MESEC

1. Maysa kadagiti annak a naipasngay ken Jafet, anak ni Noe, kalpasan ti Layus. (Ge 10:2; 1Cr 1:5) Daytoy a nagan ket nabatad a nayallatiw kadagiti kaputotanna ken iti daga a nagyananda. Ni mammadto Ezequiel kanayon a dakamatenna ti Mesec a kadua ti Tubal, a mangipasimudaag nga adda dagita iti amianan ti Palestina. Nadeskribirda kas agilaklako iti ad-adipen ken gambang idiay Tiro, kas tattao a managayat iti gubat, ken kas kaaliansa wenno sakup ni ‘Gog ti Magog’ iti naipadto a nadamsak a kampaniana maibusor iti “bambantay ti Israel.” (Eze 27:13; 32:26; 38:2, 3; 39:1, 2; kitaenyo ti GOG Num. 2.) Iti Salmo 120:5, nadakamat ti Mesec ngem awan ti Tubal, kas nabatad a mangirepresentar iti grupo dagiti tattao nga agresibo ken naranggas.

Agarup sangaribu a tawen kalpasan ti Layus, dagiti kitikit ti Asiria mangrugi a dakamatenda dagiti tattao a naawagan Musku a nagyan iti maysa a lugar iti Asia Menor iti laud ti Asiria. Dagiti emperador ti Asiria a da Tiglat-pileser I, Tukulti-Ninurta II, Ashurnasirpal II, ken Sargon agpapada a dakamatenda a nakirangetda kadagiti Musku. Yantangay dagiti Musku ket masansan a nadakamat a kadua dagiti Tabali (nabatad a ti Tubal iti Biblia), nabileg ngarud ti pammatalged a ti nagan a Musku naadaw manipud iti Mesec. Iti naud-udi a tiempo, agkadua met a dinakamat ni Herodotus (III, 94) dagiti Moschi ken Tibareni.

Ibilang ti adu nga eskolar a dagiti Musku isuda dagiti Frigiano, a nalawag a nangdominar iti kaaduan a paset ti makinlaud ken makintengnga nga Asia Menor idi agarup ngudo ti maikadua a milenio K.K.P. Ni Ari Mita ti Muski, a dinakamat ni Sargon nga emperador ti Asiria, ket ibilang ti sumagmamano nga eskolar kas isu met laeng ni Ari Midas ti Frigia, a sigun kadagiti Griego nagturay dayta iti isu met laeng a periodo.

2. Agparang ni Mesec iti Masoretiko a teksto iti 1 Cronicas 1:17 kas maysa a kaputotan ni Sem, ngem “Mas” ti nailanad iti katupag a listaan ti kapuonan iti Genesis 10:23.