Agimtuod Dagiti Agtutubo . . .

Homoseksualidad—Talaga Kadi a Nagdakes Dayta?

“Manipud pay ubingak, addaanakon kadagiti homoseksual a tarigagay. Gapu ta diak maawatan ida, diak nagan-annad. Daytoy ti nangituggod kaniak iti panangaramid iti nakadakdakes iti gayyemko. Mariknak idi a nakabasolak, ket impagarupko no pulos a dinak mapakawanen ni Jehova.”

“IPARPAREGTA ti TV Kadagiti Annaktayo ti Homoseksualidad.” Daytoy ti paulo ti maysa nga artikulo ti maysa a kolumnista ti grupo nga agsursurat para iti periodiko. Kinuna ti mannurat: “Naipasidong dagiti managbuya iti telebision iti nagadu [aglaplapusanan] a programa a kumanunong iti pannakaiparang ti estilo ti biag dagiti homoseksual.” Ti TV, nupay kasta, ket maysa laeng kadagiti adu a wagas a maus-usar kadagitoy nga aldaw a mangitandudo iti homoseksualidad kadagiti agtutubo. Dagiti propaganda a mangsuporta iti homoseksualidad ket itantandudo met dagiti mannursuro, kapatadan, sine, liblibro, ken magasin.

Nakiraman metten ti medikal a gunglo iti panangitandudo. Idi unana, minatmatan dagiti doktor ti homoseksualidad kas maysa a sakit. Ngem idi 1973, inwaragawag ti American Psychiatric Association a ti homoseksualidad ket saanen a maibilang a sakit ti panunot. Manipud idin, adu kadagiti adda iti medikal a gunglo ti nanganamongen iti estilo ti panagbiag dagiti homoseksual agingga a gistay naan-anay a maanamonganen dayta. Kas pagarigan, inwaragawag ni psychotherapist nga Albert Ellis a dagiti homoseksual a relasion “ket pulos a saan a kinakillo no di ket buklen ti nasalun-at a kababalin ti tao iti sekso. . . . Tagiragsakenyo ida no kayatyo, ket diyo palubosan ti asinoman a mangipapati kadakayo a ‘di umiso’ wenno ‘naalas’ dagitoy.”

Nasaknap dagita a panangmatmat ta ipadamag ti magasin a Newsweek: “Babaen kadagiti maipabpabuya iti warnakan ken ti kabbaro nga agdama a panangawat ti aglawlaw, ad-addan a sipapanayag a padpadasen dagiti tin-edyer ti kinabinabai ken ti pannakidenna agpadpada iti kasekso man ken di kasekso.” Idinto ta iti napalabas a tiempo, kasta unay ti panangkondenar dagiti tin-edyer iti panagdenna dagiti agkasekso, di panaglablabes a kunaen nga umad-adu nga agtutubo ita ti mangmatmat iti dayta kas “uso.” Uray pay dagiti agtutubo a di makiraman iti homoseksual a tignay ti masansan a nalawag a mangpampanuynoy iti dadduma a mangaramid iti dayta. “Nalabit no ti maysa a gayyemko ti agkuna nga isut’ binabai, gayyemnakto pay laeng,” kuna ti agtutubo nga agnagan Darren. Inyebkas pay ketdi ti maysa nga agtutubo nga estudiante iti kolehio ti danagna a nalabit isut’ saan a talaga a normal tangay “babbai laeng ti kaykayat[na]”!

Makariribuk la ngarud iti maysa a Kristiano nga agtutubo ti napanuynoy ita nga aglawlaw—nangruna kadagidiay a maigapu iti di espesipiko a rason ket magustuanda ti kaseksoda.a Ammoda a karimon ti Dios iti homoseksualidad, ket sipapasnek a kayatda a liklikan dayta. Ngem no dadduma, marigatanda unay a makidangadang kadagiti riknada isu a mangrugin a panunotenda no umiso wenno nainkalintegan met laeng ti panangmatmat ti Biblia. ‘Talaga kadi a kastat’ kadakes ti homoseksualidad?’ mayimtuodda.

