Panawanyo ti Napeggad a Disso!

TRABAHO dagiti volcanologist ti mangpaliiw ken mangtingiting kadagiti pagilasinan sada mangpakdaar maipapan kadagiti sumungsungad a panagbettak ti bulkan. (Idi bimtak ti Bantay Fugen, kapilitan a pinapanaw dagiti polis ti tattao iti napeggad a disso.) Umasping iti dayta, mapalpaliiw dagiti agad-adal iti Biblia ti pagilasinan “ti panungpalan ti sistema ti bambanag” ken pakpakdaaranda dagiti dadduma maipapan iti sumungsungad a didigra.​—Mateo 24:3.

Iti isu met la a kapitulo ti Biblia a mamakpakdaar maipapan iti sumungsungad a sangalubongan a didigra, mabasatayo daytoy a pannakailadawan dagiti umun-una a pasamak: “Ti nasion tumakderto a bumusor iti nasion ket ti pagarian bumusor iti pagarian, ket addanto dagiti kinakirang ti taraon ken dagiti ginggined iti nadumaduma a disso. . . . Adu nga ulbod a mammadto ti tumakderto ket iyaw-awanda dagiti adu; ket gapu iti iyaadu ti kinakillo lumamiisto ti ayat ti dakdakkel a bilang. . . . Ket daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.”​—Mateo 24:7-14.

Din kasapulan nga agbalintayo nga analista ti damdamag tapno maawatantayo ti agdama a kaitungpalan daytoy a padto. Mapaspasarantayo dayta nangruna nanipud pay idi 1914. Iti daytoy a siglo, napasamaken ti dua a sangalubongan a gubat, nagadu a gerra sibil, lokal a panagdadangadang, ken rinnupak gapu iti puli ken relihion. Sagsagabaen ti sangatauan ti kinakirang ti taraon kas resulta dagita a gubat, agraman dagiti pakarigatan gapu kadagiti natural a didigra. Adun a biag ti pinukaw dagiti ginggined. Timmauden dagiti kulto nga addaan kadagiti mapagduaduaan a panguluen ken panatiko a pasurot. Saanen nga ipakpakita dagiti tattao ti ayat gapu iti “iyaadu ti kinakillo,” ket saanen a gagangay ti pannakigayyem.

Talaga a maitungtungpalen ti sangalubongan a trabaho a panangasaba, a maysa pay a paset ti pagilasinan. Kitaenyo laengen ti parupa daytoy a magasin, ket mabasayo ti sasao a “Mangibumbunannag iti Pagarian ni Jehova” kas paset ti paulona. Ti Pagwanawanan a maipabpablaak iti 132 a lenguahe ken addaan iti sirkulasion a nasurok a 22 a milion, ket maysa a kangrunaan nga instrumento dagidiay mangiwarwaragawag iti “daytoy naimbag a damag ti pagarian” iti amin a mapagnaedan a daga. Karaman iti dayta a naimbag a damag ti mensahe a ti Namarsua iti uniberso, ni Jehova a Dios, impasdeknan ti nailangitan a Pagarian a mangdadaelto iti dakes a sistema ti bambanag ken mamagbalin a paraiso iti daga. Kinapudnona, maim-imatanganen iti kaaldawantayo ti pagilasinan nga agtignayton ti Dios, a mangipakpakita nga agpegpeggad ti biag dagiti tattao iti daytoy a sistema ti bambanag.​—Idiligyo ti 2 Timoteo 3:1-5; 2 Pedro 3:3, 4; Apocalipsis 6:1-8.

Ti Nakakigkigtot nga Aldaw ni Jehova

Ania ti mapasamak inton panawenen a mangukom ni Jehova? Imdenganyo ti mismo a nalawag a panangiladawanna iti mapasamakto: “Iparangkonto dagiti pagsidsiddaawan kadagiti langlangit ken iti daga: dara, ken apuy, ken monmonmon nga asuk. Ti init agbalinto a sipnget, ket ti bulan dara, no di pay dumteng ti dakkel ken nakakigkigtot nga aldaw ni Jehova.”​—Joel 2:30, 31.

