Itultuloyyo ti Agbiag kas Annak ti Dios

“Siasinoman a saan nga agaramid iti kinalinteg saan a namunganay iti Dios, uray ti di agayat ken kabsatna.”​—1 JUAN 3:10.

 1, 2. Bayat ti panangitultuloytayo ti panagadal iti Umuna a Juan, ania a balakad ti apostol ti intay usigen?

NI Jehova addaan iti sapasap a pamilia, ket dadduma kadagiti tattao itan ti paset dayta. Isuda dagiti annak ti Dios. Ngem kasano ti pannakaidumada manipud kadagiti sabsabali?

² Iti umuna a nasantuan pannakaipaltiingna a suratna, impabigbig ni apostol Juan dagitoy naparaburan unay a tattao. Isu met ti nangted iti balakad a mangtulong kadakuada a makapagtultuloy nga agbiag kas annak ti Dios. Ket iti kinunana magunggonaanto dagiti isuamin a dedikado a Saksi ni Jehova.

Anian a Naindaklan ti Ayat ti Dios!

 3. Kasano a dadduma a tattao mapagbalinda nga “annak ti Dios,”ken kasano ti panangmatmat ti lubong kadakuada?

³ Insitar ni Juan ti namnama dagiti napulotan a Kristiano. (Basaenyo ti 1 Juan 3:1-3.) Anian a naindaklan nga ayat ti impakita ni Jehova babaen iti panangtagibina kadakuada kas naespirituan nga annakna, a namagbalin kadakuada nga “annak ti Dios”! (Roma 5:8-10) Ti nadiosan nga espirituda, dagiti kalatda, ken namnamada ket saan a nakiramanan ti “lubong”​—ti nakillo a natauan a kagimongan. Ti kasta a nailubongan a kagimongan ti manggura ken Kristo ken kadagiti paspasurotna ket iti kasta guraenda met ti Ama. (Juan 15:17-25) Gapuna mabalin a ti lubong ammona dagiti napulotan kas indibidual ngem saan a kas annak ti Dios agsipud ta “saanda a naammuan” ni Jehova.​—1 Corinto 2:14.

 4. Tunggal maysa nga addaan ti namnama iti nailangitan a biag ti rebbeng a mangaramid iti ania?

⁴ Mismo nga itatta, dagiti napulotan ket annakda ti Dios. “Ngem,” kuna ni Juan, “saan pay a maiparangarang no ania daytoy” kalpasan ti ipapatayda iti kinamatalek ken mapagungarda iti nailangitan a biag nga addaan kadagiti espiritu a bagbagi. (Filipos 3:20, 21) Nupay kasta, inton ti Dios “maiparangarangto,” isuda ti “umaspingto kenkuana” ket “isu makitatayto iti kinaisuna,” kas “ni Jehova ti Espiritu.” (2 Corinto 3:17, 18) Tunggal maysa nga addaan iti daytoy a namnama iti nailangitan a biag ti rebbeng a matignay a manggugor iti bagina “kas daydiay [ni Jehova] ti nadalus.” Nupay dagiti napulotan ket imperpektoda itatta, masapul a maaddaanda koma iti nadalus a panagbiag a maitunos iti namnamada a makakita iti nadalus, nasantuan a Dios idiay langit.​—Salmo 99:5, 9; 2 Corinto 7:1.

Agaramid iti Kinalinteg

 5, 6. Siasinoman nga agar-aramid ti basol ti agar-aramid ti ania manipud iti panangmatmat ti Dios, ngem maipapan iti daytoy, ania ti pudno kadagidiay “agtaeng” ken Jesu-Kristo?

