaedda nga adalanna. Kinunana: “Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak.” (Juan 15:8) Natungpaltayo kadi ita daytoy a kalikagum mainaig iti panagbalin nga adalan? Ania ti kayat a sawen ti “mangpataud iti adu a bunga”? Tapno maammuantayo ti sungbatna, sublianantayo ti saritaan iti daydi a rabii.

 2. Ania nga ilustrasion maipapan iti bunga ti insalaysay ni Jesus iti rabii sakbay ti ipapatayna?

² Ti balakad a mangpataud iti bunga ket paset ti ilustrasion nga insalaysay ni Jesus kadagiti apostolna. Kinunana: “Siak ti pudno a puon ti ubas, ket ni Amak ti agtaltalon. Tunggal sanga nga adda kaniak a saan a mangpatpataud iti bunga ikkatenna, ket tunggal maysa a mangpatpataud iti bunga dalusanna, tapno mangpataud iti ad-adu pay a bunga. Nadaluskayon gapu iti sao a sinaok kadakayo. Agtalinaedkayo a naikaykaysa kaniak, ken siak a naikaykaysa kadakayo. Kas iti sanga saan a makapataud a bukbukodna iti bunga malaksid no agtalinaed iti puon ti ubas, iti kasta met laeng a pamay-an uray dakayo saanyo a mabalin, malaksid no agtalinaedkayo a naikaykaysa kaniak. Siak ti puon ti ubas, dakayo dagiti sanga. . . . Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak. Kas iti panagayat kaniak ti Ama ken panagayatko kadakayo, agtalinaedkayo iti ayatko. No tungpalenyo dagiti bilinko, agtalinaedkayto iti ayatko.”​—Juan 15:1-10.

 3. Ania ti nasken nga aramiden dagiti pasurot ni Jesus tapno makapataudda iti bunga?

³ Iti daytoy nga ilustrasion, ni Jehova ti Agtaltalon, ni Jesus ti puon ti ubas, ken dagiti apostol a kasarsarita ni Jesus ti sangsanga. Agbunga dagiti apostol no la ket ta pagreggetanda ti ‘agtalinaed a naikaykaysa’ ken Jesus. Kalpasanna, inlawlawag ni Jesus no kasano a mataginayon dagiti apostol daytoy a napateg a panagkaykaysa: “No tungpalenyo dagiti bilinko, agtalinaedkayto iti ayatko.” Idi agangay, insurat ni apostol Juan ti umasping a sasao kadagiti pada a Kristiano: “Ti mangtungpal kadagiti bilin [ni Jesus] agtalinaed a naikaykaysa kenkuana.”a (1 Juan 2:24; 3:24) No ngarud salimetmetanda dagiti bilin ni Kristo, makapagtalinaed dagiti pasurotna a naikaykaysa kenkuana, ket dayta a panagkaykaysa ti tumulong kadakuada nga agbunga. Ania a bunga ti nasken a pataudentayo?

Gundaway a Rumang-ay

 4. Ania ti maadaltayo iti kinapudno a ni Jehova ‘ikkatenna’ ti tunggal sanga a di agbunga?

⁴ Iti ilustrasion maipapan iti puon ti ubas, ‘ikkaten’ ni Jehova, wenno sip-akenna, ti sanga a di agbunga. Ania ti kayat a sawen daytoy? Saan laeng a makalikaguman nga agbunga ti amin nga adalan no di pay ket kabaelan ti amin ti mangpataud iti bunga, aniaman ti kasasaad wenno limitasionda. Kinapudnona, saan a maitunos iti kinamanagayat ni Jehova ti ‘panangikkat,’ wenno panangdiskualipikar, iti maysa nga adalan ni Kristo gapu ta dina maaramid ti maysa a banag a dina kabaelan.​—Salmo 103:14; Colosas 3:23; 1 Juan 5:3.

 5. (a) Kasano nga ipamatmat ti ilustrasion ni Jesus a mabalintayo ti agbalin a nabunga? (b) Ania a dua a kita ti bunga ti usigentayo?

