Sanayen ni Jehova Dagidiay Mangipastor iti Arbanna

“Ni met laeng Jehova mangted iti sirib; manipud ngiwatna adda pannakaammo ken panangilasin.”​—PROVERBIO 2:6.

1, 2. Apay a dagiti bautisado a lallaki mangragpatda iti kanayonan a responsabilidad iti kongregasion?

“NAKARAGRAGSAKAK idi madutokanak a panglakayen,” kuna ni Nick, a pito a tawenen nga agserserbi kas manangaywan. “Imbilangko a maysa a gundaway daytoy a pribilehio tapno ad-adda a maparang-ayko ti panagserbik ken ni Jehova. Mariknak a dakkel ti utangko kenkuana gapu kadagiti amin nga inaramidna agpaay kaniak. Kayatko met a tulongan dagiti kakabsat iti kongregasion agingga iti kabaelak, a saranayek ida a kas iti panangsaranay idi kaniak dagiti dadduma a panglakayen.” Ngem nupay maragsakan, adda met sumagmamano a pakadanaganna. Kinuna ni Nick: “Gapu ta awan pay 30 a tawenko idi madutokanak, madanaganak di la ket ta awananak iti nauneg a pannakaawat ken sirib​—dagiti napateg nga abilidad tapno sieepektibo a maipastorak ti kongregasion.”

² Adu ti rason nga agragsak dagidiay dinutokan ni Jehova a mangaywan iti arbanna. Impalagip ni apostol Pablo kadagiti panglakayen idiay Efeso ti maysa a rason, idi inadawna ti kinuna ni Jesus: “Ad-adu ti kinaragsak iti panangted ngem iti panangawat.” (Aramid 20:35) Ti panagserbi kas ministerial nga adipen wenno kas panglakayen luktanna dagiti kanayonan a gundaway para kadagiti bautisado a lallaki tapno makaitedda ken ni Jehova ken iti kongregasion. Kas pagarigan, dagiti ministerial nga adipen tumulongda kadagiti panglakayen. Malaksid iti dayta, asikasuenda ti adu pay a napateg nga annongen nga agkalikagum iti dakkel a panawenda. Ti panagayatda iti Dios ken iti kaarruba ti mangtigtignay kadakuada a mangipaay iti napateg a serbisio.―Marcos 12:30, 31.

 3. Apay a bumdeng ti dadduma a mangragpat kadagiti pribilehio iti kongregasion?

³ Komusta met ngay ti Kristiano a lalaki a nalabit bumdeng a mangragpat iti pribilehio kas ministerial nga adipen ken inton agangay kas panglakayen gapu ta iti panagriknana, isu ket saan a maikari? Kas ken Nick, nalabit a panunotenna nga awan kenkuana dagiti kasapulan nga abilidad tapno agbalin nga epektibo a pastor. Maysaka kadi kadagiti bautisado a lallaki nga addaan iti kasta a rikna? Nainrasonan met dagita a pakadanagan. Panungsungbaten ngamin ni Jehova dagiti pastor maibatay iti pamay-an ti panangtratoda iti arban. Kinuna ni Jesus: “Tunggal maysa a naikkan iti adu, adunto ti makalikaguman kenkuana; ket daydiay insaad dagiti tattao nga agaywan iti adu, kalikagumandanto kenkuana ti ad-adu ngem iti gagangay.”​—Lucas 12:48.

 4. Kasano ti panangtulong ni Jehova kadagidiay dutokanna a mangaywan kadagiti karnerona?

⁴ Namnamaen kadi ni Jehova kadagiti dinutokanna a ministerial nga adipen ken papanglakayen a bukodda nga ibaklay ti kanayonan nga annongen? Saan. Nangipaay ketdi iti praktikal a katulongan tapno saanda laeng a makapagtultuloy no di ket rumang-ayda pay. Kas nausig iti immuna nga artikulo, ipaay kadakuada ni Jehova ti nasantuan nga espirituna, ket tumulong kadakuada dagiti bunga ti espiritu tapno sidudungngo a maaywananda ti arban. (Aramid 20:28; Galacia 5:22, 23) Kanayonanna, ipaayan ida ni Jehova iti sirib, pannakaammo, ken panangilasin. (Proverbio 2:6) Kasanona nga aramiden dayta? Usigentayo ti tallo a pamay-an no kasano ti panangsanay ni Jehova kadagiti indibidual a dutokanna a mangaywan kadagiti karnerona.

