Denggenyo ti Kunaen ti Espiritu!

“Daydiay addaan lapayag denggenna koma ti kunaen ti espiritu kadagiti kongregasion.”​—APOCALIPSIS 3:22.

1, 2. Ania a balakad ti maulit-ulit mainaig kadagiti mensahe ni Jesus kadagiti pito a kongregasion a nainaganan iti Apocalipsis?

DAGITI adipen ni Jehova nasken nga ipaayanda iti atension ti impaltiing ti espiritu a sasao ni Jesu-Kristo kadagiti pito a kongregasion a nainaganan iti libro ti Biblia nga Apocalipsis. Kinapudnona, tunggal maysa kadagita a mensahe ket naglaon iti daytoy a balakad: “Daydiay addaan lapayag denggenna koma ti kunaen ti espiritu kadagiti kongregasion.”​—Apocalipsis 2:7, 11, 17, 29; 3:6, 13, 22.

² Inusigtayon dagiti mensahe ni Jesus kadagiti anghel, wenno manangaywan, ti Efeso, Smirna, ken Pergamo. Kasanotayo a magunggonaan kadagiti impaltiing ti espiritu a sinaona kadagiti uppat pay a kongregasion?

Iti Anghel Idiay Tiatira

 3. Pakasarakan iti Tiatira, ken ania ti kalatakan a produktona?

³ “Ti Anak ti Dios” agpadpada a kinomendaran ken tinubngarna ti kongregasion ti Tiatira. (Basaen ti Apocalipsis 2:18-29.) Ti Tiatira (Akhisar ita) ket nabangon iti asideg ti karayan nga agay-ayus iti Gediz (nagkauna a Hermus) River iti laud ti Asia Menor. Agdindinamag ti siudad iti adu a paglaingan (trade). Kadagiti agar-aramid iti tina, usarenda ti ramut ti madder kas gubuayan ti nalatak nga eskarlata, wenno purpura. Ni Lidia, a nagbalin a Kristiano bayat ti panagbisita ni Pablo iti Filipos idiay Grecia, ket “maysa nga aglaklako iti purpura, manipud iti siudad ti Tiatira.”​—Aramid 16:12-15.

 4. Iti ania a nakomendaran ti kongregasion ti Tiatira?

⁴ Kinomendaran ni Jesus ti kongregasion ti Tiatira gapu kadagiti nasayaat nga aramid, ayat, pammati, panagibtur, ken gapuananna iti ministerio. Kinapudnona, ‘dagiti aramidda a naud-udi ad-aduda ngem kadagidiay immun-una.’ Isu a nupay nasayaat ti pakasaritaantayo, ditay koma pulos baybay-an dagiti nasayaat a kababalintayo.

5-7. (a) Siasino “dayta a babai a Jezebel,” ken ania ti nasken nga aramiden mainaig iti impluensiana? (b) Ti mensahe ni Kristo iti kongregasion ti Tiatira tulonganna dagiti nadiosan a babbai a mangaramid iti ania?

⁵ Ti kongregasion ti Tiatira pampanuynoyanna ti idolatria, ulbod a sursuro, ken seksual nga imoralidad. Adda iti tengngada “dayta a babai a Jezebel”​—nalabit maysa a grupo dagiti babbai nga addaan iti kababalin a kas ken ni dakes a Reyna Jezebel iti sangapulo-tribu a Pagarian ti Israel. Sigun iti dadduma nga eskolar, ‘dagiti propetisa’ sadi Tiatira pinadasda a gargarien dagiti Kristiano nga agdayaw kadagiti dios ken diosa dagiti trabahador ken makiraman kadagiti piesta a pakairamanan dagiti taraon a naidaton kadagiti idolo. Saan koma a mapalubosan ti asinoman nga agpampammarang a propetisa a mangkontrol kadagiti kakabsat iti moderno-aldaw a kongregasion Kristiano!

