Agserserbitayo iti Dios a “Napnuan iti Asi”

 1. Ania ti malagiptayo no panunotentayo ti maysa a naasi a tao?

NO ILADAWANTAYO ti naasi a tao, mabalin a mapanunottayo ti tao a naimbag, nasingpet, mannakipagrikna, ken naparabur. Mabalin a malagiptayo met ti inyestoria ni Jesus maipapan iti naasi a Samaritano. Dayta a lalaki a taga-sabali a nasion ket “naasian” iti Judio a kinabkabil ken tinakawan dagiti mannanakaw. Gapu iti ‘asi’ ti Samaritano iti nakabkabil a Judio, siaayat nga inaywananna. (Luc. 10:29-37) Itampok daytoy nga ilustrasion ti maysa a makaay-ayo a kualidad ti Diostayo​—ti asi. Naasi ti Dios gapu ta ay-ayatennatayo ken inaldaw nga ipakpakitana dayta kadatayo.

 2. Ania ti sabali pay nga aspeto ti asi?

² Adda sabali pay nga aspeto ti asi. Ramanenna ti panangigawid iti pannusa no adda pangibatayanna. Kasta nga asi ti ipakpakita ni Jehova kadatayo. “Saannatayo a dusaen sigun kadagiti basoltayo,” imbaga ti salmista. (Sal. 103:10) Ngem no dadduma, mabalin a nadagsen ti panangdisiplina ni Jehova iti maysa a nakabasol.

 3. Ania dagiti saludsod nga usigentayo?

³ Iti daytoy nga artikulo, pagsasaritaantayo ti tallo a saludsod: Apay nga ipakpakita ni Jehova ti asi? Adda kadi koneksion ti nadagsen a disiplina ken asi? Ken ania ti makatulong tapno maipakitatayo ti asi? Kitaentayo ti sungbat ti Sao ti Dios kadagita a saludsod.

 4. Apay nga ipakpakita ni Jehova ti asi?

⁴ Pagay-ayat ni Jehova ti agbalin a naasi. Insurat ni apostol Pablo a ti Dios ket “napnuan iti asi.” Iti daytoy a konteksto, inlawlawag ni Pablo a naasi ti Dios ta inikkanna iti namnama nga agbiag idiay langit dagiti imperpekto nga adipenna, a dinutokan ti espiritu. (Efe. 2:4-7) Ngem saan laeng nga isuda ti pangipakpakitaan ni Jehova iti asina. Insurat ni salmista David: “Ni Jehova ket naimbag iti amin a parsuana, ken makita ti asina iti amin nga aramidna.” (Sal. 145:9) Ay-ayaten ni Jehova dagiti tattao, isu nga ipakpakitana ti asi kadakuada no adda ti pangibatayanna a mangaramid iti dayta.

 5. Kasano a nasursuro ni Jesus ti maipapan iti asi ni Jehova?

⁵ Ni Jesus ti kangrunaan a makaammo a pagay-ayat unay ni Jehova nga ipakita ti asi. Agkadkaduan ti Ama ken ti Anak idiay langit iti unos ti rinibu a tawen a kaadda ti tao. (Prov. 8:30, 31) Namin-adun a nakita ni Jesus a kinaasian ni Amana dagiti managbasol a tattao. (Sal. 78:37-42) Kadagiti pannursuro ni Jesus, masansan nga intampokna daytoy makaay-ayo a kualidad ni Amana.

 6. Kasano nga inyilustrar ni Jesus ti asi ni Amana?

⁶ Kas nadakamat iti napalabas nga artikulo, inyestoria ni Jesus ti maipapan iti napukaw nga anak tapno iyilustrarna a pagay-ayat unay ni Jehova nga ipakita ti asi. Pimmanaw dayta nga anak iti balayda ket “sinayangna ti sanikuana babaen ti gastador a panagbiag.” (Luc. 15:13) Idi agangay, pinagbabawyanna ti immoral a panagbiagna, nagpakumbaba, ken nagsubli idiay balayda. Ania ti reaksion ni amana? Saanen a naguray iti nabayag ti agtutubo a lalaki sakbay a maammuanna. Imbaga ni Jesus: “Uray adayo pay laeng [ti anak], nakitan ni amana ket naasian unay, isu a timmaray a simmabat. Inarakupna ti anakna ket sidudungngo nga inagkanna.” Saan a pinabainan ti ama ti anakna. Imbes ketdi, siaasi a pinakawan ken inawatna manen kas miembro ti pamiliana. Nadagsen ti basol ti napukaw nga anak, ngem gapu iti panagbabawina, pinakawan ni amana. Ti naasi nga ama iti ilustrasion irepresentarna ni Jehova. Iti daytoy makatukay a pamay-an, inyilustrar ni Jesus a sisasagana a mamakawan ni Amana kadagidiay sipapasnek nga agbabawi.​—Luc. 15:17-24.

