IDEKLARA A NALINTEG

Ti Hebreo a berbo a tsa·dheqʹ (nainaig iti tseʹdheq, kaipapananna ti “kinalinteg”) no dadduma naipatarus nga “ideklara a nalinteg” ken “ibatad a nalinteg.” (Ex 23:7; De 25:1) Daytoy a sasao iti Biblia naipatarus met nga “ilinteg,” ket dagiti nombre a porma naipatarus a “panangpalinteg.” Dagiti orihinal a sasao (di·kai·oʹo [berbo], di·kaiʹo·ma ken di·kaiʹo·sis [agpada a nombre]) iti Kristiano a Griego a Kasuratan, a pakasarakan iti naan-anay a pannakailawlawag dayta, kangrunaanna nga ipamatmatda ti kapanunotan mainaig iti pannakaabsuelto iti aniaman a pammabasol, pannakaibilang kas di nakabasol, ket ngarud pannakaluk-at iti pammabasol, wenno pannakaibatad ken pannakatrato kas nalinteg.​—Kitaenyo ti Greek-English Lexicon of the New Testament ni W. Bauer (rinebisar da F. W. Gingrich ken F. Danker), 1979, p. 197, 198; kasta met ti A Greek-English Lexicon, da H. Liddell ken R. Scott (rinebisar ni H. Jones), Oxford, 1968, p. 429.

Gapuna, sawen ni apostol Pablo a ti Dios ‘mapaneknekan a nalinteg [porma ti di·kai·oʹo]’ iti sasaona ken mangabak no uk-ukomen dagiti manangpadakes. (Ro 3:4) Kinuna ni Jesus a ti “kinasirib mapaneknekan a nalinteg babaen iti ar-aramidna” ket, inton mangidatagda iti pannakikuenta iti Aldaw a Panangukom, dagiti tattao ‘maideklarada a nalinteg [porma ti di·kai·oʹo]’ wenno makondenarda babaen iti sasaoda. (Mt 11:19; 12:36, 37) Kinuna ni Jesus a ti napakumbaba nga agsingsingir iti buis, a sibababawi a nagkararag idiay templo “napan iti pagtaenganna a napaneknekan a nalinlinteg” ngem ti napasindayag a Fariseo nga agkarkararag iti daydi met laeng a kanito. (Lu 18:9-14; 16:15) Kunaen ni apostol Pablo a ti tao a matay “naluk-atanen [porma ti di·kai·oʹo] iti basolna,” yantangay nabayadannan ti dusa nga ipapatay.​—Ro 6:7, 23.

Nupay kasta, bilang kanayonan iti kakasta a pannakausar, naaramat dagitoy a Griego a sasao iti maysa a naisangsangayan a kaipapanan. Kas pagarigan, tumukoy dayta iti maysa a tignay ti Dios a mangibilang iti maysa a tao kas awanan basol. (Ara 13:38, 39; Ro 8:33) Tumukoy met iti tignay ti Dios a mangideklara iti maysa a tao kas naan-anay ti kinatarnawna ken naukom kas maikari iti kalintegan nga agbiag, kas makita iti sumaganad.

Kadagidi Tiempo Sakbay ti Panawen Kristiano. Ni Adan ket sigud a perpekto, nalinteg a tao, ken natauan nga “anak ti Dios.” (Lu 3:38) Isu nalinteg yantangay pinarsua ti Dios ken indeklara ti Namarsuana kas “nasayaat unay.” (Ge 1:31) Ngem saanna a nataginayon ti kinatarnaw iti sanguanan ti Dios ket naipukawna ti kinalinteg maipaay iti bagina ken maipaay kadagiti masanguanan a putotna.​—Ge 3:17-19; Ro 5:12.