⁵ Iti ilustrasion ni Jesus maipapan iti puon ti ubas, ipakitana met a masapul a gundawayantayo a parang-ayen dagiti aktibidadtayo kas maysa nga adalan sigun iti kabaelantayo. Imutektekanyo no ania ti kinuna ni Jesus: “Tunggal sanga nga adda kaniak a saan a mangpatpataud iti bunga ikkatenna, ket tunggal maysa a mangpatpataud iti bunga dalusanna, tapno mangpataud iti ad-adu pay a bunga.” (Juan 15:2) Iti ngudo ti ilustrasion, indagadag ni Jesus kadagiti adalanna a mangpataudda iti “ad-adu pay a bunga.” (Juan 15 Bersikulo 8) Ania ti ipasimudaag daytoy? Kas ad-adalan, ditay koma agpampamayan. (Apocalipsis 3:14, 15, 19) Imbes ketdi, birokentayo dagiti gundaway nga agbalintayo a nabunga. Ania a kita ti bunga a nasken nga ad-adda a naruay a pataudentayo? Adda dua a kita: (1) “ti bunga ti espiritu” ken (2) ti bunga ti Pagarian.​—Galacia 5:22, 23; Mateo 24:14.

Ti Bunga a Nakristianuan a Galad

 6. Kasano nga impaganetget ni Jesus ti kinapateg ti umuna a nadakamat a bunga ti espiritu?

⁶ Ti umuna a nadakamat kadagiti “bunga ti espiritu” isu ti ayat. Ti nasantuan nga espiritu ti Dios patanorenna ti ayat kadagiti Kristiano gapu ta tungtungpalenda ti bilin nga inted ni Jesus sakbay a dinakamatna ti ilustrasion maipapan iti nabunga a puon ti ubas. Kinunana kadagiti apostolna: “Mangtedak kadakayo iti baro a bilin, nga ayatenyo ti maysa ken maysa.” (Juan 13:34) Kinapudnona, bayat ti pannakisaritana iti daydi maudi a rabii ti panagbiagna ditoy daga, maulit-ulit nga impalagip ni Jesus kadagiti apostol a masapul nga ipakitada ti galad nga ayat.​—Juan 14:15, 21, 23, 24; 15:12, 13, 17.

 7. Kasano nga impakita ni apostol Pedro a ti panangpataud iti bunga ket nainaig iti panangiparangarang kadagiti Nakristianuan a galad?

⁷ Ni Pedro, a presente iti daydi a rabii, natarusanna a nasken nga iparangarang dagiti pudno nga adalan ni Kristo ti Nakristianuan nga ayat ken dagiti mainaig a galad. Sumagmamano a tawen kalpasanna, pinaregta ni Pedro dagiti Kristiano a patanorenda dagiti galad a kas iti panagteppel, nainkabsatan a kinadungngo, ken ayat. Innayonna a no aramidentayo ti kasta, maliklikantayo ti ‘agbalin a di aktibo wenno di nabunga.’ (2 Pedro 1:5-8) Aniaman ti kasasaadtayo, kabaelantayo nga iparangarang dagiti bunga ti espiritu. Sapay ngarud koma ta ikagumaantayo nga ipakita ti ayat, kinaimbag, kinaalumamay, ken dadduma pay a Nakristianuan a galad agingga iti kabaelantayo, ta “awan linteg [wenno beddeng] a maibusor kadagita a bambanag,” (Galacia 5:23) Wen, pataudentayo koma ti “ad-adu pay a bunga.”

Panangpataud iti Bunga ti Pagarian

 8. (a) Ania ti pakainaigan ti bunga ti espiritu iti bunga ti Pagarian? (b) Ania a saludsod ti nasken nga usigentayo?

⁸ Dagiti nasam-it ken nagduduma ti marisda a prutas pagbalinenda a makaay-ayo ti buya ti mula. Ngem saan laeng a gapu iti buyada a napateg dagita a prutas. Napategda gapu ta mapaadu ti mula babaen ti bukelda. Umasping iti dayta, ti bunga ti espiritu dina laeng aramiden a makaay-ayo ti Nakristianuan a personalidadtayo. Dagiti galad a kas iti ayat ken pammati tignayendatayo met a mangisaknap iti arig bin-i a mensahe ti Pagarian a masarakan iti Sao ti Dios. Imutektekanyo no kasano nga impaganetget ni apostol Pablo daytoy a napateg a panagnaig. Kunana: “Watwatenmi met ti pammati [paset ti bunga ti espiritu] ket gapuna agsaokami.” (2 Corinto 4:13) Malaksid iti dayta, kinuna pay ni Pablo nga “idatontayo iti Dios ti sakripisio ti panagdaydayaw, kayatna a sawen, ti bunga dagiti bibig”​—ti maikadua a kita ti bunga a masapul nga iparangarangtayo. (Hebreo 13:15) Mabalintayo pay kadi ti agbalin nga ad-adda a nabunga, kinapudnona tapno mangpataud iti “ad-adu pay a bunga,” kas manangiwaragawag iti Pagarian ti Dios?