No Ania ti Kunaen ti Sao ti Dios

Kas sungbat, basaenyo a mismo no aniat’ kinuna ni apostol Pablo idiay 1 Corinto 6:9, 10: “Ania! Dikay aya ammo a dagiti nakillo a tattao didanto tawiden ti pagarian ti Dios? Dikay paiyaw-awan. Uray dagiti mannakiabig, wenno dagiti managrukbab iti didiosen, wenno dagiti mannakikamalala, wenno dagiti lallaki a maipaay kadagiti di nainkasigudan a panggep [“lallaki a balangkantis,” New International Version; “binabai,” King James Version], wenno dagiti lallaki a makikaidda kadagiti lallaki [“dagiti sodomita,” Jerusalem Bible; “nakillo a homosekual,” Today’s English Version], wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.” Usigenyo ta espesipiko a dinakamat ni Pablo dagidiay nalawag a mangar-aramid iti naalumiim a seksual a paset ken dagidiay napanpanayag iti “nalalakian” a paset kadagiti imoral a pannakirelasionda. Isu a pinagminarna a di anamongan ti Dios ti isuamin a homoseksual nga aramid.

Nabatad met daytoy kadagiti sasao ni Pablo idiay Roma 1:18-27: “Ti pungtot ti Dios maipampanayag manipud langit maibusor iti isuamin a kinadakes ken kinakillo dagiti tattao a manglaplapped iti kinapudno iti nakillo a pamay-an . . . Ti Dios, maiyannurot kadagiti tarigagay ti puspusoda, inyawatna ida iti kinarugit, tapno dagiti bagida maibabain koma kadakuada . . . Dayta ti makagapu a ti Dios inyawatna ida kadagiti nakababain a panaggartem iti sekso, ta agpadpada a dagiti babbaida sinukatanda ti nakaisigudan nga usar ti bagbagida iti maysa a maikaniwas iti nakaparsuaan; ken kasta met nga uray dagiti lallaki pinanawanda ti nakaisigudan nga usar ti babai ket simgedda a nakapalpalalo iti derrepda iti maysa ken maysa, lallaki iti lallaki, nga ar-aramidenda no ania ti naalas.” Espesipiko a kinondenar ditoy ni Pablo agpadpada ti nalalakian ken binabaian a homoseksualidad. Kinondenarna dagiti homoseksual nga aramid kas di nakaisigudan ken “naalas.”

Mangted Sakit Wenno Makapasalun-at?

Nalabit adu ti agkomento iti daytoy babaen ti panagkunada a ti panangmatmat ngamin ti Biblia ket inuugma, nagpasón. Ngem no panunotenyo dayta, adda kadi pay nalalaing a makaammo iti pannakabukel ti bagi, panunot, emosion, ken espiritualidadtayo ngem iti Namarsuatayo? Inaramid ti Dios ti lalaki ken babai, ken intukitna iti kaungganda ti pannakaallukoyda unay iti maysa ken maysa. (Genesis 1:27, 28) Dina inaramid ida tapno maaddaanda iti seksual a pannakaallukoy iti asinoman a kaseksoda. Kasta met nga inkeddeng ti Dios a dagiti seksual a relasion ti maysa a lalaki ken maysa a babai ket mapasamak laeng iti urnos ti panagasawa.—Hebreo 13:4.

Saan a pakarigatan ti ibunga daytoy kadatayo. Idiay Isaias 48:17, kuna ni Jehova a Dios nga isu “Daydiay mangisuro kenka a maipaay iti gunggonam.” Wen, ammona no ania ti makatulong kadatayo ken no ania ti makadangran kadatayo. Nupay no mabalin a kasla narigat a suroten ti dadduma dagiti sursuro ti Biblia, kanayonda a ‘makapasalun-at a sursuro,’ a kaipapananna, makagunggona iti panunot ken bagi. (Tito 2:1) Ti homoseksualidad, iti kasumbangirna, ket makadangranto laeng iti salun-at ti bagi, emosion, ken espiritualidad ti maysa.

Ti panagraira ti AIDS ket maysa a pagarigan no kasano a di makapasalun-at ti estilo ti panagbiag ti homoseksual. Idiay Norte America, dagiti homoseksual a lallaki ti nalaklaka a maakaran iti sakit. Ngem ti AIDS ket maysa laeng kadagiti nagadu a kita ti sakit—hepatitis, impeksion ti dalem, gonorrhea, syphillis, ken gastrointestinal parasites—a kadawyan a mangsaplit kadagiti homoseksual. Aniat’ mangparaira iti sakit? Ilawlawag ni Dr. Joseph Nicolosi: “Pinaneknekanen ti adu a mannurat ti makaguyugoy, makaadikto nga elemento ti estilo ti panagbiag ti binabai.” Impalgak ti maysa a nasaknap a panagadal a “28 porsiento kadagiti homoseksual a lallaki ti [naaddaan iti] pannakidenna iti sangaribo wenno nasursurok pay a kapareha. . . . Gistay 50% kadagiti puraw a homoseksual a lallaki . . . ti nagkuna a naaddaandan iti ag-500 a nadumaduma a kapareha iti sekso.”

