Dagiti Milagro a Nakitam!

TI SEGUNDARIO a kaipapanan ti sao a “milagro” ket “naidumduma unay wenno di gagangay a pagteng, banag, wenno gapuanan.” Amintayo ket nakakitan iti kasta a milagro, a saan a gapuanan ti Dios.

Bayat nga immadu ti pannakaammo ti tao maipapan kadagiti pisikal a linteg ti nakaparsuaan, naragpat dagiti tattao ti banag a matmatanda idi kas imposible. Kas pagarigan, ginasgasut a tawen sakbayna, nalabit nga impagarup ti kaaduan a tattao nga imposible ti gagangay a maar-aramidan ita dagiti kompiuter, telebision, teknolohia mainaig iti law-ang, ken umasping a moderno nga idudur-as.

Gapu ta mabigbigda a bassit laeng ti pannakaammoda kadagiti nasientipikuan a pagsidsiddaawan a masarakan kadagiti pinarsua ti Dios, admitiren ti dadduma a sientista a saanda a masigurado no adda pay banag nga imposible. Ti maibagada ita ket nalabit saan pay a posible. Gapuna, mangnamnamada nga addanto pay dagiti mapasamak a “milagro.”

Uray no ti tuktukoyentayo ket ti kangrunaan a kaipapanan ti “milagro,” ti bambanag a “gapuanan ti karkarna a puersa,” maikunatayo nga amintayo ket nakaimatang kadagiti milagro. Kas pagarigan, makitatayo ti init, bulan, ken bitbituen​—amin dagita ket gapuanan ti “karkarna a puersa,” ti Namarsua a mismo. Malaksid iti dayta, siasino ti naan-anay a makailawlawag a detaliado no kasano ti panagandar ti bagi? kasano ti panagandar ti utek? wenno kasano ti pannakabukel ti sikog? Inlawlawag ti libro a The Body Machine: “Ti tao, a konkontrolen ken tigtignayen ti central nervous system [utek ken spinal cord], ket maysa a narikut a makarikna a banag, maysa a makina a makagaraw ken makabael a mangtaginayon iti umiso a panagandarna, maysa a kompiuter a makabael nga agpaadu iti kakikitana​—nakaskasdaaw ken iti adu a pamay-an misterioso a parsua.” Talaga a maysa a milagro ti “tao” a pinarsua ti Dios, ket pagsidsiddaawantayo dayta agingga ita. Adda pay dagiti sabali a kita ti milagro a nakitamon, nupay mabalin a saanmo a minatmatan a kasta.

Makuna Kadi a Milagro ti Maysa a Libro?

Awan ti libro a nasaksaknap ti pannakaiwarasna ngem iti Biblia. Matmatam kadi ti Biblia kas maysa a milagro? Makunatay kadi a gapuanan dayta ti maysa a “karkarna a puersa”? Pudno a ti Biblia ket maysa a libro nga insurat dagiti tattao, ngem ibagada a ti kapanunotan ti Dios ti insuratda, saan a ti kapanunotanda. (2 Samuel 23:1, 2; 2 Pedro 1:20, 21) Panunotem. Ti bilangda ket agarup 40, a nagbiagda iti las-ud ti nasurok a 1,600 a tawen. Nadumaduma ti nalikudanda. Adda pastor, soldado, mangngalap, agserserbi kadagiti umili, doktor, papadi, ken ar-ari. Kaskasdi, nayallatiwda ti maymaysa a mensahe ti namnama nga agpada a pudno ken umiso.

Maibatay iti naannad a panagadal, dagiti Saksi ni Jehova matmatanda ti Biblia, “saan a kas sao dagiti tattao, no di ket, kas iti kinapudno daytoy, kas sao ti Dios,” kas insurat ni apostol Pablo. (1 Tesalonica 2:13) Kadagiti naglabas a tawtawen, inlawlawag dagiti publikasionda no kasano a dagiti nakuna a panagkokontra ket napagtutunos babaen ti kangrunaan a mensahe ti Biblia. Daytoy a panagtutunos ti mangpaneknek a ti Dios ti autor ti Biblia.a

Awan ti sabali a libro a kas iti Biblia a nagbalin a puntiria ti napinget a panangdadael. Kaskasdi, adda pay latta ti Biblia, ket naipatarus dayta iti nasurok a 2,000 a lenguahe, nupay kapasetna laeng ti dadduma. Ti pannakaitalimeng daytoy a libro ken ti kinasin-aw ti linaonna ket mangiparangarang iti pannalaknib ti Dios. Pudno a ti Biblia ket maysa a milagro!

Milagro a “Nabiag ken Adda Bilegna”

Saanen a mapaspasamak dagiti nagkauna a milagro​—dagiti namilagruan a panangpaimbag ken panangpagungar. Ngem adda panggapuantayo nga agtalek nga iti um-umay a baro a lubong ti Dios, mapasamakto manen dagiti kasta a milagro, ket iti dayta a gundaway, maaramidto dayta iti sangalubongan. Mangyegda iti permanente a pannakabang-ar ken lab-awanna ti agdama a matukod ti isiptayo.

Ti Biblia, a milagro a naipaay kadatayo, makaaramid pay ita kadagiti makuna a milagro babaen ti panangtignayna kadagiti tattao a mangpasayaat kadagiti personalidadda. (Kitaenyo ti maysa a pagarigan iti kahon a “Ti Bileg ti Sao ti Dios,” iti panid 8.) Kuna ti Hebreo 4:12: “Ti sao ti Dios nabiag ken adda bilegna ken natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.” Wen, adda paset ti Biblia iti panangpasayaat iti biag ti nasurok nga innem a milion a tattao iti sangalubongan, a pinunnona ti biagda iti panggep ken impaayanna ida iti nakaskasdaaw a namnama iti masanguanan.