 9. Ti kadi panangpataud iti bunga kangrunaan a tuktukoyenna ti panagaramid kadagiti adalan? Ilawlawagyo.

⁹ Tapno siuumiso a masungbatan, masapul a maawatantayo nga umuna no ania ti makuna a bunga ti Pagarian. Umiso kadi a kunaen a ti panangpataud iti bunga isu ti panagaramid kadagiti adalan? (Mateo 28:19) Ti kadi bunga a pataudentayo ket kangrunaan a tukoyenna dagiti indibidual a natulongantayo nga agbalin a bautisado nga agdaydayaw ken Jehova? Saan. Ta no kasta ngamin, napalalo a makapaupay dayta kadagiti dungdungnguentayo a Saksi nga adun a tawen a matalek a mangiwarwaragawag iti mensahe ti Pagarian kadagiti teritoria a manmano ti mangipangag. Kinapudnona, no dagiti laeng baro nga adalan ti isimbolo ti bunga ti Pagarian a pataudentayo, maibilang dagita a nagaget a Saksi kas kadagiti awanan iti bunga a sanga a nadakamat iti ilustrasion ni Jesus! Siempre, saan a pudno dayta. Ania ngarud ti kangrunaan a bunga ti Pagarian iti ministeriotayo?

Nabunga Babaen ti Panangisaknap iti Bin-i ti Pagarian

10. Kasano a ti ilustrasion ni Jesus maipapan iti nagmula ken iti nadumaduma a kita ti daga ipakitana no ania ti bunga ken saan a bunga ti Pagarian?

¹⁰ Ti ilustrasion ni Jesus maipapan iti agmulmula ken iti nadumaduma a kita ti daga ipatuldona ti sungbat​—maysa a makaliwliwa a sungbat para kadagidiay mangaskasaba kadagiti saan unay a nabunga a teritoria. Kinuna ni Jesus a ti bin-i isu ti mensahe ti Pagarian a masarakan iti Sao ti Dios, ket ti daga iladawanna ti piguratibo a puso ti tao. Dadduma a bin-i ti “nagdisso iti naimbag a daga, ket, kalpasan a timmubo, nangpataud iti bunga.” (Lucas 8:8) Ania a bunga? Bueno, no agdawa ti trigo ken matangkenan, saan a sabali manen a dawa ti pataudenna no di ket bukbukel. Umasping iti dayta, saan a nesesita a baro nga adalan ti bunga a patauden ti Kristiano no di ket baro a bin-i ti Pagarian.

11. Ania ti makuna a bunga ti Pagarian?

¹¹ No kasta, ti bunga iti daytoy nga ilustrasion ket saan a dagiti baro nga adalan wenno dagiti Nakristianuan a galad. Yantangay ti bin-i a naimula isu ti mensahe ti Pagarian, ti bungana isu ti ad-adu pay a panangisaknap iti dayta a mensahe. Ti panangpataud iti bunga iti daytoy nga ilustrasion tukoyenna ti panangipakaammo iti Pagarian. (Mateo 24:14) Kabaelantayo kadi a patauden dayta a bunga ti Pagarian​—ti panangiwaragawag iti naimbag a damag ti Pagarian​—aniaman ti kasasaadtayo? Wen, kabaelantayo! Iti dayta met laeng nga ilustrasion, ilawlawag ni Jesus no apay.

