Itultuloyyo ti Magna iti Lawag a Nadiosan

Bayat ti panagadal ti kongregasion iti daytoy nga artikulo ken ti dua a sumaruno iti dayta, rebbeng a pabasa ti mangidadaulo dagiti naisitar a paset ti Umuna a Juan kas ipalubos ti panawen

“Ti Dios isu ti silaw.”​—1 JUAN 1:5.

 1, 2. Kaano ken sadino ti nakaisuratan ti Umuna a Juan, ken kadagiti siasino ti pagaplikaranna?

AGYAMYAMAN dagiti Saksi ni Jehova gapu iti lawag a nadiosan ket rantada ti agtultuloy a magna iti dayta. Ti panangaramid iti dayta ket saan a nalaka, nupay kasta, ta uray dagiti immuna nga ad-adalan ni Jesu-Kristo ket naipasangoda iti apostasia. Ngem dagiti nasungdo nga apostol ni Jesus linapdanda ti panagsaknap dayta, ket daydiay maysa a ‘nagtignay a mangtiped’ isu ni apostol Juan. (2 Tesalonica 2:1-12) Kas maysa a lakayen nagbibiag idiay uneg wenno arubayan ti Efeso idi agarup 98 K.P., insuratna iti umuna iti nadiosan pannakaipaltiingna a suratna. Ti balakad dayta ti nakatulong kadagiti immuna-siglo a Kristiano a nagtultuloy a nagna iti lawag a nadiosan. Ngem ania met ngay maipapan kadatayo?

² Dagiti sasao ni Juan ti makatulong met kadatayo kadagiti maikaduapulo a siglo a Kristiano. Gapuna bayat ti pribado a panagadal iti daytoy nga artikulo ken kadagiti dua a sumaruno iti dayta, siguraduenyo a basaen amin dagiti naisitar a paset iti umuna a naipaltiing a suratna bayat a dagita maus-usigda. Iti surat ti apostol ken kadagiti komento maipapan iti dayta, dagiti pronombre kas ti “datayo” ken “tayo” ti kangrunaanna tuktukoyenna dagiti napulotan a paspasurot ni Jesus. Ngem dagiti kangrunaan a prinsipio a mainaig iti kinalinteg, ayat, pammati, ken kadagiti umas-asping kadagita ti agaplikar met kadagiti Kristiano nga addaan naindagaan a namnama.

Ti Pannakikadkadua a Mangyeg Rag-o

 3. Aniat’ pammaneknek a ti Anak ti Dios, nagsagaba, ken natay kas tao, ken apay a naawagan “ti sao ti biag”?

³ Nagsao nga umuna ni Juan maipapan iti naragsak a “pannakikadkadua.” (Basaenyo ti 1 Juan 1:1-4.) Ni Jesus, “ti sao ti biag,” ti kadua ni Jehova “manipud idi punganay,” kas umuna a parsua ti Dios, ta babaen kenkuana “naparsua dagiti amin nga adda.” (Colosas 1:15, 16) Dadduma kadagiti immuna-siglo nga apostata kunada nga awan basolda ket inlibakda ti umiso a lugar ni Kristo iti nadiosan nga urnos. Ngem dagiti apostol ni Jesus ti nakangngeg kenkuana a nagsao, isu ti minatmatanda a sipapasnek, ken isu ti nasagsagidda. Ket pagaammoda a ti pannakabalin ti Dios ti agan-andar babaen kenkuana. Gapuna nga adda dagiti makita a pammaneknek nga isu ti Anak ti Dios a pudno a nagbiag, nagsagaba, ken natay kas maysa a tao. Isu “ti sao ti biag” agsipud ta ti “biag [nga agnanayon] naiparangarang” babaen ken Jesus, a babaen kenkuana ti Dios impaayna ti subbot.​—Roma 6:23; 2 Timoteo 1:9, 10.