⁵ Ti panagbiag kas annak ti Dios kaipapananna met ti panagaramid ti nalinteg. (Basaenyo ti 1 Juan 3:4, 5.) “Isuamin a makaaramid iti basol aramidenna met ti maisalungasing iti linteg” manipud iti panangmatmat ni Jehova, a dagiti linlintegna ti salsalungasingen ti managbasol. (Isaias 33:22; Santiago 4:12) Amin a “basol isu ti panagsalungasing iti linteg,” maysa a panaglabsing kadagiti linlinteg ti Dios. Ti panagaramid ti basol ket maikontra iti Nakristianuan nga espiritu, ket agyamantayo ta ni Jesu-Kristo “naiparangarang” kas maysa a tao “tapno ikkatenna dagiti basbasoltayo.” Yantangay “awan basol kenkuana,” nabalinanna nga indatag iti Dios daydiay naan-anay a makapnek a makaabbong ti basol a daton.​—Isaias 53:11, 12; Hebreo 7:26-28; 1 Pedro 2:22-25.

⁶ “Siasinoman nga agtaeng a makipagkaykaysa kenkuana [ti Anak] saan nga agbasol.” (Basaenyo ti 1 Juan 3:6.) Kas imperpekto, mabalin a makapagaramidtayo ti basol no maminsan. Ngem ti panagbasol ket saan a naipaugali kadagidiay agtaeng a makipagkaykaysa iti Anak, iti kasta makipagkaykaysa wenno agtaeng iti Ama. Dagiti managaramid ti basol ket dida “nakita” ni Jesus babaen iti mata ti pammati; ket dagita a naipaugali iti panagbasolda kas kadagiti apostata dida “ammo” ken apresiaren ni Kristo kas iti mangabbong ti basol a “Kordero iti Dios.”​—Juan 1:36.

 7, 8. Sigun iti 1 Juan 3:7, 8, ti igaggagarana ti panagaramid iti basol nagtaud iti siasino, ngem ti Anak ti Dios “naiparangarang” a mangaramid iti ania gapu iti daytoy?

⁷ Namakdaar met ni Juan a maibusor iti mannakaiyaw-awan. (Basaenyo ti 1 Juan 3:7, 8.) “Dikay itulok nga iyaw-awannakayo ti uray siasino,” kuna ti apostol, nga innayonna: “Ti agaramid iti kinalinteg [babaen ti panangsalimetmetna iti linteg ti Dios] ket nalinteg, a kas met isu [ni Jesu-Kristo] nalinteg.” Ti kinamanagbasoltayo ti manglapped ti intay panagbalin a nalinteg iti isu met laeng a rukod a kas iti Naindaklan nga Ulidantayo. Ngem babaen iti di kaikarian a kinamanangngaasi ni Jehova, dagiti napulotan a paspasurot ni Jesus mabalinda ti agtultuloy nga agbiag kas annak ti Dios.

⁸ Ti managaramid iti inggagara a basol “kukua ti Diablo,” nga isut’ agbasbasolen “nanipud idi damo” ti karerana nga iyaalsa a maibusor ken ni Jehova. Ngem ti Anak ti Dios “naiparangarang” tapno “pukawenna” dagiti “ar-aramid” ni Satanas a panangparang-ayna ti basol ken kinadakes. Ramanen daytoy ti panangikkatna kadagiti epekto ti Adamiko nga ipapatay babaen iti pannakaabong ti basol babaen ken Kristo ken ti panangpagungarna kadagidiay adda iti Sheol (Hades), agraman ti panangrumeknanto iti ulo ni Satanas. (Genesis 3:15, 1 Corinto 15:26) Kabayatanna, agannadtayo, kas dagiti napulotan a natda ken ti “dakkel a bunggoy,” a maibusor iti panagaramid iti basol ken kinakillo.