Panangipaay iti Kasayaatantayo Agpaay iti Dayag ti Dios

12. Kabaelan kadi ti amin a Kristiano ti mangpataud iti bunga ti Pagarian? Ilawlawagyo.

¹² “Iti daydiay naimula iti nasayaat a daga,” kinuna ni Jesus, “mangpataud, daytoy ket sagsangagasut, daydiay ket innem a pulo, ti sabali tallopulo.” (Mateo 13:23) Depende iti kasasaad, mabalin a nadumaduma ti kaadu ti bunga ti bukel a naimula iti talon. Umasping iti dayta, mabalin a nagduduma ti magapuanantayo iti panangiwaragawag iti naimbag a damag depende iti kasasaadtayo. Impakita ni Jesus nga ammona dayta. Mabalin nga adda dagidiay ad-adu ti gundawayda; nalabit nasalsalun-at ken napigpigsa ti dadduma. Gapuna, mabalin nga ad-adu wenno mabalin a basbassit ti maaramidantayo ngem kadagiti dadduma. Kaskasdi, maay-ayo ni Jehova no la ketdi ta dayta ti kasayaatan a maipaaytayo. (Galacia 6:4) Nupay makedngan ti panangasabatayo gapu iti kinalakay wenno mangpakapuy a sakit, awan duadua a ti naasi nga Amatayo, ni Jehova, ibilangnatayo kas maysa kadagidiay ‘agtultuloy a mangpataud iti ad-adu a bunga.’ Apay? Gapu ta ipapaaytayo kenkuana ti ‘amin nga adda kadatayo,’​—ti amin-kararua a panagserbitayo.b​—Marcos 12:43, 44; Lucas 10:27.

13. (a) Ania ti kangrunaan a rason nga ‘itultuloytayo’ ti mangpataud iti bunga ti Pagarian? (b) Ania ti tumulong kadatayo nga agtultuloy nga agbunga kadagiti teritoria a manmano ti mangipangag? (Kitaenyo ti kahon iti panid 21.)

¹³ Aniaman ti kabaelantayo a patauden a bunga ti Pagarian, matignaytayo a “mapan ken agtultuloy a mangpataud iti bunga” no silalagiptayo no apay nga ar-aramidentayo dayta. (Juan 15:16) Dinakamat ni Jesus ti kangrunaan a makagapu: “Ni Amak maipadayag iti daytoy, nga agtultuloykayo a mangpataud iti adu a bunga.” (Juan 15:8) Wen, ti panangasabatayo santipikarenna ti nagan ni Jehova iti imatang ti sangatauan. (Salmo 109:30) Kuna ni Honor, maysa a matalek a Saksi nga agtawen iti agarup 75: “Uray kadagiti teritoria a manmano ti mangipangag, maysa a pribilehio ti mangirepresentar iti Kangatuan.” Idi a ni Claudio, a naregta a mangaskasaba sipud 1974, ket napagsaludsodan no apay nga itultuloyna ti mangasaba nupay manmano laeng ti mangipangpangag kenkuana iti teritoriana, inadawna ti Juan 4:34, a pakabasaantayo iti sasao ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” Innayon ni Claudio: “Kas ken Jesus, saanko laeng a rinugian no di ket kayatko a turposen ti trabahok kas manangiwaragawag iti Pagarian.” (Juan 17:4) Umanamong dagiti Saksi ni Jehova iti sangalubongan.​—Kitaenyo ti kahon a “No Kasano ti ‘Agbunga Buyogen ti Panagibtur,’” iti panid 21.

Mangasaba ken Mangisuro

14. (a) Ania ti dua a panggep ti trabaho da Juan a Mammautisar ken Jesus? (b) Ania ti makunayo maipapan iti trabaho dagiti Kristiano ita?

¹⁴ Ni Juan a Mammautisar ti umuna a manangiwaragawag iti Pagarian a nadakamat iti Ebanghelio. (Mateo 3:1, 2; Lucas 3:18) Ti kangrunaan a panggepna ket ‘mangsaksi.’ Inaramidna dayta buyogen ti napasnek a pammati ken namnama nga “amin a kita ti tattao mamatida koma.” (Juan 1:6, 7) Kinapudnona, nagbalin nga adalan ni Kristo ti dadduma kadagiti kinasabaan ni Juan. (Juan 1:35-37) No kasta, ni Juan ket nangasaba ken nagaramid kadagiti adalan. Uray ni Jesus, nangasaba ken nangisuro met. (Mateo 4:23; 11:1) Di ngarud pakasdaawan a binilin ni Jesus dagiti pasurotna a saanda laeng nga ikasaba ti mensahe ti Pagarian no di ket tulonganda nga agbalin nga adalan dagiti tattao a nangipangag iti mensahe. (Mateo 28:19, 20) Ti trabahotayo ngarud ita ket nagkadua: mangasaba ken mangisuro.