Sinanay Dagiti Aduan iti Kapadasan a Papastor

 5. Apay nga epektibo a pastor da Pedro ken Juan?

⁵ Idi dimmatag da Pedro ken Juan iti saklang ti Sanhedrin, dagiti ukom nga imbilang ti lubong kas mamasirib minatmatanda dagiti apostol kas tattao nga ‘awanan iti adal ken gagangay.’ Agpayso, ammo dagitoy ti agbasa ken agsurat, ngem saanda a nagsanay kadagiti rabbi no iti panangadal iti Kasuratan. Nupay kasta, pinaneknekan da Pedro ken Juan ken ti dadduma pay nga adalan nga epektiboda a mannursuro, yantangay adu kadagiti dimngeg kadakuada ti naguyugoy nga agbalin a manamati. Kasano a nagbalin a naisangsangayan a mannursuro dagitoy a gagangay a tattao? Kalpasan a nangngegda da Pedro ken Juan, ti korte “nangrugi a mabigbigda ti maipapan kadakuada a nakikuykuyogda idi ken Jesus.” (Aramid 4:1-4, 13) Pudno, immawatda iti nasantuan nga espiritu. (Aramid 1:8) Ngem nabatad met―uray kadagiti ukom a bulsek iti naespirituan​—a sinanay ni Jesus dagitoy a lallaki. Bayat ti kaaddana ditoy daga, sinursuruan ni Jesus dagiti apostol saan laeng a no kasano ti mangurnong kadagiti arig karnero a tattao no di pay ket no kasano ti mangipastor kadakuada apaman a nagbalinda a paset ti arban.―Mateo 11:29; 20:24-28; 1 Pedro 5:4.

 6. Ania nga ulidan ti impasdek da Jesus ken Pablo no iti panangsanay kadagiti dadduma?

⁶ Kalpasan a napagungar ni Jesus, intultuloyna a sinanay dagidiay nadutokan kas pastor. (Apocalipsis 1:1; 2:1–3:22) Kas pagarigan, isu a mismo ti nangpili ken ni Pablo ken nangiwanwan iti pannakasanayna. (Aramid 22:6-10) Impateg ni Pablo ti pannakasanayna ket insurona kadagiti dadduma a panglakayen ti naadalna. (Aramid 20:17-35) Kas pagarigan, adu a tiempo ken pigsa ti binusbosna a nangsanay ken ni Timoteo tapno agbalin daytoy a “maysa a mangmangged” iti panagserbi iti Dios, “nga awan ti aniaman nga ibainna.” (2 Timoteo 2:15) Nagbalinda a nasinged nga aggayyem. Sakbayna, insurat ni Pablo maipapan ken ni Timoteo: “Kas iti maysa nga anak iti ama isu nagpaadipen a kaduak iti pannakaidur-as ti naimbag a damag.” (Filipos 2:22) Awan panggep ni Pablo a pagbalinenna nga adalanna ni Timoteo wenno ti asinoman a tao. Imbes ketdi, pinaregtana dagiti padana a manamati nga agbalinda a ‘tumutulad kenkuana, kas met iti panangtuladna ken Kristo.’―1 Corinto 11:1.

7, 8. (a) Ania a kapadasan ti mangipakita kadagiti agkakaimbag a resulta no dagiti panglakayen tuladenda da Jesus ken Pablo? (b) Kaano a rumbeng a rugian dagiti panglakayen ti mangsanay kadagiti potensial a ministerial nga adipen ken panglakayen?

⁷ Kas panangtulad kada Jesus ken Pablo, dagiti aduan iti kapadasan a pastor ikagumaanda ti mangsanay kadagiti bautisado a lallaki, a mangyeg kadagiti umasping nga agkakaimbag a resulta. Usigenyo ti kapadasan ni Chad. Nupay dimmakkel iti pamilia a saan nga agkakarelihion, isu ket nabiit pay a nadutokan kas maysa a panglakayen. Kunana: “Iti panaglabas dagiti tawen, dadduma nga aduan iti kapadasan a panglakayen ti timmulong kaniak a mangparang-ay iti espiritualidadko. Gapu ta saan a manamati ni tatangko, inaywanandak dagitoy a panglakayen ket nagbalinda a naespirituan nga ammak. Inan-anusandak a sinanay iti ministerio, ken idi agangay, maysa a panglakayen ti nangsanay kaniak a mangasikaso kadagiti naitalek kaniak nga annongen iti kongregasion.”