Nupay kasta, manipud kadagiti kaputotanna, naadda dagiti tattao a “nakipagna iti pudno a Dios,” tattao nga addaan pammati a kas kada Noe, Enoc, ken Job. (Ge 5:22; 6:9; 7:1; Job 1:1, 8; 2:3) Maipapan ken Abraham, naikuna a winatwatna ti pammati iti Dios ket “naideklara a nalinteg”; kasta met, naisurat a ni Rahab a taga Jerico imparangarangna ti pammatina babaen iti ar-aramidna ket iti kasta ‘naideklara a nalinteg,’ a gapu iti dayta naispal ti biagna idi nadadael ti siudad ti Jerico. (San 2:21-23, 25) Maimutektekan nga iti surat ni Santiago (kas naisitar) ken kasta met iti surat ni Pablo kadagiti taga Roma (4:3-5, 9-11), a sadiay adawenna ti Genesis 15:6, naikuna a ti pammati ni Abraham ‘naibilang kenkuana kas kinalinteg.’ Tapno matarusantayo daytoy a sasao, makatulong ti panangusig iti kaipapanan ti naaramat ditoy a Griego a berbo a lo·giʹzo·mai, “ibilang.”

No kasano a “maibilang” a nalinteg. Daytoy a Griego a berbo a lo·giʹzo·mai ket kanayon a naaramat kadagidi kadaanan a tiempo maipaay kadagiti panagkalkular wenno panagpattapatta a nainaig iti numero, kas iti panagkuenta (accounting), a naaramat no ti matuktukoy ket maysa a banag a naiserrek iti binatog iti kuentaan a pakailanadan dagiti maikissay (debit) ken kasta met iti pakailanadan dagiti mainayon (credit). Iti Biblia, naaramat dayta a kaipapananna ti “ibilang, isingir, padayawan, ing-ingpen, wenno imutektekan.” Gapuna kunaen ti 1 Corinto 13:5 a ti ayat “saanna nga ing-ingpen [porma ti lo·giʹzo·mai] ti pannakadangran” (idiligyo ti 2Ti 4:16); ket ni salmista David naadaw kas agkunkuna: “Naragsak ti tao a ti basolna saanto a pulos isingir ni Jehova.” (Ro 4:8) Kadagidiay mangmatmat iti bambanag sigun iti makinruar a pategda, impakita ni Pablo ti panagkasapulan a mangaramid iti umiso a panangtingiting iti bambanag, nga arigna a kitaen ti agsumbangir a binatog ti libro ti kuentaan (ledger). (2Co 10:2, 7, 10-12) Kaskasdi, pakaseknan ni Pablo nga ‘awan koma ti asinoman a mangpadayaw [porma ti lo·giʹzo·mai] kenkuana’ nga ad-adda pay ngem iti maiparbeng no maipapan iti ministeriona.​—2Co 12:6, 7.

Ti sao a lo·giʹzo·mai mabalin a kaipapananna met ti “ibilang, ikabilangan, patgan, wenno gatadan (a kadua ti maysa a grupo, klase, wenno kita).” (1Co 4:1) Gapuna kinuna ni Jesus nga isu ‘maibilangto [porma ti lo·giʹzo·mai] a kadua dagiti nakillo,’ kayatna a sawen, maibilang wenno maklasipikar kas karaman kadakuada wenno kasla maysa kadakuada. (Lu 22:37) Iti suratna kadagiti taga Roma, kuna ti apostol a no maipapan iti di nakugit a tao a mangsalsalimetmet iti Linteg, ti ‘saanna a pannakakugit maibilangto kas pannakakugit,’ kayatna a sawen, maibilang wenno mamatmatan dayta a kasla pannakakugit. (Ro 2:26) Iti umasping a kaipapanan, naidagadag kadagiti Kristiano nga ‘ibilangda ti bagbagida a natay no mainaig iti basol ngem sibibiag no mainaig iti Dios babaen ken Kristo Jesus.’ (Ro 6:11) Ket dagiti napulotan a Kristiano a naala manipud kadagiti Gentil, nupay saanda a nainlasagan a kaputotan ni Abraham, ‘naibilangda kas ti bin-i’ ni Abraham.​—Ro 9:8.

Kasano a ni Abraham mabalin a maideklara a nalinteg sakbay ti ipapatay ni Kristo?

