Iparangarang a Kanayon ti Ayat ken Pammati

“Ti agtalinaed iti ayat agtaeng iti Dios.” “Ket daytoy ti panagballigi a pangparukma iti lubong, ti pammatitayo.”​—1 JUAN 4:16; 5:4.

 1, 2. Ania dagiti kualidad a nangnangruna a naipaganetget idiay 1 Juan 4:7–5:21?

NI Jehova isu ti personipikasion iti ayat, ket dagidiay tarigagayanda ti mangay-ayo kenkuana masapul nga iparangarangda daytoy nadiosan a kualidad. Pinagbalin ni apostol Juan daytoy a nalawag iti maudi a paset ti immuna a naipaltiing a suratna.

² Masapul met nga iparangarang dagiti pudno a Kristiano ti pammati. Babaen laeng iti daytoy a pamay-an a maparmekda ti lubong ket agtalinaedda a natalged iti pabor ni Jehova. Bayat ti panangadaltayo iti maudi a paset ti surat ni Juan, ngarud, sikakararag nga usigentayo ti kinapateg iti panangiparangarang ti ayat ken pammati.

‘Agayan-ayatkayo iti Maysa ken Maysa’

 3, 4. Ania a relasion ti adda iti panangiparangarangtayo iti ayat iti intay panangammo iti Dios?

³ Impaganetget ni Juan ti kinapateg ti ayat. (Basaenyo ti 1 Juan 4:7, 8.) Maigunamgunam kadagiti “inay-ayat” a Kristiano nga “agdidinnungngotayo, ta ti ayat nagtaud iti Dios,” a ni Jehova isu ti Gubuayanna. “Tunggal maysa nga agayat nabukel iti Dios [kas maysa a naiyanak iti espiritu nga indibidual] ket ammona ti Dios,” a pagaammona dagiti kualidad ken pangpanggep ni Jehova, ken no kasano ti panangiyeb-ebkasna iti ayat. Itatta daytoy a “pannakaammo iti Dios” ti magun-odan met dagiti “dakkel a bunggoy” dagiti “sabsabali a karnero” ni Kristo.

⁴ Ti pannakaammo iti Dios kaipapananna ti pudpudno a panangapresiar kadagiti kualidadna, ti naan-anay a panangayat kenkuana, ken idedekket kenkuana kas ti Soberanotayo. Ngem “ti saan nga agayat saanna nga ammo ti Dios.” Dagidiay a di mangiparparangarang iti Nakristianuan nga ayat dida “naammuan ti Dios, agsipud ta ti Dios isu ti ayat.” Wen, ti ayat isut’ dominante a kualidad ni Jehova, a daytat’ nakalawlawag kadagiti naespirituan ken namaterialan a saganana nga agpaay iti sangatauan.

 5. Ania ti naindaklan a pammaneknek a ti “Dios isu ti ayat”?

⁵ Naisitar a sumaganad isu ti kadadakkelan a pammaneknek a ti “Dios isu ti ayat.” (Basaenyo ti 1 Juan 4:9, 10.) Kuna ni Juan: “Daytoy ti nakaiparangarangan ti ayat ti Dios kadatayo [kas dagiti managbasol a maikari ken patay], agsipud ta imbaon ti Dios ti Anakna a bugbugtong ditoy lubong tapno agbiagtayo gapu kenkuana.” Ni Jesus isu ti “Anak a bugbugtong” ni Jehova ta isu ti agmaymaysa a direkta a pinarsua ti Dios. (Juan 1:1-3, 14; Colosas 1:13-16) Ket ni Jesus ti ‘naibaon ditoy lubong’ babaen ti panagbalinna a tao, a tinungpalna ti ministeriona iti publiko, ket kalpasanna natay iti ipapatay kas maysa a daton. (Juan 11:27; 12:46) Ti ‘pananggun-od ti biag nga agnanayon babaen kenkuana,’ idiay langit man wenno ditoy daga, kasapulanna iti panamati iti merito ti subbot a datonna.

