Ni Jesus​—Ulidan ti Kinapakumbaba

1, 2. Iti maudi a rabii ti panagbiag ni Jesus ditoy daga, ania a napateg a leksion ti insurona kadagiti apostolna?

ITI maudi a rabii ti panagbiagna ditoy daga, nakikadua ni Jesus kadagiti apostolna iti makinngato a siled ti maysa a balay idiay Jerusalem. Bayat ti panangrabiida, timmakder ni Jesus ket inikkatna ti makinruar a kawesna sa nangibarikes iti tualia. Kinargaanna iti danum ti maysa a palanggana ket binugguanna ti saksaka dagiti adalanna sa pinunasanna dagita. Kalpasanna, insuotna manen ti makinruar a kawesna. Apay nga inaramid ni Jesus daytoy a nanumo a trabaho?​—Juan 13:3-5.

² Inlawlawag a mismo ni Jesus: “Ammoyo kadi no ania ti inaramidko kadakayo? . . . Ngarud, no siak, nupay Apo ken Mannursuro, binugguak dagiti sakayo, rebbengyo met a bugguan dagiti saka ti maysa ken maysa. Ta impasdekko ti pagtuladan maipaay kadakayo, tapno, kas iti inaramidko kadakayo, rebbeng nga aramidenyo met.” (Juan 13:12-15) Babaen ti sidadaan a panangaramidna iti kasta a nanumo a trabaho, nangipaay ni Jesus iti napateg a leksion a nayukuok iti isipda ken nangparegta met kadakuada nga agbalin a napakumbaba iti masungad nga al-aldaw.

 3. (a) Iti dua a pasamak, kasano nga impaganetget ni Jesus ti pateg ti kinapakumbaba? (b) Ania ti mausig iti daytoy nga artikulo?

³ Idi binugguan ni Jesus ti saksaka dagiti apostolna, saan a dayta ti damo a panangipaganetgetna iti pateg ti kinapakumbaba. Iti immun-una a pasamak a nagiinnartap ti dadduma nga apostol, nangala ni Jesus iti maysa nga ubing a pinagtakderna iti sibayna, ket kinunana kadakuada: “Siasinoman nga umawat iti daytoy nga ubing maigapu iti naganko awatennak met, ket siasinoman nga umawat kaniak awatenna met ti nangibaon kaniak. Ta ti agtigtignay a kas maysa a nanumnumo kadakayo amin isu dayta ti naindaklan.” (Luc. 9:46-48) Idi agangay, yantangay ammo ni Jesus a tartarigagayan dagiti Fariseo ti kinalatak, kinunana: “Tunggal maysa a mangitan-ok iti bagina maipababanto ket ti mangipababa iti bagina maitan-okto.” (Luc. 14:11) Nalawag a kayat ni Jesus a napakumbaba koma ti panagpampanunot dagiti pasurotna ken saanda koma a napannakkel wenno napalangguad. Tapno matuladtayo ti ulidanna, usigentayo no kasano nga impakitana ti kinapakumbaba. Kitaentayo met no kasano a saan laeng a dagiti mangipakpakita iti dayta a kababalin ti magunggonaan no di pay ket ti sabsabali.

 4. Kasano nga impakita ti bugbugtong nga Anak ti Dios ti kinapakumbabana sakbay pay a nagbalin a tao?

⁴ Napakumbaban ti bugbugtong nga Anak ti Dios sakbay pay nga immay ditoy daga. Sakbay a nagbalin a tao, di mabilang a tawtawen a kadua ni Jesus ti nailangitan nga Amana. Kastoy ti kuna ti libro ti Isaias maipapan iti nasinged a relasion ti Anak iti Amana: “Ti met laeng Soberano nga Apo Jehova intedna kaniak ti dila dagidiay nasursuruan, tapno maammuak no kasano a sungbatak iti maysa a sao daydiay nabannog. Mangriing iti binigat; riingenna ti lapayagko tapno dumngeg a kas kadagidiay nasursuruan. Ti met laeng Soberano nga Apo Jehova linuktanna ti lapayagko, ket siak, iti biangko, saanak a rebelioso. Saanak a bimmaw-ing iti sungani a turong.” (Isa. 50:4, 5) Impakita ti Anak ti Dios ti kinapakumbabana ken dimngeg a nalaing iti insuro kenkuana ni Jehova. Sigagagar ken situtulok a nagsursuro iti pudno a Dios. Napaliiw a mismo ni Jesus ti kinapakumbaba ni Jehova iti panangipakitana iti asi iti managbasol a sangatauan!

