Naan-anay nga Ayatenyo ti Kinalinteg

“Inayatmo ti kinalinteg.”​—SAL. 45:7.

 1. Ania ti makatulong kadatayo a magna iti “desdes ti kinalinteg”?

BABAEN ti Saona ken ti nasantuan nga espirituna, idaldalan ni Jehova ti ilina kadagiti “desdes ti kinalinteg.” (Sal. 23:3) Ngem gapu ta imperpektotayo, agannayastayo a sumiasi kadagita a dana. Tapno maaramidtayo ti umiso, masapul ti panagregget. Ania ti makatulong kadatayo nga agballigi? Kas ken Jesus, masapul nga ayatentayo ti panangaramid iti umiso.​—Basaen ti Salmo 45:7.

 2. Ania dagiti “desdes ti kinalinteg”?

² Ania dagiti “desdes ti kinalinteg”? Ti desdes ket maysa nga akikid a pagnaan. Dagita a desdes ket naibatay kadagiti pagalagadan ni Jehova iti kinalinteg. Iti Hebreo ken Griego, ti “kinalinteg” ket tumukoy iti maysa a “napalungdo,” a mangipasimudaag iti nainget a panangannurot kadagiti moral a pagalagadan. Yantangay ni Jehova ti “disso a pagyanan ti kinalinteg,” dagiti adipenna siraragsak nga agpannurayda kenkuana no ania ti dana a nalinteg iti moral a masapul a surotenda.​—Jer. 50:7.

 3. Kasano a maammuantayo ti ad-adu pay maipapan iti kinalinteg ti Dios?

³ Naan-anay a maay-ayotayo ti Dios no aramidentayo ti amin a kabaelantayo nga agbiag maitunos kadagiti nalinteg a pagalagadanna. (Deut. 32:4) Maaramidantayo dayta no ikagumaantayo nga am-ammuen ni Jehova a Dios babaen ti panangadaltayo iti Saona, ti Biblia. Ad-adda a maipategtayo ti kinalintegna no ad-adu ti maammuantayo maipapan iti Dios ken inaldaw a sumingedtayo kenkuana. (Sant. 4:8) Masapul met nga agpaiwanwantayo iti naipaltiing a Sao ti Dios no mangaramidtayo kadagiti napateg a desision.

Sapulen ti Kinalinteg ti Dios

 4. Ania ti ramanen ti panangsapul iti kinalinteg ti Dios?

⁴ Basaen ti Mateo 6:33. Saan laeng a ti panangikasaba iti naimbag a damag ti Pagarian ti ramanen ti panangsapul iti kinalinteg ti Dios. Tapno awaten ni Jehova ti sagrado a panagserbitayo, masapul a maitunos iti nangato a pagalagadanna ti konduktatayo iti inaldaw. Ania ti rumbeng nga aramiden ti amin a mangsapsapul iti kinalinteg ti Dios? Nasken nga ‘ikawesda ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.’​—Efe. 4:24.

 5. Ania ti makatulong kadatayo a mangdaer iti pannakaupay?

⁵ Bayat nga ikagkagumaantayo ti agbiag maitunos kadagiti nalinteg a pagalagadan ti Dios, maupaytayo no dadduma gapu kadagiti pagkapuyantayo. Ania ti makatulong kadatayo tapno madaerantayo ti nakaro a pannakaupay ken masursurotayo nga ayaten ken aramiden ti kinalinteg? (Prov. 24:10) Masapul a regular nga umadanitayo ken Jehova iti kararag ‘buyogen ti napudno a puso iti naan-anay a pammasiguro ti pammati.’ (Heb. 10:19-22) Nailangitan man wenno naindagaan ti namnamatayo, ipakpakitatayo ti pammatitayo iti daton a subbot ni Jesu-Kristo ken iti ar-aramidenna para kadatayo kas ti naindaklan a Nangato a Padi. (Roma 5:8; Heb. 4:14-16) Ti bileg ti naiparukpok a dara ni Jesus ket nailadawan iti kaunaan a ruar daytoy a magasin. (1 Juan 1:6, 7) Kinuna ti artikulo: “Maysa daytoy a kinapudno ta no kitaen ti kolor eskarlata a banag iti nalabaga a sarming sa isarang iti lawag, agbalin daytoy a puraw. Gapuna, no matmatan ti Dios dagiti basoltayo babaen ti dara ni Kristo, agbalin dagita a puraw nupay kasla eskarlata ti kolorda.” (Hulio 1879, p. 6) Anian a nagsayaat a probision ti impaay kadatayo ni Jehova babaen ti daton a subbot ti dungdungnguenna nga Anak!​—Isa. 1:18.

