Tagiragsakenyo “ti Pudpudno a Biag”

NI Jehova a Dios inkabilna iti isip ti tao ti kinaagnanayon. (Eclesiastes 3:11) Daytoy ti gapuna nga awan gawgaway dagiti tattao no maipasangoda ken patay, ngem maigiddato iti dayta, saanda a maiwaksi ti tarigagay nga agbiag.

Ti Nasantuan a Biblia, nga isu ti naipaltiing a Sao ti Dios, ikkannatayo iti naindaklan a namnama. (2 Timoteo 3:16) Ni Jehova, nga isu ti ladawan ti ayat, dina inaramid ti tao a makabael nga agpanunot iti kinaagnanayon sana kedngan nga agbiag iti sumagmamano la a tawen. Maisupadi iti personalidad ti Dios ti panangparsuana kadatayo tapno laeng agrigat gapu iti sasaadentayo. Saantayo a naparsua a kas kadagiti “awanan nakem nga an-animal a nainkasigudan a nayanak tapno matiliw ken madadael.”​—2 Pedro 2:12.

Idi pinarsuana da Adan ken Eva a naisigud iti panunotda ti maipapan iti kinaagnanayon, ‘nasayaat unay’ ti inaramid ni Jehova a Dios; inaramidna ida nga addaan potensial nga agbiag nga agnanayon. (Genesis 1:31) Ngem nakalkaldaang ta di umiso ti panangusar ti umuna a pagassawaan iti wayawayada nga agpili. Sinupringda ti nalawag nga impawil ti Namarsua ket iti kasta saandan a perpekto. Nagbanaganna, natayda, nga inyallatiwda ti kinaimperpekto ken ipapatay kadagiti kaputotanda.​—Genesis 2:17; 3:1-24; Roma 5:12.

Awan misterio nga ibagbaga ti Biblia maipapan iti panggep ti biag ken no ania ti kaipapanan ti ipapatay. Kunaenna nga iti ipapatay “awan ti aramid, wenno gakat, wenno pannakaammo, wenno sirib” ket dagiti natay “dida ammo ti aniaman.” (Eclesiastes 9:5,10) Iti sabali a pannao, natay dagiti natay. Saan a maitunos iti Biblia ti doktrina maipapan iti imortal a kararua, isu nga awan ti narikut a misterio a rumbeng a maibuksilan maipapan iti kasasaad dagiti natay.​—Genesis 3:19; Salmo 146:4; Eclesiastes 3:19, 20; Ezequiel 18:4.a

Adda panggep ti Dios; saanna a pinarsua ti daga nga “ungaong.” Binukelna dayta tapno “pagyanan” dagiti perpekto a tattao iti naparaisuan a kasasaad, ket ti Dios dina binaliwan ti panggepna. (Isaias 45:18; Malakias 3:6) Tapno matungpal dayta, imbaonna ditoy daga ti Anakna. Babaen ti panagtalinaedna a matalek agingga ken patay, impaay ni Jesu-Kristo ti pamuspusan tapno masubbot ti sangatauan iti basol ken ipapatay. Kinapudnona, kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

Idi un-unana, inkari ti Dios a mangparsua iti “baro a langlangit ken baro a daga.” (Isaias 65:17; 2 Pedro 3:13) Ramanen dayta ti panangpilina iti limitado a grupo dagiti matalek a Kristiano nga agbiag sadi langit. Kaduada ni Jesu-Kristo a mangbukel iti sentro a gobierno. Iti Biblia, maaw-awagan daytoy iti “pagarian ti langlangit,” wenno “pagarian ti Dios,” a mangtarawidwid kadagiti “bambanag iti daga.” (Mateo 4:17; 12:28; Efeso 1:10; Apocalipsis 5:9, 10; 14:1, 3) Kalpasan a madadaelna amin a kinadakes ditoy daga ken madalusanna dayta, ipasdekto ti Dios ti nalinteg a baro a kagimongan ti tao, wenno “baro a daga.” Mairaman iti daytoy dagiti tattao a salaknibanto ti Dios iti umad-adani a pannakadadael daytoy dakes a sistema ti bambanag. (Mateo 24:3,7-14, 21; Apocalipsis 7:9,13, 14) Maitiponto kadakuada dagidiay agbiagto manen babaen ti naikari a panagungar.​—Juan 5:28, 29; Aramid 24:15.

