“Ti Dakkel nga Aldaw ni Jehova Asidegen”

“Ti dakkel nga aldaw ni Jehova asidegen. Asidegen dayta, ket mapagdardaras iti kasta unay.”​—SOFONIAS 1:14.

1, 2. (a) Ania a naisangsangayan nga aldaw ti segseggaan dagiti Kristiano? (b) Ania dagiti saludsod a nasken nga iyimtuodtayo, ken apay?

TI MARAGRAGSAKAN a balasang sigagagar a segseggaanna ti aldaw ti kasarna. Ti maysa a masikog siaayat a padpadaananna ti panagpasngayna. Tartarigagayan unay ti maysa a nabannogan a trabahador a mangrugi koman ti bakasion a nabayagen nga ur-urayenna. Ania ti nagpapadaanda? Ur-urayenda amin ti maysa a naisangsangayan nga aldaw​—ti aldaw nga addanto dakkel nga epektona iti biagda. Nagbileg ngem nagpaiduma ti riknada. Dumtengto met laeng ti aldaw a segseggaanda, ket namnamaenda a nakasaganada inton dumteng dayta.

² Dagiti pudno a Kristiano ita sigagagar met nga ur-urayenda ti iyaay ti maysa a naisangsangayan nga aldaw​—ti naindaklan nga “aldaw ni Jehova.” (Isaias 13:9; Joel 2:1; 2 Pedro 3:12) Ania daytoy um-umay nga “aldaw ni Jehova,” ken kasano a ti iyaay dayta apektaranna ti sangatauan? Kasanotayo met a masigurado a nakasaganatayo inton umay dayta? Nasken unay nga ammuentayo ita dagiti sungbat dagitoy a saludsod agsipud ta dagiti ebidensia ipakitada ti kinaagpayso daytoy a kunaen ti Biblia: “Ti dakkel nga aldaw ni Jehova asidegen. Asidegen dayta, ket mapagdardaras iti kasta unay.”​—Sofonias 1:14.

“Ti Dakkel nga Aldaw ni Jehova”

 3. Ania ti “dakkel nga aldaw ni Jehova”?

³ Ania “ti dakkel nga aldaw ni Jehova”? Iti intero a Kasuratan, ti ebkas a “ti aldaw ni Jehova” tukoyenna dagiti naisangsangayan a tiempo idi nga impakat ni Jehova ti panangukomna kadagiti kabusorna ken pinadayagna ti naindaklan a naganna. Dagiti di matalek nga umili ti Juda ken Jerusalem agraman dagiti manangirurumen nga umili iti Babilonia ken Egipto naipasangoda amin ‘kadagiti aldaw ni Jehova’ idi napasaranda ti pannakaipakat dagiti panangukom ni Jehova. (Isaias 2:1, 10-12; 13:1-6; Jeremias 46:7-10) Nupay kasta, di pay dimteng ti naindaklan nga “aldaw ni Jehova.” Dayta ti “aldaw” inton maipakat ti panangukom ni Jehova kadagidiay nangpadpadakes iti naganna. Mangrugi dayta inton madadael ti “Babilonia a Dakkel,” ti sangalubongan nga imperio ti palso a relihion, ken agngudo inton matalipupos ti nabatbati a paset ti dakes a sistema ti bambanag inton gubat ti Armagedon.​—Apocalipsis 16:14, 16; 17:5, 15-17; 19:11-21.

 4. Apay a kaaduan iti sangatauan rumbeng a pagbutnganda ti napartak ti iyaadanina nga aldaw ni Jehova?

⁴ Ammoda man wenno saan, kaaduan iti sangatauan rumbeng a pagbutnganda dayta napartak ti iyaadanina nga aldaw. Apay? Babaen ken propeta Sofonias, sumungbat ni Jehova: “Dayta nga aldaw ket aldaw ti rungsot, aldaw ti rigat ken riribuk, aldaw ti bagyo ken panaglangalang, aldaw ti kinasipnget ken kinadaguyemyem, aldaw dagiti ulep ken napuskol a daguyemyem.” Nakabutbuteng a talaga! Kanayonanna, kuna ti propeta: “Parigatekto ti sangatauan . . . agsipud ta maikaniwas ken Jehova a nagbasolda.”​—Sofonias 1:15, 17.

