Isusubli ni Kristo

Kayuloganna: Sakbay a pinanawanna ti daga, ni Jesu-Kristo inkarina nga agsublinto. Dagiti nakaay-ayat a pasamak a nainaig iti Pagarian ti Dios isudat’ naitimpuyog iti dayta a kari. Paliiwenyo koma ta adda naggidiatan ti yaay ken ti kaadda. Idinto ta ti yaay (nainaig iti isasangpetna wenno isusublina) ti maysa a persona ket maangay sigun iti espesipiko a kanito, ti kaaddana kalpasanna ket saknapanna ti adu a tawtawen. Idiay Biblia ti Griego a sao nga erʹkho·mai (kayuloganna ti “umay”) nausar met a mangtukoy iti panangidirihir ni Jesus iti atensionna iti daydiay nasken a trabahona sigun iti espisipiko a kanito bayat ti kaaddana, nga isu, iti daydiay trabahona kas mammapatay a dinutokan ni Jehova inton gubat ti dakkel nga aldaw ti Dios a Mannakabalin-amin.

Dagidiay pasamak a naitimpuyog iti kaadda ni Kristo maangayda ngata bayat ti nakaab-ababa a kanito wenno bayat ti adu a tawtawen?

Mat. 24:37-39: “Kas kadagiti aldaw ni Noe, kastanto ti kaadda [“yaay,” RS, TEV; “kaadda,” Yg, Ro, ED; Griego: pa·rou·siʹa] toy Anak ti tao. Ta kas kadagiti aldaw a kasanguanan ti layus, addada a mangmangan ken umin-inum, dagiti lallaki mangas-asawa ket dagiti babbai makias-asawa, agingga iti aldaw ti iseserrek ni Noe idi daong; ket dida naawatan agingga ti yaay ti layus ket inyayusna ida amin, kastanto ti kaadda toy Anak ti tao.” (Dagiti pasamak “kadagiti aldaw ni Noe” a nadeskribir ditoy naangayda iti unos ti adu a tawtawen. Ni Jesus indiligna ti kaaddana kadagidiay napasamak idi ken Noe.)

Idiay Mateo 24:37 ti nausar isu ti Griego a sao a pa·rou·siʹa. Ti literal a kaipapananna isut’ “pannakisinnibay.” Ti Liddell and Scott’s Greek-English Lexicon (Londres, 1968) itdenna ti “kaadda, dagiti persona,” kas umuna a kayulogan ti pa·rou·siʹa. Ti sentido dayta a sao nabatad ti pannakaipasimudaagna idiay Filipos 2:12, a pinagdinnilig ni Pablo ti kaaddana (pa·rou·siʹa) ken ti kaawanna (a·pou·siʹa). Iti sabali a dasig, idiay Mateo 24:30, a dakamatenna a ti “Anak ti tao nga umay iti rabaw dagiti ulep ti langit nga adda pannakabalin ken dakkel a dayagna” kas mammapatay a dinutokan ni Jehova inton gubat ti Armagedon, nausar ti Griego a sao nga er·khoʹme·non. Dagiti dadduma a managipatarus usarenda ti sao a ‘yaay’ para kadagita a dua a Griego a sasao, ngem dagidiay naan-annad a managipatarus itedda ti naggidiatan dagita a dua.

Agsublinto ngata ni Kristo iti wagas a makita dagiti natauan a mata?

Juan 14:19: “Adda pay apagbassit ket ti lubong dinakto makitan, ngem dakayo [a matalek nga apostol ni Jesus] makitadakto, gapu ta agbiagak ket agbiagkayto met.” (Inkari ni Jesus kadagiti apostolna nga isu umayto manen ket alaennanto ida idiay langit a kaduana. Makitadanto ni Jesus gapu ta agbalindanto a naespirituan a parsua a kas kenkuana. Ngem ti lubong dinanto makitan ni Jesus. Idiligyo ti 1 Timoteo 6:16.)

Ara. 13:34: “Iti panamagungarna [ti Dios] kenkuana [ni Jesus] kadagiti natay tapno uray kaano saanen nga agrupsa.” (Dagiti natauan a bagi natural nga agrupsada. Daytat’ makagapu a ti 1 Corinto 15:42, 44 inusarna ti sao nga “agrupsa” a maitunos iti “linalasag a bagi.” Saanton a pulos a maaddaan ni Jesus iti kasta a bagi.)