“Ti Pudpudno a Biag” iti Dayta a Tiempo

Kas panangpatalged iti naragsak a panagbiag iti masanguanan a Paraiso a daga, kuna ti Dios: “Adtoy! Pagbalbalinek a baro ti isuamin a bambanag.” (Apocalipsis 21:5) Saan a matukod a naan-anay ti tao dagiti nakaskasdaaw a banag nga aramidento ti Dios maipaay iti sangatauan. Mangaramidto ti Dios iti sangalubongan a paraiso, a kas iti Eden. (Lucas 23:43) Kas idiay Eden, aglaplapusananto dagiti agkakapintas ken makaay-ayo a kolor, uni, ken raman. Awanton ti kinapanglaw ken kinakirang ti taraon, ta maipapan iti dayta a panawen, kuna ti Biblia: “Dagiti immuna a bambanag naglabasdan.” (Apocalipsis 21:4; Salmo 72:16) Awanton ti agkuna iti, “Masakitak,” agsipud ta mapukawton ti sakit iti agnanayon. (Isaias 33:24) Wen, maawanto amin a pakaigapuan ti ut-ot, agraman ti ipapatay a nabayagen a kabusor ti sangatauan. (1 Corinto 15:26) Iti nakaskasdaaw a sirmata maipapan iti “baro a daga,” ti baro a kagimongan ti tao nga iturayan ni Kristo, nakangngeg ni apostol Juan iti timek nga agkunkuna: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” Adda kadi sabali pay a makaipaay iti dakdakkel a liwliwa ken rag-o ngem ti pannakatungpal daytoy a kari ti Dios?

Iti panangiladawanna iti biag iti masanguanan, partikular nga ipaganetget ti Biblia dagiti kasasaad a mangpennek kadagiti moral ken naespirituan a tarigagay ti tao. Maragpatto a naan-anay amin a nainkalintegan nga arapaap nga ikagkagumaan dagiti tattao a tun-oyen agingga ita ngem napaayda. (Mateo 6:10) Maysa kadagitoy ti panagtarigagay iti kinahustisia, a saan pay a natungpal agsipud ta ti tao masansan a parigaten dagiti naulpit, manangirurumen a nangdominar kadagiti nakapuy. (Eclesiastes 8:9) Naimpadtuan nga insurat ti salmista ti maipapan kadagiti kasasaad iti sidong ti panangituray ni Kristo: “Kadagiti al-aldawna agrangpayanto ti kinalinteg, ket naruayto ti talna.”​—Salmo 72:7, The New Jerusalem Bible.

Panagpapada ti maysa pay nga ar-arapaapen dagiti tattao, ket gapu iti dayta adu ti nagsakripisio. Iti “pannakaparsua manen,” pagpatinggaento ti Dios ti panangidumduma. (Mateo 19:28) Agpapadanto ti dignidad ti amin a tao. Saanto daytoy a panagpapada nga ipapilit ti nadangkok a panangituray ti gobierno. Imbes ketdi, awanton dagiti pakaigapuan ti panangidumduma, agraman ti kinaagum ken kinatangsit a mangtignay kadagiti tattao a mangituray kadagiti sabsabali wenno agpaadu iti sanikua. Impadto ni Isaias: “Bangonendanto dagiti balbalay, ken agtaengdanto kadakuada; ket agmuladanto kadagiti kaubasan, ket kanendanto ti bungada. Isuda didanto mangbangon, ket sabali ti agnaed; didanto agmula ket sabali ti mangan.”​—Isaias 65:21,22.

Anian a panagsagaba ti tao gapu iti panangibuyat iti dara iti nagbabaetan dagiti indibidual ken kadagiti gubat! Nangrugi daytoy iti pannakapapatay ni Abel ket agpatpatuloy agingga kadagiti gubat iti agdama a panawen. Nabayagen a mangnamnama ken ur-urayen dagiti tattao ti pannakaipasdek ti talna, a kasla ubbaw! Iti naisubli a Paraiso, mannakikappia ken naemmanto amin a tattao; “maay-ayatandanto iti kinaruay ti talna.”​—Salmo 37:11.

Kuna ti Isaias 11:9: “Ti daga mapnonto iti pannakaammo ken ni Jehova, a kasla dagiti dandanum saknapanda ti baybay.” Gapu iti natawid a kinaimperpekto, malaksid kadagiti dadduma pay a banag, saantay a maawatan a naan-anay ita ti saklawen dagita a sasao. Mabalin nga adalentayto pay laeng no kasano a ti naan-anay a pannakaammo iti Dios ikaykaysanatayto kenkuana ken no kasano a mangyeg dayta iti naan-anay a rag-o. Ngem tangay kunaen kadatayo ti Kasuratan a ni Jehova ket Dios a nakaskasdaaw ti pannakabalin, sirib, kinahustisia, ken ayatna, masiguradotayo nga ipangagnanto amin a kararag dagiti agnaed iti “baro a daga.”

Sigurado “ti Pudpudno a Biag”​—Gun-odenyo Dayta!

Adu ti mangipagarup a tagtagainep wenno arapaap laeng ti biag nga agnanayon iti nasaysayaat a lubong. Nupay kasta, kadagidiay pudpudno a mamati iti kari ti Biblia, sigurado daytoy a namnama. Dayta ti pannakasinipete ti biagda. (Hebreo 6:19) Kas iti sinipete a mangtengngel iti barko tapno saan nga agkallautang, ti namnama a panagbiag nga agnanayon pagbalinenna dagiti tattao a natalged ken ikkanna ida iti panagtalek, iti kasta kabaelanda a sanguen dagiti narikut a pakarigatan iti biag ken parmeken pay ketdi dagitoy.

