Ti Biag ken Ministerio ni Jesus

Napaayda a Mangtiliw Kenkuana

BAYAT a madama pay laeng ti Piesta dagiti Abong-abong, nagbaon dagiti papangulo ti relihion kadagiti opisial ti polisia a mangtiliw ken ni Jesus. Saanna a pinadpadas ti aglemmeng. Intultuloy ni Jesus ti panangisurona iti publiko, a kunkunana: “Adda pay bassit a tiempo a makipagianak kadakayo saakto mapan iti nangibaon kaniak. Sapulendakto, ket didakto masarakan, ket ti pagianak dikay mabalin ti umay.”

Saan a naawatan dagiti Judio, gapuna kinunkunada kadagiti bagbagida: “Adinonto ti papanan daytoy a ditayto masarakan? Mapanto ngata kadagiti Judio a naiwaras kadagiti Griego ken mangisuro kadagiti Griego? Aniat’ kaipapanan daytoy panagkunana a, ‘Sapulendakto ket didakto masarakan, ket ti pagianak dikay mabalin ti umay’?” Siempre, agsasao ni Jesus maipapan iti umadanin nga ipapatay ken panagungarna nga agturong sadi langit, a sadiay dinto makasurot dagiti kabusorna.

Ti maikapito ken maudi nga aldaw ti piesta dimtengen. Tunggal agsapa ti piesta, maysa a padi ti nangipakbo iti danum, nga innalana manipud tangke ti Siloam, a gapu itoy daytat’ agayus agingga idiay baba ti altar. Kas pammalagip kadagiti tattao iti daytoy inaldaw a seremonia, nagpukkaw ni Jesus: “No adda mawaw, umay kaniak ket uminum. Ti mamati kaniak, kas kunaen ti Surat, ‘Karkarayan ti danum a nabiag ti agayusto manipud iti unegna.’”

Kinapudnona, agsasao ditoy ni Jesus maipapan kadagiti grande a maibungana inton ti nasantuan nga espiritu ti maiparukpok. Iti sumaganad a tawen daytoy a panangiparukpok iti nasantuan nga espiritu napasamak idi Pentecostes. Adda panagayus ti danum a nabiag idi nangrugi a nagserbi dagiti 120 nga adalan kadagiti tattao. Ngem agingga iti dayta, awan pay ti espiritu iti kaipapananna nga awan pay kadagiti adalan ni Kristo ti napulotan iti nasantuan nga espiritu ken naawis iti nailangitan a biag.

Kas panangabrasa iti sursuro ni Jesus, dadduma ti nangrugi a nagkuna: “Pudno a daytoy Ti Mammadto,” a nalawag a tuktukoyenda ti mammadto a dakdakkel ngem ni Moises a naikari nga umay. Dadduma kunada: “Daytoy ti Kristo.” Ngem kinuna dagiti dadduma: “Idiay Galilea aya ti paggapuan ti Kristo? Saan a kinuna aya ti Surat nga iti kaputotan ni David ken idiay Bethlehem, ti purok a tinaudan ni David ti paggapuan ti Kristo?”

Gapuna napataud ti panagsusupadi kadagiti adu a tao. Dadduma kayatda a matiliw ni Jesus, ngem awan ti nangipatay ti imada kenkuana. Idi nagsubli dagiti policia a saanda a kadua ni Jesus, kinuna dagiti pangulo a papadi ken Fariseo: “Apay-apay isu dikay inyeg?”

“Uray kaano awan ti tao a nagsao ti kastoy,” insungbat dagiti policia.

Siuunget, nagtungpal dagiti papangulo ti relihion iti pananglalais, panangul-ulbod, ken panangusar ti dakes a nagnagan. Inlibbida: “Napaiyaw-awankayo met aya? Adda aya namati kenkuana kadagiti agturay wenno kadagiti Fariseo? Ngem dagitoy adu a tao dida ammo ti Linteg mailunodda.”

Iti daytoy, ni Nicodemo, maysa a Fariseo ken agturay kadagiti Judio (kayatna a sawen, maysa a kameng ti Sanedrin), ti nagsao a maipaay ken ni Jesus. Malagipyo pay a dua ket kagudua a tawen ti napalabasen, immay ni Nicodemo ken ni Jesus iti rabii ket inyebkasna ti pammatina kenkuana. Ita kuna ni Nicodemo: “Ukomen aya ti lintegtayo ti tao no dina umuna a denggen ken ammuen ti aramidenna?”

Ad-adda manen a nagpungtot dagiti Fariseo ta maysa kadagiti kaduada ti nangidepensa ken ni Jesus. “Sika met taga Galileaka aya?” ti makapasagid a saoda. “Sukimatem ket kitaem a manipud idiay Galilea awan ti tumaud a mammadto.”

Nupay saan a direkta a kinuna dagiti Kasuratan nga adda tumaud a mammadto manipud Galilea, itudtudoda a ti Kristo ket aggapu sadiay, a kunkunana a “maysa a dakkel a silaw” ti makita iti daytoy a lugar. Ket kontra kadagiti di umiso a panangmatmatda, naiyanak ni Jesus idiay Bethlehem, ket isut’ putot ni David. Nupay nalabit pagaammo dagiti Fariseo daytoy, isuda ti kangrunaan a makagapu iti panangisaknap ti panangallilaw nga adda kadagiti tattao maipapan ken ni Jesus.Juan 7:32-52; Isaias 9:1, 2; Mateo 4:13-17.

◆ Aniat’ mapasamak tunggal agsapa ti piesta, ket kasano ti panangiturturong ni Jesus iti atension iti daytoy?

◆ Apay a napaay dagiti policia a nangtiliw ken ni Jesus, ket kasanot’ panagrikna dagiti pangulo ti relihion?

◆ Asino ni Nicodemo, ket aniat’ kababalinna ken ni Jesus, ket kasanot’ panangtrato dagiti padana a Fariseo kenkuana?

◆ Aniat’ ebidensia a ti Kristo aggapu sadi Galilea?