 6. Bayat a managbasoltayo pay a di agayat iti Dios, ania ti inaramidna?

⁶ Managbasoltayo pay a di agayat iti Dios idi “isu inayatnatayo ket imbaonna ti Anakna a daton a subbot kadagiti basbasoltayo.” Ti daton ni Kristo ti namagbalin a posible ti intay pannakagun-od iti pannakaisubli ti umiso a pannakirelasiontayo iti Dios. (Roma 3:24, 25; Hebreo 2:17) Apresiarenyo met laeng aya daytoy kadadakkelan a pannakaiparangarang ti di maikari nga ayat iti biang ti nailangitan nga Amatayo?

 7. (a) Yantangay ditay maikuna nga inayattay ni Jehova gapu ta isu ti intay nakita, kasanotay a maipakita nga isu ti inayattayo? (b) Ti panangiparangarangtayo iti nainkabsatan nga ayat paneknekanna ti ania?

⁷ Ti ayat ti Dios kadatayo ti rebbeng a mangapektar iti kababalintayo kadagiti dadduma. (Basaenyo ti 1 Juan 4:11-13.) Yantangay inayatnatayo bayat a datayo ti managbasol pay “rebbengtay met ti agayat iti maysa ken maysa.” Kadagiti tattao, “awan pay ti nakakita iti Dios uray kaano.” Gapuna ditay maikuna nga inayattayo ni Jehova agsipud ta isut’ nakitatayo. (Exodo 33:20; Juan 1:18; 4:24) Ngem babaen iti panangiparangarang iti ayat, ipakpakitatayo nga inayattayo ti Gubuayan daytoy a kualidad. Ti nainkabsatan nga ayattayo paneknekanna a ti “Dios agtaeng kadatayo ket ti ayatna nagdanonan unay,” wenno nagtengannan ti naan-anay a pannakaiyebkasna kadatayo. Ket ammotayo nga “agtaengtayo a makipagkaykaysa” ken ni Jehova “agsipud ta inikkannatayo iti espirituna.” Ti panangiparangarangtayo iti nainkabsatan nga ayat paneknekanna a ti espiritu ni Jehova agtataeng met kadatayo, ta ti ayat maysa kadagiti bungana. (Calacia 5:22, 23) Ipakpakita daytoy nga ammotayo ti Dios ken addaantay iti anamongna.

 8. Ania ti adda a kanayonan a pammaneknek nga agtaengtayo iti Dios”?

⁸ Adda pay kanayonan a pammaneknek nga ‘agtaengtayo a makipagkaykaysa iti Dios.’ (Basaenyo ti 1 Juan 4:14-16a.) Ti ‘pannakakita’ iti naaramidan ni Jesus ditoy daga ken no kasano ti panagsagabana a maipaay iti sangatauan, ‘ti mabalin a saksian [ni Juan] a ti Ama imbaonna ti Anakna kas Manangisalakan iti lubong’ ti managbasol a sangatauan. (Juan 4:42; 12:47) Mainayon pay, ‘ti Dios agtaeng a makipagkaykaysa kadatayo ken datayo kenkuana’ no ipudnotayo a naimpusuan a ni Jesu-Kristo isu ti Anakna. Sapulen daytoy ti panamati ken panangted iti publiko a pammaneknek a ni Jesus isu ti Anak ti Dios. (Juan 3:36; Roma 10:10) Ti panagtalektayo “iti ayat ti Dios nga adda kadatayo” ti mangted iti kanayonan pay a pammaneknek a kamengtayo man ti napulotan a natda wenno “sabsabali a karnero,” agtaengtayo a makipagkaykaysa ken ni Jehova.

 9. (a) Iti ania a pannakaawat a ti ayat a maipaay iti Dios ket “maaramid a nagdanonan,” ket kasano nga apektaran daytoy ti relasiontayo kadagiti dadduma? (b) Ti “nagdanonan” nga ayat ti mangparang-ay iti ania?

