Dagiti Saludsod Manipud Kadagiti Managbasa

◼ Ti ili ti Dios rebbeng nga ‘aywananda dagidiay kukuada met laeng,’ gapuna kasano a mapagtalaw ni Abraham da Agar ken ni Ismael a mapan idiay let-ang?

Agpadpada a naayat ken maiyanatup laeng kadagiti ad-adipen ti Dios nga aywanan dagiti agkasapulan a kamkameng ti pamiliada. Maipapan kadagiti Nakristianuan a nagannak, insurat ni apostol Pablo: “Ngem no adda saan a mangtaraon kadagiti adda iti aywanna, ket nangruna dagiti kabbalayna met laeng, naglikudanna ti pammati ket dakdakes ngem iti saan a mammati.”​—1 Timoteo 5:8.

Makasigurotayo a ti kurso ni Abraham ket saan a maikontra iti espiritu dayta nadiosan a balakad, ta isut’ nangipakita ti ulidan ti pudno a pammati, kas “gayyem ni Jehova.”​—Santiago 2:23; Hebreo 11:8-19.

Ti Dios ti nagkari ti maysa a bendision babaen ti bin-i, wenno agtawid ni Abraham. Idi baketen ni Sara ken kaskasdi a lupes, ingunamgunamna ken ni Abraham a maaddaan ti maysa nga anak babaen ken ni Agar a maysa nga adipenna a babai nga Egipcio. Kamaudiananna, idi masikogen ni Agar, isut’ nangrugi nga agtignay a sikakas-ang ken Sara a daytat’ mabalin a mailadawan kas “kinaranggas,” wenno maysa a malisiuso a panagbasol a kontra iti ay-ayaten nga asawa ni Abraham. (Exodo 23:1; 2 Samuel 22:49; Salmo 11:5) Pinalubosan ni Sara ni Abraham nga ikabil ni Agar iti umiso a paglugaranna, gapu itoy nagtalaw ni Agar iti let-ang, a nalabit agturong idiay Egipto. Saan a kinuna ti salaysay nga isu ti nagbalon, gapuna mabalin a pagaammona a makagun-odto ti taraon ken danum kadagiti dadduma a kampamento, kas kadagiti grupo a Bedouin.​—Genesis 12:1-3, 7; 16:1-6.

Bimmalaet ti maysa nga anghel ket imbagana ken ni Agar nga isut’ agsubli, tapno maaddaanto kadagiti adu a kaputotan, ket ni Ismael nga anakna ‘ti imana maikaniwasto iti tumunggal tao.’ (Genesis 16:7-12) Di unay adu a tawen kamaudiananna, binusor ni Ismael ni agtutubo nga Isaac, ti pudpudno nga agtawid ni Abraham a naiyanak babaen ken ni Sara. Rinugian ni Ismael nga ‘ang-angawen’ wenno abusuen, ni Isaac. Daytoy ti nakarkaro pay ngem ti panaginnapal dagiti annak. Impamatmat ti Sao ti Dios dayta kas “panangidadanes” iti nasantuan-pannakaipadtona a bin-i ni Abraham. Gapuna maiyanatup iti natibker a panagtignay.​—Genesis 21:1-9; Galacia 4:29-31.

Kinuna ni Jehova ken ni Abraham nga ipangagna ti takder ni baketna iti kasapulan a maaramidan, a ‘pagtalawen ni Agar ken ti anakna.’ Nupay di maragsakan ni Abraham iti ipapanaw ni Agar a kadua ti anakna, nagaramid ni Abraham ti material a sagana nga agpaay kadakuada. Maigiddiat iti napalabas a panagtalaw ni Agar a napan iti let-ang, itatta isut’ pimmanaw nga addaan abasto ti tinapay (nalabit ipasimudaagna dagiti nadumaduma a taraon) ken danum​—nga impaay ni Abraham. Nalabit isu ti napukaw “idiay let-ang ti Beersheba,” ket naibus dagiti abastona sakbay a nakakita iti maysa kadagiti ubbog iti dayta a disso. Ngem ti rigatna ket saan a maipabasol ken ni Abraham, ta isut’ nagaramid ti ‘sagana nga agpaay kadagiti kukuana met laeng,’ nupay gapu ti maysa a panagbiddut kasapulan ti pannakapagtalawna manipud sangakabbalayan.​—Genesis 21:10-21.

[Mapa/Ladawan iti panid 31]

(Para iti aktual a pannakaurnosna, kitaem ti publikasion)

Dakkel a Baybay

Bantay Carmelo

Megiddo

Jerusalem

Hebron

Beer-sheba

Negeb

Natay a Baybay

[Credit Line]

Naibatay iti mapa a copyright iti Pictorial Archive (Asideg ti Eastern History) Est. and Survey iti Israel

[Ladawan]

Wadi Zin, ti namagaan a karayan iti abagatan ti Beer-sheba