 5. Ania ti positibo a panangmatmat ti minilion a tattao maipapan iti aldaw ni Jehova, ken apay?

⁵ Nupay kasta, minilion a sabsabali, ti sigagagar a mangpadpadaan iti iyaay ti aldaw ni Jehova. Apay? Ammoda a tiempo dayta ti pannakaispal dagiti nalinteg, maysa nga aldaw a naindaklanto ti pannakaitan-ok ni Jehova ken masantipikarto ti nadayag a naganna. (Joel 3:16, 17; Sofonias 3:12-17) Dayta nga aldaw ket rumbeng a pagbutngan wenno sigagagar a padaanan agdepende kangrunaanna iti agdama a wagas ti panagbiag dagiti tattao. Ania ti panangmatmatyo iti iyaadani dayta nga aldaw? Nakasaganakayo kadin para iti dayta? Ti kadi kinapudno nga asidegen ti aldaw ni Jehova apektaranna ti inaldaw a panagbiagyo ita?

“Umayto Dagiti Managuy-uyaw Agraman ti Panguy-uyawda”

 6. Ania ti panangmatmat ti kaaduan a tattao iti “aldaw ni Jehova,” ken apay a di pagsiddaawan dayta dagiti pudno a Kristiano?

⁶ Iti laksid iti kinaganat ti kasasaad, ti kaaduan iti sangatauan saanda a pakaseknan ti iyaadani ti “aldaw ni Jehova.” Lalaisen ken uy-uyawenda dagidiay mangipakpakdaar iti umad-adanin nga iyaayna. Di pagsiddaawan dayta dagiti pudno a Kristiano. Malagipda ti pakdaar nga insurat ni apostol Pedro: “Ammuenyo daytoy, a kadagiti maudi nga aldaw umayto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.’”​—2 Pedro 3:3, 4.

 7. Ania ti tumulong kadatayo nga agtalinaed a sigaganat?

⁷ Ania ti tumulong kadatayo a mangsaranget iti kasta a negatibo a kapanunotan tapno agtalinaedtayo a sigaganat? Kuna ni Pedro kadatayo: “Parayrayek dagiti nasin-aw a pannakabalinyo nga agpanunot babaen iti pammalagip, tapno malagipyo koma ti sasao a napalabasen nga insawang dagiti nasantuan a mammadto ken ti bilin ti Apo ken Manangisalakan babaen kadagiti apostolyo.” (2 Pedro 3:1, 2) No ipangagtayo dagiti naimpadtuan a patigmaan, matulongantayo a ‘mangparayray iti nasin-aw a pannakabalintayo nga agpanunot.’ Nalabit a naulit-ulit a nangngegtayon dagitoy a pammalagip, ngem napateg nga itultuloytayo nga ipangag dagitoy a pakdaar nangnangruna ita.​—Isaias 34:1-4; Lucas 21:34-36.

 8. Apay nga adu ti mangyaleng-aleng kadagiti pammalagip ti Biblia?

⁸ Apay a ti dadduma iyaleng-alengda dagitoy a pammalagip? Inayon ni Pedro: “Maitunos iti kayatda, malibasan ida daytoy a kinapudno, nga adda idi langlangit nanipud idi ugma ken maysa a daga nga agtaktakder a sititibker manipud iti danum ken iti tengnga ti danum babaen ti sao ti Dios; ket babaen kadagidiay a pamay-an nagpasar iti pannakadadael ti lubong iti daydi a tiempo idi nalayus iti danum.” (2 Pedro 3:5, 6) Wen, adda dagidiay saanda a kayat nga umay ti aldaw ni Jehova. Saanda a kayat nga adda mangsinga iti biagda. Saanda a kayat ti manungsungbat ken ni Jehova gapu iti managimbubukodan nga estilo ti panagbiagda! Kas kuna ni Pedro, agbibiagda “maitunos iti bukodda a tarigagay.”

 9. Ania ti kababalin dagiti tattao idi kaaldawan da Noe ken Lot?

⁹ Gapu iti “kayatda,” dagitoy a managuy-uyaw iyaleng-alengda a bimmallaet idi ni Jehova iti ar-aramid ti sangatauan. Da Jesu-Kristo ken apostol Pedro agpada a tinukoyda ti kasta a dua a pasamak​—“idi kaaldawan ni Noe” ken “idi kaaldawan ni Lot.” (Lucas 17:26-30; 2 Pedro 2:5-9) Sakbay ti Layus, saan nga inkankano dagiti tattao ti pakdaar ni Noe. Umasping iti dayta, sakbay ti pannakadadael idi ti Sodoma ken Gomorra, ni Lot ket minatmatan dagiti manugangna a “kasla maysa a tao nga agang-angaw.”​—Genesis 19:14.