 7. Kasano a ti panangipakita ni Jehova iti asi ti mangpaneknek nga awan kapada ti siribna?

⁷ Ipakpakita ni Jehova ti asi gapu iti awan kapadana a siribna. Ti sirib ni Jehova ket saan laeng a basta kinalaing nga awanan pannakipagrikna. Imbes ketdi, kuna ti Biblia a “ti sirib manipud ngato” ket “napno iti asi ken nasayaat nga ar-aramid.” (Sant. 3:17) Kas iti nadungngo a nagannak, ammo ni Jehova a ti asina ket pagsayaatan dagiti annakna. (Sal. 103:13; Isa. 49:15) Ti asi ti Dios ti mangted kadakuada iti namnama iti laksid ti kinaimperpektoda. Gapu iti awan kaaspingna a sirib ni Jehova, ipakitana ti asi no adda pangibatayanna a mangaramid iti dayta. Ngem kanayon a balanse ti panangipakita ni Jehova iti asina. Gapu ta isu ti kasisiriban, dina pulos ipalubos a ti asina ket agtungpal iti panangkonsintir.

 8. Ania nga aksion ti kasapulan no dadduma, ken apay?

⁸ Ipapantayon nga adda adipen ti Dios nga igaggagarana ti agbiag nga immoral. Ania ti masapul nga aramidentayo? Impaisurat ti Dios ken Pablo: “Isardengyo ti makikadkadua” kenkuana. (1 Cor. 5:11) Dagiti di agbabbabawi a nakabasol ket mailaksid iti kongregasion. Dayta nga aksion ket kasapulan tapno maprotektaran dagiti matalek a kakabsattayo ken tapno maiparangarang dagiti nasantuan a dalan ni Jehova. Nupay kasta, mabalin a marigatan ti dadduma a mangibilang iti panangilaksid kas ebkas ti asi ti Dios. Ania ti agpayso? Kitaentayo.

9-10. Maitunos iti Hebreo 12:5, 6, apay a maibagatayo a ti panangilaksid ket naasi nga urnos? Iyilustrar.

⁹ Maladingitantayo unay no maipakaammo iti gimong a ti maysa nga am-ammo ken patpatgentayo “ket saanen a maysa kadagiti Saksi ni Jehova.” Baka panunotentayo no talaga met laeng a masapul a mailaksid ti patpatgentayo. Ti kadi panangilaksid ket talaga nga ebkas ti asi? Wen. Saan a nainsiriban, naasi, wenno naayat ti panangigawid iti disiplina iti maysa nga agkasapulan iti dayta. (Prov. 13:24) Makatulong kadi ti panangilaksid tapno agbalbaliw ti di agbabbabawi a nakabasol? Posible. Imbaga ti adu kadagiti nakaaramid iti nakaro a basol a ti nadagsen a panangdisiplina kadakuada dagiti panglakayen ti mismo a kasapulanda tapno agnakemda, agbalbaliwda, ken agsublida iti naayat a panangaywan ni Jehova.​—Basaen ti Hebreo 12:5, 6.

¹⁰ Usigentayo daytoy nga ilustrasion. Nadlaw ti pastor nga agsaksakit ti maysa kadagiti karnerona. Ammona a tapno maagasan ti masakit a karnero, masapul a maisina iti arban. Nupay kasta, saan a kayat dagiti karnero ti maisinsina. Magusgustuanda ti agkakadua kas maysa nga arban, isu a no maisina ti maysa a karnero, mabalin a marigatan. Ngem kayat kadi a sawen dayta a naulpit wenno awanan asi ti pastor no isinana ti karnerona? Siempre, saan. Ammona a no ipalubosna a makipulapol ti masakit a karnero iti arban, maakaran ti dadduma. Isu a no isinana ti masakit, protprotektaranna ti intero nga arban.​—Idilig ti Levitico 13:3, 4.

11. (a) Kadagiti ania a pamay-an a ti maysa a nailaksid ket kas iti agsaksakit a karnero? (b) Ania dagiti probision ken tulong a magun-odan dagiti nailaksid?

