Orọ Avọ Ivẹ Ro Se Ahwo Tẹsalonika

3 Orọ urere, inievo, wha hae lẹ roro omai,+ re ẹme Jihova* o gbe do ruọ oria kpobi vẹrẹ vẹrẹ,+ re a jẹ jẹe rehọ avọ ọghọ nwane wọhọ epanọ o rrọ evaọ udevie rai na, 2 re a je siwi omai no obọ ahwo omuomu nọ a rẹ wha enwoma se amọfa,+ keme ẹrọwọ yọ oware nọ ahwo kpobi a wo ho.+ 3 Rekọ Olori na o re ru ẹme riẹ gba, yọ ọ te kẹ owhai ẹgba jẹ thọ owhai no obọ omuomu na. 4 Ofariẹ, ma fievahọ owhai evaọ Olori na inọ wha bi ru eware nọ ma ta yọ wha ti gbe ru ere. 5 Jọ Olori na ọ gbẹ hae kpọ udu rai gbẹsinẹdẹ re wha you Ọghẹnẹ+ je wo ithihakọ+ nọ wha rẹ rọ ruabọhọ lele Kristi.

6 Inievo, ma be kẹ owhai ohrẹ evaọ odẹ Olori mai Jesu Kristi, inọ wha siomano oniọvo kpobi nọ ọ be nya kpatiẹ hẹ,+ nọ o bi ru eware nọ i wo ohẹriẹ no enọ ma wuhrẹ owhai.*+ 7 Whai omarai wha riẹ epanọ u fo nọ wha re ru re wha rọ aro kele omai,+ keme ma dhesẹ uruemu nọ o rrọ kpatiẹ hẹ evaọ udevie rai hi, 8 yọ ma re emu ohwo ọvo ọvọvẹ hẹ.*+ Ukpoye, ma je ru iruo egaga avọ omolahiẹ te aso te uvo re ma gbẹ wọ owha ogbẹgbẹdẹ họ owhai ọvuọvo uzou hu.+ 9 Orọnikọ ma wo udu nọ ma sai ro ru ere he he,+ rekọ ma gwọlọ jọ oriruo kẹ owhai nọ wha rẹ rọ aro kele.+ 10 Evaọ uzẹme, okenọ ma jọ kugbe owhai, ma jẹ hae kẹ owhai ujaje nana inọ: “Otẹrọnọ ohwo jọ ọ gwọlọ ru iruo ho, wha kẹe emu re gbe he.”+ 11 Keme ma bi yo nọ ejọ evaọ udevie rai a be nya* kpatiẹ hẹ,+ a bi ru iruo vievie he rekọ a bi dhomahọ eware nọ i te rai hi.+ 12 Ma be rọ odẹ Olori na Jesu Kristi ta kẹ ahwo otiọye na jẹ be tuduhọ ae awọ nọ a ru iruo rai dhedhẹ jẹ re emu nọ a rọ obọ rai ru iruo kẹ.+

13 Rọkẹ owhai, inievo, wha jọ oware uwoma uruo o bẹ owhai no ho. 14 Rekọ otẹrọnọ ohwo jọ o bi ru lele eme mai hi enọ ma jọ ileta nana ta na, wha kpe oka họ ohwo nana je bru usu noi,+ re oma o vuọ ẹe. 15 Ghele na wha rehọ iẹe wọhọ ọwegrẹ hẹ rekọ wha gbẹ hae kẹe ohrẹ+ wọhọ oniọvo.

16 Jọ Olori udhedhẹ na ọ kẹ owhai udhedhẹ kẹse kẹse evaọ edhere kpobi.+ Jọ Olori na ọ jọ kugbe owhai kpobi.

17 Mẹ Pọl, mẹ be rọ obọ mẹ kere eme uyere nana ro se owhai,+ onọ o rrọ oka evaọ ileta mẹ kpobi; enẹ me re kere.

18 Jọ Olori mai Jesu Kristi o dhesẹ uwowou ulogbo riẹ kẹ owhai kpobi.