 4. Ania ti ipamatmat ti “pannakikadkadua” nga adda kadagiti napulotan?

⁴ Babaen kadagiti sinao ken insurat dagiti apostol, ‘pinaneknekanda’ ti maipapan iti awan basolna a tao a ni Jesu-Kristo. ‘Impakaammo’ ni Juan dagita a bambanag tapno dagiti napulotan ket maaddaanda ti “pannakikadkadua,” wenno pannakikuykuyog, kadagiti dadduma a makipagtawid iti Pagarian, iti Ama, ken iti Anakna. Daytoy a “pannakikadkadua” ipamatmatna ti panagkaykaysa ken mamataud ti dakkel a rag-o. (Salmo 133:1-3; Juan 17:20, 21) Dagiti apostata a gumurgura kadagiti dati a kakkakuyogda iti serbisio ni Jehova awanandan iti kasta a pannakikadua iti Dios ken ni Kristo.

“Ti Dios Isu ti Lawag”

 5. Ania a “damag” ti inawat dagiti apostol manipud ken ni Jesus, ket kasanot’ panangapektar dayta iti kababalin dagiti Saksi ni Jehova?

⁵ Ti sumaganad a naibaga isut’ maysa a “damag” nga inawat dagiti apostol manipud ken Jesus. (Basaenyo ti 1 Juan 1:5-7.) Isu daytoy: “Ti Dios isu ti lawag ket awan kenkuana ti aniaman a sipnget [awan aniaman a di nasantuan, imoral, di pudno, wenno dakes].” Gapuna dagiti Saksi ni Jehova idianda amin a makabasol nga ar-aramid a nainaig iti kinasipnget. (Job 24:14-16; Juan 3:19-21; Roma 13:11-14; 2 Corinto 6:14; 1 Tesalonica 5:6-9) Yantangay dadduma kadagiti apostata dida patien nga addada dagiti ar-aramid ti basol, addada iti naespirituan a kinasipnget. Kunada nga addaanda kadagiti nalimed a pannakaammo, ngem ti Dios isu ti lawag, saan a nasipnget a kinalimed. Isut’ mangted laeng iti naespirituan a lawag kadagiti matalek a saksina.​—Mateo 5:14-16; 1 Pedro 2:9.

 6. No ‘agtungpaltayo iti kinapudno,’ ania dagiti bendisiontayo?

⁶ No kunatay nga addaantayo iti “pannakikadkadua” iti Dios ngem “magnatayo iti kinasipnget,” a mangiturong iti sibabasol a panagbiag, “agulbodtayo ket saantayo nga aramiden ti pudno,” wenno agbiag a maitunos iti dayta. Ngem no sursurotentayo ti kurso a maitunos iti kinapudno, addatayo iti lawag, kas iti Dios adda iti lawag. Addaantayo ti “pannakikadkadua” kadagiti padatay a Kristiano, nga agkaykaysada iti doktrina, naespirituan a panangmatmat, iti trabaho a panagaramid-adalan, ken dadduma pay a paset iti nadalus a panagdayaw.

 7. Apay a ti dara ni Jesus ‘maugasannatayo manipud amin a basol’?

⁷ Saan a kas kadagiti dadduma nga immuna nga apostata, datayo a ‘magmagna iti lawag’ bigbigentayo a ti basol ket narugit. Ti dara ni Jesus “ugasannatayo iti amin a basol” agsipud ta saantayo a sipapakinakem a managbasol. (Mateo 12:31, 32) Pudno unay, agyamyamantayo ta ti Dios mangipakpakita iti asi uray kadagiti agbiddut ngem agbabbabawi a Kristiano.​—Salmo 103:8-14; Mikias 7:18, 19.

Ti Pakaibatayan ti Pannakaabbong

 8, 9. (a) Maibatay iti ania ti pangpakawanan ni Jehova kadatayo? (b) No maipapan iti basol, aniat’ ibagbaga dagiti dadduma nga apostata, ket apay a nagbiddutda?

⁸ Iti sumaganad isitar ni Juan dagiti pakaibatayan ti pannakaugas manipud basol. (Basaenyo ti 1 Juan 1:8–2:2.) No kunaentayo, “Awan ti basoltayo,” iliblibaktayo ti kinapudno nga amin dagiti imperpekto a tattao ket managbasolda, ket “ti kinapudno awan kadatayo.” (Roma 5:12) Ngem ti Dios ket “mapagtalkan” ket pakawanennatayo “no ipudnotayo dagiti basbasoltayo” kenkuana nga addaan iti agbabbabawi a kababalin a mangtignay kadatayo a mangidian iti di umiso. (Proverbio 28:13) Kuna ti Dios kadagidiay adda iti baro a tulag: “Ket saankonto a lagipenen ti basolda.” (Jeremias 31:31-34; Hebreo 8:7-12) Iti panangpakawanna kadakuada, isu ti mapagtalkan iti dayta a kari.

