HIMENEO

[napanaganan iti nagan ni Himen, ti Griego a dios ti panagasawa].

Maysa nga apostata manipud Nakristianuan a pammati idi umuna a siglo. Isu dinakamat ni Pablo kas managtabbaaw ken napno kadagiti “ubbaw a panagsasao a sumalungasing iti nasantuan.” Iti isisiasina manipud kinapudno, ni Himeneo, agraman ti maysa nga agnagan Fileto, nangisuro iti ulbod a doktrina, ket inluodna ti pammati ti sumagmamano. Ti maysa kadagiti ulbod a sursuroda ket “napasamaken ti panagungar” idi kaaldawanda. Nalawag a kastoy ti sursuroda: ti panagungar ket naespirituan laeng, simboliko laeng, ken napagungaren dagiti dedikado a Kristiano, ket awanen ti sabali pay a kaipapananna ken awanton ti masanguanan a panagungar iti sidong ti Mesianiko a Pagarian ti Dios.​—2Ti 2:16-18; idiligyo ti 1Co 15:12-23.

Iti umuna a surat ni Pablo agpaay ken Timoteo, ti nagan ni Himeneo naikadua iti sabali pay nga apostata, ni Alejandro. Kunaen ti apostol nga inyawatna “ken Satanas” da Himeneo ken Alejandro, a nabatad a tumukoy iti panangparuar wenno panangilaksid kadakuada ni Pablo iti kongregasion.​—1Ti 1:18-20.