Salimetmetan ti Linteg ti Dios

 9. Iti ania a pannakaawat a ti napulotan-espiritu a Kristiano “di makapagaramid iti basol,” ket apay a pudno daytoy?

⁹ Sumaganad paggidiaten ni Juan dagiti annak ti Dios ken dagidiay annak ti Diablo. (Basaenyo ti 1 Juan 3:9-12.) Siasinoman a “mabukel iti Dios saan nga agbasol,” wenno saanna nga iyugali ti panagbasol. Ti “makapaadu a bukel” ni Jehova, wenno ti nasantuan nga espiritu a mangted iti maysa iti “baro a pannakaiyanak” iti nailangitan a namnama, ti agtalinaed iti indibidual malaksid no kontraenna ket iti kasta ‘pagladingitenna’ ti espiritu, a gapu iti dayta ibabawi met dayta ti Dios. (1 Pedro 1:3, 4, 18, 19, 23; Efeso 4:30) Tapno agtalinaed kas maysa kadagiti annak ti Dios, ti naiyanak iti espiritu a Kristiano “saanna a mabalin nga iyugali ti agbasol.” Kas “baro a parsua” nga addaan iti “baro a personalidad,” pagreggetanna a busoren ti basol. Isu ti ‘nakapaglisin manipud iti panagrupsa nga adda iti lubong gapu iti derrep,’ ket awan iti pusona ti agbalin a maysa a naipaugalin a managaramid iti dakes.​—2 Corinto 5:16, 17; Colosas 3:5-11; 2 Pedro 1:4.

10. Aniat’ maysa a pamay-an a pangilasin iti annak ti Dios ken dagidiay annak ti Diablo?

¹⁰ Ti maysa a pamay-an a panangilasin kadagiti annak ti Dios ken ti Diablo isu daytoy: “Siasinoman a saan nga agaramid ti kinalinteg ket saan a namunganay iti Dios.” Ti kinakillo isu ti kababalin unay dagiti annak ti Diablo a “dida maturog no saanda pay a makaaramid iti dakes, ket ti turogda umadayo no awan ti mapadsoda,” nga isu daytat’ kayat nga aramiden dagiti apostata kadagiti nasungdo a Kristiano.​—Proverbio 4:14-16.

11. (a) Aniat’ sabali pay a pamay-an a pangilasin kadagidiay saan nga annak ti Dios? (b) Iti panangpampanunot ti kurso ni Cain ti rebbeng a mangtignay kadatayo a mangaramid iti ania?

¹¹ Mainayon pay, “saan a [namunganay iti Dios] uray ti di agayat ken kabsatna.” Kinapudnona, ti “damag” a nangngegantayo “nanipud idi punganay” ti panagbiagtayo kas dagiti Saksi ni Jehova a ta “agayan-ayattayo koma iti maysa ken maysa.” (Juan 13:34) Gapuna “saantayo a kas ken ni Cain,” a nangipakita nga isu “namunganay iti managdakdakes” babaen iti ‘panangpapatayna ken kabsatna’ iti naranggas a pamay-an kas kababalin ti mammapatay tao a ni Satanas. (Genesis 4:2-10; Juan 8:44) Ni Cain pinapatayna ni Abel “agsipud ta dagiti ar-aramidna dakesda, ket dagiti ar-aramid ni kabsatna nalintegda.” Pudno unay, babaen iti panangpampanunot iti kurso ni Cain rebbeng nga isut’ mangtignay kadatayo nga agsalukag a maibusor kadagiti umas-asping a pananggura kadagiti naespirituan a kakabsattayo.

Agayat “iti Aramid ken iti Kinapudno”

