Sisusungdo nga Agserbi ken ni Kristo nga Ari

“Kenkuana adda naited a panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.”​—DANIEL 7:14.

1, 2. Kasanotayo nga ammo nga awan pay ken Kristo ti naan-anay a pannakabalin ti Pagarian idi 33 K.P.?

ASINO nga agturay ti mangisakripisio iti biagna maipaay kadagiti masakupanna sa agbiagto manen tapno agturay kas ari? Asino nga ari ti makabael nga agnaed ditoy daga tapno matignayna dagiti masakupanna nga agtalek ken agsungdo kenkuana, sa kalpasanna isu ket agturay manipud langit? Ni Jesu-Kristo laeng ti kakaisuna a persona a makaaramid iti dayta, agraman iti dadduma pay a banag. (Lucas 1:32, 33) Idi Pentecostes 33 K.P., kalpasan ti ipapatay, panagungar, ken panagpalangit ni Kristo, isu ket inaramid ti Dios kas “ulo iti amin a bambanag iti kongregasion.” (Efeso 1:20-22; Aramid 2:32-36) Nangrugi ngarud a nagturay idi ni Kristo ngem iti limitado a wagas. Ti damo nga inturayanna ket dagiti napulotan iti espiritu a Kristiano, a mangbukel iti naespirituan nga Israel, “ti Israel ti Dios.”―Galacia 6:16; Colosas 1:13.

² Dandani 30 a tawen kalpasan ti Pentecostes 33 K.P., pinasingkedan ni apostol Pablo nga awan pay ken Kristo ti naan-anay a pannakabalin ti Pagarian, no di ket adda isuna “iti makannawan ti Dios, nanipud idin agur-uray agingga a dagiti kabusorna maikabilda a pagbatayan dagiti sakana.” (Hebreo 10:12, 13) Kalpasanna, idi arinunos ti umuna a siglo K.P., ti lakayen nga apostol Juan nasirmatana ti Sapasap a Soberano, ni Jehova, a nangisaad ken ni Kristo Jesus kas Ari iti kaipaspasdek a nailangitan a Pagarian. (Apocalipsis 11:15; 12:1-5) Repasuentayo ita dagiti nagadu a pammaneknek a mangpatalged a nangrugin nga agturay ni Kristo kas Mesianiko nga Ari idiay langit idi 1914.a

 3. (a) Ania ti baro nga aspeto ti naimbag a damag ti Pagarian sipud idi 1914? (b) Ania dagiti saludsod nga imtuodentayo iti bagitayo?

³ Wen, sipud idi 1914, nangrugi ti maysa a nakaragragsak nga aspeto ti naimbag a damag ti Pagarian. Siaaktibo nga agturturayen ni Kristo kas Ari iti nailangitan a Pagarian ti Dios, nupay “iti tengnga dagiti kabusor[na].” (Salmo 110:1, 2; Mateo 24:14; Apocalipsis 12:7-12) Ken iti intero a daga, situtulok nga agpaspasakup iti autoridadna dagiti nasungdo nga iturayanna babaen ti pannakipasetda iti sangalubongan a programa a panangisuro iti Biblia iti awan kaaspingna a kasaknap. (Daniel 7:13, 14; Mateo 28:18) Dagiti napulotan iti espiritu a Kristiano, “ti annak ti pagarian,” agserserbida kas “embahador a mangisunsuno ken Kristo.” Sisusungdo a supsuportaran ida ti dumakdakkel a bunggoy dagiti “sabsabali a karnero” ni Kristo, isuda a pannakabagi ti Pagarian ti Dios. (Mateo 13:38; 2 Corinto 5:20; Juan 10:16) Kaskasdi, kasapulan a sukimatentayo kas indibidual no pudpudno met laeng a bigbigentayo ti autoridad ni Kristo. Naan-anay kadi a nasungdotayo kenkuana? Kasanotayo a maipakita ti kinasungdotayo iti Ari nga agturturay idiay langit? Usigentayo nga umuna no ania dagiti rason a nasungdotayo ken Kristo.

