Ẹzaya
57 Ọria esili yulu,
Ọkpakinọn ọ bha rẹtẹ ọria soso.
Ikpia ne mhọn asun-rẹkhan yuno.
Eria bha gbẹlokotọ ghe
Ọria nọn lu emhin esili yu sibhi oya re.
2 Egbe fu ọle re.
Ọrebhe ne lu ebe diale koahua bhi idin.*
3 “Ọkpakinọn, ibha nan nian, bha vae,
Ibha nin imọn nesi azẹn,
Ibha nin imọn nesi ọgboghẹ bi imọn nesi agbilẹ.
4 Họla bha rẹ zọojiẹ?
Họla bha taan unun an gbodo man yẹ yo ukpolanmhẹn dagbare man?
Ibha nin imọn nan lu olukhọ biẹ,
Ibha nin imọn nan re eku biẹ,
5 Ibha nọn ghọn rẹ ha ne egbe nowẹ bhi ẹwẹ ene okperan,
Bhi odotọ okperan rebhe,
Ibha ne gbono imọn an bhi ene iyala,
Bi ẹlẹ uhio ne ribhi udo.
6 Udo ne kpoloa bhẹbhẹ ne ribhi iyala, ele uwẹ hoẹmhọnlẹn.
Ehe, ele uwẹ zẹle.
Uwẹ ki ha sa anyọn rẹ zọese nin ele yẹ ne emhin rẹ lu ẹsele nin ele.
Ene emhin nan dẹ be ha ti mẹn bhọ?
7 Uke oke nọn manman yoyo ọle uwẹ da lu uke ukhuo nin uwẹ da nowẹ,
Uwẹ da yẹ ha diọbhi enin dọ ha lu izọese.
8 Uwẹ da lu ebi a ha rẹ ha ye uwẹ re ọbhi ikeke odẹ bi eran odẹ.
Uwẹ da zẹ mẹn obọ dọ ha bannọn an;
Uwẹ da dọ lu ibẹdi nọnsẹ beji ọ ha da bhiabhia.
Uwẹ da deba ọshọ nesẹ gbe akovẹn.
Ọ da wo ha yẹẹ uwẹ rẹ ha deba ele nowẹ,
Uwẹ da wo ha ghe egbe okpia.*
9 Uwẹ da mun abhii
Bi abhii nọn viohin ne bunbun bu Mẹlẹk*
Uwẹ da je ukọ nesẹ ha khian eje manman ree,
Ọnan da re uwẹ nabhi ẹkẹ Idin.*
10 Egbe lọ ẹ ranmhude nin uwẹ rẹ ha rẹkhan uwedẹ ne bunbun,
Ọkpakinọn, uwẹ bha yọle, ‘Odẹ i ribhi enan!’
Uwẹ da koko ahu.
Ọnin zẹle nin uwẹ da sabọ rẹtẹ ha lu ebi uwẹ lu.*
11 Họla ofẹn ọlẹn mun uwẹ
Nin uwẹ da ha bha ohoghe?
Uwẹ bha ye mẹn re.
Emhin soso bha rẹtẹ ẹ.
Ranmhude mẹn nyangbe, sẹyẹ, mẹn bha lu emhin soso,
Ọle zẹle ofẹn imẹn bha mun uwẹ.
12 Mẹn dẹ re ‘ikhiale’ nọnsẹ bi iwẹnna nesẹ man,
Uwẹ i da miẹn elele bhọ.
13 Uwẹ a ha so nan dọ rẹkpa uwẹ,
Ene ẹbọ nin uwẹ si nẹga egbe i da sabọ hinmhin uwẹ.
Ahoho dẹ hoho ele rebhe kua,
Obhi ahoho khere ki hoho ele kua,
Ọkpakinọn, ọria nọn mun udu nyan mẹn ki le ọne otọ bhi uku.
Sẹyẹ, oke non khiale nọnsẹmhẹn ki ha yi ọsọle.
14 A dẹ yọle, ‘Bha lu odẹ, bha lu ọle, bha hẹnhẹn ọne uwedẹ ọbhi otọ!
Bha ne emhin nọn hi ki rẹ khin nọn ha de ẹbho nesẹmhẹn idobolo sibhi odẹ re.’”
15 Ọnan hi ebi Ọnọn Manman Khua Okhun tale,
Nọn nyẹnlẹn bhi ighegheghe, nin elin ọlẹn khiale:
“Eje khua okhun bi eje khiale mẹn da nyẹnlẹn,
Ọkpakinọn, ene emhin denyẹnyẹn bhi iẹnlẹn bi ene emhin gbe ele ahu sotọ, mẹn yẹ ne ele dia,
Nin mẹn da rẹkpa ene emhin gbe ele ahu sotọ rẹ kie miẹn ahu,
Yẹ rẹkpa ene emhin denyẹnyẹn bhi iẹnlẹn rẹ kie miẹn ahu.
16 Ẹkẹ ele i da ha khọ mẹn rẹ ha khian ighegheghe,
La nin ohu wo ha re mẹn rẹ ha khian,
Ranmhude mẹn ha lu iriọ, ọ ki re ahu fo eria bhọ,
Ọ dẹ re ahu fo emhin ne nyẹnlẹn rebhe nin mẹn manlẹn bhọ.
17 Ẹkẹ ọle da ha khọ mẹn ranmhude ẹlobhiamhin nọnsọle.
Nin ọle rẹ re uwedẹ eku ha guanọ elele, ẹkẹ ọle da ha khọ mẹn, bhiriọ, mẹn da gbehẹ ọle, mẹn bha re ẹlo nanlẹn miẹn.
Ọkpakinọn, ọle da sọtẹ yẹ ha khian ọsọle. Ọle da ha lu emhin ne ri ọle bhi ọkhọle.
18 Mẹn daghe ebi ọle rẹ lu emhin yẹ,
Ọkpakinọn, mẹn dẹ hinmhin ọlẹn yẹ ha re ọle khian.
Mẹn dẹ yẹ re ikoudure nanlẹn bi ẹbho nesọle ne lu akhiẹ.”
19 Ọnan hi ebi Jehova tale,
“Mẹn dẹ lu ọle nin ele ha gẹn mẹn, mẹn dẹ re ọfure nọn i da fo nin ọnọn ribhi eje reele bi ọnọn ribhi eje bha ree,
Mẹn dẹ hinmhin ọlẹn.”
20 “Inian ọluemhin-ebe diabe okpẹdẹ nọn wo fi-yo-fi-re, nọn i sabọ lọre,
Nọn wo fi ekhuọrọ bi ilunmhun ne ribhọ okhun.
21 Egbe i da fu ọria ebe re.” Iriọ Osẹnobulua nọnsẹmhẹn tale.