⁹ Mainayon pay, ti Dios ket “nalinteg,” a kanayon a salsalimetmetanna dagiti pagalagadanna iti kinalinteg. Pinennekna ti kinahustisia babaen iti subbot ken ‘pakawanennatayonto kadagiti basbasoltayo ken ugasannatayo kadagiti amin a kinakillo’ no ipudnotay ti kinamanagbasoltayo a buyogen ti pammati iti daton ni Jesus. (Hebreo 9:11-15) Babaen iti ipapatayna imbaklayen nga inyadayo ti Mesias dagiti basbasol, kas iti daydiay kalding a mangawit kadagiti basbasol maibaonton iti let-ang iti Aldaw ti Pannakaabbong. (Levitico 16:20-22; Isaias 53:5, 8, 11, 12; 1 Pedro 2:24) Dadduma kadagiti apostata kunada, “Dikam nagbasol,” iti kasta ‘pinagbalinda nga ulbod ni Jehova.’ Ngem ti “Dios . . . dina mabalin ti agulbod,” ket ipakpakita ti Saona nga amin dagiti imperpekto a tattao managbasolda. (Tito 1:2; Eclesiastes 7:20; Roma 3:23) Apay, ti panagkuna a “dikam nagbasol” kaipapananna a ti Sao ti Dios ket awan “kadatayo,” awan kadagiti puspusotayo!​—Idiligyo iti Hebreo 8:10.

10. Iti ania a pamay-an a ni Jesus ket “maysa a daton ti kappia”?

¹⁰ Insurat ni Juan “dagitoy a bambanag” maipapan iti basol, pammakawan, ken pannakaugas tapno ditayo iyugali ti panagbasol. Dagiti sasaona ti rebbeng a mamagtignay kadatayo a pagreggetan a sipapasnek a saan nga agbasol. (1 Corinto 15:34) Ngem no “makabasol[tayo]” ket agbabbabawitayo, addaantayo ti “manangibabaet iti Ama”​—ni “Jesu-Kristo, a nalinteg,” nga isunto ti mangiyararaw iti kasasaadtayo iti Dios. (Hebreo 7:26; idiligyo iti Juan 17:9, 15, 20.) Ni Jesus isu ti “daton ti kappia.” Ti ipapatayna ti mangpennek iti kinahustisia ket pinagbalinna a posible iti Dios a mangipaay iti asi ken ikkatenna ti naipabiang a basol iti kaso dagiti naespirituan nga Israelitas ken ‘ti isuamin a lubong,’ agraman ti “dakkel a bunggoy.” (Roma 6:23; Galacia 6:16; Apocalipsis 7:4-14) Anian ti panangipategtayo iti dayta a daton!

Agtulnog iti Dios ken Ipakita ti Ayat

11. Babaen iti ania a pammaneknek nga ammotayo nga “agtalinaedtayo” iti Dios?

¹¹ Tapno agtultuloy a magna iti nadiosan a lawag, masapul nga agtulnogtayo ken ni Jehova. (Basaenyo ti 1 Juan 2:3-6.) Mabigbigtayo a “maammuantayo” ti Dios, matarusantayo ken maawatantayo dagiti kualidadna, no “salimetmetantayo dagiti bilbilinna.” Asinoman nga agkuna nga ammona ni Jehova ngem di met agtulnog kenkuana “isu ti naulbod.” Iti kasumbangirna, “pudno a nagdanonan kenkuana ti ayat ti Dios,” wenno naan-anay dayta, no tungpalentayo ti saona. “Babaen iti daytoy” a pammaneknek ti panagtulnog ken panagayat iti Dios, daytoy ti pakaammuantayo nga “addatay kenkuana.” Ket obligadotayo a magna a kas iti pannagna ti Anakna, iti trabaho a panagaramid-adalan, iti relasiontayo kadagiti sabsabali, ken dadduma pay.