15. Ania ti nagpadaan ti reaksion dagiti tattao iti panangasaba idi umuna a siglo K.P. ken iti panangasaba ita?

¹⁵ Kadagidiay nakangngeg iti panangasaba ken panangisuro ni Pablo idi umuna a siglo K.P., “ti sumagmamano nangrugida a mamati iti bambanag a naisao; ti dadduma saanda a mamati.” (Aramid 28:24) Kasta met ti mapaspasamak ita. Nakalkaldaang ta nagdisso ti kaaduan a bin-i ti Pagarian kadagiti saan a nadam-eg a daga. Kaskasdi, nagdisso ti dadduma a bin-i iti nasayaat a daga, nagramut, ken nagtubo, kas impadto ni Jesus. Kinapudnona, agarup 5,000 a tattao ti agbalbalin a pudno nga adalan ni Kristo iti linawas kada tawen! Dagitoy a kabbaro nga adalan ‘mamatida iti bambanag a naisao,’ nupay kaaduan ti saan. Apay nga inawat ti pusoda ti mensahe ti Pagarian? Masansan a nakatulong ti personal nga interes nga impakita dagiti Saksi​—ti panangsibug iti baro a naimula a bin-i, no ar-arigen. (1 Corinto 3:6) Usigentayo ti uray dua kadagiti nagadu a kapadasan.

Napateg ti Personal nga Interes

16, 17. Apay a napateg nga ipakita ti personal nga interes kadagidiay makasaritayo iti ministeriotayo?

¹⁶ Ni Karolien, maysa nga agtutubo a Saksi idiay Belgium, nakasaritana ti maysa a baket a saan nga interesado iti mensahe ti Pagarian. Gapu ta nabedbedan ti ima ti baket, intukon da Karolien ken ti kaduana ti tulongda, ngem nagkedked. Dua nga aldaw kalpasanna, sinarungkaranda ti baket iti pagtaenganna ken kinomustada ti kasasaadna. “Dakkel ti naaramidan dayta,” kinuna Karolien. “Nasdaaw idi makitana a talaga a maseknankami iti kasasaadna. Pinaunegnakami, ket narugian ti maysa a panagadal iti Biblia.”

¹⁷ Ni Sandi, maysa a Saksi ni Jehova idiay Estados Unidos, nangipakita met iti personal nga interes kadagiti kaskasabaanna. Kitaenna iti lokal a diario dagiti pakaammo maipapan kadagiti nagpasngay ket sarungkaranna dagiti kabbaro a nagannak nga awitna Ti Librok Dagiti Estoria ti Biblia.c Gapu ta kaaduanna a ti ina ti adda iti pagtaengan ken maragsakan a mangipakita kadagiti bisitana ti maladagana, masansan nga adda panagpapatang. “Makisaritaak kadagiti nagannak maipapan iti kinapateg ti pannakisinggalut iti kayyanak a maladaga babaen ti panagbasa,” kuna ni Sandi. “Kalpasanna, makisaritaak maipapan kadagiti karit iti panangpadakkel iti ubing iti agdama a lubong.” Itay naglabas, kas resulta ti kasta a panagsarungkar, maysa nga ina ken innem nga annak ti nangrugi nga agserbi ken Jehova. Ti panangipakita iti umuna a tignay ken personal nga interes ket mabalin a mangyeg iti umasping a naragsak a resulta iti ministeriotayo.

18. (a) Apay a kabaelantayo a tungpalen ti kalikagum a ‘mangpataud iti ad-adu a bunga’? (b) Ania dagiti tallo a kalikagum iti panagbalin nga adalan a nadakamat iti Ebanghelio ni Juan ti determinado a tungpalentayo?

