Siasino Dagiti Sumursurot iti Silaw ti Lubong?

“Aglawagkayo a kasla silsilaw iti lubong.”​—FILIPOS 2:15.

 1. Aniat’ kunaen ti Biblia maipapan kadagiti ulbod a narelihiusuan a silaw?

SILALAWAG nga ipabigbig ti Biblia ni Jesus kas maysa a “dakkel a lawag,” “ti silaw ti lubong.” (Isaias 9:2; Juan 8:12) Ngem, mammano laeng ti simmurot kenkuana idi adda ditoy daga. Pinili ti kaaduan a suroten dagiti ulbod a silaw, nga iti kinapudnona, agaw-awitda iti kinasipnget. Maipapan kadagitoy kunaen ti Sao ti Dios: “Ta sinan apostol dagita, managsiksikapda, nga agparangda a kakasla apostol ni Kristo. Ket saan a nakaskasdaaw, ta uray ni Satanas agbalin a kasla anghel ti lawag. Saan ngarud a pakasdaawan a dagiti ministrona agparangda a kakasla ministro ti kinalinteg. Ngem ti panungpalanda maiyannurotto kadagiti aramidda.”​—2 Corinto 11:13-15.

 2. Aniat’ imbaga ni Jesus a pakaukoman dagiti tao?

² No kasta, saan a kayat dagiti amin a tao ti lawag, uray no nakaskasdaaw dayta. Kinuna ni Jesus: “Daytoy ti pakaukoman, ta ti silaw immay iti lubong ngem dagiti tao inayatda ti sipnget a nangnangruna ngem ti lawag, ta dakes idi dagiti aramidda. Ta ti agaramid ti dakes, guraenna ti lawag ket saan nga umay iti lawag, di la ket ta dagiti aramidna mababalaw.”​—Juan 3:19, 20.

Dagiti Managayat iti Sipnget

 3, 4. Kasano nga impakita dagiti relihiuso a papangulo idi kaaldawan ni Jesus a dida kayat a suroten ti silaw?

³ Usigenyo no kasano a pudno dayta idi adda ni Jesus ditoy daga. Inikkan ti Dios ni Jesus iti pannakabalin nga agaramid kadagiti datdatlag a mangpaneknek nga isu ti Mesias. Kas pangarigan, iti aldaw a Panaginana, insublina ti panagkita ti maysa a lalaki a nayanak a bulsek. Anian a nakaskasdaaw nga ebkas ti asi! Napalalot’ panagyaman ti lalaki! Makakitan! Ngem, aniat’ reaksion dagiti relihiuso a papangulo? Kuna ti Juan 9:16: “Dadduma kadagiti Fariseo kinunada [maipapan ken Jesus]: ‘Daytoy a tao saan a naggapu iti Dios, ta saanna a ngilinen ti aldaw a Panaginana.’” Nagdakes ketdin ti panagpuspusoda! Adtoy, maysa a nakaskasdaaw a panangpaimbag ti napasamak, ngem imbes a makipagrag-oda koma iti dati a bulsek ken agyaman iti mangngagas, kinondenarda ketdi ni Jesus! Iti panangaramidda ti kasta, awan duadua a nagbasolda iti pannakaiparangarang ti nasantuan nga espiritu ti Dios, basol a di mapakawan.​—Mateo 12:31, 32.

⁴ Iti saan a mabayag, idi pinagsaludsodan dagidiay a managinsisingpet ti naimbagan a bulsek maipapan ken Jesus, kinuna ti lalaki: “Adtoy ti nakaskasdaaw a banag, a dikay ammo no adino ti naggapuanna [ni Jesus], ket idinto a linuktanna pay dagiti matak. Ammotayo a ti Dios dina ipangag dagiti managbasol, ngem no adda managdayaw iti Dios ket aramidenna ti pagayatanna, isu ti denggenna. Nanipud idi panangrugi ti lubong awan pay nangngegan a nanglukat kadagiti mata ti maysa a tao a nayanak a bulsek. No daytoy a tao [ni Jesus] saan koma a naggapu iti Dios, awan koma ti mabalinna nga inaramid.” Kasanot’ isusungbat dagiti relihiuso a papangulo? “Simmungbatda ket kinunada kenkuana: ‘Naigamer iti basol ti pannakabukelmo, ket isuronakami?’ Ket pinaruarda!” Anian a kinaawan asi! Bimmato dagiti pusoda. Isut’ gapuna nga imbaga kadakuada ni Jesus a nupay makakitada, bulsekda iti naespirituan.​—Juan 9:30-41.