12. Kasano nga “ammotayo nga immalistayo manipud ken patay agingga iti biag,” ket aniat’ kaipapanan daytoy?

¹² No tuladentayo koma ni Cain, nataytayon iti naespirituan. (Basaenyo ti 1 Juan 3:13-15.) Napalalo unay ti pananggurana ken kabsatna nga isut’ pinapatayna, ket saantayo nga agsiddaaw a ti lubong umas-asping ti pananggurana kadatayo, nga impadto ni Jesus daytoy. (Marcos 13:13) Ngem “ammotayo [wenno, simamatalektayo nga] immalistayon manipud [naespirituan] nga ipapatay agingga iti biag nga [agnanayon], agsipud ta ayatentayo dagiti kakabsattayo,” dagiti padatayo a saksi ni Jehova. Gapu iti dayta nainkabsatan nga ayat, a buyogen iti pammati ken Kristo, saantayon a ‘natay’ kadagiti panagsalungasing ken basbasol, no di ket ti Dios inikkatna manipud kadatayo ti panangilunodna, ket napagungartayo manipud naespirituan nga ipapatay, babaen iti pannakaited kadatayo ti namnama ti biag nga agnanayon. (Juan 5:24; Efeso 2:1-7) Dagiti awan ayatda nga apostata awananda iti kasta a namnama, ta “ti saan nga agayat agtalinaed iti [naespirituan] nga ipapatay.”

13. No guraentay ti kabsattayo, apay a rebbeng a pagbalinentay daytoy a banag a paset ti ikarkararagtayo?

¹³ Pudno unay, “siasinoman a gumura ken kabsatna ti mammapatay.” Mabalin a saan a maaramid ti pisikal a panangpapatay (kas idi a ni Cain pinapatayna ni Abel gapu iti apal ken gura), ngem ti mananggura kaykayatna a ti naespirituan a kabsatna ket saan koma a sibibiag. Yantangay ni Jehova ti makabasa iti puso, ti mananggura ti adda a nailunod. (Proverbio 21:2; idiligyo iti Mateo 5:21, 22.) Awan ti kasta nga awan panagbabawina a “mammapatay,” wenno gumurgura iti kapammatianna, “nga adda biagna nga agnanayon nga agtaeng kenkuana.” Gapuna no adda gurguraentayo a padatayo a Saksi a sililimed, ditay aya rebbeng nga ikararag ti tulong ni Jehova a mangbalbaliw iti espiritutayo a pagbalinen a maysa nga addaan nainkabsatan nga ayat?

14. Agingga iti ania a maawagantayo a mangipakita iti nainkabsatan nga ayat?

¹⁴ No kayattayo ti agtultuloy nga agbiag kas annak ti Dios, masapul nga ipakitatayo ti nainkabsatan nga ayat iti sao ken aramid. (Basaenyo ti 1 Juan 3:16-18.) Posible a maaramid daytoy, ta “naammuantayo ti ayat, agsipud ta isu [ni Jesu-Kristo] intedna ti kararuana [wenno, “biagna”] a maipaay kadatayo.” Yantangay impakita ni Jesus ti ayatna iti kasta a pamay-an, rebbengna nga iparangarangtayo met ti umas-asping a nga addaan prinsipio nga ayat (Griego, a·gaʹpe) a maipaay kadagiti kapammatiantayo. Kadagiti panawen ti pannakaidadanes, kas pangarigan, “datayo rebbengtay nga ited dagiti biagtayo a maipaay kadagiti kakabsat,” a kas da Prisca ken Aquila “ti nangipeggad kadagiti tengngedda gapu iti biag [ni apostol Pablo].”​—Roma 16:3, 4; Juan 15:12, 13.

15. No ti maysa a kabsat ket adda pakasapulanna ket addaantayo “kadagiti sanikua daytoy a lubong a mangted biag,” aniat’ sapulen ti ayat kadatayo?