Sukimatentayo ti Naespirituan a Kabaltayo

 6. Apay a nagpateg a sukimatentayo ti naespirituan a kabaltayo?

⁶ Iti amin a gundaway, masapul nga isuottayo “ti kabal ti barukong nga isu ti kinalinteg” gapu ta nagpateg dayta a paset ti naespirituan a kabal manipud iti Dios. (Efe. 6:11, 14) Kabbarotayo man wenno nabayagen nga agserserbi ken ni Jehova, nagpateg nga inaldaw a sukimatentayo ti naespirituan a kabaltayo. Apay? Agsipud ta ti Diablo ken dagiti demoniona ket naitapuaken ditoy daga. (Apoc. 12:7-12) Nakaro ti pungtot ni Satanas ta ammona nga ababan ti tiempona. Gapuna, kimmaro ti panangbusorna iti ili ti Dios. Ap-apresiarentayo kadi ti kinapateg ti panangisuot iti “kabal ti barukong nga isu ti kinalinteg”?

 7. Kasano ti rumbeng a panagtignaytayo no bigbigentayo a kasapulantayo ti “kabal ti barukong nga isu ti kinalinteg”?

⁷ Ti kabal ti barukong salaknibanna ti literal a puso. Gapu iti kinaimperpektotayo, agannayas ti piguratibo a pusotayo nga agbalin a nagulib ken desperado. (Jer. 17:9) Yantangay agannayas ti pusotayo nga agaramid iti dakes, nagpateg a sanayen ken disiplinaentayo dayta. (Gen. 8:21) No bigbigentayo a kasapulantayo ti “kabal ti barukong nga isu ti kinalinteg,” ditay ikkaten dayta uray apagbiit laeng babaen ti panangpilitayo kadagiti paglinglingayan a kagura ti Dios, wenno ditay padpadasen a panunoten man laeng ti agaramid iti dakes. Ditay met busbosen ti adu a nagpateg a tiempotayo nga agbuya iti telebision. Imbes ketdi, ikagumaantayo nga aramiden ti makaay-ayo ken Jehova. Uray no maitibkoltayo no dadduma gapu iti panangpanunot ken panangaramidtayo iti di umiso, ditay koma sumuko. Bumangontayo manen babaen ti tulong ni Jehova.​—Basaen ti Proverbio 24:16.

 8. Apay a kasapulantayo ti “dakkel a kalasag ti pammati”?

⁸ Ti sabali pay a paset ti naespirituan a kabaltayo ket “ti dakkel a kalasag ti pammati.” Matulongannatayo dayta a ‘mangdepdep iti amin a sumsumged a gayang daydiay nadangkes.’ (Efe. 6:16) Kas resultana, ti pammati ken naimpusuan a panagayat ken Jehova tulongannatayo a mangaramid iti kinalinteg ken agtalinaed iti dalan nga agturong iti biag nga agnanayon. No ad-adda a masursurotayo nga ayaten ni Jehova, ad-adda met a maipategtayo ti kinalintegna. Ngem komusta met ti konsiensiatayo? Kasano a makatulong dayta iti panagreggettayo a mangayat iti kinalinteg?