⁶ ‘Dandani ipuruak ni Kristo ti babai a ni Jezebel iti pagiddaan ti masakit, ken dagidiay makikamkamalala kenkuana nga agturong iti dakkel a rigat, malaksid no agbabawida kadagiti aramidna.’ Saan koma a pulos a tumulok dagiti manangaywan kadagiti kasta a dakes a sursuro ken impluensia, ken saan a kasapulan a makaaramid iti naespirituan ken pisikal a pannakikamalala ti maysa a Kristiano wenno makiraman iti idolatria tapno mabigbigna a bin-ig a dakes dagiti “nauneg a bambanag ni Satanas.” No ipangagtayo ti pakdaar ni Jesus, ‘masalimetmetantayo a sititibker ti adda kadatayo,’ ket dinatay maiturayan ti basol. Gapu ta linaksidda dagiti dakes nga aramid, gartem, ken tarigagay, dagiti napagungar a napulotan awatenda ti “autoridad kadagiti nasion” ket kaduadanto ni Kristo a mangburak kadagitoy. Dagiti agdama a kongregasion addaanda kadagiti simboliko a bituen, ket inton mapagungar idiay langit dagiti napulotan, maitedto kadakuada ti “naraniag a bituen ti agsapa,” ti Nobio, ni Jesu-Kristo.​—Apocalipsis 22:16.

⁷ Napakdaaran ti kongregasion ti Tiatira a dida pampanuynoyan ti dakes nga impluensia dagiti apostata a babbai. Ti impaltiing ti espiritu a mensahe ni Kristo iti kongregasion tulonganna dagiti nadiosan a babbai a mangsalimetmet iti inted-Dios a lugarda ita. Dida padasen nga iturayan dagiti lallaki ken dida gargarien ti asinoman a kabsat a lalaki nga agaramid iti naespirituan wenno pisikal a pannakiabig. (1 Timoteo 2:12) Imbes ketdi, makaipasdek dagita a babbai kadagiti ulidan ti nasayaat nga aramid ken panagserbi a pakaidayawan ti Dios. (Salmo 68:11; 1 Pedro 3:1-6) No saluadan ti kongregasion ti adda kenkuana​—ti nasin-aw a doktrina ken kondukta ken ti maipatpateg a panagserbi mainaig iti Pagarian​—umay ni Kristo buyogen ti agkakaimbag a gunggona, saan a panangukom.

Iti Anghel Idiay Sardis

 8. (a) Sadino ti ayan ti Sardis, ken ania ti sumagmamano nga impormasion maipapan iti dayta? (b) Apay nga agkasapulan iti tulong ti kongregasion ti Sardis?

⁸ Kasapulan ti kongregasion ti Sardis ti naganat a tulong gapu ta natay daytoy iti naespirituan. (Basaen ti Apocalipsis 3:1-6.) Maysa a narang-ay a siudad ti Sardis a masarakan agarup 50 a kilometro iti abagatan ti Tiatira. Gapu iti komersio, kinadam-eg ti daga, ken ti panagaramid iti dutdotan a tela ken alpombra, bimmaknang ti siudad a dati nga addaan iti agarup 50,000 nga umili. Sigun ken ni historiador a Josephus, dakkel ti komunidad dagiti Judio idiay Sardis idi umuna a siglo K.K.P. Masarakan iti siudad dagiti rebbek ti sinagoga ken templo ti diosa dagiti taga Efeso a ni Artemis.

 9. Ania ti nasken nga aramidentayo no maysa laeng a rutina ti panagserbitayo iti Dios?

⁹ Kinuna ni Kristo iti anghel ti kongregasion ti Sardis: “Ammok dagiti aramidmo, nga addaanka iti nagan a sibibiagka, ngem natayka.” Kasano no matmatandatayo kas naespirituan a tao ngem ditay kayat ti umawat kadagiti Nakristianuan a pribilehio, a maysa laeng a rutina ti panagserbitayo, ken ‘nakasaganatayo a matay’ iti naespirituan nga anag? No kasta, masapul nga ‘agtultuloy a sipapanunottayo no kasano nga inawat ken no kasano a nangngegtayo’ ti mensahe ti Pagarian, ket masapul a parayrayentayo manen ti panagreggettayo iti sagrado a panagserbi. Sigurado a nasken a rugiantayo ti makiraman a naimpusuan kadagiti Nakristianuan a gimong. (Hebreo 10:24, 25) Pinakdaaran ni Kristo ti kongregasion idiay Sardis: “Malaksid no agriingka, umayak a kas maysa a mannanakaw, ket saanmonto a pulos maammuan no iti ania nga oras nga umayak kenka.” Komusta met iti kaaldawantayo? Iti din agbayag, manungsungbattayto.