 5, 6. Ania ti inaramid dagiti relihiuso a papangulo idi umuna a siglo a mangipakita nga inayatda ti sipnget?

⁵ A talaga nga agbasbasol iti espiritu ti Dios dagitoy relihiuso a managinsisingpet ket nalaka a makita iti sabali pay a gundaway, idi pinagungar ni Jesus ni Lazaro kadagiti natay. Gapu iti dayta a milagro, adu ti namati ken Jesus. Ngem, paliiwenyo ti inaramid dagiti relihiuso a papangulo. “Dagiti kangatuan a papadi ken dagiti Fariseo inurnongda ti Sanhedrin ket kinunada: ‘Ania ti aramidentayo, ta daytoy a tao agaramid kadagiti adu a pagilasinan? No baybay-antayo laeng, mamatinto amin dagiti tao kenkuana, ket umayto dagiti taga Roma ket ikkatendanto ti saadtayo ken ti ili pay.’” (Juan 11:47, 48) Pagdanaganda dagiti saad ken kinatan-okda. Uray aniat’ mapasamak, kayatda nga ay-ayuen dagiti taga Roma, saan a ti Dios? Gapuna, aniat’ inaramidda? “Nanipud ngarud idi nga aldaw ninumoda a papatayen [ni Jesus].”​—Juan 11:53.

⁶ Agingga la dita aya? Saan. Ti sumaganad nga inaramidda ipakitana ti dakkel a panagayatda iti kinasipnget: “Ninumo dagiti kangatuan a papadi a papatayenda met ni Lazaro, ta gapu kenkuana adu ti simmina kadagiti Judio ket namati ken Jesus.” (Juan 12:10, 11) Nalabes ti kinadakesda! Nupay inaramidda amin daytoy tapno salakniban dagiti saadda, aniat’ napasamak? Iti dayta met laeng a kaputotan, immalsada kadagiti Romano, a rimmaut kadakuada idi 70 K.P. ken nangpukaw ti saadda, ti ilida, agraman ti biagda!​—Isaias 5:20; Lucas 19:41-44.

Ti Asi ni Jesus

 7. Apay a simmurot ken Jesus dagiti mangipatpateg iti kinapudno?

⁷ Kasta met iti panawentayo, adu ti madi a malawlawagan iti naespirituan. Ngem dagidiay agayat iti kinapudno sitatallugodda nga umay iti lawag. Kayatda a ti Dios ti agbalin a Soberanoda, ken madadaanda nga agbaw-ing ken Jesus, nga imbaon ti Dios a mangilawlawag no ania ti lawag, ken sumurot kenkuana. Kasta ti inaramid dagiti napakumbaba a tattao idi adda ni Jesus ditoy daga. Simmurotda kenkuana. Uray dagiti Fariseo aminenda dayta. Inreklamoda: “Ti sangalubongan napan simmurot kenkuana.” (Juan 12:19) Dagiti marakarnero a tattao inayatda ni Jesus ta isut’ kasungani dagiti agimbubukod, natangsit, mabisin iti pannakabalin a relihiuso a papangulo, a maipapan kadakuada kinuna ni Jesus: “Mangreppetda kadagiti awit a nadagsen ken narigat nga awiten ket ipabaklayda kadagiti tao, ngem isuda dida kayat a garawen kadagiti ramayda. Ngem amin dagiti aramidda aramidenda tapno makita dagiti tao.”​—Mateo 23:4, 5.