Iti kasta met laeng a pamay-an, ti pammati ni Abraham, a napakuyogan iti ar-aramid, ket ‘naibilang kenkuana kas kinalinteg.’ (Ro 4:20-22) Siempre, saan a kayat a sawen daytoy nga isu ken ti dadduma pay a matalek a tattao kadagidi tiempo sakbay ti panawen Kristiano ket perpekto wenno siwayawayada iti basol; kaskasdi, maigapu iti panangwatwatda iti pammati iti kari ti Dios maipapan iti “bin-i” ken agsipud ta inkagumaanda nga annuroten ti bilbilin ti Dios, saanda a naklasipikar kas nakillo nga awanan nasayaat a pakasarsaritaan iti sanguanan ti Dios, kas iti dadduma pay iti lubong ti sangatauan. (Ge 3:15; Sal 119:2, 3) Siaayat nga imbilang ida ni Jehova kas awanan basol, no idilig iti lubong ti sangatauan a naisina iti Dios. (Sal 32:1, 2; Efe 2:12) No kasta, gapu iti pammatida, ti Dios mabalinanna a pakilangenan ti kakasta nga imperpekto a tattao ken bendisionan ida, nga aramidenna ti kasta ket kaskasdi a mataginayonna dagiti perpekto a pagalagadanna iti kinahustisia. (Sal 36:10) Nupay kasta, binigbig ti kakasta a tattao a kasapulanda ti pannakasubbot manipud basol ket inur-urayda ti naikeddeng a tiempo ti Dios a panangipaayna iti dayta.​—Sal 49:7-9; Heb 9:26.

“Maysa nga Aramid a Panangpalinteg” ni Kristo Jesus. Ipakita ti Kasuratan a perpekto ti natauan a bagi ni Jesu-Kristo idi adda ditoy daga, (1Pe 1:18, 19) ket nataginayonna ti kinaperpektona babaen ti agtultuloy a panangsalimetmetna ken panangpatibkerna iti kinatarnawna iti sidong ti pannubok. Maitunos daytoy iti panggep ti Dios a panamagbalin iti Kangrunaan nga Ahente ti pannakaisalakan kas “perpekto . . . babaen kadagiti panagsagaba.” (Heb 2:10) Kayatna a sawen, napagbalin a naan-anay ni Jesus no iti panagtulnog ken panangsalimetmet iti kinatarnaw ken napagbalin a perpekto maipaay iti saadna bilang Nangato a Padi ti Dios maipaay iti pannakaisalakan, kas ipakita ni Pablo iti Hebreo 5:7-10. Yantangay naturpos ni Jesus ti naindagaan a panagbiagna kas naan-anay nga awan pakapilawanna, isu binigbig ti Dios kas napaneknekan a nalinteg. Ngarud, isu laeng ti kakaisuna a tao a babaen iti pannubok nakapagtakder a sititibker ken pudpudno a nalinteg iti sanguanan ti Dios maibatay iti bukodna a gapuanan. Babaen iti daytoy “maysa nga aramid a panangpalinteg [porma ti di·kaiʹo·ma],” awan sabali, babaen iti panangpaneknek ni Jesus iti bagina kas naan-anay a nalinteg iti intero nga awanan pakapilawan a panagbiagna, pakairamanan ti sakripisiona, impaayna ti pangibatayan iti panangideklara a nalinteg dagidiay tattao nga addaan pammati ken Kristo.​—Ro 5:17-19; 3:25, 26; 4:25.

Iti Kongregasion Kristiano. Iti iyaay ti Anak ti Dios kas ti naikari a Mannubbot, naadda ti maysa a baro a banag a mabalin a pangibatayan ti Dios kadagiti pannakilangenna iti natauan nga ad-adipenna. Dagiti pasurot ni Jesu-Kristo a naayaban nga agbalin a naespirituan a kakabsatna, a ti namnamada ket makipagtawid kenkuana iti nailangitan a Pagarian (Ro 8:17), umuna a ti Dios ideklarana ida kas nalinteg maibatay iti pammatida ken Jesu-Kristo. (Ro 3:24, 28) Daytoy ket hudisial a tignay ni Jehova a Dios; gapuna, iti sanguananna kas Katan-okan nga Ukom, awan ti asinoman a ‘makaidatag iti pammabasol’ maibusor kadagiti pinilina. (Ro 8:33, 34) Apay a kastoy ti tignay ti Dios maipaay kadakuada?