10. Uray iti kasasaad nga umasping iti Sardis, ania ti mabalin a pudno iti sumagmamano a Kristiano?

¹⁰ Uray iti kasasaad nga umasping iti Sardis, nalabit adda latta sumagmamano a ‘saan a mangtulaw kadagiti makinruar a kawesda, ket nakapuraw a makipagna ken Kristo agsipud ta maikarida.’ Taginayonenda ti pakabigbiganda kas Kristiano, nga agtalinaedda a di natulawan, nga awanan iti moral ken narelihiosuan a mulit daytoy a lubong. (Santiago 1:27) Gapuna, ‘saanto a pulos punasen ni Jesus ti naganda iti libro ti biag, no di ket bigbigennanto ti naganda iti sanguanan ni Amana ken dagiti anghel.’ Kas maikari a makipagna ken Kristo, dagiti napulotan a klase nobiana ket naadornuan iti nasileng, nadalus, napino a lienso a mangisimbolo kadagiti nalinteg nga aramid dagiti sasanto ti Dios. (Apocalipsis 19:8) Dagiti agkakaimbag a pribilehio ti panagserbi nga agur-uray kadakuada idiay langit tignayenna ida a mangparmek iti lubong. Adda met dagiti bendision nga agur-uray kadagidiay agbiag nga agnanayon ditoy daga. Nakasurat met dagiti naganda iti libro ti biag.

11. Ania ti nasken nga aramidentayo no agdungsatayo iti naespirituan?

¹¹ Awan kadatayo ti kayatna a maitulad iti nakalkaldaang a naespirituan a kasasaad ti kongregasion iti Sardis. Ngem kasano no madlawtayo nga agdungsatayo iti naespirituan? Pagimbagantayo no agtignaytayo a dagus. No bilang ta magargaritayo kadagiti dakes nga aramid wenno malanglanganantayon dagiti gimong wenno bimmaaw ti regtatayo iti ministerio, sipapasnek nga ikararagtayo koma ti tulong ni Jehova. (Filipos 4:6, 7, 13) Ti inaldaw a panagbasa iti Biblia ken panangadal iti Kasuratan ken kadagiti publikasion ti “matalek a mayordomo” tulongannatayo nga agtalinaed a siririing iti naespirituan. (Lucas 12:42-44) Iti kasta, agbalintayo a kas kadagidiay taga Sardis a makaay-ayo ken Kristo, ket agbalintayo a bendision kadagiti kapammatian.

Iti Anghel Idiay Filadelfia

12. Iladawanyo ti narelihiosuan a kasasaad ti nagkauna a Filadelfia.

¹² Kinomendaran ni Jesus ti kongregasion ti Filadelfia. (Basaen ti Apocalipsis 3:7-13.) Ti Filadelfia (Alasehir ita) ket maysa a narang-ay a sentro ti maysa a rehion a pagaramidan iti arak iti laud ti Asia Menor. Kinapudnona, ti kangrunaan a diosda isu ni Dionysus, ti dios ti arak. Agparang a dagiti Judio idiay Filadelfia pinadasda a gargarien dagiti Kristiano a Judio tapno salimetmetan wenno aramiden manen dagitoy ti dadduma a bilin ti Mosaiko a Linteg, ngem dida nagballigi.

13. Kasano nga inusar ni Kristo ti “tulbek ni David”?

¹³ Adda ken ni Kristo ti “tulbek ni David,” ket naitalek kenkuana ti amin nga interes ti Pagarian ken ti panangaywan iti sangakabbalayan ti pammati. (Isaias 22:22; Lucas 1:32) Babaen dayta a tulbek, linuktan ni Jesus dagiti oportunidad ken pribilehio mainaig iti Pagarian para kadagiti Kristiano iti nagkauna a Filadelfia ken iti dadduma a lugar. Sipud idi 1919, linuktanna para iti “matalek a mayordomo” ti “dakkel a ruangan” nga agturong iti pannakaikasaba ti Pagarian a di marikpan ti asinoman a kabusor. (1 Corinto 16:9; Colosas 4:2-4) Siempre, ti ruangan dagiti pribilehio mainaig iti Pagarian ket nairikep kadagiti kameng “ti sinagoga ni Satanas,” agsipud ta saanda a kameng ti naespirituan nga Israel.