Juan 6:51: “Siak ti tinapay a sibibiag a bimmaba nanipud langit; no adda mangan itoy a tinapay agbiagto nga agnanayon; ket, kinapudnona, ti tinapay nga itdekto a pakabiagan ti lubong isu ti lasagko.” (Gapu ta intedna daytan, saanen a subliento manen ni Jesus. Dina ngarud ikapis ti sangatauan kadagiti benepisio ti naidaton a perpekto a natauan a biagna.)

Kitaenyo met ti panid 347, 348, iti paulo a “Rapture.”

Aniat’ kaipapanan ti yaay ni Jesus “iti kasta met a wagas” a kas iti panagpalangitna?

Ara. 1:9-11: “Naipangato a kitkitaen [dagiti apostol ni Jesus], ket isu inawat ti maysa nga ulep ket dida makitan. Ket idi a kitkitaenda ti tangatang bayat ti ingangatona, adtoy! dagiti dua a lallaki a nagtakder iti dinnada a nagkawes ti puraw, isuda a nagkuna met: ‘Lallaki a taga Galilea, apay agtaktakderkayo a kumitkita iti tangatang? Daytoy Jesus a naipangato sadi tangatang nanipud kadakayo iti kasta met a wagas umayto a kas ti pannakakitayo nga ipapanna idiay tangatang.’” (Paliiwenyo ta kunaen daytoy nga “iti kasta met a wagas,” saan nga iti kasta met a bagi. Ania ti “wagas” ti iyuulina? Kas ipakita ti bersikulo 9, isu sipapardas a nagpukaw idi kitkitaenda. Ti lubong a sapasap saanna a napuotan ti napasamak. Kasta met no iti isusubli ni Kristo.)

Aniat’ kaipapanan ti ‘yaayna a buyogen ti ul-ulep’ ken ‘makitanto dagiti isuamin a mata’?

Apoc. 1:7: “Adtoy! Isu umay a buyogen ti ul-ulep ket makitanto ti isuamin a matmata, ken dagidi nangduyok kenkuana; ket dagiti isuamin a tribo ditoy daga agdung-awdanto gapu kenkuana.” (Kasta met ti Mateo 24:30; Marcos 13:26; Lucas 21:27)

Aniat’ ipasimudaag ti “ul-ulep”? Di pannakakita. No ti eroplano ket adda idiay napuskol nga ulep wenno iti rabaw ti ul-ulep, dagidiay adda ditoy daga didan makita dayta, nupay mangngegda ti daranudor ti makinana. Kinuna ni Jehova ken Moises: “Umayak kenka iti napuskol nga ulep.” Ni Moises dina nakita idi ti Dios, ngem dayta nga ulep impasimudaagna ti di makita a kaadda ni Jehova. (Ex. 19:9; kitaenyo met ti Levitico 16:2; Numeros 11:25.) No agparang ni Kristo idiay langit, nabatad nga isu di makita ti “isuamin a matmata.” No isu ket agparang iti ngatuen ti Australia, kas pangarigan, isu dinto makita idiay Europa, Africa, ken America, di ngamin?

Kasano nga isu ket makita ti “isuamin a matmata”? Malasindanto gapu kadagiti mapaspasamak ditoy daga nga isu ket addan nupay isut’ di makita. Kas panangtukoyna met iti pannakakita nupay saan a pisikal dayta, ireport ti Juan 9:41: “Kinuna ni Jesus [kadagiti Pariseo]: ‘No bulsekkay koma, awan koma ti basolyo. Ngem ita kunayo, “Makakitakami.” Ti basolyo mataginayon.’” (Idiligyo ti Roma 1:20.) Kas panangpaspasungadda iti isusubli ni Kristo, dagiti dadduma adda pammatida; mabigbigda ti pagilasinan ti kaaddana. Dagiti dadduma laksidenda dagiti agdama nga ebidensia, ngem inton agtignayen ni Kristo kas tinudingan ti Dios a mangikisap kadagiti nadangkes, uray isuda malasindanton gaput’ pannakaiparangarang ti pannakabalinna a ti pannakadadaelda saan a tao no di ket langit ti naggapuanna. Maawatandanto ti mapaspasamak yantangay napakdaarandan nga immun-una. Gapu ta kastantot’ rigatda, “agdung-awdanto.”

