Siasino a Dios ti Dayawenyo?

SAAN a kas kadagiti animal, datayo a tattao addaan kabaelan nga agdayaw. Paset daytoy ti nakaparsuaantayo manipud pannakaiyanak. Addaantayo met iti sentido ti moral, maysa a konsiensia a mangiwanwan kadatayo no ania ti umiso ken ania ti dakes. Iti nagduduma a pamay-an amintayo surotentay dayta a konsiensia, ket iti panangaramid iti dayta, adu ti agpannuray iti maysa a dios wenno didios maipaay pannakaiwanwan.

Kabayatan ti napalabas a maysa wenno dua a siglo, dadduma a nailubongan a mamasirib nagriririanda ti kaadda ti maysa a mannakabalin-amin a Dios ken Namarsua. Idi 1844, ni Karl Marx indeklarana ti relihion kas “ti opium ti tattao.” Kalpasanna, inyeg ni Charles Darwin ti teoria ti ebolusion. Idin immay ti Bolshevik a rebolusion. Idiay Makindaya nga Europa ti ateismo nagbalin nga opisial a pagalagadan ti estado, ket naipato a matay ti relihion iti kaputotan ti 1917. Ngem saan a mabaliwan dagidiay nga ateista ti pamay-an a nakabuklan ti tattao. Napaneknekan daytoy iti iyuungar ti relihion idiay Makindaya nga Europa iti daytoy a tiempo.

Nupay kasta, kas kunaen ti Biblia, adu dagiti “maawagan ‘didios,’ ken adu nga ‘appo.’” (1 Corinto 8:5) Iti panaglabas dagiti pampanawen dinaydayawen ti sangatauan dagiti nakaad-adu a didios. Adda dita ti didios ti kinabunga, ti ayat, ti gubat, ken ti arak ken panagpennek. Iti relihion a Hindu laeng, minilion ti bilang dagiti didios.

Nagrimat dagiti sinnaggatlo a didios idiay Babilonia, Asiria, ken Egipto, kasta met kadagiti dagdaga a Budhista. Uray met ti Kakristianuan addaan iti “nasantuan” a Trinidad. Ti Islam, a manglaklaksid iti Trinidad, “awanan dios no di ni Allah.” Kasta pay met, uray dagidiay mangublag iti kapanunotan iti maysa a di makita, mannakabalin-amin a Dios addaanda met kadagiti bukod a didios. Kas pangarigan, idiay Filipos 3:19, saritaen ti Biblia maipapan kadagiti tattao a nasiluan kadagiti materialistiko a tarigagay: “Ti diosda isu ti tianda.”

Kaaduan a tattao dayawenda ti dios wenno didios ti daga wenno kagimongan a nakaiyanakanda. Ibangon daytoy dagiti saludsod. Amin kadi a porma ti panagdayaw agturong iti isu met la a lugar​—kasla kadagiti dalan a sumang-at iti alimpatok ti bantay? Wenno adu kadi kadagiti nalidem a dalan ti relihion mangiturong iti didigra​—kas kadagiti desdes agturong iti rangkis? Adu kadi dagiti umiso a pamay-an ti panagdayaw wenno adda laeng maymaysa? Adu kadi dagiti maikari a dayawen a didios wenno adda laeng maymaysa a Mannakabalin-amin a Dios a maikari iti naipamaysa a debosion ken panagdayawtayo?

Ti Itataud dagiti Ulbod a Didios

Dagiti saludsod iti ngato maikarida iti panagsukimattayo. Apay? Agsipud ta ti kadadaanan a naisurat nga autoridad iti relihion, ti Biblia, iladawanna no kasano a ti maysa nga ulbod a dios, a nagtignay baeten iti maysa nga uleg, sinulisogna dagiti immuna nga inapotayo iti makadidigra a kurso. Mapaspasarantayo dagiti makapaladingit a resulta ti sikapna iti daytoy a panawen. (Genesis 3:1-13, 16-19; Salmo 51:5) Ni Jesus, “ti Anak ti Dios,” sinaona dayta a rebelde a dios kas “ti agturay daytoy a lubong.” Isut’ inawagan ti maysa kadagiti apostol ni Jesus a “ti dios daytoy a sistema dagiti bambanag.” (Juan 1:34; 12:31; 16:11; 2 Corinto 4:4) Idiay Apocalipsis kapitulo 12, bersikulo 9, isut’ nailadawan kas “ti kadaanan nga uleg, nga isu ti managan Diablo ken Satanas, a mangallilaw iti isuamin a lubong.” Maysa a sangalubongan nga imperio ti lubod a relihion ti adda iti sidong ti panangtengngel ni Satanas.

