No Apay a Mayanak a Mabaliwan Dagiti Dadduma

“NO TI maysa a tao saan a mayanak a mabaliwan, saanna a makita ti pagarian ti Dios.” (Juan 3:3) Adu a tao ti agpadpada a pinaggagar ken binurburtia dagidiay a sasao nanipud insawang ida ni Jesu-Kristo nasurok a 1,900 a tawenen ti napalabas.

Tapno umiso a maawatantayo dagiti sasao ni Jesus maipapan iti pannakayanak a mabaliwan, masapul a sungbatantayo nga umuna dagiti saludsod nga: Aniat’ panggep ti Dios agpaay iti sangatauan? Aniat’ mapasamak iti kararua iti ipapatay? Aniat’ nairanta nga aramiden ti Pagarian ti Dios?

Ti Panggep ti Dios agpaay iti Sangatauan

Naparsua ti immuna a tao, ni Adan, kas maysa a perpekto a natauan nga anak ti Dios. (Lucas 3:38) Di pulos pinanggep ni Jehova a Dios a matay ni Adan. Addaan idi ni Adan ken ti asawana, ni Eva, iti gundaway a mangpataud iti awanan basol a natauan a pamilia nga agbiag nga agnanayon ken mangpunno iti paraiso a daga. (Genesis 1:28) Saan a paset iti orihinal a panggep ti Dios ti ipapatay agpaay iti lalaki ken babai. Simrek laeng dayta iti sangatauan kas resulta ti iyaalsa iti linteg ti Dios.​—Genesis 2:15-17; 3:17-19.

Nangpataud daytoy nga iyaalsa kadagiti dakkel a moral nga isyu, kas ti kinalinteg ti kinasoberano ti Dios ken ti kabaelan dagiti tao nga agtalinaed a matalek kadagiti lintegna. Kasapulan ti panawen tapno ibanag dagitoy nga isyu. Ngem di nagbaliw ti panggep ni Jehova a Dios agpaay iti sangatauan, ken di mapaay iti inrugina nga aramiden. Naan-anay a panggepna a punnuen ti daga iti perpekto a natauan a pamilia a mangtagiragsakto iti biag nga agnanayon iti Paraiso. (Salmo 37:29; 104:5; Isaias 45:18; Lucas 23:43) Nasken a sipapanunottayo iti daytoy pamunganayan a kinapudno no usigentayo dagiti sasao ni Jesus maipapan iti pannakayanak a mabaliwan.

Aniat’ Mapasamak iti Kararua iti Ipapatay?

Gapu ta dida ammo no ania ti impalgak ti nasantuan nga espiritu ti Dios kadagiti mannurat ti Biblia, inkagumaan dagiti pilosopo a Griego ti nangbiruk iti kaipapanan ti biag. Dida mamati a nairanta ti tao nga agbiag iti sumagmamano laeng a tawen, a masansan iti nakay-ay-ay a kasasaad, ket kalpasanna agpatinggan ti kaaddana. Umisoda iti daytoy. Ngem iti konklusionda maipapan iti kasasaad ti tao kalpasan ti ipapatay, nagbiddutda. Patienda nga adda sabali a biag ti tao kalpasan ti ipapatay, nga iti uneg ti tunggal tao adda di matay a kararua.

Naimpluensiaan dagiti Judio ken dagiti agkunkuna a Kristiano kadagita a pammati. Kunaen ti libro a Heaven​—A History: “Tunggal agsabat dagiti naiwaras-waras a Judio ken dagiti managpanunot a Griego, lumtuad ti idea ti di matay a kararua.” Inayon ti libro: “Napaut ti impluensia dagiti doktrina dagiti Griego maipapan iti kararua kadagiti pammati dagiti Judio ken Kristiano. . . . Babaen ti panangpartuat iti naisangsangayan a kombinasion ti Platoniko a pilosopia ken tradision ti Biblia, linuktan ni Philo [maysa nga umuna-siglo a pilosopo a Judio iti Alexandria] ti dalan agpaay kadagiti naud-udi a managpanunot a Kristiano.”

Aniat’ pinati ni Philo? Ituloy dayta met la a libro: “Para kenkuana, ti patay isublina ti kararua iti sigud, sakbay-pannakayanak a kasasaadna. Yantangay para iti lubong dagiti espiritu ti kararua, ti biag iti bagi ket maysa laeng nga apagbiit, masansan a daksanggasat, a pagteng.” Nupay kasta, ti “sakbay-pannakayanak a kasasaad” ni Adan ket kinaawan. Sigun iti salaysay ti Biblia, pulos a di pinanggep ti Dios ti automatiko nga iyaallatiw iti sabali a lubong iti ipapatay, a kas ket tay ti daga maysa laeng a pagtalaytayan iti natantan-ok wenno nababbaba a biag.