Umuna, agsipud ta perpekto ken nasantuan ni Jehova (Isa 6:3); ngarud maitunos iti kinasantona, masapul a perpekto dagidiay awatenna kas annakna. (De 32:4, 5) Ni Jesu-Kristo, ti kangrunaan nga Anak ti Dios, impakitana nga isu perpekto, “nasungdo, awanan allilaw, di natulawan, naisina kadagiti managbasol.” (Heb 7:26) Nupay kasta, dagiti pasurotna ket naala manipud kadagiti annak ni Adan, nga imperpekto ken managbasol a pamilia ti naiputotna gapu iti basol. (Ro 5:12; 1Co 15:22) Gapuna, kas ipakita ti Juan 1:12, 13, dagiti pasurot ni Jesus ket idi damo saan nga annak ti Dios. Babaen iti di kaikarian a kinamanangngaasina, ni Jehova a Dios nangyurnos iti maysa a proseso ti ‘panagampon’ a babaen iti dayta awatenna ti kakasta a naanamongan a tattao ken iyegna ida iti maysa a naespirituan a pannakirelasion kas paset ti pamilia a buklen ti annakna. (Ro 8:15, 16; 1Jn 3:1) Gapuna, ti Dios isaadna ti pakaibatayan ti pannakaiserrekda iti kasasaad kas annak wenno ti pannakaamponda kas annak babaen ti panangideklarana kadakuada kas nalinteg babaen iti pateg ti subbot a sakripisio ni Kristo nga iti dayta watwatenda ti pammati, a mangabsuelto kadakuada iti amin a basolda. (Ro 5:1, 2, 8-11; idiligyo ti Jn 1:12.) Ngarud, “maibilangda,” wenno mabigbigda, kas naan-anay a nalinteg a tattao, a ti amin a basbasolda mapakawan ken saan a maisingir kadakuada.​—Ro 4:6-8; 8:1, 2; Heb 10:12, 14.

Ngarud, daytoy a pannakaideklara ti kakasta a Kristiano kas nalinteg ket ad-adda pay ngem iti kaso ni Abraham (ken iti dadduma pay nga ad-adipen ni Jehova sakbay ti panawen Kristiano), kas immun-unan a naibinsabinsa. Maipapan iti saklaw ti pannakapalinteg ni Abraham, insurat ni adalan a Santiago: “Natungpal ti kasuratan a kunana: ‘Ni Abraham naaddaan iti pammati ken Jehova, ket naibilang dayta kenkuana kas kinalinteg,’ ket isu naawagan ‘gayyem ni Jehova.’” (San 2:20-23) No kasta, gapu iti pammatina, naideklara a nalinteg ni Abraham kas gayyem ti Dios, saan ket a kas anak ti Dios gapu iti ‘pannakayanak manen’ maipaay iti nailangitan a biag. (Jn 3:3) Ibatad ti rekord ti Kasuratan a sakbay ti iyaay ni Kristo, ti kasta a panagbalin kas anak wenno uray ti kasta a nailangitan a namnama ket saan a naluktan maipaay iti tattao.​—Jn 1:12, 17, 18; 2Ti 1:10; 1Pe 1:3; 1Jn 3:1.

Makita a, nupay naibilang dagitoy a tattao kas nalinteg iti sanguanan ti Dios, awanan dagitoy a Kristiano iti aktual wenno literal a kinaperpekto iti lasag. (1Jn 1:8; 2:1) Maigapu iti inanama a nailangitan a biag maipaay kadagitoy a pasurot ni Kristo, iti kinapudnona saanen a kasapulan ita ti kasta a literal a kinaperpekto ti nainlasagan a bagi. (1Co 15:42-44, 50; Heb 3:1; 1Pe 1:3, 4) Nupay kasta, babaen ti pannakaideklarada a nalinteg, a ‘naibilang’ dayta kadakuada kas kinalinteg, maannurot dagiti kalikaguman ti Dios mainaig iti kinahustisia, ket dagidiay naampon iserrekna iti “baro a tulag” a pinasingkedan ti dara ni Jesu-Kristo. (Lu 22:20; Mt 26:28) Dagitoy a naampon a naespirituan nga annak iti baro a tulag a naaramid iti naespirituan nga Israel ‘nabautisaranda iti ipapatay ni Kristo,’ nga inton agangay matayda a kas iti ipapatayna.​—Ro 6:3-5; Fil 3:10, 11.