 8. Maigiddiat kadagiti relihiuso a managinsisingpet, ania a kababalin ti impakita ni Jesus?

⁸ Maigiddiat iti dayta, paliiwenyo ti naasi a kababalin ni Jesus: “Idi nakitana dagiti adu unay a tattao simnek ti asina kadakuada, gapu ta nalidayda ken nawarawarada a kasda la karkarnero nga awan ti pastorda.” (Mateo 9:36) Ket ania ngay ti inaramidna? Kinunana kadagidiay pinarparigat ti sistema ni Satanas: “Umaykayo kaniak, dakayo amin nga agrigrigat ken madagdagsenan, ket paginanaenkayto. Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana a maipaay kadagiti kararuayo. Ta ti sangolko nalaka ken nalag-an ti awitko.” (Mateo 11:28-30) Tinungpal ni Jesus ti naipadto maipapan kenkuana idiay Isaias 61:1, 2, a kunana: “Ni Jehova pinulotannak a mangikasaba kadagiti naimbag a damag kadagiti naemma. Imbaonnak a mamatapat iti puso a nadunor, a mangiwaragawag iti wayawaya kadagiti nakayawan, ken ti pannakaluk-at kadagiti nabalud; a mangiwaragawag iti tawen ti parabur ni Jehova ken ti aldaw ti ibabales ti Diostayo; a mangliwliwa iti amin nga agdung-aw.”

Panangurnong Kadagiti Managawit iti Lawag

 9. Ania dagiti napateg a pasamak a naaramid idi 1914?

⁹ Kalpasan ti iyuulina sadi langit, nagur-uray ni Jesus agingga iti tiempo a panangipaay ti Dios kenkuana iti pannakabalin ti Pagarian. Kalpasanna, ilasinna dagiti “karnero” manipud kadagiti “kalding.” (Mateo 25:31-33; Salmo 110:1, 2) Dimteng dayta a tiempo iti panangrugi ti “maudi nga al-aldaw” idi 1914. (2 Timoteo 3:1-5) Kas naisaad nga Ari iti nailangitan a Pagarian ti Dios, rinugian ni Jesus nga urnongen iti makanawan ti paborna dagidiay mayat a sumurot iti silaw. Kalpasan ti Gubat Sangalubongan I, nangrugi ti trabaho a panagurnong nga agpatpatuloy a rumangrang-ay.

10. Ania a saludsod ti rumsua maipapan kadagidiay us-usaren ni Jesus iti trabaho a panagurnong?

¹⁰ Iti panangidaulo ni Kristo Jesus, naballigi unay ti trabaho a panagurnong. Awan pay kasta kaadu a tattao iti historia a naggapu kadagiti amin a nasion a maur-urnong iti nalawlawagan a pudno a panagdaydayaw. Ket siasino ita dagiti sumursurot iti lawag nga aggapu iti Dios ken ni Kristo? Siasino dagiti mangtungtungpal iti kunaen ti Filipos 2:15 nga, “aglawagkayo a kasla silsilaw iti lubong,” a mangaw-awis kadagiti sabsabali nga ‘umay ken umawat iti libre a danum ti biag’?​—Apocalipsis 22:17.

11. Aniat’ kasasaad ti Kakristianuan no maipapan iti naespirituan a silaw?

¹¹ Ar-aramiden aya ti Kakristianuan dayta? Awan duadua a saan nga aglawlawag a kas silaw ti Kakristianuan, a buklen dagiti nasinasina a relihion. Kinapudnona, kapadpada dagiti klero dagiti relihiuso a papangulo idi kaaldawan ni Jesus. Saanda nga isilsilnag ti pudno a lawag nga aggapu iti Dios ken ni Kristo. Tallopulo ket tallo a tawenen ti napalabas, kinuna ti magasin a Theology Today: “Nakababain nga annugoten a saan nga agranraniag iti kasta unay daytoy a lawag iti Simbaan. . . . Ad-adda a nagbalinen ti Simbaan a kas kadagiti komunidad iti aglawlawna. Saan nga agserserbi a silaw ti lubong no di ket isilsilnagna dagiti lawag nga agranraniag iti lubong a mismo.” Dakdakes ita ti kasasaad ti Kakristianuan. Ti makunkuna a lawag manipud lubong nga isilsilnagna ket iti kinapudnona kinasipnget ta dayta laeng ti maitukon ni Satanas ken ti lubongna. Wen, awan lawag ti kinapudno nga agtaud kadagiti agsusupadi ken naan-anay a nailubongan a relrelihion ti Kakristianuan.