14. (a) Ania ti inkari ni Jesus iti kongregasion ti Filadelfia? (b) Kasano a maliklikantayo ti matnag kabayatan ti “oras ti pannakasubok”?

¹⁴ Daytoy ti inkari ni Jesus kadagiti Kristiano iti nagkauna a Filadelfia: “Agsipud ta tinaginayonmo ti sao maipapan iti panagibturko, taginayonenkanto met iti oras ti pannakasubok, nga umay iti intero a mapagnaedan a daga.” Kalikaguman ti panangasaba ti kita ti panagibtur nga imparangarang ni Jesus. Di pulos nagpaabak iti kabusor no di ket intultuloyna nga inaramid ti pagayatan ni Amana. Iti kasta, napagungar ni Kristo iti imortal a biag idiay langit. No salimetmetantayo ti desisiontayo nga agdayaw ken ni Jehova ken suportarantayo ti Pagarian babaen ti panangikasaba iti naimbag a damag, maliklikantayo ti matnag kabayatan ti agdama a panawen ti pannubok, ti “oras ti pannakasubok.” ‘Maitultuloytayo a masalimetmetan a sititibker ti adda kadatayo’ a naggapu ken Kristo babaen ti panangikagumaantayo a mangparayray kadagiti interes ti Pagarian. Ti panangaramid iti kasta ket mangyeg iti di magatadan a nailangitan a balangat kadagiti napulotan ken biag nga agnanayon ditoy daga kadagiti nasungdo a kakaduada.

15. Ania ti makalikaguman kadagidiay agbalin nga ‘adigi iti templo ti Dios’?

¹⁵ Innayon ni Kristo: “Daydiay agballigi​—pagbalinekto nga adigi iti templo ti Diosko, . . . ket isuratkonto kenkuana ti nagan ti Diosko ken ti nagan ti siudad ti Diosko, ti baro a Jerusalem a bumaba manipud langit nga aggapu iti Diosko, ken dayta baro a naganko.” Nasken nga itandudo dagiti napulotan a manangaywan ti pudno a panagdayaw. Masapul nga agtalinaedda kas kualipikado a kameng ti “baro a Jerusalem” babaen ti panangikasabada iti Pagarian ti Dios ken panangtaginayonda iti naespirituan a kinadalus. Kasapulan daytoy no kayatda ti agbalin nga adigi iti naipadayag a nailangitan a templo ken agbalin a nailangitan nga umili iti siudad ti Dios ken maibilang a nobia ni Kristo. Ken siempre, masapul nga addaanda kadagiti lapayag a ‘dumngeg iti kunaen ti espiritu kadagiti kongregasion.’

Iti Anghel Idiay Laodicea

16. Ania ti dadduma nga impormasion maipapan iti Laodicea?

¹⁶ Tinubngar ni Kristo ti panagpampamayan ti kongregasion ti Laodicea. (Basaen ti Apocalipsis 3:14-22.) Adda ti Laodicea iti agarup 150 a kilometro iti daya ti Efeso ken masarakan iti nagsangalan dagiti kangrunaan a ruta dagiti negosiante iti nadam-eg a tanap ti Lycus River. Nakarangrang-ay ti Laodicea kas maysa a siudad dagiti pabrika ken sentro ti pinansial. Nalatak dagiti kawes a naaramid kadagiti nangisit a de lana iti rehion. Kas sentro ti agdindinamag nga eskuelaan ti medisina, mabalin a produkto ti Laodicea ti agas ti mata a pagaammo kas pulbo ti Frigia. Ni Asclepius, maysa a dios ti medisina, ti maysa kadagiti kangrunaan a dios ti siudad. Agparang nga adu ti Judio idiay Laodicea, a nalabit nabaknang ti dadduma kadakuada.