Ilawlawag ti libro a Homosexual Behavior a kadagiti adu a homoseksual “adda panagamakda a makirelasion a sadiay maikari ti kinasungdo, kinasinged, wenno responsibilidad . . . No dadduma ti kinarasukda a makidenna iti aniaman a sekso ket addaan iti napalalo a kualidad ti pannakaguyugoy. Mabalin a dadduma kadagitoy a tattao ti makiraman iti sangapulo wenno nasursurok a seksual a pannakidenna iti unos ti maysa nga aldaw wenno rabii.” Makapasalun-at kadi ti kasta nga awanan-kontrol a kababalin? Imbes ketdi, saan aya a dakes ken nakababain dayta? Nalawag a dagidiay a makiramraman iti kasta a napalalo a kinalulok ket “paad-adipen iti panagrupsa.”—2 Pedro 2:19.

Kasta pay met a ti napalalo a homoseksual a pannakidenna ket makarimon, naranggas, ken naan-anay a sadistiko. Kinuna ni apostol Pablo: “Dagiti bambanag nga aramidenda iti nalimed nakababain uray saritaen laeng.” (Efeso 5:12) Ipamatmat ti kasta a kinaranggas ti pungtot ken saem a marikrikna ngem di ipadpadlaw ti maipagarup a “naragsak” nga estilo ti panagbiag. Pudno, kunaen ti dadduma a homoseksual a saanda a nalulok. Ngem manmano dagiti homoseksual a “maymaysa” ti kaparehada—ken kaaduanna saan nga agbayag dagiti relasionda. Uray pay no agpaut dagiti panagtipon ti agkasekso, pulos a saan a dagita ti resulta ti ayat a dineskribir ti Biblia. Ti kasta nga ayat “saan a naalas ti panagtigtignayna.”—1 Corinto 13:4, 5.

Dagiti Supapakna

Kuna ni Pablo idiay Roma 1:27: “Lallaki iti lallaki, inaramidda dagitoy a nakababain a kinarimon, nga aw-awatenda, siempre, iti bagbagida ti naan-anay a supapak ti seksual a kinakillo.” (The New Testament in Modern English, ni J. B. Phillips) Kadagiti ania a wagas? Kuna ti libro a Homosexual Behavior maipapan ti maysa kadagitoy: “Nakarkaro ti panagsagaba dagiti homoseksual a babbai manipud iti nalabes a panagusar ken panangabuso iti arak ngem kadagiti babbai a makidenna iti dida kasekso.” Kuna pay ti dadduma a managsirarak a masansan a gagangay ti gandat a panagpakamatay kadagiti agtutubo a homoseksual a lallaki.

Ti kangrunaan a makadangran iti amin a supapakna isut’ espiritualidad ti maysa. Masarakan dagiti homoseksual ti bagbagida a “nasipngetan ti isipda, ken naisina manipud iti biag a kukua ti Dios.” (Efeso 4:18) Ngem komusta ngay met dagiti managbuteng-Dios nga agtutubo nga, agpapan pay iti pannakaammoda kadagiti prinsipio ti Biblia, masarakanda ti bagbagida a maallukoy iti kaseksoda? Nalawag, a masapul a makidangadangda. Siempre, ti pannakaammo no kasano a matmatan ti Dios ti homoseksualidad ti makatulong kadagita a tattao a ‘mangrurod iti dakes.’ (Roma 12:9) Adu pay met dagiti praktikal a pamay-an a maaramidanda tapno maliklikanda ti tumulok kadagiti dakes a tarigagay. Daytoyto ti tema ti masanguanan nga artikulo.

[Footnote]

[Ladawan iti panid 13]

Ti kinalulok, pannakariribuk ti emosion, ken sakit ti mangipabigbig iti estilo ti panagbiag ti homoseksual