¹⁸ Anian a makapabileg a maammuan a kabaelantayo a tungpalen ti kalikagum nga ‘itultuloy a mangpataud iti adu a bunga’! Ubbingtayo man wenno nataengan, nasalun-at man wenno addaan iti an-anayen, adu man ti mangipangag iti teritoriatayo wenno manmano, makapataudtayo amin iti adu a bunga. Kasano? Babaen ti ad-adda a panangiparangarang kadagiti bunga ti espiritu ken babaen ti panangisaknap iti mensahe ti Pagarian ti Dios agingga iti kabaelantayo. Maigiddato iti dayta, pagreggetantayo nga ‘agtalinaed iti sao ni Jesus’ ken ‘ayaten ti maysa ken maysa.’ Wen, no tungpalentayo dagitoy tallo a kalikagum iti panagbalin nga adalan a nadakamat iti Ebanghelio ni Juan, mapaneknekantayo a datayo dagiti ‘pudno nga adalan ni Kristo.’​—Juan 8:31; 13:35.

[Footnotes]

Salsaludsod a Pangrepaso

• Ania a bunga ti masapul a naruay a pataudentayo?

• Apay a kabaelantayo a tungpalen ti kalat a ‘mangpataud iti ad-adu a bunga’?

• Ania dagiti nausigtayo a tallo a napateg a kalikagum iti panagbalin nga adalan a nadakamat iti Ebanghelio ni Juan?

[Kahon/Ladawan iti panid 21]

NO KASANO TI ‘AGBUNGA BUYOGEN TI PANAGIBTUR’

ANIA ti tumulong kadakayo nga agtultuloy a simamatalek a mangikasaba iti mensahe ti Pagarian kadagiti teritoria a manmano ti mangipangag? Adtoy ti sumagmamano a makatulong a sungbat iti daytoy a saludsod.

“Gapu ta ammotayo nga adda kadatayo ti naan-anay a suporta ni Jesus, matignaytayo nga agbalin a positibo ken naanus, aniaman ti reaksion iti teritoriatayo.”​—Harry, agtawen iti 72; nabautisaran idi 1946.

“Kanayon a makaparegta kaniak ti 2 Corinto 2:17. Kunana a ti pannakipasettayo iti ministerio ket adda ‘iti imatang ti Dios, a maikuyog ken Kristo.’ No addaak iti pangasabaan, matagiragsakko ti timpuyog dagiti nasinged a gagayyemko.”​—Claudio, agtawen iti 43; nabautisaran idi 1974.

“Kinapudnona, marigatanak a mangasaba. Ngem mariknak a pudno ti sasao a masarakan iti Salmo 18:29: ‘Babaen ti Diosko makakalay-atak iti pader.’”​—Gerard, agtawen iti 79; nabautisaran idi 1955.

“No maibasak ti uray maysa laeng a teksto bayat ti panangasabak, maragsakanakon nga adda maysa a puso a sinukimat ti Biblia.”​—Eleanor, agtawen iti 26; nabautisaran idi 1989.

“Ikagkagumaak ti agusar iti nadumaduma nga introduksion. Nakaad-adu dagitoy a diak mausar amin ida kadagiti nabatbati a tawen ti biagko.”​—Paul, agtawen iti 79; nabautisaran idi 1940.

“Diak maupay kadagiti negatibo a reaksion dagiti tattao. Ikagumaak ti maaddaan iti naragsak a pannakisarita kadagiti tattao ken denggen dagiti kapanunotanda.”​—Daniel, agtawen iti 75; nabautisaran idi 1946.

“Adda dagiti naam-ammok a kabbaro a bautisado a nangibaga nga adda pasetko iti panagbalinda a Saksi. Diak ammo nga adda nangyadal iti Biblia kadakuada idi agangay ken timmulong iti panagrang-ayda. Maragsakanak a makaammo a ti ministeriotayo ket bunga ti panagtitinnulongtayo nga agkakabsat.”​—Joan, agtawen iti 66; nabautisaran idi 1954.

Ania ti tumulong kadakayo nga ‘agbunga buyogen ti panagibtur’?​—Lucas 8:15.

[Dagiti Ladawan iti panid 20]

Nabungatayo no iparangarangtayo dagiti bunga ti espiritu ken iwaragawagtayo ti mensahe ti Pagarian

[Ladawan iti panid 23]

Ania ti kayat a sawen ni Jesus idi kinunana kadagiti apostolna: “Agtultuloykayo a mangpataud iti adu a bunga”?