⁸ Kas ipakita ti kapadasan ni Chad, dagiti manakem a panglakayen rugianda ti mangsanay kadagiti potensial a ministerial nga adipen ken panglakayen sakbay pay nga agbalin a kualipikado dagitoy kadagita a pribilehio. Apay? Gapu ta ibilin ti Biblia a masapul a maragpat agpadpada dagiti ministerial nga adipen ken dagiti panglakayen ti nangato a moral ken naespirituan a pagalagadan sakbay a madutokanda nga agserbi. Masapul a “masubok koma nga umuna dagitoy no maipapan iti pannakaikari.”​—1 Timoteo 3:1-10.

 9. Ania ti responsabilidad dagiti nataengan a pastor, ken apay?

⁹ Sakbay a masubok dagiti bautisado a lallaki, maiparbeng laeng a masanayda nga umuna. Kas panangyilustrar: Makapasa ngata ti estudiante no makiddaw kenkuana nga alaenna ti maysa a narigat nga eksaminasion nga awan ti pannakasanay a naawatna manipud kadagiti mannursuro? Dakkel ti posibilidadna a saan. Gapuna, kasapulan ti panagsanay. Nupay kasta, dagiti nalaing a mannursuro sanayenda dagiti estudiante saan laeng a tapno makapasa dagitoy iti eksaminasion no di ket tapno mausar dagitoy ti pannakaammo a nagun-odda. Umasping iti dayta, dagiti naanep a panglakayen tulonganda dagiti bautisado a lallaki a mangpatanor kadagiti galad a makalikaguman iti maysa a madutokan a lalaki babaen ti panangipaay iti panagsanay a kasapulanda. Aramidenda dayta saan laeng a tapno madutokanto nga agserbi dagitoy a kakabsat no di pay ket tapno mabaelanda nga aywanan a naan-anay ti arban. (2 Timoteo 2:2) Siempre, masapul nga aramiden dagiti bautisado a lallaki ti pasetda babaen ti panangikagumaanda a mangragpat kadagiti kualipikasion a makalikaguman iti maysa a ministerial nga adipen wenno panglakayen. (Tito 1:5-9) Nupay kasta, dagidiay gumawgaw-at iti pribilehio iti kongregasion matulonganda a rumang-ay a naparpartak no sidadaan a sanayen ida dagiti aduan iti kapadasan a papastor.

10, 11. Kasano ti panangsanay dagiti pastor kadagiti dadduma no iti panangibaklay kadagiti kanayonan nga annongen?

¹⁰ Ania ti mabalin nga aramiden dagiti eksperiensiado a papastor tapno masanayda dagiti dadduma a mangibaklay kadagiti annongen iti kongregasion? Umuna, masapul nga interesadoda a tumulong kadagiti kakabsat a lallaki iti kongregasion―babaen ti regular a pannakikaduada kadagitoy iti tay-ak ti ministerio ken panangtulong kadakuada a mangparang-ay kadagiti abilidadda a mangaramat “a siuumiso iti sao ti kinapudno.” (2 Timoteo 2:15) Dagiti nataengan a pastor saritaenda kadagitoy a kakabsat a lallaki ti ragsak ti panagserbi kadagiti sabsabali ken ti pannakapnek a masagrapda gapu iti panangipasdek ken panangragpatda kadagiti naespirituan a kalat. Siaayat met a mangipaayda kadagiti espesipiko a singasing no kasano nga agbalin ti kabsat a lalaki kas maysa a ‘mapagulidanan iti arban.’―1 Pedro 5:3, 5.

¹¹ Apaman a madutokan ti kabsat kas maysa a ministerial nga adipen, isu ket itultuloy a sanayen dagiti masirib a pastor. Ni Bruce, a nagserbi kas maysa a panglakayen iti adun a dekada, kunana: “Pakaragsakak nga irepaso iti maysa a kabbaro a nadutokan a ministerial nga adipen dagiti instruksion nga impablaak ti matalek ken masirib nga adipen. Basaenmi met ti aniaman a pagalagadan mainaig iti espesipiko nga annongenna, ket kalpasanna, tulongak agingga a makabesadona dagiti trabahona.” Bayat nga umad-adu ti kapadasan ti ministerial nga adipen, mabalin met a masanay iti trabaho a panagipastor. Ituloy ni Bruce: “No mangikuyogak iti ministerial nga adipen bayat ti panagipastor a panagsarungkar, tulongak a mangpili kadagiti espesipiko a teksto a makaparegta ken makaguyugoy iti indibidual wenno pamilia a sarungkaranmi. Napateg ngamin a masursuro ti maysa no kasano nga usaren ti Kasuratan iti wagas a makatukay iti rikna tapno agbalin nga epektibo a pastor.”―Hebreo 4:12; 5:14.