⁹ Sumaganad ipakita ni Juan a ti ayat mabalin a “maramid a nagdanonan.” (Basaenyo ti 1 Juan 4:16b, 17.) Mapalagipantayo manen a “ti Dios isu ti ayat.” Agsipud ta ‘agtaengtayo iti ayat,’ iparparangarang daytoy a bunga ti espiritu ni Jehova, nga ‘agtaengtayo a makipagkaykaysa iti Dios.’ No ti ayat ken Jehova “naaramid a nagdanonan kadatayo,” a nagtengannan ti naan-anay a pannakaiyebkas kenkuana, ayatentayo met dagiti kapammatiantayo. (Idiligyo iti bersikulo 12.) Ti “nagdanonan” nga ayat parang-ayenna met ti “wayawaya ti panagsao” iti Dios babaen iti kararag itan ken “iti aldaw ti pannakaukom” a nainaig iti kaadda ni Kristo. Dagidiay mangiparparangarang iti kasta nga ayat ngarud awan rasonda nga agbuteng a ti panangukom ti Dios ket dakesto. No iparangarangtayo iti ayat, iti dayta a pannakaawat “no kasano daydiay [ni Jesus], kastatayo met ditoy lubong.” Wen, kas kenkuana tagtagiragsakentayo ti pabor kas annak ti Dios iti daytoy a lubong ti sangatauan a naisina iti Dios.

10. Dagidiay a ti ayat pinagbalinna a “nagdanonan” didanto lak-amen ti ania?

¹⁰ Dagidiay nga adda iti uneg iti ayat a naaramid a “nagdanonan” dida lak-amen ti buteng nga isut’ manglapped iti kararag. (Basaenyo ti 1 Juan 4:18, 19.) “Ti buteng addaan iti pananglapped” a mangtiped iti iyaasidegtayo a siwayawaya ken ni Jehova. Gapuna no addaantay iti kasta a buteng, ‘saantayo pay a naaramid a nagdanonan iti ayat.’ Ngem no “aaramid[tayo] a nagdanonan iti ayat,” daytoy a kualidad ti mangpunno kadagiti puspusotayo, isut’ mangiduron kadatayo nga agaramid iti nasantuan a pagayatan, ket tignayennatayo nga agtalinaed a nasinged iti nailangitan nga Amatayo iti kararag. Pudpudno nga addaantayo iti rason nga agayat ken ni Jehova ken agkararag kenkuana, ta kas kuna ni Juan, ‘Datayo agayattayo, agsipud ta ti Dios inayatnatayo nga immuna.’

11. Apay a nainkalintegan nga agtulnogtayo iti bilin a: “Ti agayat iti Dios ayatenna met koma ti kabsatna”?

¹¹ Siempre, saan nga umdas ti basta panagkuna nga inayattayo ti Dios. (Basaenyo ti 1 Juan 4:20, 21.) Asinoman nga agkuna, “siak ayatek ti Dios” ngem gurguraenna met ti naespirituan a kabsatna “isu ti maysa a naulbod.” Yantangay makitkitatayo ti kabsattayo ken makitkitatayo dagiti nadiosan a kababalinna, ti panangipakita iti ayat kenkuana ti rebbeng a nalaklaka koma ngem ti panagayat iti di makita a Dios. Pudno unay, “ti saan nga agayat iti kabsatna, isu a nakitana, saanna a mabalin nga ayaten ti Dios, isu a dina nakita.” Gapuna nainkalintegan nga agtulnogtayo koma iti daytoy a “bilin”: “Ti agayat iti Dios ayatenna met koma ni kabsatna.”

Asino ti Mangparukma iti Lubong?