¹⁵ No itedtay dagiti biagtayo a maipaay kadagiti kakabsattayo, rebbeng a situtuloktayo met a mangaramid kadagiti babassit a bambanag a maipaay kadakuada. Kas pangarigan datayo ti “agikut kadagiti sanikua daytoy a lubong”​—ti kuarta, taraon, kawes, ken umas-asping kadagita, a pinagbalin ti lubong a posible a magun-odan. Mabalin a ‘makakitatayo’ ti maysa a kabsat nga agkasapulan, saan laeng a babaen iti paspasaray a pannakakita no di ket namatmatantayo ti adda a kasasaad. Ti kasasaadda ti mabalin a mangtignay “ti ruangan” iti “asitayo,” wenno kaungan a rikriknatayo, a malukatan. Ngem anian no “punitantayo” dayta a “ruangan” babaen iti panangipalubostayo iti kinaimot a mangtungday iti panggeptayo a mangtulong kenkuana? No kasta “kasano ti panagnaed ti ayat ti Dios” kadatayo? Saan nga umdas ti basta agsasao laeng maipapan iti nainkabsatan nga ayat. Kas annak ti Dios, masapul nga iparangarangtayo dayta “iti aramid ken kinapudno.” Kas pangarigan, no mabisbisin ti maysa a kabsat, kasapulanna ti taraon saan a basta sasao laeng.​—Santiago 2:14-17.

Dagiti Puso a Di Mangilunod Kadatayo

16. (a) Kasano a ti Dios “dakdakkel ngem ti pusotayo”? (b) Sigun ken ni Juan, apay a sungbatan ni Jehova dagiti karkararagtayo?

¹⁶ Sumaganad itudo ni Juan dagiti pammasiguro a datayo ket annak ni Jehova. (Basaenyo ti 1 Juan 3:19-24.) “Maammuantayo a namunganaytayo iti pudno” ket saan a dagiti biktima ti apostata a panangallilaw “babaen iti daytoy”​—ti banag nga iparparangarangtayo ti nainkabsatan nga ayat. Iti kasta “patalgedantayo dagiti pusotayo” iti sanguanan ti Dios. (Salmo 119:11) No dagiti puspusotayo ilunoddatayo, nalabit gapu ta mariknatayo a ditayo pinakitaan dagiti padatayo a managdaydayaw iti umdas a panagayat, laglagipenyo a “ti Dios dakdakkel ngem iti pusotayo ket isu ammona amin.” Isu ti manangngaasi agsipud ta pagaammona ti “awan panaginsisingpet a nainkabsatan a panagayattayo,” ti pannakidangadangtayo a maibusor ti basol, ken dagiti panagreggettayo nga agbiag iti pamay-an a makaay-ayo kenkuana. (1 Pedro 1:22; Salmo 103:10-14) “No ti pusotayo saannatay nga ilunod” agsipud ta addada dagiti ar-aramid a mangpaneknek iti nainkabsatan nga ayattayo, ket saantayo a sibabasol kadagiti nalimed a basbasol, “addaantay ti wayawaya iti panagsao [panagtalek] iti Dios” iti kararag. (Salmo 19:12) Ket sungbatanna dagiti karkararagtayo “ta salimetmetantayo dagiti bilbilinna ket aramidentayo dagiti bambanag a makaay-ayo kadagiti matana.”

17. Ti “bilin” ti Dios ramanenna dagiti ania a dua a kasapulan?

¹⁷ No namnamaentayo a masungbatan dagiti karkararagtayo, masapul a salimetmetantayo dagiti “bilbilin” ti Dios a ramanenna dagitoy dua a kasapulan: (1) Masapul a maaddaantayo iti pammati iti “nagan” ni Jesus, nga awatentayo ti subbot ken bigbigentayo ti autoridadna nga inted ti Dios. (Filipos 2:9-11) (2) Masapul nga “agayattayo met iti maysa ken maysa” kas imbilin ni Jesus. (Juan 15:12, 17) Pudno unay, siasinoman nga addaan pammati iti nagan ni Kristo rebbeng nga ayatenna met dagiti dadduma nga addaan iti kasta a pammati.

18. Kasanotay nga ammo a ni Jehova “agtaeng kadatayo”?

¹⁸ Ti tao a mangsalsalimetmet kadagiti bilbilin ti Dios “agtaeng kenkuana,” a makipagkaykaysa ken ni Jehova. (Idiligyo iti Juan 17:20, 21.) Ngem kasano ti “pakaammuantayo” a ti Dios ket “agtaeng kadatayo”? Ammotay daytoy “gapu iti [nasantuan] nga espiritu nga intedna kadatayo.” Ti panagikuttayo iti nasantuan nga espiritu ti Dios ken ti pannakabalin a mangiparangarang kadagiti bungana, agraman ti nainkabsatan nga ayat, paneknekanna nga agtaengtayo ken Jehova.​—Galacia 5:22, 23.