12. Kasano a makatulong dagiti aduan iti kapadasan a panglakayen no iti panangsanay kadagiti kabbaro a nadutokan a panglakayen?

¹² Makagunggona met ti agtultuloy a pannakasanay dagiti kabbaro a nadutokan a pastor. Ni Nick, a nadakamat itay, kunana: “Dakkel ti naitulong ti panangsanay kaniak ti dua a laklakay a panglakayen. Kaaduanna nga ammo dagitoy a kakabsat no kasano a tamingen dagiti bambanag. An-anusandak nga imdengan ken pudno nga ikabilanganda ti panangmatmatko uray no dida umanamong iti dayta. Adu ti nasursurok manipud iti napakumbaba ken nadayaw a wagas ti pannakilangenda kadagiti kakabsat iti kongregasion. Impasagepsep kaniak dagitoy a panglakayen ti kinapateg ti sisisigo a panangusar iti Biblia no mangtamtaming kadagiti parikut wenno no mangipapaay iti pammaregta.”

Sinanay ti Sao ti Dios

13. (a) Ania ti kasapulan ti maysa a kabsat a lalaki tapno agbalin nga epektibo a pastor? (b) Apay a kinuna ni Jesus: “Ti isursurok saanko a kukua”?

¹³ Ti Sao ti Dios, ti Biblia, pudno a naglaon kadagiti linteg, prinsipio, ken pagwadan a kasapulan dagiti pastor tapno agbalinda a ‘naan-anay a makabael, naan-anay a nakabalan maipaay iti tunggal naimbag nga aramid.’ (2 Timoteo 3:16, 17) Nalabit a nangato ti adal ti maysa a kabsat a lalaki, ngem ti panagbalinna nga epektibo a pastor ket agpannuray iti pannakaammona iti Kasuratan ken no kasanona nga iyaplikar dayta. Usigenyo ti ulidan ni Jesus. Isu ti kaaduan iti pannakaammo, kalaingan a mangilasin, ken kasisiriban a naespirituan a pastor a nagbiag ditoy daga; kaskasdi, isu ket saan a nagpannuray iti bukodna a sirib no isursurona dagiti karnero ni Jehova. Kinunana: “Ti isursurok saanko a kukua, no di ket kukua daydiay nangibaon kaniak.” Apay a ti nailangitan nga Amana ti binigbig ni Jesus a nagtaudan dagiti isursurona? Inlawlawagna: “Ti agsao manipud iti bukodna a parnuay sapsapulenna ti bukodna a dayag.”​—Juan 7:16, 18.

14. Kasano a dagiti pastor maliklikanda a biroken ti bukodda a pakaidayawan?

¹⁴ Dagiti nasungdo a pastor liklikanda a biroken ti bukodda a pakaidayawan. No mangbalakad wenno mangparegtada, ibatayda dayta iti Sao ti Dios, saan nga iti bukodda a sirib. Bigbigenda a ti annongen ti maysa a pastor isu ti panangtulongna kadagiti karnero a gumun-od ‘iti panunot ni Kristo,’ saan a ti panunot dagiti panglakayen. (1 Corinto 2:14-16) Kas pagarigan, ania ti mapasamak no ti panglakayen a tumultulong iti maysa nga agassawa a mangtaming kadagiti parikutda ket ibatayna ti balakadna iti bukodna a kapadasan imbes a kadagiti prinsipio ti Biblia ken impormasion nga impablaak ti “matalek ken masirib nga adipen”? (Mateo 24:45) Mabalin a ti balakadna ket nalabes a naimpluensiaan kadagiti lokal a kostumbre ken saan a nalawa ti saklawenna gapu iti limitado a pannakaammona. Saan met ketdi a dakes ti dadduma a kostumbre, ken nalabit nga aduan iti kapadasan ti panglakayen. Ngem ad-adda a magunggonaan dagiti karnero no paregtaen ida dagiti pastor nga umimdengda iti timek ni Jesus ken kadagiti sasao ni Jehova imbes nga iti kapanunotan dagiti tattao wenno iti idiktar dagiti lokal a kostumbre.―Salmo 12:6; Proverbio 3:5, 6.

Sinanay “ti Matalek ken Masirib nga Adipen”

15. Ania a trabaho ti intalek ni Jesus ‘iti matalek ken masirib nga adipen,’ ken ania ti maysa a rason a nagballigi ti klase adipen?