12. Ania ti “daan a bilin” nga adda kadagiti Kristiano, ken kasano met a dayta ti “baro”?

¹² Nasken met ti ayat a nainkabsatan. (Basaenyo ti 1 Juan 2:7, 8.) Ni Juan ti agsursurat maipapan “iti bilin a daan” nga adda kadagiti matalek “nanipud idi punganay” iti panagbiagda kas Kristiano. Dayta ti “daan” agsipud ta daytat’ inted ni Jesus adu a tawtawenen nga immun-una idi nga imbagana kadagiti paspasurotna nga ‘agayatda iti maysa ken maysa a kas ti panangayatna kadakuada.’ (Juan 13:34) Kaskasdi dayta met ti “baro” agsipud ta daytat’ lumab-aw iti ayat iti kaarruba wenno pada a tao nga isut’ kalkalikaguman ti Linteg ken aw-awaganna iti situtulok a panangisuko iti biag ti maysa gapu kadagiti padana a manamati. (Levitico 19:18; Juan 15:12, 13) Yantangay ti managsakripisio nga ayattayo paneknekanna ti panangtungpal iti daytoy “baro a bilin” ket ‘pudno agpadpada ken Kristo ken kadatayo, ti kinasipnget aglabasen ket ti pudno a silaw ti agranraniagen’ kadatayo.

13. Sigun iti 1 Juan 2:9-11, asino ti “adda iti lawag” ket asino dagiti awan iti lawag?

¹³ Kaskasdi, asino a talaga ti “adda iti lawag”? (Basaenyo ti 1 Juan 2:9-11.) Bueno, “ti agkuna nga adda iti lawag ket guraenna ni kabsatna” ket adda pay laeng iti naespirituan a kinasipnget “agingga ita.” Ngem “ti agayat iti kabsatna agtalinaed iti lawag,” ket iti daytoy a kaso awan “kenkuana ti aniaman a pakaikulbuan.” Ditoy ti sao a Griego isingsingasingna ti adda appanna a pagsilo ti animal ket ipampamatmatna ti maysa a banag a mangiyeg iti pannakatnag iti basol. Kinapudnona, ti agkunkuna a Kristiano a gumurgura iti kabsatna “dina ammo no sadino ti pagturonganna, agsipud ta ti sipnget kinullaapanna dagiti matana.” (Mateo 13:13-15) Daytoy kadi a pammakdaar ti mangtignay kadatayo a mangliklik iti naespirituan a kinasipnget babaen ti dikay panangipalubos kadagiti personal a pagdudumaan, ti kinaulbod dagiti apostata, wenno aniaman pay a bambanag a mangdadael iti ayatyo a nainkabsatan?

Ti Pakaibatayan ti Panagtalek

14. Asino dagiti “ub-ubbing” ken dagiti “amma” a sinuratan ni Juan?

¹⁴ Sumaganad inyebkas ni Juan ti panagtalekna kadagiti “ub-ubbing [agtutubo],” a kaawatan tuktukoyenna ti intero a kongregasion. (Basaenyo ti 1 Juan 2:12-14.) Dagiti basbasoltayo ti napakawanen ‘maigapu iti nagan ni Kristo,’ ta babaen laeng kenkuana a pinagbalin a posible ti Dios ti pannakaisalakan. (Aramid 4:12) Dagiti napulotan “ammoda ti Ama” agsipud ta inyanakna ida babaen iti espiritu. Dadduma isuda dagiti “amma”​—a mabalbalin isuda dagiti natataenganen, ad-adu ti kapadasanna, ken narangrang-ay iti naespirituan a manamati. Ammoda ni Jesus, nga isut’ addan “manipud idi punganay” gapu ta isu ti pinarsua ti Dios sakbay amin dagiti dadduma a bambanag.

15. (a) Asino dagiti “agtutubo a lallaki” a sinuratan ni Juan, ken kasano nga “inabak[da] ti managdakdakes”? (b) Mangted iti pangarigan no kasano ti mabalinyo a ‘panangabak’ ken Satanas itatta.