 5. Kas Miguel nga arkanghel, kasano nga inyulidan ni Jesus ti kinapakumbaba ken kinaemma idi naaddaan iti pannakisusik iti Diablo?

⁵ Saan nga amin a parsua idiay langit ket napakumbaba kas iti bugbugtong nga Anak ti Dios. Kas pagarigan, ti anghel a nagbalin a Satanas a Diablo saanna a kayat ti agsursuro ken Jehova. Binay-anna a tumanor iti pusona ti kasupadi ti kinapakumbaba​—ti kinapannakkel ken kinatangsit​—ket nagrebelde ken Jehova. Iti sabali a bangir, kontento ni Jesus iti saadna ken saanna a kayat nga usaren ti autoridadna iti di umiso a pamay-an. Kas Miguel nga arkanghel, saan a limbes ni Jesus iti autoridadna idi ‘naaddaan iti pannakisusik iti Diablo gapu iti bagi ni Moises.’ Imbes ketdi, impakita ti Anak ti Dios a napakumbaba ken naemma. Impabiangna ken Jehova, ti Kangatuan nga Ukom ti uniberso, ti pannakataming ti bambanag iti pamay-an ken tiempo nga inkeddengna.​—Basaen ti Judas 9.

 6. Kasano nga impakita ni Jesus ti kinapakumbaba idi inawatna ti annongen nga agbalin a Mesias?

⁶ Awan duadua a karaman iti bambanag a naammuan ni Jesus sakbay a nagbalin a tao ket dagiti padto mainaig iti panagbiagna ditoy daga kas Mesias. Nasaksakbay ngarud nga ammona dagiti mapasaranna a rigat. Ngem kaskasdi nga inawat ni Jesus ti annongen nga agbiag ditoy daga ken matay kas naikari a Mesias. Apay? Napakumbaba ngamin ti bugbugtong nga Anak ti Dios. Intampok dayta ni apostol Pablo idi insuratna: “Nupay adda idi iti langa ti Dios, saanna a pinanunot ti panangagaw, kayatna a sawen, nga isu makipada koma iti Dios. Saan, no di ket inuksobanna ti bagina ket innalana ti langa ti maysa nga adipen ket nagbalin a kaas-asping ti tattao.”​—Fil. 2:6, 7.

7, 8. Kasano nga impakita ni Jesus ti kinapakumbabana uray idi ubing pay ken bayat ti ministeriona ditoy daga?

⁷ “Idi [a ni Jesus] nasarakanna ti bagina iti langa a kas maysa a tao,” insurat ni Pablo, “impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.” (Fil. 2:8) Napakumbaban ni Jesus sipud kinaubingna. Nupay imperpekto dagiti nagannakna​—da Jose ken Maria​—sipapakumbaba nga ‘intultuloyna ti nagpasakup kadakuada.’ (Luc. 2:51) Nagsayaat dayta nga ulidan para kadagiti agtutubo. Bendisionan la ketdi ida ti Dios no situtulok nga agpasakupda kadagiti nagannakda.

⁸ Kas adulto, impakita ni Jesus ti kinapakumbabana babaen ti panangipangpangrunana iti pagayatan ni Jehova. (Juan 4:34) Bayat ti ministeriona, inusar ni Jesu-Kristo ti personal a nagan ti Dios ken tinulonganna dagiti tattao a maaddaan iti umiso a pannakaammo maipapan kadagiti kualidad ni Jehova ken iti panggepna para iti sangatauan. Nagbiag met ni Jesus maitunos iti insurona maipapan ken Jehova. Kas pagarigan, iti modelo a kararag, kastoy ti umuna a punto a dinakamat ni Jesus: “Amami nga adda iti langlangit, masantipikar koma ti naganmo.” (Mat. 6:9) Isursurona ngarud kadagiti pasurotna nga ipangpangrunada ti panangsantipikar iti nagan ni Jehova. Kasta a mismo ti inaramid ni Jesus. Idi agngudon ti ministerio ni Jesus ditoy daga, naibagana iti kararagna ken Jehova: “Impakaammok kadakuada [kadagiti apostol] ti naganmo ket ipakaammokto dayta.” (Juan 17:26) Kasta met, iti intero a ministeriona, ni Jehova ti pinadayawanna iti aniaman a naaramidanna ditoy daga.​—Juan 5:19.