Ti Ari a Maikari iti Kinasungdo

 4. Ania ti nagapuanan ni Jesus kas ti Nadutokan nga Ari kabayatan ti ministeriona ditoy daga?

⁴ Nasungdotayo ken ni Kristo gapu ta apresiarentayo dagiti gapuananna ken dagiti naisangsangayan a galadna. (1 Pedro 1:8) Idi adda ditoy daga, ni Jesus kas ti Nadutokan nga Ari, imparangarangna iti limitado a pamay-an no anianto ti aramidenna bayat ti panagturayna kas Ari iti intero a lubong iti tiempo nga inkeddeng ti Dios. Pinakanna dagiti mabisin. Pinaimbagna dagiti masakit, bulsek, baldado, tuleng, ken umel. Adda pay dagiti pinagungarna. (Mateo 15:30, 31; Lucas 7:11-16; Juan 6:5-13) Maysa pay, gapu ta ammotayo ti kabibiag idi ni Jesus ditoy daga, ammotayo dagiti galadna kas masanguanan nga Agturay―nangnangruna ti managsakripisio nga ayatna. (Marcos 1:40-45) Mainaig iti dayta, naipadamag a kinuna ni Napoléon Bonaparte: “Ni Alejandro, Cesar, Carlomagno, ken siak nakaipasdekkami kadagiti imperio, ngem kasano a naibanagmi dagita? Babaen ti puersa. Ni Jesu-Kristo laeng ti nakaibangon iti maysa a pagarian a naisaad iti ayat, ket ita minilion a tattao ti sidadaan a matay maigapu kenkuana.”

 5. Apay a makaay-ayo ti personalidad ni Jesus?

⁵ Gapu ta napakumbaba ken naalumamay ti kababalin ni Jesus, dagidiay madagdagsenan kadagiti pakarigatan iti biag nagin-awaanda kadagiti makapabileg a sursurona ken naasi a personalidadna. (Mateo 11:28-30) Naasideg kenkuana dagiti ubbing. Sidadaan a nagbalin nga adalanna dagiti napakumbaba, mannakaawat a tattao. (Mateo 4:18-22; Marcos 10:13-16) Gapu ta nakonsiderasion ken nadayaw, nagun-odna ti talek ti adu a babbai a managbuteng iti Dios, ket adu kadagitoy ti nangbusbos iti tiempo, pigsa, ken material a sanikuada tapno maipaayda ti kasapulanna bayat nga intungpalna ti ministeriona.―Lucas 8:1-3.

 6. Ania a nadungngo a rikna ti impakita ni Jesus idi natay ni Lazaro?

⁶ Impakita ni Jesus ti dadduma kadagiti kadudungnguan a riknana idi pimmusay ti nasinged a gayyemna a ni Lazaro. Gapu ta nakaro ti asi a simnek ken ni Jesus idi makitana ti panagtuok ti rikna da Marta ken Maria, dina nalapdan ti nagsennaay ket ‘nagarubos dagiti luana.’ Isu ket “nariribukan,” a nagpanaas ti barukongna, uray pay no ammona a pagungarenna ni Lazaro iti dayta met laeng a kanito. Maigapu iti ayat ken asi, inusar ni Jesus ti inted ti Dios a pannakabalinna ket pinagungarna ni Lazaro.―Juan 11:11-15, 33-35, 38-44.

 7. Apay a maikari ni Jesus iti kinasungdotayo? (Kitaenyo met ti kahon iti panid 31.)

⁷ Pagamangaennatayo ti dakkel a panangipateg ni Jesus iti kinalinteg ken ti pananggurana iti kinamanaginsisingpet ken kinadakes. Namindua a situtured a nagtignay tapno dalusanna ti templo manipud kadagiti naagum a komersiante. (Mateo 21:12, 13; Juan 2:14-17) Maysa pay, naipasango ni Jesus iti amin a kita ti ibubusor idi adda ditoy daga kas tao, isu a napadasanna a mismo dagiti rigat ken parikut a pakaipaspasanguantayo. (Hebreo 5:7-9) Ammo met ni Jesus no ania ti rikna ti agbalin a biktima ti gura ken di nainkalintegan a pannakatrato. (Juan 5:15-18; 11:53, 54; 18:38–19:16) Kamaudiananna, situtured nga impalubosna nga isu ket lumasat iti nakas-ang nga ipapatay tapno maitungpalna ti pagayatan ni Amana ken maipaayanna iti biag nga agnanayon dagiti iturayanna. (Juan 3:16) Saankay kadi a matignay kadagiti kasta a galad ni Kristo tapno itultuloyyo ti agserbi a sisusungdo kenkuana? (Hebreo 13:8; Apocalipsis 5:6-10) Ngem ania ti makalikaguman tapno agbalin a maysa kadagiti iturayan ni Kristo nga Ari?

