Ania ti Maitulong Kenka Dagiti Gimong Dagiti Saksi ni Jehova?

Napadasmo kadin ti nakigimong kadagiti Saksi ni Jehova? No saan pay, baka medio agnerbioska no panunotem nga umatenderka. Mabalin a mapanunotmo: ‘Ania ti maar-aramid kadagiti gimong? Apay nga importante dagita? Apay nga umatenderak?’ Iti daytoy a leksion, masursurom no kasano a ti pannakikadua iti sabsabali matulongannaka nga agbalin a nadekdekket iti Dios.

1. Ania ti kangrunaan a rason nga aggigimong dagiti Saksi ni Jehova?

Imbaga ti maysa a nagsurat iti Biblia ti kangrunaan a rason ti panaggigimong: “Iti dakkel a kongregasion, idaydayawkonto ni Jehova.” (Salmo 26:12) Kas met laeng idi, maragragsakan dagiti Saksi ni Jehova no aggigimongda. Iti intero a lubong, linawas nga aggigimongda tapno maidaydayawda ti Dios, agkantada para kenkuana, ken agkararagda. Kada tawen, umatenderda met kadagiti daddadakkel a panaggigimong.

2. Ania ti maammuam kadagiti gimong?

Kadagiti gimong, agpokuskami iti Sao ti Dios, nga ‘ilawlawagmi a naimbag ti kaipapananna.’ (Basaen ti Nehemias 8:8.) No umatenderka, masursurom ti maipapan ken Jehova ken dagiti nagsasayaat a kualidadna. No ad-adu ti maammuam maipapan iti ayatna kenka, agbalinka a nadekdekket kenkuana. Makitamto met no kasano a matulongannaka a maaddaan iti naragsak a biag.​—Isaias 48:17, 18.

3. Ania ti maitulong kenka dagiti tattao a makaduam iti gimong?

Isursuronatayo ni Jehova nga “agpipinnanunottayo tapno matignaytayo a mangipakita iti ayat ken nasayaat nga ar-aramid, a ditay baybay-an ti panaggigimongtayo.” (Hebreo 10:24, 25) Kadagiti gimong, makaam-ammoka kadagiti tattao a pudpudno a mangipatpateg iti maysa ken maysa ken interesado nga agsursuro iti ad-adu pay maipapan iti Dios, a kas kenka. Mangngegmo dagiti makaparegta nga ibagada maipapan iti Biblia. (Basaen ti Roma 1:11, 12.) Mabalin a maam-ammom met ti dadduma nga awan asawana wenno adda asawana a naragsak latta uray adda dagiti problemada. Dagita ket dadduma laeng kadagiti rason no apay a kayat ni Jehova a regular nga aggigimongtayo!

AMMUEM TI AD-ADU PAY

4. Dagiti gimong dagiti Saksi ni Jehova

Idi umuna a siglo, regular nga aggigimong dagiti Kristiano tapno agdayawda ken Jehova. (Roma 16:3-5) Basaen ti Colosas 3:16, sa pagsaritaan daytoy a saludsod:

• Kasano idi a nagdaydayaw dagiti immuna a Kristiano ken Jehova?

VIDEO: Ania ti Maar-aramid iti Kingdom Hall? (2:12)

• Ania ti nakitam a pagpadaan dagiti maar-aramid iti Kingdom Hall ken ti nabasam iti Colosas 3:16?

• Iti video wenno iti piktiur, adda kadi sabali pay a nakitam maipapan iti gimong a nagustuam?

Basaen ti 2 Corinto 9:7, sa pagsaritaan daytoy a saludsod:

• Apay nga awan bayadna dagiti gimong dagiti Saksi ni Jehova?

Iti tulong ti mangyad-adal kenka, kitaem no ania ti mapagsasaritaan iti maysa kadagiti gimong ita a lawas.

• Ania a paset ti gimong ti magustuam unay wenno pampanunotem a makatulong kenka?

Ammom kadi?

Iti jw.org, makitam ti lokasion ken eskediul dagiti gimong iti intero a lubong.