12. Yantangay inayattayo ti Dios, ania pay nga ayat ti manamnama a maadda kadatayo?

¹² Sumaganad impakita ni Juan no ania a talaga ti kaipapanan ti panagayat iti Dios. (Basaenyo ti 1 Juan 5:1-5.) Umuna, intudo ti apostol a “siasinoman a mamati a ni Jesus isu ti Kristo,” (ti Mesias wenno ti Pinulotan ni Jehova) “ti nabukel iti Dios,” wenno isut’ naiyanak iti espiritu babaen ken ni Jehova. Mainayon pay, siasinoman nga agayat iti Nangiyanak kenkuana, ni Jehova, ayatenna met ti asinoman pay a “nabukel kenkuana.” Wen, amin dagiti napulotan nga annak ti Dios ti agayat kenkuana ket manamnama nga agayan-ayatda iti maysa ken maysa. Ti kasta a nainkabsatan nga ayat ti kababalin met ti “dakkel a bunggoy” dagiti “sabsabali a karnero” nga addaan iti naindagaan a namnama.​—Juan 10:16; Apocalipsis 7:9.

13. (a) Apay a dagiti bilbilin ti Dios ket saanda a “makapadagsen” kadatayo? (b) Kasano ti intay ‘panangparmek ti lubong’?

¹³ ‘Ammotayo nga inayattayo dagiti annak ti Dios no inayattayo ti Dios ken salsalimetmetantayo dagiti bilbilinna.’ Kinapudnona, ‘ti ayat ti Dios kaipapananna a tungpalentayo dagiti bilbilinna.’ Yantangay inayattayo ti Dios ken ti kinalinteg, maragsakantayo a mangsalimetmet kadagiti bilbilinna. Kuna ni Juan a dagita saanda a “makapadagsen” kadatayo “ta ti aniaman a mabukel iti Dios parukmaenna ti lubong.” Ti “aniaman” mabalin nga ipamatmatna ti inted ti Dios a pannakabalin a ‘mangparukma iti lubong,’ wenno panagballigi a maibusor iti nakillo a natauan a kagimongan agraman dagiti pannulisogna a pangsalungasing kadagiti bilbilin ni Jehova. (Juan 16:33) “Ti panagballigi a mangparukma iti lubong” ket isu ti “pammatitayo” iti Dios, iti Saona, ken iti Anakna. No addaantayo “ti pammati a ni Jesus isu ti Anak ti Dios,” ‘pinarukmatayon ti lubong’ babaen iti panangilaksid kadagiti di umiso a panagpampanunotna ken imoral a pamay-anna, ken babaen ti intay panangsalimetmet kadagiti bilbilin ti Dios.

14. (a) Kasano nga immay ni Jesus “babaen iti danum”? (b) Kasano a ni Kristo naipakita nga Anak ti Dios “babaen iti dara”? (c) Kasano a ti nasantuan nga espiritu ‘pinaneknekanna’ ti maipapan ken Jesu-Kristo?

¹⁴ Yantangay ti pammati ken Jesus nakapatpateg unay iti intay panagbalin a ‘manangparukma iti lubong,’ insitar ni Juan dagiti pammaneknek a naited maipapan ken ni Kristo babaen kadagiti “tallo a mangsaksi.” (Basaenyo ti 1 Juan 5:6-8.) Umuna kinuna ni Juan a ni Jesus “immay gapu iti danum.” Idi nabautisaran ni Jesus iti danum a mangisimbolo iti panangiparangna iti bagina iti Dios, kinuna ni Jehova: “Daytoy ti Anakko, a dungdungoek, nga isu ti inanamongak.” (Mateo 3:17) Ni Kristo naipakita met nga Anak ti Dios “babaen iti dara” nga imparukpokna iti ipapatayna kas maysa a subbot. (1 Timoteo 2:5, 6) Mainayon pay, kuna ni Juan, “ti [nasantuan] nga espiritu ti mangted ti pammaneknek, gapu ta ti espiritu isu ti kinapudno.” Ti panagpababa iti espiritu ken Jesus idi bautismona ti nangpaneknek kenkuana nga isut’ Anak ti Dios. (Mateo 3:16; Juan 1:29-34) Ti espiritu ni Jehova ti namagbalin ken Jesus a nangitungpal iti nakaibaonanna ken nangaramid kadagiti nakaskasdaaw nga ar-aramid. (Juan 10:37, 38; Aramid 10:38) Babaen iti espiritu, nabalinan ti Dios ti nagaramid iti naisangsangayan a kinasipnget, ti ginggined, ken ti pannakapisang ti kurtina ti templo idi natay ni Jesus, ket kalpasanna babaen iti isu met laeng nga espiritu ti Dios ti nangpagungar kenkuana.​—Mateo 27:45-54.