Nupay pakawanen ni Jehova dagiti basolda maigapu iti nainlasagan a kinakapuy ken kinaimperpekto, kaskasdi nga adda panagbinnusor iti uneg dagitoy a Kristiano, kas nayilustrar iti surat ni Pablo kadagiti taga Roma (7:21-25). Panagbinnusor dayta iti nagbaetan ti linteg ti napabaro a panunotda (Ro 12:2; Efe 4:23), wenno “linteg ti Dios,” ken ti “linteg ti basol” nga adda kadagiti kamengda. Daytoy ket gapu ta saan a napagbalin a perpekto dagiti nainlasagan a bagida, uray pay no maibilangda a nalinteg ken mapakawan dagiti basolda. Daytoy a panagbinnusor ket maysa pay a mangsubok iti kinatarnawda iti Dios. Babaen iti tulong ti espiritu ti Dios ken buyogen ti pannaranay ti naasi a Nangato a Padida a ni Kristo Jesus, mapagballigianda daytoy a panagbinnusor. (Ro 7:25; Heb 2:17, 18) Nupay kasta, tapno agballigida masapul a patinayon a watwatenda ti pammati iti subbot a sakripisio ni Kristo ket isu surotenda, iti kasta mataginayonda ti kinalintegda iti imatang ti Dios. (Idiligyo ti Apo 22:11.) Pagbanaganna, ‘mapagbalinda a sigurado ti pannakaayab ken pannakapilida’ maipaay iti bagbagida. (2Pe 1:10; Ro 5:1, 9; 8:23-34; Tit 3:6, 7) Iti sabali a bangir, no iyugalida ti panagbasol, nga umikayda manipud iti pammati, maipukawda ti naanamongan a takderda iti sanguanan ti Dios kas nalinteg a tattao agsipud ta “ilansada manen ti Anak ti Dios a maipaay iti bagbagida ket isu iparangda iti pannakaibabain iti publiko.” (Heb 6:4-8) Ti kakasta a tattao sangsanguenda ti pannakadadael. (Heb 10:26-31, 38, 39) Gapuna, nagsao ni Jesus maipapan iti basol a di mapakawan, ket pinagduma ni apostol Juan ti basol a “saan nga agbanag iti ipapatay” ken ti basol nga “agbanag iti ipapatay.”​—Mt 12:31, 32; 1Jn 5:16, 17.

Ni Jesu-Kristo, kalpasan ti panangtaginayonna iti kinamatalekna agingga ken patay, “napagbiag iti espiritu,” naipaayan iti imortalidad ken kinaawan panagrupsa. (1Pe 3:18; 1Co 15:42, 45; 1Ti 6:16) Ngarud “naideklara [wenno naibatad] a nalinteg iti espiritu” (1Ti 3:16; Ro 1:2-4) ket nagtugaw iti makannawan ti Dios idiay langit. (Heb 8:1; Fil 2:9-11) Dagiti matalek a sumursurot iti addang ni Kristo ur-urayenda ti panagungar a kas iti panagungarna (Ro 6:5), nga in-inanamaenda nga awatenda ti kasasaad kas nadibinuan.​—2Pe 1:4.