¹⁵ Dagiti “agtutubo a lallaki” a dinakamat ni Juan mabalin nga isuda dagiti ub-ubbing, nakurkurang ti kapadasanna a Kristiano. Isuda “inabak[da] ti managdakdakes,” ni Satanas, babaen iti saanda a pannakatnag kadagiti “gakatna.” (2 Corinto 2:11) Kas pangarigan, itatta ramanenna daytoy ti panangliklik kadagiti narugit a paglinglingayan, dagiti naderrep a toktokar, ken pornograpia, nga isut’ makadadael kadagiti Nakristianuan a prinsipio ket mangibunga iti pannakatnag iti seksual nga imoralidad. Dagiti “agtutubo a lallaki” naballigida a maibusor ken Satanas agsipud ta isuda ti “napigsa” iti naespirituan ket “ti sao ti Dios” nagtalinaed kadakuada. Sapay koma ta agbalintayo a kas kadakuada iti panangawat kadagiti naespirituan a sagana ti Dios, a laksiden ti aspostasia, ket agtultuloy a magna iti nadiosan a lawag.

Ti Ayat a Di Koma Maadda Kadatayo

16. Ania nga ayat ti rebbeng nga awan koma kadatayo, ngem ania ti pudno kadatayo no addaantay kadagiti nailubongan a panangmatmat ken tartarigagay?

¹⁶ Datayo man dagiti ub-ubbing wenno natataengan a Kristiano, adda ti ayat a di koma maadda kadatayo. (Basaenyo ti 1 Juan 2:15-17.) ‘Ditay koma ayaten ti lubong wenno uray dagiti bambanag nga adda kenkuana.’ Imbes ketdi, salimetmetantay koma a ditay matulawan babaen kadagiti kinarugit iti nakillo a natauan a kagimongan ket ditay angsen ti “espirituna,” wenno matignay babaen kadagiti sibabasol a dominante a kababalinna. (Efeso 2:1, 2; Santiago 1:27) No maaddaantayo kadagiti nailubongan a panangmatmat ken tartarigagay, “ti ayat ti Ama” awan kadatayo. (Santiago 4:4) Daytat’ taraon a maipaay iti sikakararag a panagpampanunot, saan aya?

17. Rebbeng a di penneken dagiti Kristiano dagiti ania a nailubongan a tartarigagay?

¹⁷ “Isuamin nga adda ditoy lubong” ket saan a namunganay iti Dios. Ramanen daytoy “ti tarigagay ti lasag,” ti panangpennek iti dayta kaipapananna ti panangpennek kadagiti sibabasol a panangil-iliw kas dagiti imoral a seksual a tartarigagay. (1 Corinto 6:15-20; Galacia 5:19-21) Ti met liklikan isu ti pannakatnag “iti derrep dagiti mata.” Ti makagargari unay iti mata a naiparit a bunga ti nakaallukoy ken ni Eva, ket ti panangbuybuya ni David ken ni Batseba bayat nga isut’ nagdigdigos ti nangiturong kenkuana iti nadagsen a basol. (Genesis 3:6; 2 Samuel 11:2-17) Tapno agtultuloy a magna iti nadiosan a lawag, masapul a liklikantayo dagiti nakaap-aprang a panaglinglingay ken dadduma pay a bambanag a mangallukoy iti sibabasol a tartarigagay ket mangrugit iti puso.​—Proverbio 2:10-22; 4:20-27.

18. Apay a “ti kinapalanguad iti panagbiag” awan mamaayna, ket ania ti dinanto maiyeg?

¹⁸ Agtataud met iti lubong isu “ti kinapalangguad iti panagbiag.” Ti tao a natangsit mabalin a paglastogna ti kinabaknangna, dagiti kawkawesna, ken dagiti umas-asping kadagita, nga amin dagita ti mabalin a mapukaw. Ti “kinapalanguad” ti mabalin a mamagsiddaaw iti sumagmamano a tattao ket mangyeg kadagiti apagbiit panaglabasna a dayaw ngem saan a kadagiti nadiosan a bendision.​—Mateo 6:2, 5, 16, 19-21; Santiago 4:16.

19. Anianto ti mapasamak iti daytoy a lubong, ket kasanot’ rebbeng a panangapektar daytoy a kinapudno kadatayo?

¹⁹ Laglagipenyo a “ti lubong aglabas” ket madadaelto. (2 Pedro 3:6) Dagiti tartarigagay ken namnamana mapukawdanto a kaduana, agraman dagiti tattao nga agayat iti dayta. “Ngem,” kuna ni Juan, “ti agaramid iti pagayatan ti Dios mataginayon.” Gapuna matmatmatantay koma a kankanayon ti biag nga awan inggana babaen iti ‘pananggura kadagiti nailubongan a tartarigagay’ ket agtultuloytayo a magna iti nadiosan a lawag.​—Tito 2:11-14.