Dagiti Kualipikasion ti Agbalin nga Iturayan

 8. Ania ti makalikaguman kadagiti iturayan ni Kristo?

⁸ Panunotenyo daytoy a panagdilig: Ti panagbalin nga umili iti sabali a pagilian masansan a kalikagumanna ti panangragpat iti sumagmamano a napapateg a kualipikasion. Nalabit a makalikaguman kadagidiay makipagili a masapul nga addaanda iti nasayaat a reputasion ken makapasada kadagiti pagalagadan iti salun-at. Umasping iti dayta, dagiti iturayan ni Kristo masapul a salimetmetanda dagiti nangato a pagalagadan iti moral ken nasalun-at ti espiritualidadda.​—1 Corinto 6:9-11; Galacia 5:19-23.

 9. Kasanotayo a maipakita a nasungdotayo ken ni Kristo?

⁹ Nainkalintegan met a kalikaguman ni Jesu-Kristo kadagiti iturayanna nga agbalinda a nasungdo kenkuana ken iti Pagarianna. Maipakitada ti kasta a kinasungdo babaen ti panagbiagda maitunos kadagiti insurona idi isu ket adda ditoy daga kas Nadutokan nga Ari. Kas pagarigan, iyun-unada dagiti interes ti Pagarian ken ti panagaramid iti pagayatan ti Dios imbes a dagiti material a pagnam-ayanda. (Mateo 6:31-34) Ikagkagumaanda met nga iyanninaw ti personalidad ni Kristo, uray iti sidong ti karirigatan a kasasaad. (1 Pedro 2:21-23) Kanayonanna, dagiti iturayan ni Kristo tultuladenda ti ulidanna babaen ti sidadaan a panangaramidda iti naimbag kadagiti sabsabali.​—Mateo 7:12; Juan 13:3-17.

10. Kasano a maipakitatayo ti kinasungdotayo ken ni Kristo (a) iti uneg ti pamilia ken (b) iti kongregasion?

¹⁰ Ipakpakita met dagiti pasurot ni Jesus a nasungdoda kenkuana babaen ti panangyanninawda kadagiti galadna iti uneg ti pamilia. Kas pagarigan, ipakpakita dagiti lallaki a nasungdoda iti nailangitan nga Arida babaen ti Nakristianuan a panangtratoda iti asawa ken annakda. (Efeso 5:25, 28-30; 6:4; 1 Pedro 3:7) Ipakpakita dagiti asawa a babbai a nasungdoda ken Kristo babaen ti nadalus a kababalinda ken babaen ti panangiparangarangda iti “naulimek ken naalumamay nga espiritu.” (1 Pedro 3:1-4; Efeso 5:22-24) Nasungdo ken ni Kristo dagiti ubbing no tuladenda ti kinatulnogna. Idi agtutubo, nagpasakup ni Jesus kadagiti nagannakna uray pay no imperpektoda. (Lucas 2:51, 52; Efeso 6:1) Dagiti iturayan ni Kristo sisusungdo nga ikagkagumaanda ti tumulad kenkuana babaen ti ‘panangipakitada iti pannakipagmaymaysa ti rikna, nga addaan iti nainkabsatan a panagayat’ ken babaen ti panagbalin a “nadungngo a mannakipagrikna.” Pagreggetanda ti agbalin a kas ken Kristo, a “napakumbaba iti panagpampanunot, a saan nga isupapak ti panangdangran iti panangdangran wenno panangrabngis iti panangrabngis.”​—1 Pedro 3:8, 9; 1 Corinto 11:1.

Dagiti Iturayan a Natulnog iti Linteg

11. Kadagiti ania a linteg nga agtulnog dagiti iturayan ni Kristo?

¹¹ No kasano a dagiti makipagili ket agtulnog kadagiti linteg ti baro a pagilianda, dagiti iturayan ni Kristo agpasakupda “iti linteg ni Kristo” babaen ti panangitunosda iti biagda kadagiti amin nga insuro ken imbilin ni Jesus. (Galacia 6:2) Sisusungdo nga itunosda ti biagda “iti naarian a linteg” ti ayat. (Santiago 2:8) Ania ti nairaman kadagita a linteg?

12, 13. Kasano a sisusungdo a matungpaltayo “ti linteg ti Kristo”?

