MUGING

Ti paset ti rupa iti ngatuen dagiti mata. Ti maysa a Hebreo a sao a naipatarus a ‘muging’ (De 14:1) ken ti Griego a sao maipaay iti “muging” (meʹto·pon) ket literal a kaipapananna ti “nagbaetan dagiti mata.” Kadagidi nagkauna a tiempo, gapu ta ti muging ket nakapatpatak ken makita a dagus a paset ti bagi ti maysa a tao, dayta ti pangmarkaan kadagiti adipen tapno makita ti amin no siasino ti pagserserbianda nga apo. Kasta met laeng ti pannakamarka dagiti debotado iti sumagmamano a pagano a dios. Uray itatta, an-annuroten ti dadduma ti panagikabil kadagiti narelihiosuan a marka iti muging, tapno maammuan ti sabsabali a debosionadoda kadagiti narelihiosuan a patpatienda.

Marka iti Muging. Iti Biblia, ti kaadda ti marka iti “muging” ket naaramat met iti piguratibo a pamay-an tapno mangipasimudaag a ti maysa ket adipen ti pudno a Dios wenno ti sabali. Iti Apocalipsis 7:2-4, natukoy ti panangselio dagiti anghel kadagiti muging ti 144,000 a persona. (Kitaenyo ti SELIO.) Iti sabali pay a paset ti sirmata iti Apocalipsis, naiparang ti 144,000 nga addaan iti nagan ti Kordero, ni Jesu-Kristo, ken iti nagan ti Amana a naisurat kadagiti mugingda. Maiparbeng laeng nga addaanda iti naganna ta nobia ida ti Kordero. (Apo 14:1; 22:3, 4) Yantangay namindua a nadakamat ti pagsasao a Hebreo iti libro ti Apocalipsis (9:11; 16:16) ken gapu ta ni apostol Juan ket maysa a Hebreo, mabalin a ti sagrado a Tetragrammaton ti naisurat kadagiti muging ti 144,000, a mangipabigbig nga ad-adipen ken saksi ida ni Jehova.

Kas nailadawan iti Ezequiel 9:3-6, maysa a kita ti tattao ti namarkaan kadagiti mugingda kas proteksion manipud panangdadael dagiti mangpapatay a puersa ti Dios. Ngem iti daytoy a gundaway, saan a dagiti anghel ti nangmarka kadakuada, saan met a maysa a “selio” ti naimarka kadakuada, no di ket minarkaan ida ti maysa a lalaki nga addaan iti “tintero ti sekretario.” Yantangay nailadawan dagitoy kas “agsensennaay ken umas-asug gapu iti amin a nakarimrimon a bambanag a maar-aramid,” ti ‘pannakamarkada’ ti mangipakita nga ad-adipen ken agdaydayawda ken Jehova; ti tigtignay, ar-aramid, ken personalidadda ket nabatad a mangpaneknek iti daytoy iti sanguanan ti isuamin, a kasla naisurat ‘kadagiti mugingda.’

Iti panangmarka kadagiti agbalin nga adipen ti napolitikaan nga “atap nga animal” ti lubong (kitaenyo ti AN-ANIMAL, SIMBOLIKO NGA [Ti pito-ti-ulona nga atap nga animal manipud iti baybay]), maysa a simboliko a marka ti naikabil kadagiti muging wenno makannawan nga im-ima ti tattao, a naipilit pay ketdi dayta, kas nailadawan iti Apocalipsis 13:16, 17. Ipakita ti panangawatda iti dayta a marka a kabusor ida ti Dios ken naikeddeng nga awatenda ti nakaro nga ungetna.​—Apo 14:9-11; kitaenyo ti MARKA.

Nangato a Padi iti Israel. Iti Israel, iti sango ti turbante ti nangato a padi, iti rabaw ti muging ti padi, adda ti maysa a balitok a plata “ti nasantuan a pagilasinan ti dedikasion,” nga iti rabaw dayta ket naikitikit “babaen kadagiti kitikit ti maysa a selio” ti sasao a “Ti kinasanto kukua ni Jehova.” (Ex 28:36-38; 39:30) Kas kangrunaan a pannakabagi ti panagdaydayaw ken Jehova ti Israel, ti nangato a padi mayanatup a taginayonenna a nasantuan ti akemna, ket daytoy met a kitikit ti agserbi a pammalagip iti intero nga Israel a masapul nga agtalinaedda a nasantuan iti panagserbi ken Jehova. Maitutop met dayta a ladawan ti naindaklan a Nangato a Padi, ni Jesu-Kristo, ken ti panangidedikar kenkuana ni Jehova iti daytoy a panagserbi kas padi a mangitandudo iti kinasanto ti Dios.​—Heb 7:26.

Babilonia a Dakkel. Iti kasumbangirna, adda nagan a “Babilonia a Dakkel” iti muging ti simboliko a naindaklan a balangkantis. Nabayagen nga inrepresentar ti kadaanan a Babilonia dagidiay saan a nasantuan ken bumusbusor iti Dios.​—Apo 17:1-6; kitaenyo ti BABILONIA A DAKKEL.

Dadduma Pay a Pannakausar ti Termino. Ti sabali pay a piguratibo a pannakausar ti sao a “muging” ket masarakan iti Isaias 48:4, a sadiay kuna ni Jehova a ti muging ti Israel ket gambang, nabatad a gapu ta kasta unay ti kinasukir ken kinarebeliosona. Iti Jeremias 3:3, ti nakuspag ken awan bainna a panagapostata ti di matalek a Jerusalem ket nailadawan iti piguratibo a pamay-an kas “ti muging ti asawa a babai nga agbalbalangkantis.” Kasta met, iti Ezequiel 3:7-9, kuna ti Dios ken Ezequiel, a nagipadto kadagiti Israelita a natangken ti panagul-uloda (iti literal, “natangken a muging”) ken natangken ti panagpuspusoda, a pinagbalinna a “kas iti diamante” ti muging ti mammadto, ta pinagbalinna a desidido, determinado, ken natured a mangidanon iti mensahe ti Dios kadakuada.

Idi sidudursok ken di nainkalintegan nga inagaw ni Ari Ozias dagiti annongen ti padi, ta ginandatna ti mangidaton iti insienso iti rabaw ti altar ti insienso iti templo ni Jehova, sipapatak ken dagus a naiparangarang ti basolna ken ti panangukom ni Jehova babaen ti itatanor ti kukutel iti mugingna.​—2Cr 26:16, 19, 20.