10. Ania ti reaksion ni Jehova kadagiti manangyaleng-aleng?

¹⁰ Kasta met la itatta. Ngem utobenyo ti reaksion ni Jehova kadagiti manangyaleng-aleng: “Sanguekto dagiti tattao a tumangtangken kadagiti ared-edda ken agkunkuna iti pusoda, ‘Ni Jehova saanto nga agaramid iti naimbag, ket saanto nga agaramid iti dakes.’ Ket ti kinabaknangda agbalinto a maipaay iti panangkamkam ken dagiti balayda maipaay iti langalang a rebbek. Ket mangibangondanto kadagiti balay, ngem saandanto a pagnaedan; ket agmuladanto kadagiti kaubasan, ngem saandanto nga inumen ti arakda.” (Sofonias 1:12, 13) Mabalin nga itultuloy ti tattao dagiti “gagangay” nga aktibidadda iti inaldaw, ngem saanda a magun-odan ti aniaman a permanente a gunggona iti napinget a trabahoda. Apay? Agsipud ta kellaat nga umay ti aldaw ni Jehova, ket saan ida a maispal dagiti material a kinabaknang a mabalin a naurnongda.​—Sofonias 1:18.

“Agtultuloyka a Manginanama iti Dayta”

11. Ania a balakad ti rumbeng a laglagipentayo?

¹¹ Saan a kas iti nadangkes a lubong a pagbibiagantayo, masapul a silalagiptayo iti balakad nga inrekord ni propeta Habakuk: “Ti sirmata agpaay pay laeng iti naituding a tiempo, ket uman-anangsab a tumurong iti panungpalan, ket saanto nga agulbod. Uray no agtaktak, agtultuloyka a manginanama iti dayta; ta di bumurong a pumudnonto. Saanto a maladaw.” (Habakuk 2:3) Uray pay no kasla agtaktak dayta nga aldaw sigun iti imperpekto a panangmatmattayo, masapul a laglagipentayo a saan a nabuntog ni Jehova. Umay ti aldawna iti eksakto a kanito, iti oras a saan a namnamaen dagiti tattao.​—Marcos 13:33; 2 Pedro 3:9, 10.

12. Ania ti impakdaar ni Jesus a mapasamak iti dadduma nga adalanna, ken kasano a naiduma dagiti matalek a pasurot ni Jesus?

¹² Iti panangipaganetgetna iti kinapateg ti kanayon a pananginanama iti aldaw ni Jehova, impakdaar ni Jesus nga uray ti dadduma kadagiti adalanna saandanto nga agtalinaed a sigaganat. Impakpakaunana maipapan kadakuada: “No dayta a dakes nga adipen kunaenna iti pusona, ‘Ni apok agtaktak,’ ket rugianna a kabilen dagiti padana nga adipen ket makipangan ken makiinum kadagiti napaneknekan a managbartek, ti apo dayta nga adipen umayto iti aldaw a saanna nga inanamaen ken iti oras a saanna nga ammo, ket dusaennanto iti kakaruan unay.” (Mateo 24:48-51) Saan a kas kadakuada, ti matalek ken masirib a klase adipen sisusungdo nga agtalinaed a sigaganat. Ti klase adipen agtultuloy nga agbambantay ken pampaneknekanna ti bagina a sisasagana. Isu ket dinutokan ni Jesus nga agaywan “kadagiti amin a sanikuana” ditoy daga.​—Mateo 24:42-47.

No Apay a Nasken ti Kinaganat

13. Kasano nga intampok ni Jesus ti kinapateg ti kinaganat?

¹³ Dagiti Kristiano idi umuna a siglo nasken nga agtultuloyda a sigaganat. Masapul a panawanda a dagus ti Jerusalem idi makitada dayta a siudad a “nalikmut kadagiti nagkampo a buyot.” (Lucas 21:20, 21) Napasamak dayta idi tawen 66 K.P. Siputanyo no kasano nga intampok ni Jesus ti kinapateg ti kinaganat iti biang dagiti nagkauna a Kristiano: “Ti tao nga adda iti tuktok ti balay saan koma a bumaba tapno alaenna dagiti sanikua manipud iti balayna; ket ti tao nga adda iti talon saan koma nga agsubli iti balay tapno alaenna ti makinruar a kawesna.” (Mateo 24:17, 18) Yantangay nagtultuloy a natalged ti Jerusalem iti simmaganad nga uppat pay a tawen, apay a masapul nga ipangag dagiti Kristiano ti sigaganat unay nga imbaga ni Jesus idi 66 K.P.?