Dayta nga aldaw, nga ad-adda a nakabutbuteng ken makadadael ngem iti aniaman a lokal a panagbettak ti bulkan wenno ginggined, ket asidegen. Kuna ni mammadto Sofonias: “Ti dakkel nga aldaw ni Jehova asideg, isu asideg ken napardas unay. . . . Ti isuamin a daga malamutto iti apuy ti imonna: ta aramidennanto ti panungpalan, wen, nakakigkigtot a panungpalan, ti isuamin nga agnaed iti daga.” Nupay “ti pirakda uray ti balitokda didanto mabalin ti mangispal kadakuada iti aldaw ti pungtot ni Jehova,” adda pamay-an tapno makalasat iti dayta a nakakigkigtot nga aldaw.​—Sofonias 1:14-18.

Insuro ni Sofonias no kasano babaen ti panagkunana: “Iti kasakbayan ti iyaay kadakayo ti narungsot a pungtot ni Jehova, iti kasakbayan ti iyaay kadakayo ti aldaw ti pungtot ni Jehova, birokenyo ni Jehova, dakayo amin a naemma iti daga . . . birokenyo ti kinalinteg, birokenyo ti kinaemma: nalabit a dakayo maitalimengkayto iti aldaw ti pungtot ni Jehova.” (Sofonias 2:2, 3) Mabalintayo ti agkamang babaen ti ‘panangbirok ken Jehova, panangbirok iti kinalinteg, ken panangbirok iti kinaemma.’ Siasino ita ti mangbirbirok ken Jehova?

Awan duadua a mainaigyo ti sao a “Jehova” kadagiti Saksi ni Jehova gapu iti trabahoda a panangasaba. Mabalin a naalayo daytoy a magasin iti maysa kadakuada. Agdindinamag nga agbibiagda a sililinteg kas nasayaat nga umili. Ikagkagumaanda nga ikawes ti “baro a personalidad,” a pakairamanan ti panangpatanor iti kinaemma. (Colosas 3:8-10) Bigbigenda a daytoy ket gapu iti panagpaisuroda iti makitkita nga organisasion ni Jehova, nga ireprepresentar dagiti lokal a kongregasion dagiti Saksi ni Jehova iti intero a daga. Wen, mabalinyo ti agkamang a kadua ‘ti intero a timpuyog dagiti kakabsat’ a Saksi ni Jehova iti intero a lubong.​—1 Pedro 5:9.

Agkamangkayo Itan

Tapno makapagkamangtayo babaen ti panangbirok ken Jehova, masapul nga agbalintayo a gagayyemna. Ania ti ramanen dayta? Sumungbat ti Biblia: “Dikay aya ammo a ti pannakigayyem iti lubong ket pannakibusor iti Dios? Siasinoman, ngarud, a tarigagayanna ti agbalin a gayyem ti lubong ibilbilangna ti bagina a kabusor ti Dios.” (Santiago 4:4) Tapno agbalintayo a gagayyem ti Dios, masapul nga idiantayo ti aniaman nga emosional a pannakinaig iti agdama a dakes a lubong a bumusbusor iti Dios.

Balakadannatayo ti Biblia: “Dikay ayaten ti lubong wenno uray dagiti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana; agsipud ta amin a banag iti lubong​—ti derrep ti lasag ken ti derrep dagiti mata ken ti panangiparammag iti panagbiag ti maysa​—saan nga agtaud iti Ama, no di ket agtaud iti lubong. Kanayonanna pay, ti lubong aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.” (1 Juan 2:15-17) Kaaduan a tattao ita ket tigtignayen ti nainlasagan a tarigagay​—di mapengdan a panaggartem iti sekso, naagum a pananggun-od iti kuarta, ken panangabuso iti autoridad. Ngem tapno maibilang ti maysa a tao iti dasig ni Jehova, masapul a parmekenna dagita a tarigagay.​—Colosas 3:5-8.

