Orọ Ọsosuọ Ro Se Ahwo Kọrint

11 Wha rọ aro kele omẹ, wọhọ epanọ mẹ be rọ aro kele Kristi na.+

2 Me bi jiri owhai keme evaọ eware kpobi wha be kareghẹhọ omẹ yọ wha bi ru lele eware na nwane wọhọ epanọ me wuhrẹ owhai. 3 Rekọ mẹ gwọlọ nọ wha riẹ inọ ọnọ o wuzou ọzae kpobi họ Kristi;+ yọ ọnọ o wuzou aye họ ọzae;+ yọ ọnọ o wuzou Kristi họ Ọghẹnẹ.+ 4 Ọzae kpobi nọ ọ be lẹ hayo ruẹaro avọ oware nọ o ro ruru uzou ọ be wha omovuọ se uzou riẹ;* 5 rekọ aye kpobi nọ ọ be lẹ hayo ruẹaro+ nọ o ruru uzou riẹ hẹ ọ be wha omovuọ se uzou riẹ,* keme oyena o wọhọ ẹsenọ ọ rrọ aye nọ a fọrọ uzou riẹ muotọ. 6 Keme otẹrọnọ aye o re ruru uzou riẹ hẹ, jọ ọ nware eto riẹ no; rekọ otẹrọnọ o rrọ oware omovuọ re aye ọ nware eto riẹ no hayo fọrọ eto riẹ muotọ, jọ o ruru uzou riẹ.

7 Ọzae o re ruru uzou riẹ hẹ, keme uwoho+ gbe oruaro Ọghẹnẹ ọ rrọ, rekọ aye yọ oruaro ọzae. 8 Keme orọnikọ a ma ọzae no oma aye ze he, rekọ a ma aye no oma ọzae ze.+ 9 Ofariẹ, orọnikọ a ma ọzae fiki aye he, rekọ a ma aye fiki ọzae.+ 10 Oyejabọ nọ u ro fo nọ aye o re wo oware jọ evaọ ehru uzou riẹ nọ o rẹ jọ oka inọ ọ rrọ otọ ohwo jọ,* fiki ikọ-odhiwu na.+

11 U te no ere no, evaọ Olori na aye o wo ohẹriẹ no ọzae he, yọ ọzae o wo ohẹriẹ no aye he. 12 Keme wọhọ epanọ a ma aye no oma ọzae ze+ na, ere ọvona re ọzae o re no oma aye ze; rekọ obọ Ọghẹnẹ eware kpobi i no ze.+ 13 Wha bruoziẹ na kẹ omarai: Kọ u kiehọ re aye ọ lẹ se Ọghẹnẹ avọ uzou riẹ nọ o ruru hu? 14 Kọ oghẹrẹ nọ a ma ohwo u gbe wuhrẹ owhẹ nọ o rrọ oware omovuọ nọ ọzae o te wo eto ithethei, 15 rekọ aye o te wo eto ithethei yọ oruaro rọ kẹe? Keme a kẹ riẹ eto viukpọ oware nọ o re ro ruru uzou. 16 Rekọ, otẹrọnọ ohwo jọ ọ gwọlọ si ikẹ inọ uruemu ofa jọ o mai fo, ma wo ofa ha, yọ ikoko Ọghẹnẹ a wo ofa gbe he.

17 Rekọ nọ mẹ be kẹ owhai ehrẹ nana, me bi jiri owhai hi, keme eyoma o bi no omakugbe rai ze, orọnikọ ewoma ha. 18 Keme orọ ọsosuọ kpobi, me bi yo nọ evaọ okenọ wha te kokohọ evaọ ukoko rai, ohẹriẹ o be jọ udevie rai; yọ mẹ rọwo nọ uzẹme o rrọ ẹme na. 19 Keme itu sa-sa e te siọ udevie rai ba ẹjọ họ,+ re a rọ enẹ riẹ owhai otu nọ Ọghẹnẹ ọ jẹrehọ.

20 Nọ wha te kokohọ oria ovo, orọnọ re wha ginẹ re Emu Owọwọ Olori na+ ha. 21 Keme nọ wha tẹ be re iẹe, omomọvo ọ be re ọvuọ emu owọwọ riẹ tao, fikiere nọ ohọo u bi kpe ọjọ yọ idi i bi mu ọfa. 22 Kọ wha wo iwou nọ wha rẹ jọ re jẹ da? Hayo kọ wha bi rri ukoko Ọghẹnẹ vo je bi ru enọ i wo ho oma vo? Eme mẹ rẹ ta kẹ owhai? Kọ me re jiri owhai? Evaọ onana, me bi jiri owhai hi.

23 Keme onọ me wo no obọ Olori na ze oye me wuhrẹ owhai, inọ Olori na Jesu evaọ aso+ nọ a bi ti ro vivie iei ọ rehọ ebrẹdi, 24 nọ ọ lẹ yere Ọghẹnẹ no, o te bru ei ọ tẹ ta nọ: “Onana u dikihẹ kẹ ugboma mẹ,+ onọ me ti siobọno fiki rai. Wha hai ru onana rọ kareghẹhọ omẹ.”+ 25 Epọvo na o ru kpahe egho na+ re nọ a re emu owọwọ* na no, ọ ta nọ: “Egho nana o dikihẹ kẹ ọvọ ọkpokpọ na+ ẹkwoma azẹ mẹ.+ Oke kpobi nọ wha tẹ be dae, wha hai ru onana rọ kareghẹhọ omẹ.”+ 26 Keme oke kpobi nọ wha be re ebrẹdi nana jẹ da egho nana, yọ wha bi whowho uwhu Olori na, bẹsenọ ọ rẹ nyaze.

27 Fikiere ohwo kpobi nọ o te he nọ ọ re ebrẹdi na jẹ da egho Olori na, ọ te reabe kpahe ugboma gbe azẹ Olori na. 28 Jọ ohwo ọ kake kiẹ omariẹ riwi, nọ ọ jẹ ruẹ nọ o te,+ ẹsiẹe ọvo ọ rẹ re ebrẹdi na jẹ da egho udi na. 29 Keme ohwo nọ ọ re jẹ da nọ o vuhu ugboma na mu hu ọ re jẹ da ẹdhoguo fihọ uzou. 30 Oyejabọ nọ ibuobu evaọ udevie rai a gbẹ rọ ga ha jẹ be mọ na, yọ ibuobu i whu no.*+ 31 Rekọ ma tẹ kiẹ omamai riwi ziezi, a ti gu omai ẹdhọ họ. 32 Rekọ nọ a te gu omai ẹdhọ, yọ Jihova* ọ be whọku omai na,+ re a gbe brukpe omai kugbe akpọ na ha.+ 33 Fikiere, inievo mẹ, nọ wha te kokohọ re wha re iẹe, wha hẹrẹ ohwohwo. 34 Ohọo u te bi kpe ohwo jọ, jọ ọ jọ obọ uwou riẹ re emu, re nọ wha te kokohọ wha gbẹ wha ẹdhoguo se omarai hi.+ Rekọ kpahe eme nọ i kiọkọ, mẹ te kpọ ae vi nọ mẹ tẹ nyaze.