Apay a dimo bay-an ti Biblia a maaddaan iti milagro nga epekto iti biagmo?

[Footnote]

[Kahon/Ladawan iti panid 7]

NATAYEN WENNO SIBIBIAG PAY?

Sigun iti Juan 19:33, 34, natayen ni Jesus idi a ti “maysa kadagiti soldado dinuyokna ti bakrangna iti maysa a pika, ket dagus a rimmuar ti dara ken danum.” Ngem ipasimudaag ti Mateo 27:49, 50 a sibibiag pay ni Jesus idi mapasamak dayta. Apay a nagduma?

Ti Linteg Mosaiko imparitna ti agpatnag a pannakabitay ti maysa a kriminal iti kayo a pakapapatayanna. (Deuteronomio 21:22, 23) Gapuna, idi kaaldawan ni Jesus, no malemen ket sibibiag pay la ti nailansa a kriminal, nakaugalian a matukkol dagiti sakana tapno dardaras a matay. Saannan a mayunnat ti bagina ket marigatanen nga aganges. Impagarup ngarud dagiti soldado a natayen ni Jesus yantangay tinukkolda ti saka dagiti dua a managdakdakes a nailansa iti sibayna ngem saanda a tinukkol ti saka ni Jesus. Posible a ti soldado dinuyokna ti bakrang ni Jesus tapno maikkat ti panagduadua a sibibiag pay ken tapno saanen a maungaran a mabalin a sibibiddut a maipadamag kas panagungar.

Ti teksto iti Mateo 27:49, 50 mangipaay iti naiduma a panagsasaganad dagiti pasamak. Kunana: “Ti sabali a lalaki nangala iti pika ket dinuyokna ti bakrangna, ket rimmuar ti dara ken danum. Manen ni Jesus nagpukkaw a buyogen ti natbag a timek, ket inyawatna ti espirituna.” Ti nakaitaliko a sentensia saan nga agparang iti amin a nagkauna a manuskrito ti Biblia. Adu nga eskolar ti mangibaga a nainayon dayta idi agangay maibatay iti Ebanghelio ni Juan ngem di umiso ti nakaipuestuanna. Gapuna, iti adu a patarus, ti sentensia ket naikabil iti uneg dagiti braket wenno parenteses, naikkan iti mangilawlawag a footnote, wenno naan-anay lattan a naikkat.

Iti kompleto a teksto da Westcott ken Hort, a kangrunaan a nakaibatayan ti Baro a Lubong a Patarus, ti sentensia ket naikabil iti uneg dagiti braket. Napakuyogan dayta iti komento a mangibagbaga a ti sentensia ket “innayon la ketdi dagiti eskriba.”

Aglaplapusanan ngarud ti pammaneknek a nakappapati ti Juan 19:33, 34, a natayen ni Jesus idi duyoken ti Romano a soldado babaen ti pika.

[Kahon/Ladawan iti panid 8]

TI BILEG TI SAO TI DIOS

Kas maysa a tin-edyer ken biktima ti nasinasina a pamilia, nasumok ni Detlef ti agdroga, agbartek, ken agdengngeg iti musika a heavy metal.b Nagbalin a kameng ti grupo a gagangay a maawagan nga skinhead, ken nagbalin a parikut dagiti polis gapu iti kinaranggasna.

Idi 1992, 60 nga skinhead ti nakirinnupak iti agarup 35 a punker iti maysa a restawran ken paginuman iti arak idiay makin-amianan a daya ti Alemania. Nakaro a nadangran ti maysa kadagiti punker, ni Thomas, ket natay gapu kadagiti sugatna. Kalpasan ti bista a kasta unay ti pannakaipadamagna, nasentensiaan a maibalud ti sumagmamano kadagiti nangidaulo, agraman ni Detlef.

Di nagbayag kalpasan a naruk-atan ni Detlef manipud iti pagbaludan, maysa a pampleta ti impaima kenkuana dagiti Saksi ni Jehova. Napauluan dayta iti “Apay a Napno ti Biag iti Parikut?” Dagus a nabigbig ni Detlef a pudno ti nabasana, ket nangrugi a nakipagadal iti Biblia kadagiti Saksi. Dayta ti naan-anay a namagbalbaliw iti biagna. Sipud idi 1996, isu ket maysan a naregta a Saksi ni Jehova.

Ni Siegfried, maysa a sigud a punker, ket nasinged a gayyem ni Thomas, ti agtutubo a lalaki a napapatay. Nagbalin met ni Siegfried a Saksi idi agangay ket maysa itan a panglakayen iti kongregasion. Iti kongregasion ni Detlef [a pakigimgimongan met sagpaminsan ti ina ni Thomas], bimmisita ni Siegfried tapno mangiparang iti palawag a naibatay iti Biblia, ket inawis ni Detlef a mangaldaw. Agarup sangapulo a tawen sakbayna, narigat a matngelan ti guranggurada. Ita, nakadkadlaw ti nainkabsatan nga ayatda.

Segseggaan da Detlef ken Siegfried ti panangabrasadanto ken ni Thomas, inton agungar iti paraiso a daga. Kuna ni Detlef: “Makaluaak no mapanunotko dayta. Pagladingitak unay ti inaramidko.” Agpada a tarigagayanda a tulonganto ni Thomas, kas iti panangtulongda ita kadagiti sabsabali, a mangammo ken ni Jehova ken agrag-o gapu iti namnama nga ipapaay ti Biblia.

Wen, kasta kabileg ti Sao ti Dios!

[Footnote]

[Ladawan iti panid 6]

Ti bagi ti tao ket maysa a nakaskasdaaw a parsua

[Credit Line]

Anatomy Improved and Illustrated, London, 1723, ni Bernardino Genga