Mabalin a pasaray agbasbasakayo iti daytoy a magasin, ket nalabit anamonganyo ti panangilawlawagna iti kaitungpalan dagiti padto ti Biblia. Nupay kasta, mabalin a diyo pay pinadas ti nakitimpuyog kadagiti Saksi ni Jehova. Ngem no adda sangsanguentayo a didigra, umanay kadin ti basta panagdengngeg laeng iti pakdaar? Kas maawatantayo iti napasamak idi bimtak ti Bantay Fugen, masapul nga ipangagtayo ti pakdaar. Laglagipenyo a napukaw ti biag ti di kumurang a 15 a reporter ken cameraman a kayatda idi ti manggun-od iti impormasion. Kinapudnona, natay ti maysa a retratista a nakatalmeg ti ramayna iti shutter button ti kamerana. Ti maysa a volcanologist​—a nagkuna iti, “No matayakto man, kayatko ti matay iti igid ti bulkan”​—natungpal ti kayatna a pannakatay. Napasnekda amin iti trabaho ken raragpatenda. Ngem ti biagda ti pinagbayadda​—ti supapak ti dida panangikankano iti pakdaar.

Adu itatta ti makangkangngeg iti mensahe maipapan iti inkeddeng ti Dios a panangdadaelna iti daytoy dakes a sistema ti bambanag, ken medio maawatanda met ti kinapateg ti pakdaar. ‘Mabalin a dumtengto,’ nalabit irasonda, ‘ngem saan nga iti kaaldawantayo.’ Itungtungkuada ti iyaay ti aldaw ni Jehova tapno dida maisiasi iti agparang a napatpateg ita iti imatangda.

Kasta met la idi ti kasasaad ni Baruc. Kas sekretario ti mammadto idi ugma a ni Jeremias, situtured a pinakdaaran ni Baruc dagiti Israelita maipapan iti umad-adani idin a pannakadadael ti Jerusalem. Ngem naminsan, nautoyan iti trabahona. Isu a kinorehir ni Jehova: “Sapulem dagiti dadakkel a bambanag a maipaay kenka met laeng? Dika ida sapulen.” Kinabaknang, kinatan-ok, wenno material man a kinatalged, masapul a saan a ‘sapulen [ni Baruc] dagiti dadakkel a bambanag.’ Masapul a maysa laeng ti pakaseknanna, nga isu ti panangaramid iti pagayatan ti Dios tapno matulongan dagiti tattao nga agkamang iti dasigna. Ta no kasta ti aramidenna, awatenna ‘ti biagna kas sinamsamna.’ (Jeremias 45:1-5) Umasping iti dayta, imbes nga ‘agsapultayo iti dadakkel a bambanag para iti bagitayo,’ masapul a birokentayo ni Jehova, a mangiturong iti pannakaisalakan ti mismo a biagtayo.

Idiay Bantay Fugen, nasurok a sangapulo a polis ken boluntario a bombero ti madama idi a mangar-aramid iti annongenda idi a dinalapus ida ti agburburek a pitak a naggapu iti bulkan. Ikagkagumaanda a tulongan ken salakniban dagiti tattao nga agpegpeggad ti kasasaadda. Kaaspingda dagiti nasayaat ti panggepda a lallaki ken babbai a makiramraman a mangpasayaat iti daytoy a lubong. Nupay mabalin a nagsayaat dagiti panggepda, “ti killo saan a mapalinteg.” (Eclesiastes 1:15) Saanen a mailinteg ti killo a sistema ti bambanag. Nainkalintegan ngarud aya a ‘makigayyem [ti maysa] iti lubong’ babaen ti panangpadasna a mangsalbar iti sangalubongan a sistema nga inkeddeng ti Dios a dadaelen?

No Nakapanawkayon, Dikay Agsubsublin

Maysa a banag ti panangpanaw iti agpegpeggad a sistema, ngem dakkel ti nakaidumaan ti panagtalinaed iti natalged a panangaywan “ti intero a timpuyog dagiti kakabsat.” (1 Pedro 2:17) Ditay liplipatan dagiti mannalon a nakapagbakuitda la ngaruden, nagsublida pay laeng tapno kitaenda dagiti talonda iti asideg ti Bantay Fugen. Nalabit magagaranda idi nga agsubli iti nakairuamanda a “normal” a panagbiag. Ngem ammoyo a saan a nainsiriban ti desisionda nga agsubli. Nalabit saan a daydi ti damo nga ipapanda iti napeggad a disso. Nalabit napanda iti peligroso a disso iti apagbiit, nga awan ti aniaman a napasamak. Iti simmaganad, nalabit nabaybayagda, ket kaskasdi nga awan ti napasamak. Mabalin nga idi agangay, nairuamdan ti mapan iti maipagel a disso agingga a timmuredda nga agbayag iti agpegpeggad a lugar.