15. Ania dagiti “tallo a mangsaksi”?

¹⁵ Gapuna “adda dagiti tallo a mangsaksi” iti kinapudno a ni Jesus isu ti Anak ti Dios. Dagitoy isuda ti (1) ti nasantuan nga espiritu, (2) ti danum iti bautismo ni Jesus ken ti itaktakderan dayta (ti panangiparangna iti bagina ken ni Jehova), ken (3) ti dara nga imparukpokna ken patay kas maysa a subbot. Dagitoy a tallo “agdadanggayda” a mangted iti pammaneknek a ni Jesus isut’ Anak ti Dios, nga isut’ masapul a pakaaddaantayo iti pudno a pammati no kayattay nga awaten ti biag nga awan inggana.​—Idiligyo iti Deuteronomio 19:15.

Ti Pammaneknek nga Inted ti Dios

16. Kasanot’ panangpaneknek ni Jehova maipapan ken Jesus?

¹⁶ Ti Dios a mismo ti nangted iti pammaneknek maipapan iti Anakna. (Basaenyo ti 1 Juan 5:9-12.) “No awatentayo [kas pudno] ti pammaneknek dagiti [imperpekto] a tattao [kas gagangayen nga ar-aramidentayo iti panagpapatang ken iti pangukoman], ti pammaneknek ti Dios dakdakkel.” (Juan 8:17, 18) Yantangay ti ‘Dios dina mabalin ti agulbod,’ mabalintayo nga ipaay ti naan-anay a panagtalektayo ‘iti pammaneknek ti Dios maipapan iti Anakna.’ Ket ni Jehova kinunana a ni Jesu-Kristo isut’ Anakna. (Tito 1:2; Mateo 3:17; 17:5) Mainayon pay, ti Dios isut’ adda iti likudan ti “tallo a mangsaksi,” kayatna a sawen, ti Nasantuan nga espirituna, ti danum iti bautismo ni Jesus, ken ti naiparukpok a dara ni Kristo.

17. Ania ti kakaisuna a pamay-an a posible ti pannakaisalakan?

¹⁷ “Ti mamati iti Anak ti Dios addaan iti pammaneknek a bukodna,” wenno “iti bagina met laeng,” agsipud ta amin dagiti pammaneknek ti mangkumbinsir kenkuana a ni Jesus isut’ Anak ti Dios. Ngem “ti saan a mamati iti Dios” kas maysa a mapagtalkan a mangsaksi maipapan iti Anakna pagparangenna ni Jehova a maysa a naulbod. Siempre, ti dagup ti pammaneknek a naited a “ta ti Dios inikkannatayo ti biag nga agnanayon, ket daytoy a biag adda iti Anakna.” Babaen laeng iti pammati ken Jesus kas Anak ti Dios a posible ti pannakaisalakan nga agturong iti biag nga agnanayon (Juan 11:25, 26; 14:6; 17:1-3) Gapuna “ti agikut iti Anak” babaen iti panamati kenkuana ti addaan iti di kaikarian a sagut ti biag nga awan inggana. (Juan 20:31) Ngem “daytoy a biag” dinto tagiragsaken ti asinoman nga awanan ti pammati ken Jesus kas Anak ti Dios.

Ti Kararag Addaan Bileg!

18. Apay a ni Juan insuratna “dagitoy a bambanag”?

¹⁸ Sumaganad inted ni Juan ti kangrunaan a panggep ti suratna ket salaysayenna ti kararag. (Basaenyo ti 1 Juan 5:13-15.) Insuratna “dagitoy a bambanag” tapno maammuan koma ‘nga addaantayo ti biag nga agnanayon.’ Daytoy ti riknatayo kas dagidiay addaan pammati iti “nagan” iti Anak ti Dios. (Idiligyo iti 1 Juan 3:23.) Ket dagiti apostata, a ditay ida kadua, dida madadael dayta a pammati.​—1 Juan 2:18, 19.