Saan nga isursuro ti impaltiing-espiritu a Sao ti Dios, ti Biblia, ti pammati a di matay ti kararua ti tao. Pulos a dina usaren ti termino a “di matay a kararua.” Kunaenna a naparsua ni Adan kas maysa a kararua, a saan ket nga addaan iti kararua. Kunaen ti Genesis 2:7: “Ni Jehova a Dios binukelna ti tao iti tapuk ti daga ket impuyotna iti agongna ti anges ti biag, ket ti tao nagbalin a kararua a sibibiag.” Pulos a di naipasango ti sangatauan iti gundaway nga agbiag nga agnanayon idiay langit wenno iti pannusa nga agnanayon a panagtutuok iti umap-apuy nga impierno. Ipakita ti Biblia a ti matay a kararua, wenno persona, awan puotna. (Salmo 146:3, 4; Eclesiastes 9:5, 10; Ezequiel 18:4) Gapuna, di nainkasuratan dagiti kapanunotan dagiti pilosopo maipapan iti kararua. Nasken nga agaluadtayo kadagiti makaallilaw nga idea a mangkullaap iti pannakaawattayo kadagiti sasao ni Jesus maipapan iti pannakayanak a mabaliwan.

Mayanak a Mabaliwan tapno Agturay kas Ar-ari

Kinuna ni Jesus ken ni Nicodemo a dagidiay “mayanak a mabaliwan . . . sumrekda iti pagarian ti Dios.” (Juan 3:3-5) Ania dayta a Pagarian? Iti simboliko a sasao iti karrugi ti historia ti tao, impakaammo ni Jehova a Dios ti panggepna a mangaramat iti naisangsangayan a “bin-i”​—maysa a mapasungad nga agturay​—a mangpis-it iti ulo ti orihinal nga uleg, ni Satanas a Diablo. (Genesis 3:15; Apocalipsis 12:9) Kas in-inut a naipalgak iti Kasuratan, daytoy a “bin-i” isu ni Jesu-Kristo, nga agturay a kaduana dagiti dadduma iti naisangsangayan nga ebkas ti kinasoberano ti Dios, ti Mesianiko a Pagarian. (Salmo 2:8, 9; Isaias 9:6, 7; Daniel 2:44; 7:13, 14) Isu daytoy ti Pagarian ti langit, maysa a gobierno kadagiti langlangit a mangalangon iti kinasoberano ni Jehova ken mangispal iti sangatauan manipud pannakaadipen iti basol ken ipapatay.​—Mateo 6:9, 10.

Dagiti kadua ni Jesus nga agturay isu dagiti 144,000 a nagatang manipud sangatauan. (Apocalipsis 5:9, 10; 14:1-4) Nangpili ti Dios ti sumagmamano manipud iti imperpekto a natauan a pamilia ni Adan tapno agbalinda a dagitay “sasanto ti Kangatuan,” nga agturay a kadua ni Kristo iti Mesianiko a Pagarian. (Daniel 7:27; 1 Corinto 6:2; Apocalipsis 3:21; 20:6) Addaan dagitoy a lallaki ken babbai iti pammati ken ni Jesu-Kristo, a nangikuna a ‘mayanakda a mabaliwan.’ (Juan 3:5-7) Kasano ken apay a mapasamak daytoy a pannakayanak?

Nabautisaran dagitoy nga indibidual iti danum kas pasurot ni Kristo. Pinakawan ti Dios dagiti basolda maibatay iti daton a subbot ni Jesus, indeklarana ida a nalinteg, ken imbilangna ida kas naespirituan nga annak. (Roma 3:23-26; 5:12-21; Colosas 1:13, 14) Kadakuada, kunaen ni apostol Pablo: “Inawatyo ti espiritu ti pannakaibilang nga annak, a babaen dayta nga espiritu umawagtayo: ‘Abba, Ama!’ Ti espiritu met laeng paneknekanna kadagiti espiritutayo a datayo annaknatayo ti Dios. No ngarud, annaktayo, agtawidtayo met: agtawid iti Dios, ngem makipagtawid ken Kristo, no la ket ta makipagsagabatayo kenkuana iti kasta makipaggloriatayo met kenkuana.”​—Roma 8:15-17.