12. Siasino dagiti mangbukel ti pudno nga agaw-awit iti lawag nga organisasion ita?

¹² Maikunatay a sipapasnek a ti baro a lubong a sosiedad dagiti Saksi ni Jehova ti pudno, agaw-awit iti lawag nga organisasion ita. Amin a miembrona​—lallaki, babbai, ken ubbing​—sangsangkamaysa a pagsilsilnagenda ti lawagda nga aggapu ken Jehova ken ni Kristo iti amin a sangatauan. Itay kallabes a tawen, iti agarup 70,000 a kongregasion dagiti Saksi ni Jehova iti intero a lubong, nasurok nga uppat a milion a managawit iti lawag ti siaaktibo a nangisarita kadagiti sabsabali maipapan iti Dios ken iti pangpanggepna. Ket itan kada tawen, makitkitatayo ti agtultuloy a pannakaurnong ti nakaad-adu a tattao a mayat met a malawlawagan iti naespirituan. Ginasut a ribo ti mababautisaran kalpasan ti panagadalda iti Biblia ken pannakagun-odda iti umiso a pannakaammo ti kinapudno. Pudno unay, ‘pagayatan [ti Dios] nga isuamin a kita dagiti tao maisalakanda koma ken dumtengda iti umiso a pannakaammo ti kinapudno.”​—1 Timoteo 2:4.

13. Iti ania a maiyarigtayo ti lawag manipud ken Jehova?

¹³ Maiyarigtay ti pannakalawlawag ita manipud ken Jehova iti napasamak idi pinanawan ti ili ti Dios ti Egipto idi ugma: “Ni Jehova nagna iti sangoda iti maysa a monmon nga ulep a mangiturong kadakuada iti dalan, ket no iti rabii iti maysa a monmon nga apuy tapno lawaganna ida, tapno makapagnada iti aldaw ken iti rabii.” (Exodo 13:21, 22) Mapangnamnamaan a bagnos ti ulep iti aldaw ken ti apuy iti rabii a naggapu iti Dios. Mapangnamnamaan dagitoy a kas ti init a pinarsua ti Dios a manglawag kadatayo iti aldaw. Kasta met, makapagpannuraytay ken Jehova nga itultuloyna a silawan iti naespirituan ti dalan para kadagiti agsapsapul ti kinapudno kadagitoy dakes a maudi nga al-aldaw. Ipanamnama kadatayo ti Proverbio 4:18: “Ti dana ti nalinteg kas iti anaraar ti agsapa, a rumaniag a rumaniag agingga iti napaypayso nga aldaw.”