19. (a) Sigun iti 1 Juan 5:14, 15, addaantayo iti ania a “panagtalek” maipapan iti Dios? (b) Ania ti sumagmamano a bambanag a mabalintay a nainkalintegan nga ikararag?

¹⁹ Iti Dios addaantayo ti “panagtalek,” wenno “tured nga agsao,” nga aniaman a dawatentayo iti kararag “a maiyannurot iti pagayatanna, isu denggennatayo.” Siuumiso ti panangikararagtayo kadagiti bambanag kas ti pannakasantipikar iti nagan ni Jehova, ti espirituna, ti nadiosan a sirib, ken ti pannakaispal manipud iti managdakdakes. (Mateo 6:9, 13; Lucas 11:13; Santiago 1:5-8) Ket “ammotayo a magun-odantayto dagiti bambanag a dawatentayo no dinawattay dagita kenkuana,” ti “Managdengngeg iti kararag.”​—Salmo 65:2.

20, 21. (a) Ania daydiay “basol a di mangipaay iti ipapatay”? (b) Apay a di umiso ti panangikararag iti “basol a mangipaay iti ipapatay”?

²⁰ Sumaruno agsao ni Juan maipapan iti kararag ken iti isuamin a kita ti basol. (Basaenyo ti 1 Juan 5:16, 17.) “Ti maysa a basol a saan a maipaay iti ipapatay” ket saan a sipapakinakem, ket saan a dakes ti panangikararag a ti agbabbabawi a managbasol ket mapakawan. (Aramid 2:36-38; 3:19; Santiago 5:13-18) Ngem saan nga umiso ti panangikararag iti “basol a maipaay iti ipapatay” agsipud ta daytoy ti sipapakinakem a basol a maibusor iti nasantuan nga espiritu, nga awanen ti pannakapakawanna. (Mateo 12:22-32; Hebreo 6:4-6; 10:26-31) Dagita a managbasol mapandanto idiay Gehena, a lak-amenda ti agnanayon a pannakadadael “iti maikadua nga ipapatay.” (Apocalipsis 21:8; Mateo 23:15) Gapuna yantangay ni Jehova isunto ti maudi nga Ukom, ditay irisrisgo ti intay panangsair kenkuana babaen ti panangikararag iti managbasol idinto nga ipampamatmat dagiti pammaneknek nga isu ti sibabasol a sipapakinakem iti “basol a maipaay iti ipapatay.”

²¹ Gapuna, “no ti maysa a tao [nangnangruna ti napulotan-espiritu a panglakayen] makitana ti kabsatna nga agbasbasol iti maysa a basol a saan a maipaay iti ipapatay [“maikadua nga ipapatay”], rebbengna nga idawdawat, ket ti [Dios] ikkannanto ti biag [ti managbasol],” a mangisalakan kenkuana manipud iti agnanayon a pannakadadael. Siempre, “isuamin a kinakillo basol,” wenno ti pannakaikapis iti tanda maipapan kadagiti nalinteg a pagalagadan iti Dios. “Ket adda basol a saan a maipaay iti ipapatay” agsipud ta daytat’ bunga ti kinaimperpektotayo, agbabawitayo, ket ti basol ti abbongan ti daton ni Kristo.

Dagiti Kangrunaan a Paset iti Surat ni Juan

22. Asino ti “saan a sumagid” kadagiti nasungdo a Kristiano, ket agpaay iti ania a mabalin met nga ikararag ti kasta a tao a buyogen ti panagtalek?

