Biag ken Ministerio ni Jesus

Inton Maiparangarang ti Anak ti Tao

BAYAT ti kaadda pay laeng ni Jesus iti amianan (idiay Samaria wenno idiay Galilea), nagimtuod dagiti Fariseo kenkuana maipapan iti iyaay ti Pagarian. Mamatida a daytat’ umay a buyogen iti kasta unay a kinaranga ken seremonia, ngem kuna ni Jesus: “Ti pagarian ti Dios saanto nga umay babaen ti panagpalpaliiw a makita, ket dinto met kunaen dagiti tattao, ‘Adtoy!’ wenno ‘Adda idiay!’ Ta, adtoy! ti pagarian ti Dios adda iti tengngayo.”

Dagiti sasao ni Jesus nga “adda iti tengngayo” ti naipatarus no maminsan nga “adda iti unegyo.” Gapuna pagarupen dagiti dadduma a ti kayat a sawen ni Jesus ket ti Pagarian ti Dios agturay iti puspuso dagiti ad-adipen ti Dios. Ngem, nalawag a, ti Pagarian ti Dios awan iti puspuso dagitoy a di mamati a Fariseo a pakisarsaritaan ni Jesus. Kaskasdi, adda iti tengngada, agsipud ta ti natudingan nga Ari iti Pagarian ti Dios, ni Jesu-Kristo, ket adda iti tengngada.

Nalabit kalpasan laeng ti ipapanaw dagiti Fariseo a nakisarita pay ni Jesus kadagiti adalanna maipapan iti umay a Pagarian. Ti nangnangruna a pampanunotenna isu ti masanguanan a kaaddana iti Naarian a pannakabalin isu a namakdaaranna: “Ket kunaento dagiti tattao kadakayo, ‘Kumitakayo sadiay!’ wenno ‘Kumitakayo ditoy!’ Dikay mapan ket dikay suroten [dagitoy ulbod a Mesias]. Ta kas iti kimat, a no agkimat manipud iti maysa a disso iti baba ti langit, sumilap agingga iti sabali a bangir ti baba iti langit, kastanto met ti Anak ti tao inton aldawna.” Gapuna no kasano a ti kimat ket makita iti nasaknap a lugar, ipampamatmat ni Jesus a ti pammaneknek ti kaaddana iti Naarian a pannakabalin ket nalawag a makitanto dagiti amin nga agtarigagay a makapaliiw iti dayta.

Kalpasanna indilig ni Jesus dagiti paspasamak idi ugma a mangipakita no anianto ti kababalin dagiti tattao bayat iti masanguanan a kaaddana. Inlawlawagna: “Ket no kasano ti naaramid kadagiti aldaw ni Noe, kastanto met kadagiti aldaw ti Anak ti tao . . . Kasta met ti naaramid kadagiti aldaw ni Lot: manganda idi, aginumda, aggatangda, aglakoda, agmulada, agbalayda. Ngem idi aldaw nga iruruar ni Lot idiay Sodoma nagtudo nanipud langit iti apuy ken asufre ket pinukawna amin ida. Kas itoy, kastanto iti aldaw a pannakaiparangarang ti Anak ti tao.”

Saan nga ibagbaga ni Jesus a dagiti tattao idi aldaw ni Noe ken ni Lot ket nadadaelda gapu laeng iti panangaramidda kadagiti gagangay nga ar-aramid a pannangan, panaginum, panaggatang, panaglako, panagmula, ken panagbalay. Uray ni Noe ken ni Lot ken dagiti pamiliada ar-aramidenda dagitoy a banag. Ngem intuloy dagiti dadduma dagitoy nga aramid a dida inkankano ti pagayatan ti Dios, ket gapu itoy a rason a nadadaelda. Maigapu iti isu met laeng a rason, madadaelto dagiti tattao inton maiparangarang ni Kristo bayat ti dakkel a rigat daytoy a sistema dagiti bambanag.

Babaen ti panangipaganetget iti kinapateg ti dagdagus a panangipangag iti pammaneknek iti masanguanan a kaaddana iti Naarian a pannakabalin, kinuna pay ni Jesus: “Iti dayta nga aldaw ti addanto iti tuktok ti balay ket dagiti alikamenna adda iti uneg ti balay saanto nga umulog a mangala kadakuada, ket ti adda iti talon, kasta met a dinto makapagsubli. Laglagipenyo ti asawa ni Lot.”

No agparang ti pammaneknek iti kaadda ni Kristo, saan a masapul a palubosan dagiti tattao ti panangipategda kadagiti namaterialan a sanikuada a manglapped kadakuada nga agtignay a dagus. Iti dalanda a rummuar iti Sodoma, ti asawa ni Lot nalawag a timmaliaw a buyogen iti panagtarigagay kadagiti bambanag a nabati, ket isut’ nagbalin a teddek iti asin.

Iti panangituloyna iti deskripsionna iti kasasaadto bayat ti masanguanan a kaaddana, imbaga ni Jesus kadagiti adalanna: “Iti dayta a rabii addanto dua a tao iti maysa a pagiddaan; ti maysa maalanto, ket ti sabali mabaybay-anto. Addanto dua a babbai a madamadanto nga aggilgiling nga agdinna; ti maysa maalanto ket ti sabali mabaybay-anto.”

Ti pannakaala katupagna ti iseserrek ni Noe a kadua ti pamiliana iti daong ken ti panangiruar dagiti anghel ken ni Lot ken ti pamiliana iti Sodoma. Dayta kaipapananna ti pannakaisalakan. Iti kasumbangirna, ti pannakabaybay-a kaipapananna ti panagsagaba iti pannakadadael.

Iti daytoy a punto, nagimtuod dagiti adalan: “Adino, Apo?”

“No adino ti yan ti bangkay, idiayto met ti paguurnongan dagiti aguila,” simmungbat ni Jesus. Dagidiay “maala” a maipaay iti pannakaisalakan ket kas kadagiti adayo ti makitana nga aguila ket aguurnongda “iti bangkay.” Ti bagi tuktukoyenna ti pudno a Kristo iti di makita a Naarian a pannakabalin ken iti naespirituan a piesta nga ipaay ni Jehova. Lucas 17:20-37; Genesis 19:26.

◆ Kasano a ti Pagarian adda iti tengnga dagiti Fariseo?

◆ Iti ania a pamay-an a ti kaadda ni Kristo ket kas iti kimat?

◆ Apay a madadaelto dagiti tattao bayat ti kaadda ni Kristo?

◆ Ania ti kaipapanan ti pannakaala, ken ti pannakabaybay-a?