Dadduma Pay a Nalinteg. Iti maysa kadagiti pangngarig, wenno parabulo, ni Jesus a mangisalsalaysay iti tiempo ti iyaayna iti dayag ti Pagarian, dagiti tattao a naipadis kadagiti karnero natukoyda kas “nalinteg.” (Mt 25:31-46) Nupay kasta, makapainteres nga iti daytoy a pangngarig, naiparang dagitoy a “nalinteg” kas naisina ken naiduma kadagidiay awagan ni Kristo iti “kakabsatko.” (Mt 25:34, 37, 40, 46; idiligyo ti Heb 2:10, 11.) Dagitoy a marakarnero a tattao mangipapaayda iti tulong kadagiti naespirituan a “kakabsat” ni Kristo, iti kasta iparparangarangda ti pammati ken Kristo a mismo. Gapuna, binendisionan ida ti Dios ket naawaganda iti “nalinteg.” Kas ken Abraham, naibilangda, wenno naideklarada, a nalinteg kas gagayyem ti Dios. (San 2:23) Daytoy a nalinteg a takder kaipapanannanto ti pannakailasatda inton dagiti “kalding” agturongda “iti agnanayon a pannakagessat.”​—Mt 25:46.

Iti sirmata a nailanad iti Apocalipsis 7:3-17, mapaliiw ti maysa a pumadpada a kasasaad. Ditoy, ti maysa a “dakkel a bunggoy” a di nakedngan ti bilangda ket naipakita kas naiduma kadagiti 144,000 a ‘naselioan.’ (Idiligyo ti Efe 1:13, 14; 2Co 5:1.) Ti pannakadeskribir daytoy a “dakkel a bunggoy” kas “linabaanda dagiti pagan-anayda ket pinapudawda ida iti dara ti Kordero,” ipatuldona nga addaanda ti nalinteg a takder iti sanguanan ti Dios.​—Apo 7:14.

Ti “dakkel a bunggoy,” a makalasat iti “dakkel a rigat,” saanda pay a naideklara a nalinteg maipaay iti biag​—kayatna a sawen, kas maikari iti kalintegan iti biag nga agnanayon ditoy daga. Kasapulan nga agtultuloyda a makiraman kadagiti “ubbog ti dandanum ti biag,” kas idaldalan ti Kordero, ni Kristo Jesus. Kasapulan nga aramidenda daytoy bayat ti Milenio a Panagturay ni Kristo. (Apo 7:17; 22:1, 2) No mapaneknekan a nasungdoda ken Jehova babaen iti maudi a pannubok iti ngudo ti sangaribu a tawen, permanente a mapagtalinaedto ti nagnaganda iti kukua ti Dios a libro ti biag. Iti kasta, ideklara wenno bigbigen ni Jehova a, kamaudiananna, naan-anayen a nalintegda.​—Apo 20:7, 8; kitaenyo ti BIAG (Kaykayo ti Biag).

Ti Dios Napaneknekan a Nalinteg iti Amin nga Aramidna. Makita a kadagiti pannakilangenna iti imperpekto a tattao, ti Dios saanna a pulos salungasingen dagiti bukodna a pagalagadan iti kinalinteg ken kinahustisia. Saanna nga ideklara a nalinteg dagiti managbasol a tattao maibatay iti bukodda a gapuanan, nga iti kasta palabsen wenno panuynoyanna ti basol. (Sal 143:1, 2) Kas ilawlawag ni apostol Pablo: “Amin nagbasol ken agkurang iti dayag ti Dios, ket kas awan bayadna a sagut a maidekdeklarada a nalinteg babaen ti di kaikarian a kinamanangngaasina baeten iti pannakaluk-at babaen ti subbot nga imbayad ni Kristo Jesus. Isu impasdek ti Dios kas maysa a daton a maipaay iti pannakikappia babaen ti pammati iti darana. Daytoy ket tapno maipakita ti bukodna a kinalinteg, agsipud ta pinakpakawanna dagiti basol a naaramid iti napalabas bayat a ti Dios watwatwatenna idi ti kinamanagpalabas; tapno maipakita ti bukodna a kinalinteg iti daytoy agdama a panawen, iti kasta isu nalinteg koma uray iti panangideklarana a nalinteg ti tao nga addaan iti pammati ken Jesus.” (Ro 3:23-26) Gapuna, babaen iti di kaikarian a kinamanangngaasi, ti Dios nangipaay iti legal nga urnos maibatay iti sakripisio ni Kristo, a gapu iti dayta, naan-anay a nainkalintegan ken nalinteg ti Dios iti panangpakawanna kadagiti basol dagidiay mangwatwatwat iti pammati.