Agsalukag a Maibusor iti Apostasia

20. Dagidiay ‘maibusor ken Kristo’ naawaganda ti ania, ket ti panagparangda paneknekanna nga ania ti dimtengen?

²⁰ Itan mamakdaar ni Juan a maibusor kadagiti antikristo. (Basaenyo ti 1 Juan 2:18, 19.) Pinalagipanna dagiti kapammatianna a manipud kadagiti apostol “nangngeg[da]” nga umay ti antikristo.” Ti panagparang dagiti “adu nga antikristo” paneknekanna nga isun ti “kamaudianan nga oras,” ti maudi a paset ti panawen nga apostoliko. Nupay dagidiay ‘maibusor ken Kristo’ ti mangbukel iti nagkaykaysa nga “antikristo,” adu kadagiti indibidual nga antikristo ti sinsinan nga agdaydayawda iti Dios ngem “ditay ida kadua” ket tinalikudanda ti pudno a Kinakristiano. Maragsakantayo a ti ipapanaw wenno pannakailaksid dagiti kakasta itatta ti nanglapped iti pannakamulit ti kongregasion.

21. Apay a dagiti naiyanak iti espiritu a Kristiano “addaanda iti pannakaammo,” ket ania a “kinapudno” ti ammoda?

²¹ Dagiti panangmatmat nga apostata ti linaksid dagiti nasungdo a Kristiano a naiyanak iti espiritu. Yantangay ti “pananglana manipud iti santo,” a ni Jehova, ti nangtulong kadakuada a nangtarus iti Saona, ‘aminda ti addaan ti pannakaammo.’ (Basaenyo ti 1 Juan 2:20, 21.) Sigsigurado nga ammoda “ti kinapudno” a mainaig ken Jesu-Kristo, idinto a dagiti apostata addaanda kadagiti errado a kapanunotan maipapan kenkuana. Yantangay “awan ti ulbod nga agtaud iti kinapudno,” amin dagiti managayat ken ni Jehova laksidenda dagiti kakasta nga ulbod a panangmatmat ken dagidiay mangitantandudo kadakuada.

22. Aniat’ inaramid ni C. T. Russell idi maysa kadagiti immuna a kadkaduana inlibakna ti subbot?

²² Ta kinaagpaysona, “asino ti naulbod no di daydiay mangilibak a ni Jesus isu ti Kristo,” daydiay Pinulotan ti Dios? (Basaenyo ti 1 Juan 2:22-25.) Apay, ‘daydiay mangilibak iti Ama ken ti Anak isuda ti antikristo’! Makapainteres, idi maysa kadagiti immuna a kadua ti estudiante ti Biblia ni Charles T. Russell inlibakna ti subbot, simmina ni Russell manipud pannakikadkadua kenkuana ket rinugianna nga impablaak daytoy a pagiwarnak, a daytat’ kanayon a nangiwaragawag ti kinapudno maipapan iti namunganayan ni Kristo, ti Mesianiko nga akemna, ken ti naayat a serbisio kas ti “makaabbong a daton.”

23. Kasano a ti ‘panangipudnotayo iti Anak’ apektaranna ti pannakirelasiontayo iti Dios, ken dagiti pananginanamatayo?

²³ Dagiti apostata a mangilibak ken Kristo awan kadakuada ni Jehova a kas gayyemda. (Juan 5:23) Ngem datayo a ‘mangipudno [iti publiko] iti Anak adda kadatayo ti Ama,’ ta addatayo iti naanamongan a pannakirelasion iti Dios. (Mateo 10:32, 33) Dagiti immuna a nasungdo a paspasurot ni Jesus pinetpetanda ti nangngeganda maipapan iti Anak ti Dios “manipud idi punganay” iti panagbiagda kas Kristiano. Ket no dagita met laeng a kinapudno ti adda iti puspusotayo, “agtalinaedtayo a makikadua” agpadpada iti Dios ken ni Kristo ket awatentayto “ti naikari,” ti biag nga agnanayon.​—Juan 17:3.