Panangtaginayon iti Nadalus a Konsiensia

 9. Kasano a makagunggona kadatayo ti panangtaginayon iti nadalus a konsiensia?

⁹ Idi nagpabautisartayo, kiniddawtayo ken Jehova nga ipaayannatayo iti “naimbag [wenno nadalus] a konsiensia.” (1 Ped. 3:21) Gapu ta ipakpakitatayo ti pammatitayo iti subbot, ti dara ni Jesus inabbonganna dagiti basoltayo, iti kasta, addaantayo iti nadalus a takder iti imatang ti Dios. Ngem tapno mataginayontayo dayta, masapul a pagtalinaedentayo a nadalus ti konsiensiatayo. No adda dagiti gundaway a sidirennatayo ti konsiensiatayo, rumbeng nga agyamantayo agsipud ta umiso ti panagandar dayta. Ti kasta a pannakakonsiensia paneknekanna a saan a kimmalio ti konsiensiatayo no maipapan kadagiti nalinteg a daldalan ni Jehova. (1 Tim. 4:2) Ngem adda pay kanayonan nga akem ti konsiensia para kadagidiay agtarigagay a mangayat iti kinalinteg.

10, 11. (a) Mangisalaysay iti kapadasan a mangipakita no apay a masapul nga ipangagtayo ti nasanay-Biblia a konsiensiatayo. (b) Apay a makagunggona kadatayo ti panagayat iti kinalinteg?

¹⁰ No makaaramidtayo iti di umiso, sidirennatayo ti konsiensiatayo. Maysa nga agtutubo ti simmiasi kadagiti “desdes ti kinalinteg.” Naadik iti pornograpia ken nagmarihuana. Makonkonsiensia no tumabuno kadagiti gimong ken ibilangna ti bagina nga aginsisingpet no makiraman iti panangasaba. Gapuna, insardengnan ti makiraman kadagita a Nakristianuan nga aktibidad. Kunana: “Ngem diak idi naamiris a sidsidirennak gayam ti konsiensiak gapu kadagiti aramidko.” Innayonna, “Nagtultuloy ti minamaag a panagbiagko iti agarup uppat a tawen.” Kalpasanna, napanunotko ti agsubli iti kinapudno. Nupay impagarupna a saan nga imdengan ni Jehova ti kararagna, nagkararag latta ket dimmawat iti pammakawan. Awan pay sangapulo a minuto ti napalabas, simmangpet ni nanangna ket pinaregtana a tumabuno kadagiti gimong. Napan iti Kingdom Hall ket kiniddawna iti maysa a panglakayen nga iyadalanna. Idi agangay, nagpabautisar, ken agyamyaman ita ken Jehova gapu ta naispal manipud iti narugit a panagbiagna.

¹¹ Saan kadi a dakkel ti magunggonatayo no aramidentayo ti umiso? Bayat a masursurotayo nga ayaten ti kinalinteg ken naan-anay nga aramidentayo dayta, ad-adda a maragsakantayo a mangaramid iti banag a makaay-ayo iti nailangitan nga Amatayo. Panunotem daytoy! Dumtengto ti tiempo nga amin a tattao ket saanen a makarikna iti pannakakonsiensia yantangay naan-anayton a mayanninawda ti personalidad ti Dios. Gapuna, iyukuoktayo itan iti pusotayo ti panagayat iti kinalinteg tapno maparagsaktayo ni Jehova.​—Prov. 23:15, 16.

12, 13. Kasanotayo a masanay ti konsiensiatayo?

¹² Ania ti aramidentayo tapno nasayaat ti pannakasanay ti konsiensiatayo? No adalentayo ti Kasuratan ken dagiti naibatay-Biblia a publikasion, napateg a laglagipentayo a “ti puso daydiay nalinteg agmennamenna tapno makasungbat.” (Prov. 15:28) Usigentayo no kasano a makagunggona dayta no maipasangotayo kadagiti saludsod maipapan iti panggedan. No ti maysa a trabaho ket nalawag a maisalungasing kadagiti Nainkasuratan a pagalagadan, kaaduan kadatayo ti dagus nga agtignay maitunos iti panangiwanwan nga ipapaay ti matalek ken masirib nga adipen. Ngem no ditay masigurado no ti maysa a panggedan ket maisalungasing iti Biblia wenno saan, nasken nga agsukimattayo kadagiti Nainkasuratan a prinsipio nga agaplikar iti kasasaad. Kalpasanna, utoben ken ikararag ti maipapan kadagita.a Karaman kadagita dagiti prinsipio a mainaig iti panangliklik a mangitibkol iti sabsabali. (1 Cor. 10:31-33) Nangnangruna koma a maseknantayo kadagiti prinsipio nga adda pakainaiganna iti relasiontayo iti Dios. No pudno ni Jehova kadatayo, nagpateg nga isaludsodtayo, ‘Masaktan kadi ti rikna ni Jehova no awatek daytoy a trabaho?’​—Sal. 78:40, 41.