Kas pasurot ni Kristo, addaan dagitoy iti baro a pannakayanak, wenno baro a panagrugi, iti biag. Resulta dayta ti natibker a pammati a makiramanda iti nailangitan a tawid ni Jesus. (Lucas 12:32; 22:28-30; 1 Pedro 1:23) Inladawan ni apostol Pedro ti pannakayanak a mabaliwan iti kastoy a pamay-an: “Mayalubog iti dakkel nga asina [ti Dios] binaliwannatay nga inyanak a maipaay iti maysa nga inanama a sibibiag gapu iti panagungar ni Jesu-Kristo kadagiti natay, a maipaay iti maysa a tawid a di agrupsa ken awan tulawna ken saan nga agkupas. Dayta naidulin sadi langit a maipaay kadakayo.” (1 Pedro 1:3, 4) Posible daytoy baro a biag idiay langit agpaay kadagita nga indibidual ngamin pagungaren ida ti Dios a kas ti panangpagungarna ken ni Jesus.​—1 Corinto 15:42-49.

Komusta met ngay ti Daga?

Di kayat a sawen daytoy nga amin a natulnog a sangatauan mayanakdanto a mabaliwan tapno mapanda idiay langit manipud daga. Umarngi dayta a di umiso a kapanunotan iti daydi insuro dagiti pilosopo a kas ken Philo, a nangipagarup a ti “biag iti bagi [ket] maysa laeng nga apagbiit, masansan a daksanggasat, a pagteng.” Ngem awan a pulos ti pakapilawan ti orihinal a naindagaan a parsua ni Jehova a Dios.​—Genesis 1:31; Deuteronomio 32:4.

Nikaanoman a nairanta ti biag ti tao nga apagbiit ken naut-ot. Ikkatento ni Jesu-Kristo ken dagidiay mayanak a mabaliwan kas ar-ari ken papadi a kaduana idiay langit amin a makadangran a nagbanagan ti iyaalsa ni Satanas. (Efeso 1:8-10) Babaen kadakuada kas ti naikari a ‘bin-i ni Abraham,’ “mabendisionanto isuamin dagiti nasion ti daga.” (Galacia 3:29; Genesis 22:18) Para iti natulnog a sangatauan, kaipapanan daytoy ti biag iti paraiso a daga, nga adayo a naiduma manipud iti apagbiit, naut-ot a biag ita.​—Salmo 37:11, 29; Apocalipsis 21:1-4.

Asinonto ti Magunggonaan?

Karaman kadagiti magunggonaan iti probision ti Dios maipaay iti pakabendisionan ti sangatauan isu dagidiay mapagungar a natay a mangalagad iti pammati iti daton a subbot ni Jesus. (Juan 5:28, 29; Aramid 24:15) Kaaduan kadakuada ti pulos a di nakaammo maipapan iti Dios ken ni Kristo ket ngarud dida naipakita ti pammati ken Jesus. Kabilangto met kadagidiay a mapagungar dagiti matalek a tattao a kas ken ni Juan a Mammautisar, a natay sakbay a linuktan ti ipapatay ni Jesus ti dalan iti nailangitan a biag. (Mateo 11:11) Malaksid kadagitoy, ‘maysa a dakkel nga umariwekwek a naggapu kadagiti amin a nasion ti binugguanda dagiti pagan-anayda ket pinapurawda ida iti dara ti Kordero,’ ni Jesu-Kristo. Sipapaborable nga ipangagda ti trabaho a panangikaskasaba ti Pagarian nga idadauluan ita dagiti nayanak-a-nabaliwan a “kakabsat” ni Jesus ken malasatandanto ti gubat ti Dios iti Armagedon tapno agbiagda iti nadalusan a daga. (Apocalipsis 7:9-14; 16:14-16; Mateo 24:14; 25:31-46) Gapuna, iti urnos ti Dios, riniwriw ti maisalakan, nupay saanda a mayanak a mabaliwan nga agturay a kadua ni Kristo kadagiti langlangit.​—1 Juan 2:1, 2.

Maysakayto aya kadagidiay agtawid iti biag iti paraiso a daga? Mabalin no alagadenyo ti pammati iti daton ni Jesu-Kristo ken siaaktibo a makitimpuyogkayo iti pudno a kongregasion Kristiano. Saan a namulitan dayta kadagiti pilosopia no di ket nagtalinaed nga “adigi ken sadiri ti kinapudno.” (1 Timoteo 3:15; idiligyo ti Juan 4:24; 8:31, 32.) Iti kasta mabalinyo ti kumita iti nakaskasdaaw a masanguanan inton agturayen dagiti nayanak-a-nabaliwan nga annak ti Dios sadi langit ket amin a naindagaan nga annak ti Dios maisublida iti kinaperpekto iti nakaskasdaaw a paraiso a daga. Isu a petpetanyo ti gundawayyo maipaay iti biag iti dayta baro a lubong iti agnanayon a bendision.​—Roma 8:19-21; 2 Pedro 3:13.

[Ladawan iti panid 6]

Pulos a di napagpili ni Adan iti biag idiay langit wenno agnanayon a panagtutuok iti umap-apuy nga impierno