Dagiti Pananggandat a Mangpaneknek iti Bukod a Kinalinteg. Yantangay ti Dios laeng ti makaideklara a nalinteg ti maysa a tao, awan mamaay dagiti pananggandat ti maysa a mangpaneknek iti kinalintegna maibatay iti bukodna a gapuanan wenno babaen iti panangawatna iti kapanunotan ti dadduma maipapan iti bukodna a kinalinteg. Natubngar ni Job agsipud ta, nupay saanna a pabpabasolen ti Dios iti aniaman a kinadakes, ‘idekdeklarana a nalinteg ti bukodna a kararua imbes a ti Dios.’ (Job 32:1, 2) Ti lalaki a nalaing iti Linteg a nagsaludsod ken Jesus maipapan iti dalan nga agturong iti agnanayon a biag ket saan a direkta a tinubngar ni Jesus gapu iti pananggandatna a mangpaneknek a nalinteg ti bagina. (Lu 10:25-37) Kinondenar ni Jesus dagiti Fariseo gapu iti panangikagumaanda a mangideklara a nalinteg ti bagbagida iti sanguanan dagiti tattao. (Lu 16:15) Kangrunaanna, impakita ni apostol Pablo a gapu iti imperpekto ken managbasol a kasasaad ti intero a sangatauan, awan ti siasinoman a mabalin a maideklara a nalinteg babaen iti panangpadasda a mangipasdek iti bukodda a kinalinteg maibatay iti ar-aramid iti Mosaiko a Linteg. (Ro 3:19-24; Ga 3:10-12) Imbes ketdi, impaganetgetna a ti pammati ken Kristo Jesus isu ti pudno a pakaibatayan ti kasta a pannakaideklara a nalinteg. (Ro 10:3, 4) Ti naipaltiing a surat ni Santiago an-anayenna ti sasao ni Pablo babaen ti panangipakitana a ti kasta a pammati masapul a mapagbalin a nabiag, saan a babaen kadagiti aramid ti Linteg, no di ket babaen iti ar-aramid ti pammati, kas kadagiti kaso da Abraham ken Rahab.​—San 2:24, 26.

Ti sumagmamano a tattao a siuulbod nga agkunkuna nga apostolda di nainkalintegan a kinaritda ti kinaapostol ken Nakristianuan nga ar-aramid ni Pablo, iti kasta inkagumaanda nga iyadayo ti kongregasion ti Corinto ken pasuroten kadakuada. (2Co 11:12, 13) Yantangay ammo ni Pablo a simamatalek nga itungtungpalna ti kinamayordomo maipaay ken Kristo, kinunana a saan a maseknan iti panangukom ti tattao a naan-anay a di naautorisaran ken arigna a nagtugaw kas “natauan a pangukoman” tapno isu ukomenda. Saanna pay ketdi a talken ti mismo a panangusigna iti bagina, no di ket nangnamnama ken Jehova kas Mangusig kenkuana. (1Co 4:1-4) Gapuna, maipasdek daytoy a prinsipio: saan a mabalin a pagkammatalkan ti panangukom ti tattao no ti maysa nalinteg wenno saan, malaksid no ti panangukomda ket suportaran ti Sao ti Dios. Dayta a tao masapul nga usigenna ti Sao ti Dios ket bay-anna a dayta ti mangsukimat kenkuana. (Heb 4:12) Nupay kasta, no ti pannubngar nabatad a supsuportaran ti Sao ti Dios, ken no ti mangipapaay iti pannubngar ket maysa a Kristiano a kabsat, nangnangruna no panglakayen iti kongregasion, daydiay matubtubngar di umiso nga iwaksina ti kasta a pannubngar babaen ti panangpadasna a mangpaneknek a nalinteg ti bagina. (Pr 12:1; Heb 12:11; 13:17) Ket no ti asinoman nga addaan iti annongen ket agtugaw a mangukom iti maysa a banag wenno maysa a supiat, isu kondenaren ti Dios no imbatadna a “daydiay nadangkes ket nalinteg maipagapu iti pasuksok.”​—Isa 5:23; San 2:8, 9.