¹¹ No mailaksid ti maysa a Kristiano, isu ket kas iti agsaksakit a karnero. Masakit isuna iti naespirituan. (Sant. 5:14) Kas iti literal a sakit, ti naespirituan a sakit ket mabalin a makaakar unay. Isu nga iti dadduma a situasion, masapul a maisina iti kongregasion ti maysa a masakit iti naespirituan. Daytoy a panangdisiplina ket ebkas ti ayat ni Jehova kadagiti matalek a kameng ti arbanna, ken mabalin a dayta ti mangdanon iti puso ti nakabasol ket matignay nga agbabawi. Nupay nailaksid, mabalinna ti makigimong tapno mataraonan ken sumalun-at iti naespirituan. Makaala met iti publikasion nga usarenna ken mabalinna ti agbuya iti JW Broadcasting^®. Ket bayat a makitkita dagiti panglakayen ti irarang-ayna, mabalin a sagpaminsan a balakadanda ken ibagada ti aramidenna tapno sumalun-at manen iti naespirituan ken maisubli kas maysa kadagiti Saksi ni Jehova.b

12. Kasano a maipakita dagiti panglakayen ti ayat ken asi iti di agbabbabawi a nakabasol?

¹² Napateg a laglagipen a dagiti laeng nakabasol a di agbabbabawi ti mailaksid. Ammo dagiti panglakayen a serioso dayta, banag a saanda a tagtagilag-anen. Ammoda a mangdisdisiplina ni Jehova “iti maitutop a pamay-an.” (Jer. 30:11) Ay-ayatenda dagiti kakabsatda, ken dida kayat ti mangaramid iti aniaman a mangdangran iti espiritualidadda. Ngem no dadduma, maipakita dagiti panglakayen ti ayat ken asida no ilaksidda ti nakabasol iti kongregasion.

13. Apay a masapul idi a mailaksid ti maysa a Kristiano idiay Corinto?

¹³ Kitaentayo ti inaramid ni apostol Pablo iti maysa a di agbabbabawi a nakabasol idi umuna a siglo. Adda Kristiano idiay Corinto a makidendenna iti asawa ni amana. Nagdakes dayta! Ammo ni Pablo nga imbaga idi ni Jehova kadagiti nagkauna nga Israelita: “No makidenna ti lalaki iti asawa ni tatangna, ibabainna ni tatangna. Agpada a mapapatay ti lalaki ken ti babai ket basolda dayta.” (Lev. 20:11) Siempre, saan a mabalin nga ibilin ni Pablo a mapapatay ti lalaki. Ngem imbilinna kadagiti taga-Corinto a masapul nga ilaksidda. Maim-impluensiaan idin ti dadduma iti kongregasion gapu iti immoral nga ar-aramiden dayta a lalaki. Adda pay ketdi dagiti saan a mangibilang a nadagsen a basol ti ar-aramidenna!​—1 Cor. 5:1, 2, 13.

14. Kasano nga impakita ni Pablo ti asi iti nailaksid a lalaki idiay Corinto, ken apay? (2 Corinto 2:5-8, 11)

¹⁴ Idi agangay, naammuan ni Pablo a talaga a nagbalbaliwen ti nakabasol. Pudno ti panagbabawina! Uray no nangyeg ti lalaki iti pakaibabainan ti kongregasion, imbaga ni Pablo kadagiti panglakayen a dina kayat ti agsao “iti nasakit.” Imbilinna kadakuada: “Siaasi a pakawanen ken liwliwaenyo koma.” Ti rason ni Pablo? “Tapno saan a lapunosen ti nakaro a ladingit.” Naasian ni Pablo iti agbabbabawi a lalaki. Dina kayat a makita a malapunos ti lalaki iti liday, ken maupay iti naaramidanna nga uray la isardengnan ti dumawat iti pammakawan.​—Basaen ti 2 Corinto 2:5-8, 11.

15. Kasano a maipakita dagiti panglakayen ti kinainget a napakuyogan iti asi?

¹⁵ Kas ken Jehova, pagay-ayat dagiti panglakayen nga ipakita iti asi. Naingetda no kasapulan ngem ipakitada ti asi no posible no la ket ta adda pangibatayanda a mangaramid iti dayta. Ta no saan, dida ipakpakita ti asi no di ket konkonsintirenda ti nakabasol. Ngem dagiti laeng kadi panglakayen ti masapul a mangipakita iti asi?

16. Sigun iti Proverbio 21:13, ania ti aramiden ni Jehova kadagiti saan a mangipakita iti asi?

¹⁶ Ikagkagumaan ti amin a Kristiano a tuladen ti asi ni Jehova. Apay? Ti maysa a rason ket saan a denggen ni Jehova dagidiay saan a mangipakita iti asi iti sabsabali. (Basaen ti Proverbio 21:13.) Kayattayo a denggen ni Jehova dagiti kararagtayo isu nga ikagumaantayo a liklikan ti agbalin a di mannakipagrikna. Imbes nga iyaleng-alengtayo ti panagrigat ti maysa a kapammatian, masapul a kanayon a nakasaganatayo a dumngeg iti “panagpatulong ti nanumo.” Masapul met nga ipapusotayo daytoy a balakad ti Biblia: “Daydiay saan a mangngaasi maukomto nga awanan asi.” (Sant. 2:13) No sipapakumbaba a panunotentayo a kasapulantayo unay ti asi, ad-adda met a maipakitatayo ti asi. Lallalo pay a kayattayo nga ipakita ti asi no agsubli iti kongregasion ti agbabbabawi a nakabasol.