Panangisilnag iti Lawag ti Pagarian

14. Aniat’ rebbeng a kangrunaan a panggep dagiti managawit iti lawag?

¹⁴ No kasano a ni Jehova ti Gubuayan ti lawag, ket ni Kristo ti Kangrunaan a Manangisilnag iti dayta a lawag, dagiti pasurot ni Jesus masapul nga isilnagda met daytoy. Kinunana maipapan kadakuada: “Dakayo ti silaw ti lubong. . . . Kasta koma ti panaglawag ti silawyo iti sanguanan dagiti tao, tapno makitada dagiti naimbag nga aramidyo ket dayawenda koma ni Amayo nga adda sadi langit.” (Mateo 5:14, 16) Ket aniat’ kangrunaan a tema daytoy a lawag nga isilnag dagiti pasurotna iti sangatauan? Aniat’ isuroda iti daytoy kangitingitan ti historia ti lubong? Di imbaga ni Jesus nga ikasaba dagiti pasurotna ti demokrasia, kinadiktador, panagtipon ti Simbaan ken ti Estado, wenno dadduma pay a nailubongan nga ideolohia. Imbes ketdi, idiay Mateo 24:14 impadtona nga iti sango ti sangalubongan nga ibubusor, “daytoy naimbag a damag ti pagarian maikaskasabanto iti amin a mapagnaedan a daga tapno mangpaneknek kadagiti isuamin a nasion, ket iti kasta umayton ti panungpalan.” No kasta, ibaga dagiti managawit iti lawag ita kadagiti dadduma ti maipapan iti Pagarian ti Dios, a manggibusto iti lubong ni Satanas ken mangyeg iti nalinteg a baro a lubong.​—1 Pedro 2:9.

15. Sadino ti pagbaw-ingan dagidiay agayat iti lawag?

¹⁵ Saan a paikapis dagidiay agayat iti lawag kadagiti sasao ken kalat daytoy a lubong. Mapukawton iti mabiit amin dagitoy a sasao ken kalat, ta asidegen ti kanibusanan daytoy a lubong. Imbes ketdi, sitatallugod nga agbaw-ing dagiti mangipatpateg iti kinalinteg iti naimbag a damag nga iwarwaragawag dagidiay mangisilsilnag ti lawag ti Pagarian ti Dios iti amin a suli ti daga. Isu dagitoy dagidiay naipadto idiay Apocalipsis 7:9, 10, a kunana: “Nakitak, ket, adtoy! ti dakkel nga umariwekwek, nga awan tao a makabalin a bumilang, a naggapuda kadagiti amin a nasion ken kadagiti tribo ken kadagiti ili ken kadagiti dila, a nakatakderda iti sanguanan ti trono [ti Dios] ken iti sanguanan ti Kordero [ni Kristo] . . . Ket agpukpukkawda iti napigsa a timek, a kunkunada: ‘Ti pannakaisalakan utangtayo iti Diostayo, a situtugaw iti trono, ken iti Kordero.’” Kuna ti bersikulo 14: “Dagitoy isuda dagidiay naggapu iti dakkel a rigat.” Wen, malasatanda ti panungpalan daytoy a lubong nga agturong iti awan inggana a baro a lubong iti sidong ti Pagarian ti Dios.

Ti Nalawlawagan a Baro a Lubong

16. Anianto ti mapasamak iti lubong ni Satanas inton dakkel a rigat?

¹⁶ Malapunosto iti naraniag a lawag ti kinapudno ti baro a lubong. Panunotenyo no anianto ti kasasaad kalpasan a pagpatinggaen ti Dios daytoy a sistema dagiti bambanag. Awanton ni Satanas, dagiti demoniona, ken dagiti sistemana iti politika, komersio, ken relihion​—awan mabati kadakuada! Awanto metten ti intero a makinaria ti propaganda ni Satanas. Ngarud, kalpasan ti dakkel a rigat, awanton uray maysa a periodiko, magasin, libro, bokleta, wenno polieto a mangitantandudo iti daytoy dakes a lubong. Awanton dagiti narugit nga impluensia a maibrodbrodkas kadagiti estasion ti telebision wenno radio ti lubong. Mamimpinsan a maikkatto amin a makasabidong nga elemento ti lubong ni Satanas!​—Mateo 24:21; Apocalipsis 7:14; 16:14-16; 19:11-21.

17, 18. Kasanoyo a deskribiren ti naespirituan a kasasaad kalpasan ti panagpatingga ti lubong ni Satanas?