¹² Imperpekto ken adda pagkurangan dagiti pasurot ni Kristo. (Roma 3:23) Gapuna, masapul nga itultuloyda a patanoren ti “di managinsisingpet a nainkabsatan a panagayat” tapno ‘maayatda ti maysa ken maysa a nasged unay manipud iti puso.’ (1 Pedro 1:22) “No ti asinoman adda pakaigapuan ti reklamona maibusor iti sabali,” sisusungdo nga iyaplikar dagiti Kristiano ti linteg ni Kristo babaen ti ‘panangitultuloyda a pananganus iti maysa ken maysa ken sibubulos a pakawanenda ti maysa ken maysa.’ No agtulnogda iti dayta a linteg, masursuroda a palabsen dagiti pagkurangan ken birokenda dagiti rason tapno ayatenda ti maysa ken maysa. Saankay kadi nga agyaman a karamankayo iti timpuyog dagidiay sisusungdo nga agpaspasakup iti naayat nga Ari, a gapu iti dayta ket kinawesanda ti bagbagida iti ayat, ti “naan-anay a singgalut ti panagkaykaysa”?―Colosas 3:13, 14.

¹³ Kanayonanna, inlawlawag ni Jesus a ti kita ti ayat nga imparangarangna ket saan a kas iti kadawyan nga ayat nga ipakpakita dagiti tattao iti maysa ken maysa. (Juan 13:34, 35) No dagidiay laeng mangay-ayat kadatayo ti ayatentayo, saan a ‘naisangsangayan a banag’ dayta nga ar-aramidentayo. Iti kasta, kurang ti panagayattayo. Indagadag ni Jesus a tuladentayo ti panagayat ni Amana babaen ti panangipakitatayo iti ayat a naibatay iti prinsipio uray kadagiti tattao a bumusbusor ken mangidaddadanes kadatayo. (Mateo 5:46-48) Dayta nga ayat ti mangtignay met kadagiti iturayan ti Pagarian nga agtultuloy nga aganus iti kangrunaan a trabahoda. Ania ngay dayta?

Pannakasubok ti Kinasungdo

14. Apay a nakapatpateg ti trabaho a panangasaba?

¹⁴ Dagiti iturayan ti Pagarian ti Dios ket addaan ita iti napateg a trabaho a ‘naan-anay a panangsaksi maipapan iti pagarian ti Dios.’ (Aramid 28:23) Napateg dayta yantangay ti Mesianiko a Pagarian ti mangalangon iti sapasap a kinasoberano ni Jehova. (1 Corinto 15:24-28) No ikasabatayo ti naimbag a damag, adda gundaway dagidiay dumngeg tapno agbalinda nga iturayan ti Pagarian ti Dios. Maysa pay, ti panangukom ni Kristo kadagiti tattao ket maibatay iti tignayda iti dayta a mensahe. (Mateo 24:14; 2 Tesalonica 1:6-10) Gapuna, ti maysa a kangrunaan a pamay-an a maipakitatayo ti kinasungdotayo ken ni Kristo ket babaen ti panangtungpaltayo iti bilinna nga ipakaammotayo kadagiti tattao ti maipapan iti Pagarianna.​—Mateo 28:18-20.

15. Apay a masubsubok ti kinasungdo dagiti Kristiano?

¹⁵ Siempre, lapdan ni Satanas ti trabaho a panangasaba iti uray ania a wagas a mabalinanna, ken dagiti natauan nga agtuturay dida bigbigen ti autoridad ni Kristo nga inted ti Dios. (Salmo 2:1-3, 6-8) Gapuna, pinakdaaran ni Jesus dagiti adalanna: “Ti adipen saan a dakdakkel ngem iti apona. No indadanesdak, idadanesdakayto met.” (Juan 15:20) Gapuna, makidangdangadang iti naespirituan dagiti pasurot ni Kristo, a pakasubokan ti kinasungdoda.​—2 Corinto 10:3-5; Efeso 6:10-12.

16. Kasano a dagiti iturayan ti Pagarian bayadanda “iti Dios ti bambanag ti Dios”?

¹⁶ Nupay kasta, dagiti iturayan ti Pagarian ti Dios agtalinaedda a nasungdo iti di makita nga Arida, bayat a raraemenda dagiti natauan nga autoridad. (Tito 3:1, 2) Kinuna ni Jesus: “Ibayadyo ken Cesar ti bambanag ni Cesar, ngem iti Dios ti bambanag ti Dios.” (Marcos 12:13-17) Gapuna, agtulnog dagiti pasurot ni Kristo kadagiti linteg ti gobierno a saan a maikaniwas kadagiti linteg ti Dios. (Roma 13:1-7) Ngem idi a ti nangato a korte dagiti Judio kinontrana dagiti linteg ti Dios babaen ti panangibilinna nga isardeng dagiti adalan ni Jesus ti mangasaba, sititibker ngem siraraem a kinunada a masapul nga ‘agtulnogda iti Dios kas agturay imbes a kadagiti tattao.’​—Aramid 1:8; 5:27-32.