Tinukoy ni Jesu-Kristo ti umasping a kasasaad a mapasamak kabayatan “ti panungpalan ti sistema ti bambanag.” Kinunana: “Kas kadakuada idi kadagidiay nga al-aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a ni Noe simrek iti daong; ket dida nangikankano agingga a ti layus immay ket inyanudna amin ida, kastanto ti kaadda ti Anak ti tao.”​—Mateo 24:3, 38, 39.

Imutektekanyo a dinakamat ni Jesus ti pannangan, panaginum, ken pannakiasawa. Awan kadagidiay a banag ti dakes iti imatang ni Jehova. Ania ngarud ti problema? Isu ti ‘di panangikankano’ dagiti tattao idi kaaldawan ni Noe. Impamaysada ti biagda iti gagangay nga ar-aramidenda. No tiempo ti peggad, saan a makapagbiag ti maysa a tao iti “normal.” No nakapanawkayon wenno simminakayon iti agdama a lubong a naikeddengen a madadael, masapul a labananyo ti aniaman a tarigagay nga agsubli tapno aprobetsaren ti aniaman a maurnongyo iti dayta. (1 Corinto 7:31) Mabalin a makaruarkayo iti naespirituan a natalged a disso ket makapagsublikayo a di naan-ano nga awan pay ketdi ti makadlaw iti dayta. Nupay kasta, mabalin a dayta ti mangpatured ken mangiguyyonto kadakayo nga agsubli manen iti lubong, tapno lallalo nga agbayag iti dayta. Di agbayag, mabalin a kunayonton: “Saan pay nga ita ti iyaay ti panungpalan.”

Panunotenyo met ti tallo a tsuper ti taksi a natay bayat nga ur-urayenda dagiti reporter ken cameraman idi nagalikuno iti bakras ti agburburek a pitak a naggapu iti bulkan. Dadduma ita ti mabalin a makikuyog kadagidiay makaitured nga agsubli iti lubong. Aniaman ti rason, nalawag a napeggad ti pannakaiguyyo nga agsubli iti peligroso a disso.

Amin dagiti biktima ti panagbettak ti Bantay Fugen ket pimmanaw iti natalged a disso sada napan iti napeggad a disso. Nupay ekspektarenda nga addanto aldaw a bumtak ti bulkan, awan kadakuada ti nangipagarup a bumtak dayta iti daydi nga aldaw. Adu ti mamati a dumtengto ti aldaw ni Jehova babaen ti panangpaliiwda iti pagilasinan ti panungpalan ti sistema ti bambanag, ngem pagarupenda a mabayag pay. Pampanunoten pay ketdi ti dadduma a saan a mabalin nga “ita” ti iyaay dayta nga aldaw. Talaga a napeggad ti kasta a panagpampanunot.

“Ti aldaw ni Jehova umayto a kasla mannanakaw,” impakdaar ni apostol Pedro. Masapul nga agsalukagtayo, ‘nga ur-urayen ken agtaltalinaedtayo a silalagip unay iti kaadda ti aldaw ni Jehova,’ nga aramidentayo ‘ti amin a kabaelantayo tapno masarakannatayo iti kamaudiananna a di namulitan ken awan pakapilawanna ken sitatalna.’ (2 Pedro 3:10-14) Kalpasan ti pannakadadael ti agdama a dakes a sistema ti bambanag, agbalinton a paraiso ti daga nga iturayan ti Pagarian ti Dios. Sapay koma ta ditay masulisog a mapan iti napeggad a disso gapu iti aniaman a rason a mapanunottayo, amangan no iti aldaw nga agsublitayo iti lubong mabalin a daytanton ti iyaay ti aldaw ni Jehova.

Agkamangkayo a kadua dagiti tattao ni Jehova ket agtalinaedkayo iti ayanda.

[Dagiti Ladawan iti panid 7]

Agkamangkayo a kadua dagiti tattao ni Jehova ket agtalinaedkayo iti ayanda

[Picture Credit Line iti panid 4]

Iwasa/Sipa Press