Agsalukagkayo!

19, 20. Apay a “suoten dagiti naipaltiing a sasao,” ket ania a tulong ti impaay ni Juan a maipaay iti daytoy?

¹⁹ Sumaganad ipakita ni Juan no kasano ti intay panagsalukag. (Basaenyo ti 1 Juan 4:1.) Ditay koma patien ti tunggal espiritu, wenno ti “naipaltiing a sasao,” no di ket “suotentayo dagiti naipaltiing a sasao tapno makita no nagtaudda iti Dios.” Apay? “Agsipud ta adu dagiti saan a pudno a mammadto a rimmuar ditoy lubong.” Addada sumagmamano kadagitoy manangallilaw a mannursuro nga agdaldaliasat idi, a makitimpuyogda kadagiti nadumaduma a kongregasion, ket sapsapulenda a “guyoguyen dagiti adalan a sumurot kadakuada.” (Aramid 20:29, 30; 2 Juan 7) Gapuna masapul a dagiti matalek agsalukagda.

²⁰ Dadduma kadagiti umuna-siglo a Kristiano ti addaan iti “pannakaawat kadagiti naipaltiing a sasao,” maysa a namilagruan a sagut ti aktibo a puersa ti Dios a mamagbalin kadakuada a mangikeddeng no dagiti “naipaltiing a sasao” ket naggapuda ken ni Jehova. (1 Corinto 12:4, 10) Ngem ti pammakdaar ni Juan ti kasla agaplikar kadagiti Kristiano iti pangkaaduan ken makatulong met itatta no padpadasen dagiti apostata a dadaelen ti pammati dagiti Saksi ni Jehova. Nupay ti sagut ti espiritu a ‘panangtarus kadagiti naipaltiing a sasao’ ket naglabasen, dagiti sasao ni Juan ti mangted iti pamay-an a panangilasin no dagiti mannursuro ket natignayda babaen iti espiritu ti Dios wenno babaen kadagiti nademonioan nga impluensia.

21. Aniat’ maysa a pamay-an a panangsuot kadagiti “naipaltiing a sasao”?

²¹ Usigenyo ti maysa kadagiti pamay-an a panangsuot. (Basaenyo ti 1 Juan 4:2, 3.) “Isuamin a naipaltiing a sasao a mangipudno a ni Jesu-Kristo immay a naglasag nagtaud iti Dios.” Bigbigentayo a naminsan nagbiag ni Jesus kas maysa a tao ket isu ti Anak ti Dios, ket ti pammatitayo ti mangtignay kadatayo a mangisuro kadagiti dadduma kadagita a kinapudno. (Mateo 3:16, 17; 17:5; 20:28; 28:19, 20) “Ngem amin a naipaltiing a sasao a di mangipudno ken Jesus saan a kukua ti Dios.” Imbes ketdi, “daytoy isu ti naipaltiing a sasao ti antikristo” a maibusor ken Kristo ken maibusor kadagiti Nainkasuratan a pannursuro maipapan kenkuana. Kaawatan, ni Juan ken dagiti dadduma nga apostol namakdaarda a “ti naipaltiing a sasao ti antikristo” ti umay. (2 Corinto 11:3, 4; 2 Pedro 2:1) Yantangay dagiti ulbod a mannursuro idi ti mamagpeggad kadagiti pudno a Kristiano, mabalinan a maikuna ni Juan, “Dayta adda itan ditoy lubong.”

