Orọ Ọsosuọ Ro Se Ahwo Kọrint

16 Whaọ kpahe eware nọ wha be zọhọ ze rọkẹ erẹri na,+ wha rẹ sai ru wọhọ epanọ mẹ ta kẹ ikoko obọ Galesha na. 2 Evaọ ẹdẹ ọsosuọ oka kpobi, jọ whai omomọvo o fi oware jọ họ akotọ wọhọ epanọ o wo te, re o gbẹ jọ nọ okenọ mẹ nyaze no wha re ro mu eware họ ẹzọhọ ze he. 3 Rekọ nọ me te te obei, me ti vi ahwo nọ wha kuenu kẹ evaọ ileta rai+ re a rọ okẹ uwowou rai kpobọ Jerusalẹm. 4 Rekọ u te fo nọ mẹ rẹ nya re, a ve ti lele omẹ nya.

5 Rekọ mẹ te nyabru owhai ze nọ mẹ tẹ nya Masidonia duwu no, keme mẹ te nya orọ Masidonia;+ 6 yọ ẹsejọhọ mẹ te jọ kugbe owhai evaọ omoke jọ hayo tubẹ jọ kugbe owhai evaọ ezi ekpahe* na kpobi, re okenọ mẹ te nyavrẹ kpohọ obonọ mẹ te nya, wha ve su omẹ họ aro omojọ. 7 Mẹ gwọlọ ruẹ owhai obọnana ha nọ owọ mẹ o rrọ onyonya na, keme me bi rẹro nọ mẹ te raha oke jọ kugbe owhai,+ o tẹ ruọ Jihova.* 8 Rekọ mẹ te gbẹ jọ Ẹfisọs+ rite oke Ehaa Pẹntikọst, 9 keme a rovie uvẹ ulogbo* orọ iruo fihọ kẹ omẹ no,+ rekọ otu ọwọsuọ buobu e riẹ.

10 Nọ Timoti+ ọ tẹ nyabru owhai ze, wha ruẹ nọ oware ovo u ru ozọ mu ei hi nọ ọ tẹ rrọ kugbe owhai, keme iruo Jihova*+ o bi ru wọhọ epanọ me bi ru na. 11 Fikiere jọ ohwo ọvo o rri rie vo ho. Wha vi ei ruọ edhere evaọ udhedhẹ, re ọ nyabru omẹ ze, keme mẹ avọ inievo na ma be hẹrẹ iẹe.

12 Whaọ kpahe Apọlọs+ oniọvo mai, mẹ tuduhọ iẹe awọ gaga inọ o lele inievo na nyabru owhai ze. Ọ gwọlọ nyaze obọnana ha, rekọ ọ te nyaze nọ uvẹ na u te rovie.

13 Wha jaja aro vi,+ wha dikihẹ ga evaọ ẹrọwọ na,+ wha wo udu,*+ wha jọ egba.+ 14 Wha rehọ uyoyou ru eware kpobi nọ wha bi ru.+

15 Wha riẹ nọ uviuwou Stẹfanas họ ibi ọsosuọ Akeya, gbe nọ a rọ oma rai kpobi gbodibo kẹ erẹri na. Fikiere, inievo, mẹ be tuduhọ owhai awọ nọ: 16 Wha hae rọ oma rai kpotọ kẹ oghẹrẹ ahwo otiọye na re gbe ahwo kpobi nọ e rrọ ibe iruiruo mai nọ i bi ru iruo gaga.+ 17 Rekọ eva e be were omẹ nọ Stẹfanas+ gbe Fọtunatọs gbe Akaikọs a rrọ kugbe omẹ, keme a ru eware nọ wha hai ru o hae jọ nọ wha rrọ etenẹ. 18 A sasa omẹ oma jẹ sasa owhai oma. Fikiere, wha rri ezae itieye na ghaghae.

19 Ikoko nọ e rrọ Esia a bi yere owhai. Akwila avọ Priska gbe ukoko nọ o rrọ uwou rai+ a yere owhai ziezi evaọ Olori na. 20 Inievo na kpobi a yere owhai. Wha rọ ẹviọlọ ọrẹri yere ohwohwo.

21 Mẹ Pọl, mẹ be rọ obọ mẹ kere eme uyere nana ro se owhai.

22 Otẹrọnọ ohwo jọ o you Olori na ha, jọ ọ jọ ọnọ a bọwo ehao. O Olori mai, nyaze! 23 Jọ Olori na Jesu o dhesẹ uwowou ulogbo riẹ kẹ owhai. 24 Me you owhai kpobi nọ e rrọ usu kugbe Kristi Jesu.