17. Apay a situtured a madaerantayo dagiti pannubok iti kinasungdotayo?

¹⁷ Siempre, masapul nga agtured dagiti iturayan ni Kristo tapno makapagtalinaedda a nasungdo iti Arida iti sango ti pannakaidadanes. Kaskasdi, kinuna ni Jesus: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit.” (Mateo 5:11, 12) Napasaran dagiti nagkauna a pasurot ni Kristo ti kaitungpalan dagita a sasao. Uray idi nasapsaplitda gapu iti panangitultuloyda a panangikasaba iti Pagarian, nagrag-oda “agsipud ta naibilangda a maikari a maibabain maigapu iti naganna. Ket iti tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.” (Aramid 5:41, 42) Makomendarankayo no iparparangarangyo ti kasta a kinasungdo bayat nga ib-ibturanyo dagiti rigat, sakit, ipapatay ti ing-ingungoten, wenno ibubusor.―Roma 5:3-5; Hebreo 13:6.

18. Ania ti ipamatmat ti kinuna ni Jesus ken ni Poncio Pilato?

¹⁸ Idi isu ket nadutokan ngem di pay nagturay kas Ari iti Pagarian, inlawlawag ni Jesus iti Romano a Gobernador a ni Poncio Pilato: “Ti pagariak saan a paset daytoy a lubong. No koma ti pagariak paset daytoy a lubong, nakibakal koma dagiti agserserbi kaniak tapno saanak a mayawat kadagiti Judio. Ngem, iti kinaagpaysuanna, ti pagariak saan a manipud itoy a gubuayan.” (Juan 18:36) Gapuna, dagiti iturayan ti nailangitan a Pagarian dida makigubat wenno makibiang iti aniaman a natauan a salisal. Gapu ta nasungdoda iti “Prinsipe ti Kappia,” agtalinaedda a naan-anay a neutral iti mamaglalasin nga aktibidad ti lubong.―Isaias 2:2-4; 9:6, 7.

Dagiti Agnanayon a Gunggona Dagiti Nasungdo nga Iturayan

19. Apay a dagiti iturayan ni Kristo mabalinda ti kumita iti masanguanan buyogen ti panagtalek?

¹⁹ Dagiti nasungdo nga iturayan ni Kristo, ti “Ari ti ar-ari,” kumitada iti masanguanan buyogen ti panagtalek. Sigagagar a paspasungadanda ti asidegen a panangiparangarangna iti nakaskasdaaw a pannakabalinna kas ari. (Apocalipsis 19:11–20:3; Mateo 24:30) Ti natda kadagiti nasungdo, napulotan iti espiritu nga “annak ti pagarian” siinanamada iti di magatadan a tawidda kas ar-ari a makipagturay ken ni Kristo idiay langit. (Mateo 13:38; Lucas 12:32) Dagiti nasungdo a “sabsabali a karnero” a kukua ni Kristo sigagagar nga ur-urayenda ti panangideklarana iti anamongna: “Umaykayo, dakayo a binendisionan ni Amak, tawidenyo ti [naindagaan a Paraiso a sakup ti] pagarian a naisagana kadakayo manipud iti pannakabangon ti lubong.” (Juan 10:16; Mateo 25:34) Maitunos iti dayta, sapay koma ta ti amin nga iturayan ti Pagarian agbalinda a determinado a mangitultuloy iti nasungdo a panagserbida ken ni Kristo nga Ari.

[Footnote]

Mailawlawagyo Kadi?

• Apay a maikari ni Kristo iti kinasungdotayo?

• Kasano a maipakita dagiti iturayan ni Kristo ti kinasungdoda kenkuana?

• Apay a kayattayo ti agbalin a nasungdo ken ni Kristo nga Ari?

[Kahon iti panid 31]

TI DADDUMA PAY KADAGITI NAISANGSANGAYAN A GALAD NI KRISTO

Di panangidumduma​—Juan 4:7-30.

Kinamanangngaasi​—Mateo 9:35-38; 12:18-21; Marcos 6:30-34.

Managsakripisio nga ayat​—Juan 13:1; 15:12-15.

Kinasungdo​—Mateo 4:1-11; 28:20; Marcos 11:15-18.

Empatia​—Marcos 7:32-35; Lucas 7:11-15; Hebreo 4:15, 16.

Kinarasonable​—Mateo 15:21-28.

[Ladawan iti panid 29]

Babaen ti panagiinnayattayo, sisusungdo nga agpaspasakuptayo iti “linteg ti Kristo”

[Dagiti Ladawan iti panid 31]

Dagiti kadi galad ni Kristo guyugoyennaka nga agserbi kenkuana a sisusungdo?