TIQUICO

[nagtaud iti sao a kaipapananna ti “kalak-aman; balligi”].

Maysa kadagiti katulongan ni Pablo, ‘dungdungnguen a kabsat ken matalek a ministro ken pada nga adipen iti Apo’ manipud iti Distrito ti Asia. (Col 4:7) Ni Tiquico ket kameng ti grupo ni Pablo nga idi nagsublida manipud Grecia, dimmalanda iti Macedonia nga agturong iti Asia Menor, ngem saan a naibaga no kimmuyog ni Tiquico wenno saan agingga idiay Jerusalem. (Ara 20:2-4) Maysa ni Tiquico kadagiti sumagmamano a tattao a naikuna kas “ti kabsat” a timmulong ken Tito bayat ti kaaddana idiay Grecia a nangyurnos iti panagur-or maipaay kadagiti kakabsat idiay Judea. (2Co 8:18, 19; 12:18) Manipud nakaibaludan ni Pablo idiay Roma, ni Tiquico ti imbaonna idiay Efeso ken Colosas nga awitna ti sursuratna, ket inkarina a ni Tiquico ti mangibaga kadakuada iti ad-adu pay maipapan iti kasasaad ti trabahona ken mangliwliwa kadakuada; nadakamat iti surat kadagiti taga Colosas a ni Onesimo ti kaduana. (Efe 6:21, 22; Col 4:7-9) Kalpasan ti pannakaluk-at ni Pablo iti pagbaludan, napanunotna nga ibaon ni Artemas wenno ni Tiquico idiay Creta. (Tit 3:12) Idi maisubli ti apostol iti maysa a pagbaludan idiay Roma iti maikadua a gundaway, imbaonna ni Tiquico idiay Efeso.​—2Ti 4:12.