¹⁷ Anian a nagdakkelto a bang-ar dayta! Manipud iti dayta nga aldaw, ti laeng makaay-ayo, makapagin-awa a naespirituan a lawag nga aggapu ken Jehova ken iti Pagarianna ti mangimpluensia iti sangatauan. Impadto ti Isaias 54:13: “Amin dagiti annakmo maisuronto kadakuada ni Jehova, ket dakkelto ti talna dagiti annakmo.” Inton iturayanen ti Dios ti intero a daga, ti karina ket, kas kunaen ti Isaias 26:9, “dagiti agtaeng iti nabunga a daga sursuruenda ti kinalinteg.”

¹⁸ Sumayaatto a dagus ti intero a mental ken espiritual a kasasaad. Dagiti makapabileg a bambanag ti nangnangrunanto imbes a dagiti makapaleddaang, imoral a bambanag a nakasaksaknap itan. Amin a sibibiag masursuruandanto iti kinapudno maipapan iti Dios ken iti pangpanggepna. Iti naan-anay a pamay-an, matungpalton ti padto idiay Isaias 11:9, a kunana: “Ti daga mapnonto iti pannakaammo ken ni Jehova a kasla dagiti dandanum saknapanda ti baybay.”

Naganat ti Panangsurot iti Silaw

19, 20. Apay a masapul nga agsalukag dagidiay mayat a sumurot iti silaw?

¹⁹ Ita, kadagiti maudin a tawtawen daytoy dakes a sistema, naganat ti panangsurot iti silaw ti lubong. Ken masapul nga agsalukagtayo, ta adda nabara nga ibubusor a manglaplapped ti pannagnatayo iti lawag. Ni Satanas, dagiti demoniona, ken ti naindagaan nga organisasionna​—dagiti pannakabalin ti sipnget​—ti pagtataudan daytoy nga ibubusor. Isut’ gapuna a mamallaag ni apostol Pedro: “Agparbengkayo, agsalukagkayo. Ti Diablo a kabusoryo, kasla leon a ngumerngernger, a magmagna iti sibayyo nga agsapsapul ti alun-onenna.”​—1 Pedro 5:8.

²⁰ Ikabil ni Satanas amin a lapped iti dalan dagidiay umay iti lawag, agsipud ta kayatna nga agtalinaedda iti kasipngetan. Mabalin nga usarenna ti ibubusor manipud kadagiti kakabagian wenno kadagiti dati a gagayyem a bumusbusor iti kinapudno. Mabalin a daytat’ panagduadua iti Biblia gapu ta kinullaapan ida dagiti sursuro ti ulbod a relihion wenno dagiti propaganda dagiti awanan pammati nga ateista ken agnostiko. Mabalin a dagiti bukodtayo a dakes a pagannayasan a mamagbalin a narigat ti panangsalimetmet kadagiti nadiosan a pagalagadan.

21. Aniat’ rebbeng nga aramiden dagiti amin a mayat nga agbiag iti baro a lubong ti Dios?

²¹ Aniaman dagiti sumangbay a lapped, kayatyo kadi a tagiragsaken ti biag iti baro a lubong nga awanton ti kinapanglaw, krimen, kinaulpit, ken gubat? Kayatyo kadi a tagiragsaken ti naan-anay a salun-at ken biag nga agnanayon iti paraiso a daga? No kasta, awaten ken surotenyo ni Jesus a kas silaw ti lubong ken ipangagyo ti mensahe dagidiay mangsalsalimetmet iti “sao ti biag” ken ‘aglawlawag a kasla silsilaw iti lubong.’​—Filipos 2:15, 16.

Kasanoyo a Sungbatan?

◻ Kasano nga impakita dagiti relihiuso a papangulo a kaay-ayoda ti sipnget?

◻ Ania a kababalin ti impakita ni Jesus kadagiti tattao?

◻ Kasano a rimmang-ay ti pannakaurnong dagiti managawit iti lawag?

◻ Ania dagiti dadakkel a panagbalbaliw nga asidegen a mapasamak?

◻ Apay a naganat ti panangsurot iti silaw ti lubong ita?

[Ladawan iti panid 14, 15]

Pinaruar dagiti natangken panagpuspusoda a Fariseo daydi dati a bulsek a pinaimbag ni Jesus