Manangpakawankay Kadi?

SAAN nga agkatunosan da Bill ken ti 16-años a balasangna a ni Lisa. Masansan nga agtungpal iti panagbinnugkaw dagiti bassit la a dida pagkinnaawatan. Kamaudiananna, kimmaro ti susik agingga a napagtalaw ni Lisa iti pagtaengan.a

Idi agangay, nabigbig ni Lisa nga isut’ nagbiddut ket dimmawat iti pammakawan ni tatangna. Ngem imbes a lipatenna dagiti napalabas a biddut ni Lisa, linaksid ti makapungtot nga amana dagiti panagreggetna a makikappia. Rabakenyo! Dina kayat a kaasian ti mismo a balasangna!

Ginasut a tawenen ti napalabas, nakondenar a matay ti maysa nga awan basolna a lalaki gapu iti krimen a dina inaramid. Nagsaksi iti ulbod dagiti testigo, ken inggagara dagiti agtuturay nga inkedked ti hustisia. Dayta awan basolna a tao ket isu ni Jesu-Kristo. Sakbay la unay ti ipapatayna, inkararagna iti Dios: “Ama, pakawanem ida, ta dida ammo ti ar-aramidenda.”​—Lucas 23:34.

Sibubulos a namakawan ni Jesus, manipud iti pusona, ket nabalakadan dagiti pasurotna a tuladenda iti daytoy a banag. (Efeso 4:32) Nupay kasta, kas ken Bill, adu ti awanan-puso nga agkedked a mamakawan. Kasanot’ pannakairukodyo iti daytoy a banag? Madadaankay aya a mamakawan kadagiti sabsabali no makabasolda kadakayo? Ken komusta met ngay dagiti nadagsen a basol? Nasken aya a pakawanen met dagitoy?

Maysa a Karit ti Panangpakawan

Saan a kanayon a nalaka ti mamakawan. Ket kadagitoy napeggad a tiempo, rumikrikut ti relasion dagiti tattao. Masansan a magabsuonan ti biag ti pamilia kadagiti pakariribukan ken parikut. Kinuna ni Kristiano nga apostol Pablo idi un-unana nga agrairanto dagiti kasta a kasasaad iti “maudi nga al-aldaw.” Kinunana: “Dagiti tattao managayatdanto iti bagbagida, managayat iti kuarta, napalangguad, natangsit, . . . awanan panagayat iti kinaimbag, mangliliput, natangken ti uloda, natangsit a buyogen ti panagpannakkel.”​—2 Timoteo 3:1-4.

Ngarud, saantay a maliklikan ti maipasango kadagiti makinruar a pakasuotan a mangsubok iti abilidadtayo a mamakawan kadagiti sabsabali. Mainayon pay, makidangdangadangtay met kadagiti makin-uneg a puersa. Insennaay ni Pablo: “Ti naimbag a kayatko diak aramiden, no di ket ti dakes a diak kayat isu ti an-annurotek. No, ita, ti diak kayat isu ti aramidek, ti mangar-aramid iti dayta ket saanen a siak, no di ket ti basol nga agnanaed kaniak.” (Roma 7:19, 20) Gapuna, adu kadatayo ti marigatan a mamakawan nupay ditay kayat ti agbalin a kasta. Addaan ngamin iti nabileg nga impluensia kadatayo amin ti natawid a kinaimperpekto ken basol, a no dadduma ikkatenna ti asitayo kadagiti padatayo a tattao.

Idi naparegta a pakawanenna ti maysa a tao a nakaaramid iti bassit a biddut, kinuna ti maysa a babai: “Awan ti maikari iti panagregget a mamakawan.” Sibabatad, kasla nalamiis, awanan pannakipagrikna, naulpit pay ketdi, ti kasta a komento. Nupay kasta, no amirisentayo a naimbag, makitatayo nga ipalgak dayta ti pannakaupay a marikna dagiti adu a tattao no maipasangoda iti lubong a matmatanda a managimbubukod, awanan pannakaseknan, ken naulpit. Kinuna ti maysa a lalaki: “Gundawayandaka dagiti tattao no pakawanem ida. Kasla ar-aramidendaka a pagpigadan.”

Ngarud, di pakasdaawan a narigat a sukayen ti manangpakawan a kababalin kadagitoy maudi nga al-aldaw. Kaskasdi, paregtaennatay ti Biblia a siaasi a mamakawan. (Idiligyo ti 2 Corinto 2:7.) Apay a rumbeng a mamakawantayo?

[Footnote]