¹³ No agsaganatayo para iti Panagadal iti Pagwanawanan wenno iti Panagadal ti Kongregasion iti Biblia, rumbeng a laglagipentayo a nagpateg nga utobentayo dagiti naidatag nga impormasion. Nayugalitayo kadin ti manguged lattan kadagiti sungbat sa umakartayo a dagus iti sumaruno a parapo? No kasta ti panagsaganatayo, ditay mapauneg ti panagayattayo iti kinalinteg ken ditay mapatanor ti konsiensia a sinanay ti Biblia. Tapno mapatanortayo ti panagayat iti kinalinteg, masapul a sipapasnek nga agadaltayo ken utobentayo ti nabasatayo iti naisurat a Sao ti Dios. Kasapulan ti panagregget tapno masursurotayo nga ayaten a naan-anay ti kinalinteg!

Mabisin ken Mawaw iti Kinalinteg

14. Ania ti kayat ni Jehova a Dios ken ni Jesu-Kristo a mariknatayo iti sagrado a panagserbitayo?

¹⁴ Kayat ni Jehova a Dios ken ni Jesus-Kristo a naragsaktayo bayat nga itungtungpaltayo ti sagrado a panagserbitayo. Ania ti makatulong tapno naragsaktayo? Isu ti panagayattayo iti kinalinteg! Iti Sermon ni Jesus iti Bantay, kinunana: “Naragsak dagidiay mabisin ken mawaw iti kinalinteg, yantangay mapennekdanto.” (Mat. 5:6) Ania ti kaipapanan dagita a sasao kadagidiay agtarigagay a mangayat iti kinalinteg?

15, 16. Kadagiti ania a pamay-an a mapennek ti naespirituan a panagbisin ken pannakawaw?

¹⁵ Ti lubong a pagbibiagantayo ket iturturayan daydiay nadangkes. (1 Juan 5:19) No agbasatayo iti diario iti sadinoman a pagilian, makitatayo ti nakaro a kinaulpit ken kinaranggas. Maburiboran ti maysa a nalinteg no panunotenna ti kinaulpit ti tao iti padana a tao. (Ecl. 8:9) Datayo a mangay-ayat ken Jehova, ammotayo nga Isu laeng ti makapennek iti naespirituan a panagbisin ken pannakawaw dagidiay mayat nga agsursuro iti kinalinteg. Dandanin madadael dagiti di nadiosan a tattao, ken saanton a mariribukan dagidiay managayat iti kinalinteg gapu kadagiti dakes nga aramid dagidiay managsalungasing-linteg a tattao. (2 Ped. 2:7, 8) Anian a bang-ar ti itden dayta!

¹⁶ Kas adipen ni Jehova ken pasurot ni Jesu-Kristo, ammotayo a ‘mapennekto’ ti amin a mabisbisin ken mawaw iti kinalinteg. Mapennekdanto a naan-anay babaen ti urnos ti Dios a baro a langlangit ken baro a daga a sadiay nga “agtaeng ti kinalinteg.” (2 Ped. 3:13) Gapuna, saantayo koma a maupay wenno masdaaw nga awan ti kinalinteg iti daytoy a lubong ni Satanas gapu kadagiti agraraira a panangirurumen ken kinaranggas. (Ecl. 5:8) Ti Kangatuan a ni Jehova ammona ti mapaspasamak ken dandaninan ispalen dagidiay mangay-ayat iti kinalinteg.