¹⁵ Dagiti pastor a kas kada apostol Pedro, Juan, ken Pablo ket kameng ti grupo nga inawagan ni Jesus kas “ti matalek ken masirib nga adipen.” Daytoy a klase adipen ket buklen dagiti napulotan iti espiritu a kakabsat ni Jesus ditoy daga, nga addaan iti namnama a makipagturay ken ni Kristo idiay langit. (Apocalipsis 5:9, 10) Kabayatan ti maudi nga al-aldaw daytoy a sistema, manamnama a bumassit a bumassit ti bilang dagiti kakabsat ni Kristo ditoy daga. Nupay kasta, ita pay laeng a kastoy kasaknap ti trabaho nga intalek ni Jesus kadakuada―ti panangikasaba iti naimbag a damag ti Pagarian sakbay a dumteng ti panungpalan. Pudno a naisangsangayan ti panagballigi ti klase adipen! Apay? Ti maysa a rason ket gapu ta nangsanayda kadagiti “sabsabali a karnero” a makitinnulong kadakuada iti trabaho a panangasaba ken panangisuro. (Juan 10:16; Mateo 24:14; 25:40) Iti agdama, daytoy a grupo ti mangitungtungpal iti dakdakkel a paset dayta a trabaho.

16. Kasano ti panangsanay ti klase adipen kadagiti nadutokan a lallaki?

¹⁶ Kasano nga ipapaay ti klase adipen daytoy a panagsanay? Idi umuna a siglo, adda dagiti pannakabagi ti klase adipen a naautorisaran a mangsanay ken mangdutok kadagiti agbalin a manangaywan kadagiti kongregasion, ket dagitoy ti mangsanay met kadagiti karnero. (1 Corinto 4:17) Kasta met laeng ita. Ti Bagi a Manarawidwid―ti bassit a grupo dagiti napulotan a panglakayen a mangibagi iti klase adipen―autorisaranna dagiti pannakabagina a mangsanay ken mangdutok kadagiti agbalin a ministerial nga adipen ken papanglakayen kadagiti nakaad-adu a kongregasion iti sangalubongan. Malaksid iti dayta, mangyur-urnos ti Bagi a Manarawidwid kadagiti eskuelaan a mangsanay kadagiti miembro ti Komite ti Sanga, agdaldaliasat a manangaywan, panglakayen, ken ministerial nga adipen no kasano ti kasayaatan a panangtaripato kadagiti karnero. Maipapaay dagiti kanayonan nga instruksion babaen kadagiti surat, artikulo iti Ti Pagwanawanan, ken dadduma pay a publikasion, kas iti Organisado a Mangaramid iti Pagayatan ni Jehova.a

17. (a) Kasano nga impakita ni Jesus ti panagtalekna iti klase adipen? (b) Kasano a maipakita dagiti naespirituan a pastor nga agtalekda iti klase adipen?

¹⁷ Nagdakkel ti panagtalek ni Jesus iti klase adipen isu nga impabiangna iti dayta ti “amin a sanikuana”―ti amin a naespirituan nga interesna ditoy daga. (Mateo 24:47) Paneknekan met dagiti nadutokan a papastor nga agtalekda iti klase adipen babaen ti panangyaplikarda kadagiti instruksion a maaw-awatda manipud iti Bagi a Manarawidwid. Wen, no dagiti pastor sanayenda dagiti sabsabali, no isuda a mismo ipalubosda a sanayen ida ti Sao ti Dios, ken no iyaplikarda ti pannakasanay nga ipapaay ti klase adipen, itantandudoda ti panagkaykaysa ti arban. Anian a yamantayo a nangsanay ni Jehova kadagiti lallaki a maseknan unay iti tunggal kameng ti kongregasion Kristiano!

[Footnote]

Ania ti Sungbatyo?

• Kasano ti panangsanay dagiti nataengan a naespirituan a pastor kadagiti sabsabali?

• Apay a saan a mangisuro dagiti pastor maibatay iti bukodda a kapanunotan?

• Kasano ken apay nga ipakita dagiti pastor ti panagtalekda iti klase adipen?

[Dagiti Ladawan iti panid 24, 25]

Dagiti Kristiano a panglakayen sanayenda dagiti ub-ubing a lallaki iti kongregasion

[Dagiti Ladawan iti panid 26]

Mangipapaay “ti matalek ken masirib nga adipen” iti aglaplapusanan a panangsanay kadagiti panglakayen