 9. Ania ti impadto ni Zacarias maipapan iti Mesias, ken kasano a tinungpal daytoy ni Jesus?

⁹ Impadto ni Zacarias maipapan iti Mesias: “Agrag-oka unay, O anak a babai ti Sion. Agdir-ika a sibaballigi, O anak a babai ti Jerusalem. Adtoy! Ti met laeng arim umay kenka. Isu nalinteg, wen, naisalakan; napakumbaba, ken sisasakay iti asno, iti mismo a nataenganen nga animal nga anak ti asna.” (Zac. 9:9) Natungpal daytoy idi simrek ni Jesus iti Jerusalem sakbay ti Paskua idi tawen 33 C.E. Inyaplag dagiti tattao ti makinruar a kawesda iti kalsada kasta met dagiti sanga ti kaykayo. Nagkakaribuso dagiti tattao iti siudad bayat ti iseserrekna. Ngem uray pinadpadayawanda kas Ari, napakumbaba latta ni Jesus.​—Mat. 21:4-11.

10. Ania ti napaneknekan iti situtulok a panagtulnog ni Jesus agingga ken patay?

¹⁰ Nangnangruna nga impakita ni Jesu-Kristo ti kinapakumbaba ken kinatulnogna idi natay iti pagtutuokan a kayo. Pinaneknekanna a kabaelan dagiti tattao ti agtalinaed a nasungdo ken Jehova uray no agpasarda iti nakaro a suot. Impakita met ni Jesus nga ulbod ti imbaga ni Satanas nga agserserbi laeng dagiti tattao ken Jehova gapu iti bendision a maaw-awatda. (Job 1:9-11; 2:4) Ti naan-anay a kinatarnaw ni Kristo intandudona met ti kinaumiso ken kinalinteg ti panangituray ni Jehova iti intero nga uniberso. Naragsakan la ketdi ni Jehova idi nakitana ti naan-anay a kinasungdo ti napakumbaba nga Anakna.​—Basaen ti Proverbio 27:11.

11. Gapu iti subbot a daton ni Jesu-Kristo, ania dagiti namnama a naluktan para kadagidiay addaan iti pammati?

¹¹ Babaen ti ipapatayna iti kayo a pagtutuokan, binayadan met ni Jesus ti gatad ti subbot para iti sangatauan. (Mat. 20:28) Gapu iti dayta, mapakawan ni Jehova dagiti basoltayo maibatay kadagiti nalinteg a pagalagadanna ken naaddaantayo iti gundaway nga agbiag nga agnanayon. “Babaen ti maysa nga aramid a panangpalinteg imbungana iti amin a kita ti tattao ti pannakaideklarada a nalinteg maipaay iti biag,” insurat ni Pablo. (Roma 5:18) Gapu iti ipapatay ni Jesus, naaddaan dagiti napulotan iti espiritu a Kristiano iti namnama nga agbiag kas imortal a parsua idiay langit. Naaddaan met ti “sabsabali a karnero” iti namnama nga agbiag nga agnanayon ditoy daga.​—Juan 10:16; Roma 8:16, 17.

12. Kasano nga impakita ni Jesus a naalumamay ken napakumbaba iti pannakilangenna kadagiti imperpekto a tattao?

¹² Iyaw-awis ni Jesus nga umay kenkuana dagiti amin a “mabambannogan ken madagdagsenan.” Kinunana: “Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” (Mat. 11:28, 29) Gapu ta napakumbaba ken naalumamay ni Jesus, naasi ken patas ti pannakilangenna kadagiti imperpekto a tattao. Rasonable iti banag nga ekspektarenna kadagiti adalanna. Kinomendaran ken pinaregtana ida. Saanna ida a tinagibassit wenno imbilang a di maikari, ket saan met a nasabrak wenno naulpit. Imbes ketdi, impasigurado ni Jesus kadagiti pasurotna a magin-awaanda no umadanida kenkuana ken tungpalenda dagiti pannursurona, ta ti sangolna ket nanam-ay ken nalag-an ti awitna. Komportable kenkuana dagiti lallaki, babbai, lallakay, babbaket, ken ubbing.​—Mat. 11:30.