Gunggona nga Itden ti Panagayat iti Kinalinteg

17. Ania ti dadduma kadagiti gunggona nga itden ti panagayat iti kinalinteg?

¹⁷ Impaganetget ti Salmo 146:8 ti nagsayaat a gunggona nga itden ti pannagna iti dana ti kinalinteg. Inkanta ti salmista: “Ay-ayaten ni Jehova dagidiay nalinteg.” Agasenyo! Ay-ayatennatayo ti Soberano iti uniberso gapu iti panagayattayo iti kinalinteg! Gapu iti panagayat ni Jehova, makapagtalektayo nga ipaayna ti kasapulantayo no iyun-unatayo dagiti interes ti Pagarian. (Basaen ti Salmo 37:25; Proverbio 10:3.) Inton agangay, ti intero a planeta ket tawidenton dagiti managayat iti kinalinteg. (Prov. 13:22) Gapu iti panangannurotda iti kinalinteg, kaaduan nga adipen ti Dios ti magunggonaanto iti aglaplapusanan a ragsak ken iti biag nga agnanayon iti nagpintas a paraiso a daga. Uray itan, dagidiay mangay-ayat iti kinalinteg ti Dios maaddaanda iti talna ti panunot a makatulong iti panagkaykaysa ti pamiliada ken ti kongregasion.​—Fil. 4:6, 7.

18. Ania ti masapul nga itultuloytayo nga aramiden bayat nga ur-urayentayo ti aldaw ni Jehova?

¹⁸ Bayat nga ur-urayentayo ti iyaay ti dakkel nga aldaw ni Jehova, masapul nga itultuloytayo a sapulen ti kinalintegna. (Sof. 2:2, 3) Gapuna, iparangarangtayo koma ti pudno a panagayat iti nalinteg a daldalan ni Jehova a Dios. Ramanen dayta ti panangtaginayon a nakakapet kadatayo “ti kabal ti barukong nga isu ti kinalinteg” tapno masalakniban ti piguratibo a pusotayo. Masapul a taginayonentayo met ti maysa a nadalus a konsiensia a mangyeg iti rag-o kadatayo ken iti puso ti Dios.​—Prov. 27:11.

19. Ania ti determinado nga aramidentayo, ken ania ti mailawlawag iti sumaruno nga artikulo?

¹⁹ ‘Dagiti mata ni Jehova mapan nga agsublisubli iti intero a daga tapno ipakitana ti pigsana maigapu kadagidiay a ti pusoda naan-anay kenkuana.’ (2 Cron. 16:9) Anian a makaliwliwa dagita a sasao kadatayo bayat nga ar-aramidentayo ti umiso iti laksid ti kumarkaro a kinaranggas, kinadakes, ken di kinatalged iti daytoy nariribuk a lubong! Pudno, ti nalinteg a panagbiagtayo ket mabalin a pakasdaawan dagiti tattao a naisina iti Dios. Ngem dakkel ti magunggonatayo no annurotentayo ti kinalinteg ni Jehova. (Isa. 48:17; 1 Ped. 4:4) Gapuna, determinadotayo koma a mangitultuloy a mangayat ken mangannurot iti kinalinteg buyogen ti naan-anay a puso ta dayta ti mangyeg iti kinaragsak kadatayo. Ngem ti pannakaadda ti naan-anay a puso ramanenna met ti pananggura iti kinakillo. Ipakita ti sumaganad nga artikulo no ania ti kaipapanan dayta.

[Footnote]

Ania ti Sungbatyo?

• Tapno maipategtayo ti kinalinteg, apay a nasken a bigbigentayo ti kinapateg ti subbot?

• Apay a nagpateg nga isuot “ti kabal ti barukong nga isu ti kinalinteg”?

• Kasanotayo a masanay ti konsiensiatayo?

[Ladawan iti panid 26]

Ti nasanay a konsiensia tulongannatayo a mangrisut kadagiti saludsod mainaig iti panggedan