1. Adda palawag, demostrasion, ken video kadagiti gimongmi. Mairugi ken maileppas dagiti gimong iti kanta ken kararag

2. Adda dagiti paset ti programa a maawis dagiti immatender nga agkomento

3. Maawis ti amin nga umatender​—dagiti adda pamiliana, awan asawana, babbaket ken lallakay, ken ubbing

4. Awan ti bayadam no makigimongka. Saandaka a singiren dagiti Saksi ni Jehova no sumrekka ken saanda nga agkolekta iti kuarta

5. Kasapulam ti agsakripisio nga umatender iti gimong

Kitaem ti ar-aramiden idi ti pamilia ni Jesus. Kada tawen, masapul a magnada iti agarup 100 a kilometro iti kabambantayan manipud Nazaret agingga iti templo idiay Jerusalem. Basaen ti Lucas 2:39-42, sa pagsaritaan dagitoy a saludsod:

• Panagkunam, kasapulanda ngata ti agsakripisio tapno makadanonda idiay Jerusalem?

• Apay a mabalin a kasapulam ti agsakripisio tapno makaatenderka kadagiti gimong?

• Panagkunam, sulit ngata ti panagsakripisiom? Apay?

• Apay a masapul a regular nga umatendertayo kadagiti gimong?

SUMARIO

No makigimongka, mas maam-ammom ni Jehova, lumagda ti pannakigayyemmo kenkuana, ken maidaydayawmo isuna a kadua ti dadduma.

Rebiu

• Apay a kayat ni Jehova nga aggigimongtayo?

• Ania dagiti masursurom kadagiti gimong dagiti Saksi ni Jehova?

• Panagkunam, ania pay ti maitulong kenka ti pannakigimongmo?

AGDISKOBREKA PAY

No ngay madanaganka a makigimong? Kasta idi ti rikna ti maysa a lalaki. Kitaem no kasano a nagustuanna dagiti gimong.

Dimi Pulos Malipatan Dayta a Kablaaw (4:16)

Kitaem no kasano a na-enjoy ti maysa nga agtutubo a lalaki dagiti gimong ken no ania ti inaramidna tapno maitultuloyna ti makigimong.

Kaykayatko Unay Dagiti Gimong! (4:33)

Ammuem no ania ti makuna ti dadduma maipapan iti pannakigimong.

“Apay a Makigimongka iti Kingdom Hall?” (Artikulo iti website)

Kitaem no kasano a nagbalbaliw ti biag ti maysa a dati a naranggas a miembro ti gang kalpasan nga immatender iti gimong dagiti Saksi ni Jehova.

“Awitko ti Paltogko iti Sadinoman a Papanak” (Ti Pagwanawanan, Hulio 1, 2014)

5. Nagbaliw ti lubong sipud 1914

I-play ti VIDEO.

VIDEO: Nagbalbaliw ti Lubong Sipud 1914 (1:10)

Impakpakauna ni Jesus dagiti kasasaad ti lubong a nalawag a makita inton agturayen kas Ari. Basaen ti Lucas 21:9-11, sa pagsaritaan daytoy a saludsod:

• Ania kadagita a kasasaad ti nakitkita wenno nangnangngegmon?

Imbaga ni apostol Pablo no anianto ti ug-ugali dagiti tattao iti maudi nga al-aldaw ti turay ti tao. Basaen ti 2 Timoteo 3:1-5, sa pagsaritaan daytoy a saludsod:

• Ania kadagitoy nga ugali ti makitkitamon kadagiti tattao ita?

6. Ania koma ti epekto kadatayo ti panagturay ti Pagarian ti Dios?

Basaen ti Mateo 24:3, 14, sa pagsaritaan dagitoy a saludsod:

• Ania nga importante a trabaho ti mangipakita nga agturturayen ti Pagarian ti Dios?

• Kasanoka a makipaset iti daytoy a trabaho?

Agturturayen ti Pagarian ti Dios ken dandaninan iturayan ti intero a daga. Basaen ti Hebreo 10:24, 25, sa pagsaritaan daytoy a saludsod:

• Ania ti aramiden ti tunggal maysa kadatayo bayat a “makitkitayo nga umas-asidegen ti aldaw”?