14, 15. Apay a dagiti Kristiano idi umuna a siglo masapul nga agtignayda a di agtaktak idi makitada a nalikmut ti Jerusalem kadagiti nagkampo a buyot?

¹⁴ Nupay ti buyot ti Roma sana la dinadael ti Jerusalem idi 70 K.P., saan a natalna dagita nga uppat a tawen. Talaga a nariribuk! Dagidi a tawen ket napno iti kinaranggas ken panangpapatay. Kinuna ti maysa a historiador a bayat dayta a tiempo iti Jerusalem, adda idi ti “nakaam-amak a nadara a gerra sibil ken dagiti nakaal-alingget a kinaulpit.” Naayaban dagiti agtutubo a lallaki tapno mangpabileg kadagiti sarikedked, agarmas, ken agserbi iti militar. Inaldaw a masanayda kas kameng ti militar. Mamatmatan a mangliliput dagidiay saan a tumulong kadagiti nalabes a gannuat. Agpeggad unay dagiti Kristiano no dida panawan a dagus ti siudad.​—Mateo 26:52; Marcos 12:17.

¹⁵ Siputantayo koma ta kinuna ni Jesus a mangrugi koman a pumanaw “dagidiay adda idiay Judea,” saan laeng a dagiti adda idiay Jerusalem. Napateg dayta agsipud ta iti sumagmamano a bulan nga ipapanawda manipud Jerusalem, pinabaro manen dagiti buyot ti Roma dagiti pamay-anda a makigubat. Umuna, naparmek ti Galilea idi 67 K.P., sa kalpasanna, sistematiko a naparukma ti Judea iti simmaganad a tawen. Nagresulta dayta iti nakaro a panagsagaba kadagiti away. Ad-adda met a rimmigat para iti siasinoman a Judio ti aglibas manipud iti mismo a Jerusalem. Naguardiaan dagiti ridaw ti siudad, ket siasinoman nga agpanggep nga aglibas ket mapagatapan a kumapkappon kadagiti Romano.

16. Ania ti rumbeng a kababalin dagiti Kristiano idi umuna a siglo tapno malasatanda ti tiempo ti rigat?

¹⁶ Maibasar kadagitoy a banag, maawatantayo no apay nga impaganetget ni Jesus ti kinaganat ti kasasaad. Masapul a situtulok nga agsakripisio dagiti Kristiano, a dida ipalubos a maiwawada gapu iti material a sansanikua. Masapul a situtulokda nga “agpakada kadagiti amin a sanikua[da]” tapno makapagtulnogda iti pakdaar ni Jesus. (Lucas 14:33) Dagidiay dagus a nagtulnog ken naglibas a bimmallasiw iti Jordan ket naisalakan.

Panangtaginayon iti Kinaganattayo

17. Apay a masapul a pabilgentayo ti kinaganattayo?

¹⁷ Silalawag nga ipalgak dagiti padto ti Biblia nga agbibiagtayon iti arinunos ti tiempo ti panungpalan. Nangnangruna ita a nasken a pabilgentayo ti kinaganattayo. No awan pay ti gubat, saan a marikna ti maysa a soldado ti rigat ken peggad. Ngem no saanna a marikna ti kinaganat gapu iti dayta sa kellaat a maibaon a makigubat, mabalin a saanto a nakasagana ket makapapatay dagiti ibunga dayta. Pudno met dayta iti naespirituan a dangadang. No in-inut a mapukaw ti kinaganattayo, mabalin a saantayo a nakasagana a mangsango kadagiti iraraut ken maklaattayo inton dumteng kamaudiananna ti aldaw ni Jehova. (Lucas 21:36; 1 Tesalonica 5:4) No adda siasinoman a ‘nagsanud iti isusurot ken Jehova,’ itan ti tiempo tapno agsublida manen kenkuana.​—Sofonias 1:3-6; 2 Tesalonica 1:8, 9.