Ni Satanas isu ti kangrunaan a manangallilaw. (1 Timoteo 2:14) Pagang-angawanna ti nainkasigudan a tarigagay ti tao nga agdayaw babaen panangitan-okna iti adu a kita dagiti didiosen​—espiritu dagiti inapo, dagiti idolo, ladladawan, dagiti Madonna. Tarawidwidanna pay ti panagdayaw kadagiti natauan a didios, kas kadagiti nabileg nga agtuturay, naballigi a heneral, ken dagiti bituen ti pelikula ken ay-ayam. (Aramid 12:21-23) Nasayaat ti aramidentayo no agsiputtayo, a desidido nga agsapul ken agdayaw laeng iti pudno a Dios, isu a pudpudno “a saan nga adayo iti tunggal maysa kadatayo.”​—Aramid 17:27.

Siasino, ngarud, daytoy a naidaddaduma a Dios a rebbeng a dayawentayo? Agarup 3,000 a tawen ti napalabasen, isut’ inladawan ti salmista ti Biblia kas “ti Katatan-okan . . . , Daydiay Mannakabalin-amin . . . , ti Diosko, isu a pagkamatalkak,” ken isut’ inawaganna iti naranga a naganna​—“Jehova.” (Salmo 91:1, 2) Saksakbayna, kuna ni Moises maipapan kenkuana: “Ni Jehova a Diostayo isu ti maymaysa a Jehova.” (Deuteronomio 6:4) Ken kinutar ni mammadto Isaias ti Dios a mismo nga agkunkuna: “Siak ni Jehova. Dayta ti naganko; ket ti dayagko diakto ited iti sabali, ket diak met ited ti dayawko kadagiti kinitikitan a ladladawan.”​—Isaias 42:8.

Panggepen ni Jehova a Dios a waknitan ti naganna kadagiti amin nga umsi nga impiltak ni Satanas iti dayta. Inyilustrarna no kasanonanto nga aramiden daytoy idi tawen 1513 K.K.P., idi inusarna ni mammadtona a Moises tapno isalakanna ti ili ti Israel manipud panangparigat dagiti Egipcio. Iti dayta a gundaway, innaig ti Dios ti naganna a Jehova kadagiti sasao a: “Siak ti siak.” (Exodo 3:14, 15) Alangonennanto ti bagina maibusor ken Faraon ti Egipto, ngem umuna imbagana iti dayta nadangkes nga agturay: “Ngem kinaagpaysuanna daytoy ti nangpabilgak kenka, tapno ipakitak kenka ti pannakabalinko ken tapno ti naganko maibunannag iti amin a lubong.”​—Exodo 9:16.

Umasping ti kasasaad ita. Kas ken Faraon idi ugma, ti dios daytoy a lubong, ni Satanas, supringenna ni Jehova a Dios ken sisisikap nga ituloyna ti naespirituan a pannakidangadang maibusor kadagidiay tattao a mangayat iti kinalinteg ken kinapudno. (Efeso 6:11, 12, 18) Maminsan pay, pinanggep ti Dios nga itan-ok ti naganna iti sango ti ibubusor ni Satanas. Nupay kasta, sakbay panangipakitana iti pannakabalinna babaen panangdadaelna ken Satanas ken amin dagiti aramidna, ibaon ni Jehova dagiti managdaydayawna tapno ipakaammoda ti Naganna iti amin a daga. Daytoy a panangsaksi iti naganna ket maysa a napateg a paset ti pudno a panagdayaw.

Maikanatad unay, kuna a mismo ti Dios a dagitoy a managdaydayaw agbalindanto a saksina, dagiti Saksi ni Jehova, “ti umili a binukelko a maipaay kaniak met laeng, tapno iparangarangda koma ti pannakaidayawko.” (Isaias 43:10-12, 21) Kasanoda nga iparangarang ti pannakaidayaw ni Jehova? Mangasabada ken mangisuroda iti publiko ken iti binalaybalay, nga ipakpakaammoda ti naimbag a damag a ti Pagarian ni Jehova, nga iturayan ti Anakna, ni Jesu-Kristo, iyegnanto dagiti agnanayon a bendision iti nasungdo a sangatauan iti daytoy a daga. Ngarud, dayawenda ti Dios “nga awan sardayna,” kas inaramid dagidi pudno a Kristiano idi umuna a siglo. (Aramid 5:42; 20:20, 21) Tinagiragsakda kadin ti nadiosan a bendision iti daytoy? Sumungbat dagiti sumaganad a panid.