17. Apay a natubngar dagiti taga Laodicea?

¹⁷ Iti pannakisaona iti kongregasion ti Laodicea babaen ti ‘anghelna,’ nagsao ni Jesus buyogen ti autoridad kas “ti matalek ken napudno a saksi, ti pangrugian ti panamarsua ti Dios.” (Colosas 1:13-16) Natubngar dagiti taga Laodicea gapu ta ‘saanda a nalamiis wenno uray napudot’ iti naespirituan. Gapu ta apaganem-emda, itupra ida ni Kristo. Saan koma a narigat para kadakuada a tarusan dayta a punto. Adda napudot nga ubbog iti asideg ti Hierapolis, ken nalamiis a danum sadi Colosas. Ngem gapu ta adayo ti paggapuan ti danum ti Laodicea, nalabit, apaganem-emto no dumteng iti siudad. Lumabas dayta iti maysa a kanal. Iti asideg iti Laodicea, lumabas dayta iti sementado a pagayusan a kinabite.

18, 19. Kasano a matulongan dagiti agdama a Kristiano nga umasping kadagiti taga Laodicea?

¹⁸ Dagiti indibidual ita nga umasping kadagiti taga Laodicea ket saan a makaparegta ti barada wenno makapagin-awa ti lamiisda. Kas iti apaganem-em a danum, maitupradanto! Saan a kayat ni Jesus nga agbalinda a pannakangiwatna, kas dagiti napulotan nga “embahador a mangisunsuno ken Kristo.” (2 Corinto 5:20) Malaksid no agbabawida, mapukawda ti pribilehioda kas manangiwaragawag iti Pagarian. Ti naindagaan a kinabaknang ti binirok dagiti taga Laodicea ngem ‘dida ammo a nakaay-ay-ay, nakakaasi, napanglaw, bulsek, ken lamolamoda.’ Tapno maikkat ti naespirituan a kinapanglaw, kinabulsek, ken kinalamolamo ti asinoman ita a kas kadakuada, masapul a gumatang ken Kristo iti ‘napasudi a balitok’ ti nasubok a pammati, “puraw a makinruar a kawkawes” ti kinalinteg, ken “sapsapo iti mata” a manglawag iti naespirituan a panagkita. Tapno agbalinda a sipapanunot iti naespirituan a kasapulanda, maragsakan dagiti Kristiano a manangaywan a tumulong kadakuada ket iti kasta, agbalinda a “nabaknang iti pammati.” (Santiago 2:5; Mateo 5:3) Maysa pay, masapul a tulongan ida dagiti manangaywan a mangikabil kadagiti naespirituan a “sapsapo iti mata”​—ti panangakseptar ken panangyaplikar iti sursuro, balakad, ulidan, ken panagpampanunot ni Jesus. Agas daytoy maibusor iti ‘derrep ti lasag ken ti derrep dagiti mata ken ti panangiparammag iti sanikua a pagbiag ti maysa.’​—1 Juan 2:15-17.

¹⁹ Tubngaren ken disiplinaen ni Jesus ti amin nga ipatpategna. Sidudungngo met koma nga aramiden dayta dagiti manangaywan nga adda iti sidongna. (Aramid 20:28, 29) Kasapulan dagiti taga Laodicea ti ‘agregta ken agbabawi,’ a balbaliwanda ti panagpampanunot ken wagas ti panagbiagda. Bueno, dadduma kadi kadatayo ti nairuamen iti estilo ti panagbiag a mamagbalin a maikadua laeng iti biag ti sagrado a panagserbitayo iti Dios? No kasta, masapul a ‘gumatangtayo ken Jesus iti sapsapo iti mata’ tapno makitatayo ti kinapateg ti naregta a panangsapul nga umuna iti Pagarian.​—Mateo 6:33.

20, 21. Siasino dagiti siuumiso a mangipangpangag iti ‘panagtuktok’ ni Jesus ita, ken ania ti manamnamada?