13. Kasano nga impakita ni Jesus ti asi kadagidiay nakaay-ay-ay?

¹³ Naasian ni Jesus kadagiti gagangay nga umili ti Israel gapu ta nakaay-ay-ayda, ket siaayat a tinulonganna ida. Iti asideg ti Jerico, nalabsanna ti dua a bulsek nga agpalpalama a ni Bartimeo ken ti di nainaganan a kaduana. Dida simmardeng a nagpakpakaasi ken Jesus, ngem inanawa ida dagiti tattao. Gapu iti dayta, naglaka koma a dina lattan ikaskaso ti panagpakaasi dagiti bulsek. Ngem imbilin ni Jesus a maiyegda kenkuana, ket insublina ti panagkitada gapu iti asina. Wen, tinulad ni Jesus ni Jehova nga Amana babaen ti panangipakitana iti kinapakumbaba ken asi kadagiti managbasol.​—Mat. 20:29-34; Mar. 10:46-52.

14. Ania dagiti gunggona nga imbunga ti kinapakumbaba ni Jesus?

¹⁴ Adu ti naragsakan ken nagunggonaan iti kinapakumbaba ni Jesu-Kristo. Naragsakan ni Jehova ta nakitana a sipapakumbaba a nagpasakup iti pagayatanna ti dungdungnguenna nga Anak. Nabang-aran dagiti apostol ken adalan gapu iti kinaalumamay ken kinapakumbaba ni Jesus. Ti ulidan, pannursuro, ken napasnek a komendasionna ti nakatulong kadakuada a rumang-ay iti naespirituan. Nagunggonaan dagiti gagangay a tattao iti kinapakumbaba ni Jesus ta naipaayanda iti tulong, pannursuro, ken pammaregta. Kinapudnona, amin a masubbot a tattao ket agnanayonto a magunggonaan iti subbot a daton ni Jesus.

15. Kasano a nagunggonaan ni Jesus iti kinapakumbabana?

¹⁵ Nagunggonaan kadi met ni Jesus iti kinapakumbabana? Wen, agsipud ta imbaga ni Jesus kadagiti adalanna: “Siasinoman a mangipababa iti bagina maitan-okto.” (Mat. 23:12) Pimmayso kenkuana dagita a sasao. Inlawlawag ni Pablo: “[Ni Jesus] intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.” Gapu iti kinapakumbaba ken kinamatalek ni Jesus idi adda ditoy daga, intan-ok ni Jehova babaen ti panangtedna kenkuana iti autoridad iti amin a parsua idiay langit ken ditoy daga.​—Fil. 2:9-11.

16. Ania ti mangipakita a napakumbabanto latta ti Anak ti Dios?

¹⁶ Agtultuloyto latta a napakumbaba ti Anak ti Dios iti pangaramidna iti bambanag. Impakpakauna ti salmista ti panagtignay ni Jesus, kas Ari idiay langit, maibusor kadagiti kabusorna, idi inkantana: “Iti kinangayedmo agtultuloyka iti panagballigi; agsakayka maipuon ti kinapudno ken kinapakumbaba ken kinalinteg.” (Sal. 45:4) Inton Armagedon, makigubatto ni Jesu-Kristo ken agsakay maipuon ti kinapudno, kinalinteg, ken kinapakumbaba. Ket anianto ti mapasamak iti ngudo ti Sangaribu a Tawen a Turay ti Mesianiko nga Ari, inton ‘maiyegnan iti pannakapukaw ti isuamin a gobierno ken isuamin nga autoridad ken pannakabalin’? Napakumbabanto latta kadi? Wen, ta ‘iyawatnanto ti pagarian iti Dios ken Amana.’​—Basaen ti 1 Corinto 15:24-28.

17, 18. (a) Apay a napateg a tuladen dagiti adipen ni Jehova ti kinapakumbaba ni Jesus? (b) Ania ti mausig iti sumaganad nga artikulo?

¹⁷ Iti biangtayo, tultuladentayo met laeng kadi ti kinapakumbaba ni Jesus? Anianto ti mapasamak kadatayo iti iyaay ni Jesu-Kristo inton Armagedon? Yantangay umayto maigapu iti kinapakumbaba ken kinalinteg, dagidiay laeng napakumbaba ken nalinteg ti isalakanna. Patanorentayo ngarud ti kinapakumbaba tapno maisalakantayo. Kasta met, no kasano a nagunggonaan ni Jesu-Kristo ken ti dadduma gapu iti kinapakumbabana, magunggonaantay met ken uray ti sabsabali no napakumbabatayo.

¹⁸ Ania ti makatulong kadatayo a mangtulad iti kinapakumbaba ni Jesus? Kasano a maipakitatayo ti kinapakumbaba uray no maipasangotayo kadagiti pakarigatan? Mausig dagitoy a saludsod iti sumaganad nga artikulo.