Siasino “dagidi nangduyok kenkuana”? Soldado a Romano dagidi talaga a nangduyok kenkuana idi kanito a pannakapapatay ni Jesus. Ngem nabayagdan a natay dagidi. Gapuna masapul a ti tuktukoyenna ditoy isu dagidiay mangirurumen, wenno ‘mangduyduyok,’ kadagiti pudno a pasurot ni Kristo kadagitoy “maudi nga aldaw.”—Mat. 25:40, 45.

Talaga kadi a makuna a ti maysa ket ‘immay’ wenno isu ket ‘addan’ uray no isu ket di met makita?

Ni apostol Pablo imbagana nga isu ket ‘awan iti bagi ngem adda iti espiritu’ no iti daydiay kongregasion sadi Corinto.—1 Cor. 5:3.

Nadakamat ni Jehova ti ‘yuulogna’ a mangriribuk ti lenguahe dagidi nangbangon iti torre ti Babel. (Gen. 11:7) Kinunana pay nga ‘umulogto’ a mangispal iti Israel manipud pannakaadipen idiay Egipto. Ket impasigurado ti Dios ken Moises, “Bimmabaakon” a mangidalan iti Israel idiay Naikari a Daga. (Ex. 3:8; 33:14) Ngem awan tao a nakakita iti Dios.—Ex. 33:20; Juan 1:18.

Ania ti sumagmamano a pasamak nga innaig ti Biblia iti kaadda ni Kristo?

Dan. 7:13, 14: “Immay babaen iti ul-ulep ti langit ti maysa a kasla anak ti tao [ni Jesu-Kristo]; ket dimteng iti Dati a Lakay [ni Jehova a Dios], ket isu inyasidegda iti saklangna. Ket isu naikkan iti panagturay ken dayag ken pagarian, tapno amin nga il-ili, nasnasion ken pagsasao agserbida koma kenkuana.”

1 Tes. 4:15, 16: “Daytoy ti ibagami kadakayo babaen ti sao ni Jehova, a datayo a sibibiag nga agbati agingga iti kaadda ti Apo saantayonto nga unaan dagiti naturogen ken patay; ta ti Apo met laeng aggapunto sadi langit a buyogen ti mangbilin nga awag, ti timek ti arkanghel ken ti trompeta ti Dios, ket dagiti natay ken Kristo bumangondanto nga umuna.” (No kasta, dagidiay makipagarinto ken Kristo mapagungardanto a kaduana idiay langit—umuna dagidiay natay bayat ti tawtawen a naglabas sa sumaruno dagidiay natay bayat ti isusubli ti Apo.)

Mat. 25:31-33: “Intono ti Anak ti tao umayto agraman iti dayagna, ken amin dagiti anghel maikuyog kenkuana, isu ti panagtugawnanto iti nadayag a tronona. Ket iti sanguananna maurnongto dagiti isuamin a nasion, ket paglalasinennanto dagiti maysa ken maysa, a kas iti pastor ilasinna dagiti karnero kadagiti kalding. Ket isaadnanto dagiti karnero iti makanawanna, ket dagiti kalding iti makatigidna.”

2 Tes. 1:7-9: “Dakayo a maparparigat, aginanakayo a mairaman kadakami intono maiparangarang ni Apo Jesus nga aggapu sadi langit agraman kadagiti anghelna kadagiti darang ti apuy, a balsenna dagiti saan a mangammo iti Dios ken di agtulnog iti naimbag a damag ni Apotayo a Jesus. Isuda madusadanto iti agnanayon a pannakapukaw a maisinada iti sanguanan ti Apo ken ti dayag ti pannakabalinna.”

Luc. 23:42, 43: “[Daydi mannakaawat a managbasol a kadua ni Jesus a naibitin] kinunana: ‘Jesus, laglagipennak inton umayka iti pagariam.’ Ket kinunana kenkuana: ‘Pudno kunak kenka ita nga aldaw, Makipagiankanto kaniak idiay Paraiso.’” (Iti sidong ti panangituray ni Jesus, ti intero a daga agbalinton a paraiso; dagiti natay nga adda iti lagip ti Dios agungardanto a buyogen ti gundaway a mangtagiragsak iti perpekto a panagbiag ditoy daga iti agnanayon.)

Kitaenyo pay ti panid 224-229, iti paulo a “Dagiti Maudi nga Aldaw.”