Sinuruan ni Jehova a Dios

24. Asinoda dagiti addaan ti “pannakapulot” iti nasantuan nga espiritu, ket apay a “dida kasapulan ti asinoman a mangisuro” kadakuada?

²⁴ Tapno magna iti nadiosan a lawag ket di maallilaw babaen kadagiti apostata, kasapulantayo ti umiso a naespirituan a pannakasursuro. (Basaenyo ti 1 Juan 2:26-29.) Dagidiay naiyanak iti espiritu ket addaanda iti “pannakapulot” babaen iti nasantuan nga espiritu, naammuanda ti Dios ken ti Anakna, ken “awan ti pakasapulanda iti uray siasino [nga apostata] a mangisuro” kadakuada. Babaen ti mangpulot nga espirituna, ti Dios “isurona” dagiti naespirituan nga Israelitas “maipapan kadagiti isuamin a bambanag” a kasapulan tapno makapagdayaw kenkuana iti makaay-ayo a pamay-an. (Juan 4:23, 24; 6:45) Maragsakantayo ta kas dagiti Saksi ni Jehova inawattayo ti kasta a naespirituan a pannakasursuro manipud iti Dios babaen “ti matalek ken naannad nga adipen.”​—Mateo 24:45-47.

25, 26. (a) Apay a dagiti napulotan maaddaanda ti “wayawaya ti panagsao”? (b) Aniat’ kayat a sawen ti ‘panagaramid ti kinalinteg’?

²⁵ Ingunamgunam ni Juan kadagiti umiso ti pannakasursurona a napulotan nga “agtalinaedda” iti Dios. Dagidiay “agtalinaed” ken Jehova ti addaan met iti pannakikaykaysa iti Anakna. (Juan 14:19-21) Ti kasta a panagkaykaysa ti naigunamgunam tapno “inton maiparangarang [ni Kristo] addanto ti sibubulos a panagsaotayo ket saantay a mabainan iti sanguananna inton kaaddana,” kayatna a sawen, bayat ti Parousiana.

²⁶ Yantangay agbibiagtayon bayat ti “kaadda” ni Jesus, kasanotayo a masigurado nga awan ti ibaintayo ken ti kinapudnona magmagnatayo iti nadiosan a lawag? Babaen ti ‘panagaramid iti kinalinteg.’ ‘No ammotayo a ti Dios nalinteg,’ inrason ni Juan, ‘pagaammotayo a tunggal agar-aramid ti kinalinteg ti namunganay kenkuana.’ ‘Ti panagaramid ti kinalinteg’ kaipapananna ti panagtulnog kadagiti bilbilin ti Dios, a liklikan dagiti kinakillo, ket makiraman kadagiti nasayaat nga ar-aramid kas ti panagaramid ti adalan ken panangtulong kadagiti kapammatian. (Marcos 13:10; Filipos 4:14-19; 1 Timoteo 6:17, 18) Ti “pannakaipasngay iti” Dios kaipapananna ti “pannakaiyanak manen” kas kadagiti naespirituan nga annakna.​—Juan 3:3-8.

27. Aniat’ sumaganad nga ipakita ni apostol Juan kadatayo?

²⁷ Gapuna impakita ni Juan no kasano ti panagtultuloy iti pannagna iti nadiosan a lawag. Sumaganad impakitana no kasano ti panagbiag kas annak ti Dios. Aniat’ sapulen daytoy?

Ania dagiti Sungbatyo?

◻ Ania ti pammaneknek nga inted ni Juan a ti Anak ti Dios nagbiag, nagsagaba, ken natay kas maysa a tao?

◻ Iti ania a pamay-an a ni Jesu-Kristo ket “maysa a daton ti kappia”?

◻ Ania a bilin ti adda kadagiti Kristiano nga agpadpada a “daan” ken “baro”?

◻ Anianto ti mapasamak iti daytoy a lubong, ket kasano ti panangapektar daytoy a kinapudno kadatayo kas Kristiano?

◻ Kasanot’ pannakasiguro dagiti napulotan a magmagnada iti nadiosan a lawag?

[Blurb iti panid 12]

Ipakpakitayo aya ti panangipategyo iti daton ni Jesus?