²² Itan gupgopenen ni Juan dagiti pamunganayan a punto iti suratna. (Basaenyo ti 1 Juan 5:18-21.) Siasinoman “a nabukel iti Dios” kas maysa a napulotan iti espiritu a Kristiano “saan nga agbasol.” Ni Jesu-Kristo, “Daydiay nabukel iti Dios” babaen iti nasantuan nga espiritu, “agannad, ket ti managdakdakes [ni Satanas] saan a sumagid kenkuana.” Ti kasta a nasungdo a napulotan a Kristiano ti sitatalek a makapagkararag a maipaay iti pannakaispal manipud iti managdakdakes ket, babaen “ti dakkel a kalasag iti pammati,” malisianna ti naespirituan a pannakadangran manipud kadagiti “dumardarang a gayang” ni Satanas.​—Mateo 6:13; Efeso 6:16.

23. Kasano a ‘ti isuamin a lubong adda iti pannakabalin ti managdakdakes’?

²³ Agsipud ta dagiti napulotan addaanda ti pammaneknek nga isuda dagiti naespirituan nga annak ni Jehova, mabalinda a kunaen, “Ammomi a nagtaudkami iti Dios.” Ti kinapudno nga addaanda iti pammati ken Kristo ket saanda nga agaramid iti dakes paneknekanna nga isuda ti annak ti Dios isu a saan a mabalin a “tenglen” ni Satanas. “Ngem ti isuamin a lubong [ti nakillo a natauan a sosiedad] adda iti pannakabalin ti managdakdakes,” ni Satanas a Diablo. (Efeso 2:1, 2; Apocalipsis 12:9) Ti lubong tulokenna ti dakes nga impluensia ken panangituray ni Satanas, a di mangaramid iti panangikagumaan a makalapsut iti dayta tapno agaramid iti pagayatan ti Dios.

24. Iti ania a ni Jesus “inikkannatayo iti pannakaawat”?

²⁴ Kuna dagiti dadduma nga ulbod a mannursuro a ni Kristo saan nga immay iti lasag. (2 Juan 7) Ngem dagiti pammaneknek a naisitar iti daytoy a surat ti namagbalin ken ni Juan a makapagkuna, “Ket ammotayo a ti Anak ti Dios immay.” (1 Juan 1:1-4; 5:5-8) Mainayon pay, ni Jesus “inikkannatay ti pannakaawat,” wenno “pannakaawat iti isip,” tapno “mabigbigtayo daydiay a napudno,” maysa a narang-ay a pannakaawat maipapan iti Dios. (Mateo 11:27) Gapuna “datayo agtaengtayo iti daydiay napudno [ni Jehova a Dios], babaen iti Anakna a ni Jesu-Kristo.”​—Idiligyo iti Juan 17:20, 21.

25. Kas Kristiano, kasanotay a maiyaplikar ti balakad idiay 1 Juan 5:21?

²⁵ Dagidiay agtaeng iti pudno a Dios, a ni Jehova, napulotanda man a natda wenno dagiti “sabsabali a karnero,” tarigagayanda ti mangparagsak a mangay-ayo kenkuana iti isuamin a pamay-an. Ngem dagiti sulisog a makiraman iti panagdayaw iti didiosen ti adda idi umuna a siglo, kas met laeng ti kaaddada itatta. Gapuna siuumiso a pinagpatingga ni Juan ti suratna babaen iti naamaan a pammalakad: “Annakko a dungdunguen, igagayo dagiti bagbagiyo kadagiti didiosen.” Kas Kristiano, ditay kayat ti agruknoy iti sanguanan dagiti ladladawan. (Exodo 20:4-6) Ammotayo met a di umiso ti panangikabil iti bagbagitayo iti ragragsak, wenno aniaman pay a kasukat iti Dios. (2 Timoteo 3:1-2, 4) Ket ti dedikasiontayo kenkuana ti nairaman iti panagdaydayawtayo iti napolitikaan nga “atap nga animal” ken ti “ladawanna.” (Apocalipsis 13:14-18; 14:9-12) Gapuna addaan panggep a mangay-ayo iti nailangitan nga Amatayo ken panangawat iti sagutna a biag nga agnanayon, agbalintayo koma a natibker iti determinasiontayo a mangliklik iti amin a panagdayaw iti didiosen, a ditay palpalubosan dayta a mangdadael iti nagsudi a pannakirelasiontayo ken Jehova babaen ken Jesu-Kristo.