18, 19. Ania ti tumulong kadatayo nga agtultuloy a sipapanunot iti “kaadda ti aldaw ni Jehova”?

¹⁸ Di pakasdaawan nga ibalbalakad kadatayo ni apostol Pedro nga agtultuloytayo a sipapanunot iti “kaadda ti aldaw ni Jehova”! Kasanotayo a maaramid dayta? Ti maysa a pamay-an ket babaen ‘dagiti nasantuan a panagbibiag ken ar-aramid ti nadiosan a debosion.’ (2 Pedro 3:11, 12) Ti panagtultuloy nga okupado kadagiti kasta nga aktibidad ti tumulong kadatayo tapno sigagagar a padaanantayo ti iyaay “ti aldaw ni Jehova.” Ti Griego a sao a naipatarus nga ‘agtalinaed a silalagip unay’ literal a kaipapananna ti “papartaken.” Ditay aktual a mapapartak ti tiempo a nabatbati sakbay ti iyaay ti aldaw ni Jehova. Ngem bayat nga ur-urayentayo dayta nga aldaw, kasla naparpartak nga aglabas ti tiempo no okupadotayo iti panagserbitayo iti Dios.​—1 Corinto 15:58.

¹⁹ Ti panangmennamenna iti Sao ti Dios ken panangusig kadagiti linaonna a pammalagip ti tumulong met kadatayo a mangaramid iti daytoy​—ti “sipapasnek a panangsegsegga (panangnamnama ken panangpapartak) iti iyaay” dayta nga aldaw, wen, ti “agtultuloy a panangnamnama” iti dayta. (2 Pedro 3:12, The Amplified Bible; The New Testament, ni William Barclay) Nairaman kadagitoy a pammalagip ti nagadu a padto a mangipakpakauna saan laeng nga iti iyaay ti aldaw ni Jehova no di ket ti nagadu a bendision a tagiragsaken dagidiay ‘agtultuloy a manginanama.’​—Sofonias 3:8.

20. Ania a pammagbaga ti rumbeng nga ipapusotayo?

²⁰ Talaga nga itan ti tiempo tapno ipapusotayo amin ti pammagbaga a naited babaen ken propeta Sofonias: “Sakbay a dumteng kadakayo ti sumsumged nga unget ni Jehova, sakbay a dumteng kadakayo ti aldaw ti unget ni Jehova, sapulenyo ni Jehova, dakayo amin a naemma iti daga, a nangannurot iti bukodna a hudisial a pangngeddeng. Sapulenyo ti kinalinteg, sapulenyo ti kinaemma. Nalabit maitalimengkayo iti aldaw ti unget ni Jehova.”​—Sofonias 2:2, 3.

21. Ania ti determinasion ti ili ti Dios bayat ti tawen 2007?

²¹ Anian a maitutop ngarud ti teksto ti tawen a napili para iti 2007: “Ti dakkel nga aldaw ni Jehova asidegen.” Kombinsido ti ili ti Dios nga “asidegen dayta, ket mapagdardaras iti kasta unay.” (Sofonias 1:14) “Saanto a maladaw.” (Habakuk 2:3) Bayat ngarud nga ur-urayentayo dayta nga aldaw, kanayon koma nga alertotayo kadagitoy tiempo a pagbibiagantayo, a sipapanunottayo nga asidegen ti ultimo a kaitungpalan dagitoy a padto!

Masungbatanyo Kadi?

• Ania ti “dakkel nga aldaw ni Jehova”?

• Apay nga adu ti mangyaleng-aleng iti kinaganat ti tiempo?

• Apay a dagiti Kristiano idi umuna a siglo masapul nga agtignayda a sigaganat?

• Kasano a maparayray ti kinaganattayo?

[Blurb iti panid 19]

Ti teksto para iti tawen 2007 ket: “Ti dakkel nga aldaw ni Jehova asidegen.”​—Sofonias 1:14.

[Dagiti Ladawan iti panid 16, 17]

Kas idi kaaldawan ni Noe, maklaatto dagiti manangumsi inton agtignayen ni Jehova

[Ladawan iti panid 18]

Masapul nga agtignay a dagus dagiti Kristiano idi makitada ti Jerusalem a “nalikmut kadagiti nagkampo a buyot”