22. Aniat’ sabali pay a pamay-an a panangsuot kadagiti “naipaltiing a sasao”?

²² Ti sabali pay a pamay-an a panangsuot kadagiti “naipaltiing a sasao” isut’ panangammo no asino dagiti dumdumngeg kadakuada. (Basaenyo ti 1 Juan 4:4-6.) Kas dagiti ad-adipen ni Jehova, ‘inabaktayon,’ wenno pinarmektayon, dagiti ulbod a mannursuro, a napagballigiantayon dagiti panangpadpadasda a mangguyugoy kadatayo nga umadayo manipud kinapudno iti Dios. Daytoy naespirituan a panagballigi ti nagbalin a posible agsipud ta ti Dios, isu nga “adda” kadagiti nasungdo a Kristiano, “ti dakdakkel ngem isu [ti Diablo] nga adda ditoy lubong,” wenno ti nakillo a natauan a kagimongan. (2 Corinto 4:4) Agsipud ta dagiti apostata “tattao ida ti lubong” ket addaanda ti dakes nga espirituna, “agsaoda ti maipapan ti lubong ket ti lubong denggenna ida.” Yantangay addaantayo iti espiritu ni Jehova, mailasintayo ti di naespirituan a kababalin ti “naipaltiing a sasao[da]” ket ngarud mabalintay a laksiden ida.

23. Asino ti agdengngeg kadatayo ken makabigbig a ti espiritu ti Dios ti mangiturturong kadatayo?

²³ Ngem ammotayo a “tattaonatayo ti Dios” agsipud ta “ti makaammo iti Dios denggennatayo.” Dagidiay kimmarnero a tattao mabigbigda nga isursurotayo ti kinapudno a naibatay iti Sao ti Dios. (Idiligyo iti Juan 10:4, 5, 16, 26, 27.) Siempre, “ti saan a tao ti Dios saannatay a denggen.” Dagiti ulbod a mammadto, wenno mannursuro, dida dimngeg ken ni Juan wenno kadagiti dadduma a ‘tattao ti Dios’ a nangipaay iti nasin-aw a naespirituan a pannursuro. Gapuna “maammuantayo ti naipaltiing a sasao iti kinapudno ken ti naipaltiing a sasao nga ulbod.” Datayo a mangbukel ti pamilia dagiti managdaydayaw ni Jehova agsasaotayo ti “nadalus a pagsasao” dagiti Nainkasuratan a kinapudno a maipapaay babaen iti organisasion ti Dios. (Sofonias 3:9) Ket manipud iti intay ibagbaga, nalawag kadagiti kimmarnero a tattao a datayo ti maiturturong babaen iti nasantuan nga espiritu ti Dios.

24. Aniat’ sumaganad nga itudo ni Juan?

²⁴ Agingga iti daytoy a punto, imbinsabinsa ni Juan ti sumagmamano kadagiti pamunganayan a kasapulan a masapul a maragpattayo no kayattay ti agtultuloy nga agbiag kas annak ti Dios. Sumaruno ipakitatayo no apay a masapul nga iparangarangtayo a kanayon ti ayat ken pammati.

Ania ti Sungbatyo?

◻ Kasano a dadduma mapagbalinda nga “annak ti Dios”?

◻ Kasanotay a maidasig dagiti annak ti Dios ken dagiti annak ti Diablo?

◻ Iti panangpampanunot iti kurso ni Cain ti rebbeng a mangtignay kadatayo a mangaramid iti ania?

◻ Agingga iti ania a rebbeng nga ipakitatayo ti nainkabsatan nga ayat?

◻ Kasano a masuot dagiti “naipaltiing a sasao”?

[Ladawan iti panid 18]

Ti panangpampanunot iti kurso ni Cain ti rebbeng a mangtignay kadatayo nga agannad a maibusor iti pananggura iti asinoman kadagiti kakabsattayo

[Ladawan iti panid 20]

Sawen dagiti managdaydayaw ken Jehova ti “nadalus a pagsasao” dagiti Nainkasuratan a kinapudno a maipapaay iti organisasion ti Dios