Masiguradotayo a tungpalento ti Dios dagiti karina. Pinatalgedanna pay ketdi dayta babaen ti panagsapatana, a nakikumit ket dina mabalin nga ibabawi dayta. Insurat ni apostol Pablo: “Idi pinanggepna nga iparangarang a nawadwadwad pay kadagiti agtawid iti kari ti di pannakabalbaliw ti pammatigmaanna, ti Dios bimmallaet buyogen ti maysa a sapata, tapno, babaen kadagiti dua a di mabalbaliwan a bambanag a di mabalin a pagulbodan ti Dios, datayo . . . maaddaantayo koma iti nabileg a pammaregta a kumpet iti namnama a naikabil iti sanguanantayo.” (Hebreo 6:17, 18) Ti “dua a di mabalbaliwan a bambanag” a pulos a di mabalin a waswasen ti Dios isu ti kari ken sapatana, a nakaibatayan ti namnamatayo.

Mangipaay iti dakkel a liwliwa ken naespirituan a kired ti panamati kadagiti kari ti Dios. Addaan iti kasta a pammati ni Josue, a nangidaulo kadagiti Israelita. Idi agpakadan ni Josue kadagiti Israelita, lakay idin ket ammona nga asidegen a matay. Ngem inyebkasna ti determinasionna ken ti di maisin a kinasungdona, a nagubbog iti naan-anay a panagtalek kadagiti kari ti Dios. Kalpasan ti panangibagana nga isu ket ‘magna iti dalan ti isuamin a daga,’ ti dana a mangiturong kadagiti amin a tattao ken patay, kinuna ni Josue: “Ammuenyo iti amin a pusoyo ken amin a kararuayo, nga awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo; isuda amin natungpalda kadakayo, awan ti nagkurang kadakuada nga uray maysa.” Wen, namitlo nga inulit ni Josue a kanayon a tungpalen ti Dios amin a karina.​—Josue 23:14.

Mabalinyo met ti maaddaan iti kasta a pammati iti baro a lubong nga inkari ti Dios nga asidegen a maipasdek. Babaen ti napasnek a panangadalyo iti Biblia, maawatanyonto no siasino ni Jehova ken no apay a maikari a pagtalkanyo a naan-anay. (Apocalipsis 4:11) Da Abraham, Sara, Isaac, Jacob, ken dadduma pay a matalek a tattao idi ugma naaddaanda iti di maisin a pammati, a naibatay iti nauneg a pannakaammoda maipapan iti pudno a Dios a ni Jehova. Nagtalinaed a natibker ti namnamada, nupay “dida nagun-od ti kaitungpalan ti karkari” kabayatan ti panagbiagda. Ngem “nakitada ida iti adayo ket inabrasada ida.”​—Hebreo 11:13.

Tangay maawatantayo dagiti padto iti Biblia, makitkitatayo ita nga umad-adanin ti “naindaklan nga aldaw ti Dios a Mannakabalin-amin,” a kabayatan dayta madalusanto ti daga iti amin a kinadakes. (Apocalipsis 16:14, 16) Kas kadagiti matalek a tattao idi ugma, masapul nga itultuloytay a seggaan a sitatalek dagiti masanguanan a pasamak, bayat a tigtignayennatayo ti pammati ken kasta met ti panangipateg iti Dios ken iti “pudpudno a biag.” Ti kinaasideg ti baro a lubong ket nabileg a pakatignayan dagidiay mangipakpakita iti pammati ken Jehova ken mangay-ayat kenkuana. Nasken a sukayentayo ti kasta a pammati ken ayat tapno anamongan ken salaknibannatayto ti Dios kabayatan ti naindaklan nga aldawna, a nakaas-asidegen.​—Sofonias 2:3; 2 Tesalonica 1:3; Hebreo 10:37-39.

No kasta, napateg kadi kadakayo ti biag? Ken ad-adda kadi a tarigagayanyo ti “pudpudno a biag”​—panagbiag kas naanamongan nga adipen ti Dios, a siinanama iti naragsak a masakbayan, wen, biag nga agnanayon? No kasta, ipangagyo ti pammagbaga ni apostol Pablo, a nagkuna a rumbeng nga ‘isadagtayo ti namnamatayo, saan a kadagiti pagduaduaan a kinabaknang, no di ket iti Dios.’ Kinuna pay ni Pablo: “Agbalin[tayo] a nabaknang kadagiti nasayaat nga ar-aramid,” a pakaidayawan ti Dios, tapno “mapetpetan[tayo] a sititibker ti pudpudno a biag.”​—1 Timoteo 6:17-19.

Babaen ti pannakipagadalyo iti Biblia kadagiti Saksi ni Jehova, magun-odyo ti pannakaammo a “kaipapananna ti agnanayon a biag.” (Juan 17:3) Siaayat a nailanad iti Biblia daytoy naamaan nga awis: “Anakko, dika lipaten ti lintegko ngem salimetmetam koma dita pusom dagiti bilbilinko: ta inayondanto kenka ti kaatiddog dagiti aldaw, ken tawtawen ti panagbiag, ken ti talna.”​—Proverbio 3:1, 2.

[Footnote]