²⁰ “Adtoy!” kuna ni Kristo, “agtaktakderak iti ruangan ken agtuktuktokak. No ti asinoman mangngegna ti timekko ket luktanna ti ruangan, sumrekakto iti balayna ket makipangrabiiak kenkuana ken isu kaniak.” Masansan a nangipaay ni Jesus iti naespirituan nga instruksion bayat ti pannakipanganna. (Lucas 5:29-39; 7:36-50; 14:1-24) Agtuktuktok ita ni Jesus iti ridaw ti kongregasion nga umasping iti Laodicea. Ipangag ngata dagiti kameng dayta a kongregasion ti panagtuktokna, pabaraenda manen ti panangipategda kenkuana, pastrekenda, ket agpaisuroda kenkuana? No aramidenda ti kasta, makipanganto kadakuada ni Kristo ket matagiragsakda ti dakkel a naespirituan a gunggona.

²¹ Ni Jesus ket piguratibo a pinastrek ti “sabsabali a karnero” ita, a mangyeg kadakuada iti biag nga agnanayon. (Juan 10:16; Mateo 25:34-40, 46) Iti tunggal maysa nga agballigi a napulotan, itedto ni Kristo ti pribilehio a ‘makikatugaw kenkuana iti tronona, kas iti mismo a panagballigina ken pannakikatugawna iti Amana iti tronona.’ Wen, kadagiti agballigi a napulotan, inkari ni Jesus ti naindaklan a gunggona a pannakikatugaw kenkuana iti tronona iti makannawan ni Amana idiay langit. Ken dagiti agballigi a sabsabali a karnero manamnamada ti nakapimpintas a lugar ditoy daga iti sidong ti panangituray ti Pagarian.

Dagiti Leksion Para Kadatayo Amin

22, 23. (a) Kasano a nagunggonaan ti amin a Kristiano kadagiti sasao ni Jesus kadagiti pito a kongregasion? (b) Ania koma ti determinasiontayo?

²² Awan duadua a dakkel ti magunggona ti amin a Kristiano manipud iti sasao ni Jesus kadagiti pito a kongregasion iti Asia Menor. Kas pagarigan, gapu ta nakitada a nangted ni Kristo iti maitutop a komendasion, matignay dagiti naayat a Kristiano a panglakayen a mangkomendar kadagiti indibidual ken kongregasion nga addaan iti nasayaat nga espiritualidad. No adda dagiti pagkapuyan, tumulong dagiti panglakayen kadagiti kapammatian a mangyaplikar kadagiti Nainkasuratan a solusion. Agtultuloy a magunggonaantayo amin iti nadumaduma a benneg ti balakad ni Kristo kadagiti pito a kongregasion no sikakararag ken dagus nga iyaplikartayo dagita.a

²³ Daytoy maudi nga al-aldaw ket saan a panawen ti panagpampamayan, panagbalin a materialistiko, wenno aniaman a mamagbalin a segundario laengen ti panagserbitayo iti Dios. Agtultuloy koma ngarud nga agraniag ti amin a kongregasion kas iti pagsaadan ti silaw a pinagtalinaed ni Jesus iti lugarda. Kas matalek a Kristiano, sapay koma ta kanayon a determinadotayo a mangipaay iti atension no agsao ni Kristo ken umimdeng iti kunaen ti espiritu. Iti kasta, matagiragsaktayo ti manayon a rag-o kas managawit iti lawag a pakaidayawan ni Jehova.

[Footnote]

Ania ti Sungbatyo?

• Siasino “dayta a babai a Jezebel,” ken apay a saan a tuladen dagiti nadiosan a babbai?

• Ania ti kasasaad idi iti kongregasion ti Sardis, ken ania ti mabalintayo nga aramiden tapno saantayo a matulad ti adu a Kristiano a nagbiag sadiay?

• Ania dagiti inkari ni Jesus iti kongregasion ti Filadelfia, ket ania ti kaipapananda ita?

• Apay a natubngar dagiti taga Laodicea, ngem ania dagiti manamnama dagiti naregta a Kristiano?

[Ladawan iti panid 16]

Masapul a liklikan dagiti dakes nga aramid “dayta a babai a Jezebel”

[Dagiti Ladawan iti panid 18]

“Maysa a dakkel a ruangan” ti linuktan ni Jesus kadagiti pasurotna agturong kadagiti pribilehio mainaig iti Pagarian

[Ladawan iti panid 20]

Pastrekenyo kadi ni Jesus ket umimdengkayo kenkuana?