DAYAW

Ti kangrunaan a Hebreo a termino a mangipasimudaag iti “dayaw” ket ka·vohdhʹ, a literal a kaipapananna ti “kinadagsen.” (Idiligyo ti pannakaaramat dagiti nainaig a termino iti 1Sm 4:18 ken 2Sm 14:26.) Gapuna, ti maysa a tao a napadayawan ket naibilang kas nadagsen, wenno adda pategna. Iti Griego, ti nombre a ti·meʹ ipasimudaagna ti anag a “dayaw,” “pateg,” “gatad,” “kinapateg.” Ngarud ti berbo a ti·maʹo mabalin met a kaipapananna ti “gatadan” (Mt 27:9); ti nombre a ti·meʹ mabalin nga addaan iti anag a “gatad,” “pateg” (Mt 27:6; Ara 4:34); ket ti pangiladawan a sao a tiʹmi·os mabalin a kaipapananna ti “ipatpateg” ken “napateg.”​—Ara 5:34; 20:24; 1Co 3:12.

Ni Jehova a Dios ken ti Anakna. Maigapu iti Kinanamarsua ken Kinasoberanona, maikari ni Jehova a Dios iti dayaw, nadayaw a panangikabilangan wenno panagraem. (1Ti 1:17; Heb 3:3, 4; Apo 4:9-11) Ipaay dagiti tattao daytoy a dayaw babaen ti panangaramidda iti makaay-ayo iti imatangna, kas iti inaramid ti Anakna iti amin a tiempo. (Jn 8:29, 49) Bayat a maal-alagad ti Linteg ti tulag, dagiti Israelita mabalinda a dayawen ni Jehova babaen ti panangidatagda kadagiti kasayaatan unay nga ik-ikutanda kas sakripisio.​—Pr 3:9; Mal 1:6-8.

Ti pormalistiko laeng a panangalagad kadagiti pammarang a porma ti panagdaydayaw saan a maibilang a pudno a panangpadayaw iti Mannakabalin-amin. Kasapulan met ti pudpudno a panagayat iti daldalan ni Jehova ken ti naimpusuan a panagtarigagay a mangaramid iti pagayatanna. Awan daytoy kadagiti narelihiosuan a papanguluen ti Judaismo idi tiempo ti naindagaan a ministerio ni Jesus.​—Mr 7:6; Isa 29:13.

Impasdek ni Jesu-Kristo ti perpekto nga ulidan iti panangpadayaw iti Amana, nga awan pakapilawan nga inaramidna ti pagayatan ti Dios agingga iti punto nga indatagna ti biagna kas sakripisio. (Mt 26:39; Jn 10:17, 18) Gapu ta pakaragsakanna nga aramiden ti pagayatan ti Ama, isu pinadayawan ni Amana babaen ti panangbigbigna kenkuana kas dungdungnguen ken inanamonganna nga Anak. (2Pe 1:17; Mt 17:5) Kalpasan a nagngudo ti naindagaan a panagbiag ni Jesus, ti Dios impaayanna ti Anakna iti adayo a dakdakkel a dayaw ken dignidad ngem iti ik-ikutan idi ni Jesus sakbay a nagbalin a tao. (Fil 2:9-11) Ti kaso ni Jesu-Kristo iladawanna no kasano a ti Kangatuan padayawannanto amin dagidiay mangpadayaw kenkuana, a bigbigenna ida kas naanamongan nga ad-adipenna ken bendisionanna ida iti kasta unay.​—1Sm 2:30.

Yantangay ni Jehova a Dios ti nangitan-ok unay iti Anakna, amin dagiti agkedked a mangbigbig ken Jesu-Kristo kas imortal nga Ari ti ar-ari ken Apo ti ap-appo saanda a padpadayawan ti Ama. Gapu iti kinasiasinona ken iti naaramidanna, maikari ti Anak iti dayaw ken nasungdo a suporta. (Jn 5:23; 1Ti 6:15, 16; Apo 5:11-13) Amin nga agtarigagay a padayawan ti Anak kas naanamongan nga ad-adalanna masapul a tuladenda ti ulidanna ken simamatalek nga annurotenda ti sursurona.​—Ro 2:7, 10.

Dadduma Pay a Persona a Padayawan. Nupay ni Jehova a Dios ken ti Anakna maikarida iti kadakkelan a dayaw, adda dagiti relasion kadagiti tattao nga agkasapulan met iti panangpadayaw. Dagiti annak dayawenda dagiti nagannakda babaen ti panagbalinda a natulnog. (De 5:16; Efe 6:1, 2) No agkasapulan dagiti nagannak, ti nataenganen nga anakda makaipakita iti panangpadayaw babaen ti kinatulokna a mangipaay iti namaterialan a tulong. (Mt 15:4-6; 1Ti 5:3, 4) Yantangay ti asawa a lalaki padayawanna ti asawana babaen ti panangtratona kenkuana a siaayat ken buyogen ti dignidad, ti asawa a babai padayawanna ti asawana babaen ti panagpasakup ken panangipakitana iti nauneg a panagraem. (1Pe 3:1-7) Ti papanglakayen nga agtartrabaho a sipipinget iti panangisuro ket maipaayan iti “mapamindua a dayaw,” a nabatad a pakairamanan ti namaterialan a tulong. (1Ti 5:17, 18) Dagiti Kristiano nga ad-adipen padayawanda ti appoda babaen ti siraraem a panangitungpalda kadagiti annong a naituding kadakuada. (1Ti 6:1, 2) Ti agtuturay ken dadduma pay nga addaan autoridad rebbeng a maipaayan iti panangpadayaw, wenno panagraem, a kalkalikaguman ti saadda. (Ro 13:7) Aniaman ti kasasaadda iti biag, ti amin a kita ti tattao, kas paset ti parsua ti Dios, maikarida iti panangpadayaw.​—1Pe 2:17.

Idauluan dagiti Kristiano ti panangipakita iti pammadayaw kadagiti padada a manamati. (Ro 12:10) Ramanen daytoy ti panangsapul saan nga iti bukod a pagsayaatan ti maysa a tao no di ket ti pagsayaatan ti sabsabali. (1Co 10:24) Agkasapulan daytoy iti kinatulok a mangaramid kadagiti nanumo nga annong. (Lu 22:26; Jn 13:12-17) Mataginayon daytoy nagsayaat nga espiritu babaen ti pananglaglagip a tunggal manamati ket napateg iti Dios ken kasapulan dagiti Kristiano ti maysa ken maysa, no kasano a ti tunggal kameng ti natauan a bagi agpannuray iti sabsabali pay.​—1Co 12:14-27.

Nupay saanda nga agsapsapul iti pannakaipadayag, siuumiso a maseknan dagiti Kristiano maipapan iti panangtaginayon iti nadayaw a takder iti sanguanan ni Jehova a Dios ken ti Anakna. Agkasapulan daytoy iti panagaluad kadagiti mamagrinuker a pannakitimtimpuyog ken panangsarked kadagiti tarigagay ti managbasol a lasag. Babaen laeng ti panagtalinaed a nasin-aw iti moral ken naespirituan a ti maysa makapagtalinaed kas nadayaw a basehas nga usaren ti Dios. (1Te 4:3-8; 2Ti 2:20-22; Heb 13:4) Adda iti dayta ti pudpudno a dayaw.