Ti Natibker a Tulong Kadatayo

26. Ania dagiti sumagmamano a napateg a paset ti Umuna a Juan?

²⁶ Ti immuna a naipaltiing a surat ni Juan ti nakatulong kadagiti immuna a Kristiano a nangliklik iti panagdayaw iti didiosen. Daytat’ nakatulong kadakuada a nangsungbat kadagiti kinaulbod dagiti apostata, ket daytat’ agserbi iti umas-asping met a panggep itatta. Kas pangarigan, pinaneknekan dayta a ni Jesu-Kristo ti nagbiag kas maysa a tao ken natay kas “daton ti kappia” a maipaay kadagiti basbasol. Impabigbig ti surat “ti antikristo” ket impabigbigna dagiti annak ti Dios ken dagiti annak ti Diablo. Ipakpakita dayta no kasano ti panangsuot kadagiti “napaltiingan a sasao” tapno makita no dagita ti naggapu ken ni Jehova. Mainayon pay dagiti sasao ni Juan ti nangkumbinsir kadatayo a ti “Dios isu ti ayat,” a ti pudno a pammati ti mangparmek iti lubong, ket ni Jehova denggenna ti karkararag dagiti nasungdo a saksina.

27. Kadagiti ania a pamay-an a ti immuna a nadiosan pannakaipaltiingna a surat ni Juan nakatulong kadatayo?

²⁷ Iti imatang dagiti nailubongan a pannulisog, anian a nainsiriban iti panangsalimetmet iti is-isiptayo iti pammakdaar ni Juan a maibusor iti panagayat iti lubong! No dagiti personal a di pagkikinnaawatan ti mangisaad iti pannakadadael iti pannakirelasiontayo kadagiti dadduma a kapammatiantayo, ipalagip kadatayo ti sasao ti apostol a mapaneknekantayo a datayo ti managayat iti Dios babaen iti panangiparangarang met iti nainkabsatan nga ayat. Babaen iti nadiosan a tulong ken babaen iti panangiyaplikar iti balakad ni Juan, maliklikantayo ti panagaramid ti basol ken masalimetmetantayo ti pammati a mangparukma iti lubong. Gapuna ipakitatayo ti panagyamantayo iti daytoy naipaltiing a surat bayat ti panagtultuloytayo a magna iti nadiosan a lawag, panagtultuloy nga agbiag kas annak ti Dios, ken kanayon nga iparangarang ti ayat ken pammati a maipaay a pakaidayawan ti nailangitan nga Amatayo, ni Jehova.

Kasano ti Panangsungbatyo?

◻ No ayatentay ni Jehova, kasano ti panangapektar daytoy iti relasiontayo kadagiti kapammatiantayo?

◻ Kasanotay a ‘parmeken ti lubong’?

◻ Ania dagiti “tallo a mammaneknek” maipapan iti Anak ti Dios?

◻ Maipapan iti kararag, ania a “panagtalek” ti mabalin a maadda kadatayo?

◻ Ti Umuna a Juan ti makatulong kadatayo kadagiti ania a pamay-an?

[Blurb iti panid 22]

Yantangay inayatnatayo ni Jehova bayat a managbasoltayo pay, ‘rebbengtay met ti agayan-ayat iti maysa ken maysa’

[Blurb iti panid 23]

Ti pammatitayo iti Dios, iti Saona, ken iti bugbugtong nga Anakna ti mamagbalin kadatayo a ‘mangparukma iti lubong’

[Ladawan iti panid 25]

Ti nasantuan nga espiritu, ti danum iti bautismo ni Jesus, ken ti naiparukpok a darana, ken ni Jehova a mismo ti mangpaneknek a ni Jesu-Kristo ket Anak ti Dios