17. Kasano nga impakita ni Ari David ti napudno nga asi?

¹⁷ Makatulong kadatayo dagiti ulidan iti Biblia tapno maipakitatayo ti asi ken maliklikantayo ti kinaulpit. Ti maysa kadakuada ket ni Ari David. Masansan nga impakitana ti napudno nga asi. Uray no kayat a patayen ni Saul, kinaasian ni David dayta nga ari a dinutokan ti Dios. Pulos a dina binales wenno dinangran.​—1 Sam. 24:9-12, 18, 19.

18-19. Ania ti dua a pasamak a saan nga impakita ni David ti asi?

¹⁸ Nupay kasta, saan a kanayon a naasi ni David. Kas pagarigan, ti nauyong a ni Nabal ininsultona ni David ken dagiti tattaona ken dina inikkan ida iti makan. Gapu iti dayta, nakapungtot ni David ken kayatna a patayen ni Nabal ken ti amin a lallaki iti sangakabbalayanna. Imbag laengen ta nagtignay a dagus ni Abigail a naanus nga asawa ni Nabal, isu a naliklikan ni David ti panangibukbok iti dara.​—1 Sam. 25:9-22, 32-35.

¹⁹ Iti sabali a gundaway, inyestoria ni propeta Natan ken David ti maipapan iti nabaknang a lalaki a nangtakaw iti karnero nga ipatpateg ti maysa a napanglaw a kaarrubana. Nakaunget ni David isu nga imbagana: “Isapatak iti nagan ti sibibiag a Dios a ni Jehova, rumbeng a mapapatay dayta a tao!” (2 Sam. 12:1-6) Pagaammo ni David ti Mosaiko a Linteg. No adda tao a nagtakaw iti maysa a karnero, masapul a bayadanna dayta iti uppat a karnero. (Ex. 22:1) Ngem ti ngay sentensia nga ipapatay? Naulpit dayta a dusa. Ngem ilustrasion la gayam dayta ni Natan tapno ipaawatna ken David a nakarkaro nga amang dagiti krimen nga inaramidna! Pinaneknekan ni Jehova nga adayo a naas-asi isuna ngem ni David idinto ta ni David ket saan a naasian iti nagtakaw iti karnero iti ilustrasion ni Natan!​—2 Sam. 12:7-13.

20. Ania ti masursurotayo iti kapadasan ni David?

²⁰ Gapu iti pungtot ni David, inukomna ni Nabal ken ti amin a lallaki iti sangakabbalayanna a maikarida a mapapatay. Ken idi agangay, imbaga ni David a ti lalaki iti ilustrasion ni Natan ket maikari a mapapatay. Iti maikadua a pasamak, mabalin a panunotentayo no apay a naulpit ti panangukom ni David idinto ta nasingpet met a tao isuna. Usigentayo ti konteksto. Iti dayta a tiempo, makonkonsiensia ni David. Ti naulpit ken manangukom a kababalin ket pagilasinan a saan a nasalun-at ti espiritualidad ti maysa a tao. Impakdaar ni Jesus kadagiti pasurotna: “Isardengyo ti mangukom tapno saankayo a maukom; ta maukomkayto sigun iti panangukomyo iti sabsabali.” (Mat. 7:1, 2) Ikagumaantayo ngarud a liklikan ti kinaulpit ken agbalintayo a “napnuan iti asi,” kas iti Diostayo.

21-22. Ania ti dadduma a pamay-an a maipakitatayo ti asi?

²¹ Ti asi ket saan laeng a maysa a rikna. Kinapudnona, ti asi ket makita iti aramid. Panunotentayo ngarud koma amin no asino a kapamilia, kakongregasion, ken kalugarantayo ti agkasapulan iti tulong. Sigurado nga adu ti pamay-an a maipakitatayo ti asi! Adda kadi am-ammoyo nga agkasapulan iti liwliwa? Mabalintayo kadi a tulongan ida, kas iti panangted iti makan wenno dadduma pay a mangipakita a sipapanunottayo kadakuada? Agkasapulan ngata ti maysa a naisubli a kabsat iti makaliwliwa ken makaparegta a panaglalangen? Mabalintayo kadi nga ibaga iti dadduma ti makaliwliwa a mensahe ti naimbag a damag? Sumagmamano laeng dagita kadagiti kasayaatan a pamay-an a maipakitatayo ti asi iti amin a makalangentayo.​—Job 29:12, 13; Roma 10:14, 15; Sant. 1:27.

²² No nasiputtayo kadagiti kasta a panagkasapulan, makitatayto nga adu gayam ti gundaway a maipakitatayo ti asi. No ipakitatayo ti asi, maparagsaktayo ti nailangitan nga Amatayo, ti Dios a “napnuan iti asi”!